ကန်ဒေါ်လာ

November 23, 2021

NUG အထူးငွေတိုက်စာချုပ် စတင်ရောင်းချသည့်တရက်တည်း ကန်ဒေါ်လာ ၆ ဒသမ ၃ သန်းကျော်ဖိုး ရောင်းချရ

အမျိုးသားညီညွတ်ရေးအစိုးရ NUG က အထူးငွေတိုက်စာချုပ်တွေကို နိုဝင်ဘာလ ၂၂ ရက်နေ့မှာ စတင်ရောင်းချခဲ့ရာမှာ  မနေ့က ည ၁၂ နာရီအချိန်ထိ အမေရိကန်ဒေါ်လာ ၆ ဒသမ ၃ သန်းကျော် ရောင်းချပြီးဖြစ်တယ်လို့သိရပါတယ်။

အထူးငွေတိုက်စာချုပ် စတင်ရောင်းချပြီး ၂ နာရီအတွင်းမှာတင် အမေရိကန်ဒေါ်လာ ၂ သန်းဖိုးရောင်းချခဲ့ရတယ်လို့ အမျိုးသားညီညွတ်ရေးအစိုးရ စီမံကိန်းဘဏ္ဍာရေးနှင့် ရင်းနှီးမြှပ်နှံမှုဝန်ကြီးဌာန ဒုတိယဝန်ကြီး ဦးမင်းဇေယျာဦးက ဒီဗွီဘီ ကိုပြောပါတယ်။

NUGက နွေဦးတော်လှန်ရေး အထူးငွေတိုက်စာချုပ်တွေကို https://www.unitedbonds-nug.org/  ဝက်ဘ်ဆိုက်ကတဆင့် ရောင်းချနေတာဖြစ်ပြီး  ဝယ်ယူသူတွေရဲ့ ကိုယ်ရေးအချက်အလက်တွေကို   အထူးလုံခြုံတဲ့ နည်းပညာနဲ့ အာမခံချက်ပေးထားတာကြောင့် စိုးရိမ်မှုမရှိဘဲ  ယုံယုံကြည်ကြည် ပူးပေါင်းဆောင်ရွက်ကြဖို့ တိုက်တွန်းထားပါတယ်။

ဒါ့အပြင် ဘဏ်ငွေလွှဲစနစ်ကိုလည်း အတတ်နိုင်ဆုံး၊ အစွမ်းကုန် ကြိုးစားပြင်ဆင်ပေးထားတဲ့ အတွက် စိတ်ချလုံခြုံစွာ ငွေလွှဲပြောင်းပေးပို့နိုင်တဲ့အပြင် ဝယ်ယူသူ မူလပိုင်ရှင်အပြင် ဆက်ခံသူတစ်စုံတစ်ဦးကိုလည်း အမည်/တော်စပ်ပုံ ဖြည့်သွင်းဆောင်ရွက်ခြင်းနဲ့ စိတ်ချ လုံခြုံမှုကို အပြည့်အဝဆောင်ရွက်နိုင်မှာဖြစ်တယ်လို့ ဆိုပါတယ်။

ငွေတိုက်စာချုပ်တွေကို အမေရိကန်ဒေါ်လာ ၁၀၀၊ ၅၀၀၊ ၁၀၀၀၊ ၅၀၀၀ တန်အမျိုးအစား ၄ မျိုးနဲ့ အတိုးမဲ့ ထုတ်ဝေရောင်းချသွားမယ်လို့ ကြေညာထားပြီး တစ်ဦးချင်း၊ တစ်ယောက်ချင်း စိတ်ကြိုက် ဝယ်ယူနိုင်တဲ့အပြင် အစုအဖွဲ့လိုက် စုပေါင်းစပ်ပေါင်းလည်း ဝယ်ယူနိုင်မယ်လို့ ဆိုပါတယ်။

စာချုပ်သက်တမ်းကိုတော့ ၂ နှစ်သတ်မှတ်ထားကာ သက်တမ်းစေ့ရောက်တဲ့အချိန်မတိုင်ခင်မှာ တဆင့်ပြန်လည်လွှဲပြောင်း၊ ရောင်းချ၊ ဝယ်ယူခွင့်ပြုမှာမဟုတ်ဘဲ သက်တမ်းစေ့ပြီးနောက်မှသာ သတ်မှတ်စည်းမျဉ်းစည်းကမ်းတွေနဲ့အညီ ဆောင်ရွက်ပိုင်ခွင့်ရှိမှာ ဖြစ်ပါတယ်။

အခုလို အထူးငွေတိုက်စာချုပ်တွေကို တော်လှန်ရေးအစိုးရတရပ်က အတိုးမဲ့ ထုတ်ဝေ ရောင်းချတာဟာ ကမ္ဘာ့သမိုင်းမှာတော့ ပထမဆုံးအကြိမ် ဖြစ်လာခဲ့ပြီး ဖက်ဒရယ်ဒီမိုကရေစီ စနစ်ကို လိုလားတဲ့ မြန်မာပြည်သူတွေက စစ်အာဏာရှင်ကို အဆုံးစွန် ဆန့်ကျင် အာခံတော်လှန်ခဲ့တဲ့ သမိုင်းမော်ကွန်းအဖြစ် ခမ်းနားစွာထင်ရှား ကျန်ရစ်ခဲ့မှာဖြစ်တယ်လို့ ဆိုပါတယ်။

