ကပစ စက်ရုံ

October 2, 2021

မင်းလှမြို့နယ်တွင် ကပစ စက်ရုံ ၂ ရုံမှ ဝန်ထမ်း ၅ ဦး အပါအဝင် ကိုဗစ်အတည်ပြုလူနာ ၂၀ ဦး တွေ့ရှိ

မကွေးတိုင်းဒေသကြီး၊ မင်းလှမြို့နယ်မှာ အောက်တိုဘာ ၁ ရက်နေ့က အကြမ်းဖက်စစ်ကောင်စီရဲ့ စစ်လက်နက်ပစ္စည်းတွေ ထုတ်လုပ်ပေးတဲ့ ကပစ စက်ရုံ ၂ ရုံက ဝန်ထမ်းမိသားစုဝင် ၅ ယောက် အပါအဝင် ကိုဗစ်အတည်ပြုလူနာ ၂၀ ထပ်မံတွေ့ရှိခဲ့တယ်လို့ ပရဟိတအဖွဲ့တွေဆီကနေ သိရပါတယ်။

မင်းလှမြို့နယ် ပြည်သူ့ကျန်းမာရေးဌာနမှာ မနေ့က နေ့လယ်ပိုင်းမှာ ကိုဗစ်-၁၉ သံသယလူနာတွေနဲ့ နေရပ်ပြန်လာသူ ၂၄၈ ယောက်ကို RDT Test Kits နဲ့ စစ်ဆေးရာ အမျိုးသား ၈ ယောက်နဲ့ အမျိုးသမီး ၁၂ ယောက်မှာ ကိုဗစ်-၁၉ ရောဂါပိုးတွေ့ရှိခဲ့တာလို့ ပရဟိတအဖွဲ့ဝင် တစ်ယောက်က DVB ကို ပြောပါတယ်။

အဲဒီပိုးတွေ့တဲ့အထဲမှာ အကြမ်းဖက်စစ်အုပ်စုရဲ့ စစ်လက်နက်ပစ္စည်းတွေ ထုတ်လုပ်ပေးတဲ့ စက်ရုံတွေဖြစ်တဲ့ ကပစ (၁၀) က အမျိုးသား ၂ ယောက်၊ အမျိုးသမီးတစ်ယောက်နဲ့ ကပစ (၁၇) က အမျိုးသမီး ၂ ယောက်မှာ ကိုဗစ်ရောဂါပိုး တွေ့ရှိခဲ့တယ်လို့ ဆိုပါတယ်။

ကိုဗစ်ရောဂါပိုးတွေ့တဲ့ လူနာတွေကို ကပစ စက်ရုံနှစ်ခုက ကိုဗစ်စင်တာတွေနဲ့ လင်းကယ်၊ ရေနံမ၊ လက်ပံတံခါး တိုက်နယ်ဆေးရုံတွေနဲ့ ညောင်ဝိုင်းကျေးရွာ ကိုဗစ်စင်တာတွေမှာ ဆေးကုသပေးနေတယ်လို့ ပြောပါတယ်။

မင်းလှမြို့နယ်ထဲမှာ အောက်တိုဘာ ၁ ရက်နေ့အထိ ကိုဗစ်-၁၉ အတည်ပြုလူနာ ၂၅၂၉ ဦး တွေ့ရှိခဲ့ပြီးတော့ သေဆုံးတဲ့သူ ၆၇ ယောက်ရှိတယ်လို့ ကျန်းမာရေးဌာနရဲ့ ထုတ်ပြန်ချက်တွေအရ သိရပါတယ်။

2 months Ago

August 3, 2021

မင်းလှတွင် ကပစ စက်ရုံ ၃ ရုံက ၂၁ ဦးအပါအဝင် ကိုဗစ်လူနာ ၈၄ ဦးတွေ့ရှိ

မကွေးတိုင်းဒေသကြီး မင်းလှမြို့နယ်မှာ သြဂုတ်လ ၂ ရက်နေ့က ကာကွယ်ရေးနဲ့စစ်လက်နက်ပစ္စည်းထုတ်လုပ်ရေးစက်ရုံ (ကပစ) ၃ ခုက ၂၁ ယောက်အပါအဝင် ကိုဗစ်-၁၉ အတည်ပြုလူနာ ၈၄ ယောက်တွေ့ရှိခဲ့တယ်လို့ ပရဟိတအဖွဲ့တွေဆီကနေ သိရပါတယ်။

မင်းလှမြို့နယ် ကျန်းမာရေးဌာနမှာ ကိုဗစ်ရောဂါပိုးရှိသူတွေနဲ့ ထိစပ်သံသယလူနာတွေနဲ့ အခြားမြို့နယ်တွေက ပြန်လာသူ ၂၄၀ ယောက်ကို RDT Test Kit နဲ့စစ်ဆေးခဲ့ရာ ကိုရင်တစ်ပါးအပါအဝင်၊ အမျိုးသား ၄၁ ယောက်နဲ့ အမျိုးသမီး ၄၃ ယောက်တို့မှာ ကိုဗစ်-၁၉ ရောဂါပိုး တွေ့ရှိခဲ့တာလို့ ပရဟိတ အဖွဲ့ဝင်တစ်ယောက်က ပြောပါတယ်။

ကိုဗစ်-၁၉ ကူးစက်ခံရတဲ့ လူနာတွေကို မြို့နယ်ဆေးရုံ၊ တိုက်နယ်ဆေးရုံနဲ့ ကုသရေးစင်တာတွေကို ပို့ဆောင် ကုသပေးနေတယ်လို့ ဆိုပါတယ်။

စစ်ကောင်စီရဲ့ ကာကွယ်ရေးနဲ့ စစ်လက်နက်ပစ္စည်းထုတ်လုပ်ရေး စက်ရုံတွေဖြစ်တဲ့ ကပစ (၂) က ၉ ယောက်၊ ကပစ (၁၀) က ၉ ယောက်နဲ့ ကပစ (၁၇) က ၃ ယောက် စုစုပေါင်း ၂၁ ဦးကိုတော့ အဲဒီစက်ရုံတွေက ကိုဗစ်စင်တာတွေမှာ ကုသပေးနေတယ်လို့ သိရပါတယ်။

မင်းလှမြို့နယ်ထဲမှာ သြဂုတ် ၂ ရက်နေ့အထိ ကိုဗစ်ရောဂါကူးစက်ခံရသူ ၁,၂၁၅ ယောက်နဲ့ သေဆုံးသူ ၂၅ ယောက်ရှိပြီး ၈၀၂ ယောက်ကတော့ ကျန်းမာရေးပြန်လည်ကောင်းမွန်လာလို့ ဆေးရုံကနေ ဆင်းခွင့်ရရှိပြီလို့ သိရပါတယ်။

4 months Ago
Up