အသေးစိတ်သိလိုတာတွေရှိရင်လည်း အီးမေးလ်လိပ်စာ [email protected] ဆီ ဆက်သွယ်မေးမြန်းနိုင်တယ်လို့ ထုတ်ပြန်ထားပါတယ်။

2 months Ago

November 17, 2021

NUG က ထုတ်ဝေသည့် အထူးငွေတိုက်စာချုပ်များ ကန်ဒေါ်လာ ၁၀၀ မှစတင်ဝယ်ယူနိုင်

အမျိုးသားညီညွတ်ရေးအစိုးရ(NUG)က နွေဦးတော်လှန်ရေး အထူးငွေတိုက်စာချုပ်တွေကို လာမယ့် နိုဝင်ဘာ ၂၂ ရက်မှာ စတင်ထုတ်ဝေရောင်းချသွားမယ်လို့ ထုတ်ပြန်ကြေညာထားပြီး အမေရိ ကန်ဒေါ်လာ ၁၀၀ တန်ကနေ စတင်ဝယ်ယူနိုင်မှာ ဖြစ်ပါတယ်။

NUG အစိုးရ၊ စီမံကိန်း၊ ဘဏ္ဍာရေးနှင့် ရင်းနှီးမြုပ်နှံမှုဝန်ကြီးဌာန ဝန်ကြီး ဦးတင်ထွန်းနိုင်က လက်မှတ်ရေးထိုးထုတ်ပြန်လိုက်တဲ့ အဆိုပါ ကြေညာချက်မှာတော့ ငွေတိုက်စာချုပ် တွေကို အမေရိကန်ဒေါ်လာ ၁၀၀၊ ၅၀၀၊ ၁၀၀၀၊ ၅၀၀၀ တန်အမျိုးအစား ၄ မျိုးနဲ့ အတိုးမဲ့ ထုတ်ဝေရောင်းချသွားမယ်လို့ ဆိုပါတယ်။

ငွေတိုက်စာချုပ်တွေရဲ့ သက်တမ်းကိုတော့ ၂ နှစ်သတ်မှတ်ထားပြီး သက်တမ်းစေ့ရောက် တဲ့ အချိန်မတိုင်ခင်မှာ တဆင့်ပြန်လည်လွှဲပြောင်း၊ ရောင်းချ၊ ဝယ်ယူခွင့်ပြုမှာမဟုတ်ဘဲ သက်တမ်းစေ့ပြီးနောက်မှသာ သတ်မှတ်စည်းမျဉ်းစည်းကမ်းတွေနဲ့အညီ ဆောင်ရွက်ပိုင်ခွင့်ရှိမှာ ဖြစ်ပါတယ်။

သက်တမ်းစေ့ရောက်လို့ ပြန်လည်ရွေးနုတ်တဲ့အခါမှာလည်း ဝယ်ယူချိန်က အသုံးပြုထား တဲ့ နာမည်နဲ့ သက်သေခံကတ်ပြားအမှတ်တွေကို မှန်ကန်ကိုက်ညီကြောင်း အထောက်အ ထားတင်ပြနိုင်သူကိုသာ ပြန်လည်ရွေးနုတ်ခွင့်ပြုမယ်လို့ ဆိုပါတယ်။

အခုလို အထူးငွေတိုက်စာချုပ်တွေကို တော်လှန်ရေးအစိုးရတရပ်က အတိုးမဲ့ ထုတ်ဝေ ရောင်းချတာဟာ ကမ္ဘာ့သမိုင်းမှာတော့ ပထမဆုံးအကြိမ်ဖြစ်လာခဲ့ပြီး ဖက်ဒရယ်ဒီမိုကရေ စီစနစ်ကို လိုလားတဲ့ မြန်မာပြည်သူတွေက စစ်အာဏာရှင်ကို အဆုံးစွန် ဆန့်ကျင်အာခံ တော်လှန်ခဲ့တဲ့ သမိုင်းမော်ကွန်းအဖြစ် ခမ်းနားစွာထင်ရှား ကျန်ရစ်ခဲ့မှာဖြစ်တယ်လို့ ဆိုပါတယ်။

ဒါကြောင့်မို့ မြန်မာ့မြေပေါ်ကနေ စစ်အာဏာရှင်စနစ် အပြီးတိုင် ပျောက်ကွယ်ချုပ်ငြိမ်း သွားစေရေးကို ပြင်းပြတဲ့ဆန္ဒနဲ့ လိုလားတောင့်တကြသူတိုင်း နွေဦးတော်လှန်ရေး အထူး ငွေတိုက်စာချုပ်တွေကို တော်လှန်ရေး အောင်စိတ်နဲ့ မဖြစ်မနေ ဝယ်ယူကြဖို့လည်း  မေတ္တာရပ်ခံတိုက်တွန်းထားပါတယ်။

2 months Ago
More News
Up