ကန်ကြီးထောင့်မြို့နယ်

October 13, 2021

ကန်ကြီးထောင့်မြို့နယ်က စစ်အုပ်စုပိုင် မိုင်တဲလ်တာဝါတိုင် မိုင်းခွဲခံရ

ဧရာဝတီတိုင်း၊ ကန်ကြီးထောင့်မြို့နယ်မှာ အောက်တိုဘာ ၁၂ ရက်နေ့ ညပိုင်းက အာဏာသိမ်းစစ်အုပ်စုပိုင် မိုင်တဲလ်တာဝါတိုင် မိုင်းခွဲဖျက်ဆီးခံခဲ့ရတယ်လို့ သိရပါတယ်။

ရှမ်းရွာတံတားအဆင်း အညာစုရွာထိပ်မှာရှိတဲ့ စစ်အုပ်စုပိုင် မိုင်တဲလ်တာဝါတိုင်ကို ည ၇ နာရီခွဲလောက်က မိုင်းခွဲဖျက်ဆီးခဲ့တာလို့ ပုသိမ်မြို့ပြပြောက်ကျားအဖွဲ့ကထုတ်ပြန်ခဲ့ပါတယ်။

“စစ်ကောင်စီကို အထောက်အပံ့ပေးနေတဲ့ အရာတွေကို မိုင်းခွဲဖျက်ဆီးတာပါ။ ရှေ့ဆက်လည်း ဆက်လုပ်သွားမှာပါ။ ခုမိုင်းခွဲတာကိုတော့ ပုသိမ်မြို့ပြပြောက်ကျားတပ်ဖွဲ့နဲ့ ဧရိယာ ၁၄ အဖွဲ့ပေါင်းလုပ်တာပါ” လို့ ပုသိမ်မြို့ပြပြောက်ကျားအဖွဲ့ဝင်တဦးက ပြောပါတယ်။

စစ်အုပ်စုပိုင်မိုင်တဲလ်တာဝါတိုင် မိုင်းခွဲဖျက်ဆီးတာကို ဒေသခံပြည်သူတွေ ထိခိုက်မှုမရှိအောင် ပြုလုပ်နိုင်ခဲ့တယ်လို့ ဆိုပါတယ်။

မိုင်းပေါက်ကွဲပြီး မိနစ်ပိုင်းအကြာမှာတော့ အာဏာသိမ်းစစ်ကောင်စီရဲ့ တပ်သားတွေ ရောက်ရှိလာပြီး အနီးပတ်ဝန်းကျင်ကို ဆဲဆိုကြိမ်းမောင်းတာတွေ ပြုလုပ်သွားတယ်လို့ သိရပါတယ်။

ဧရာဝတီတိုင်းမှာ စစ်အုပ်စုပိုင် မိုင်တဲလ်တာဝါတိုင် မိုင်းခွဲဖျက်ဆီးခံရတာ ၆ ကြိမ်ထိ ရှိလာပြီလို့ မြို့ပြပြောက်ကျားတပ်ဖွဲ့ရဲ့ မှတ်တမ်းတွေအရ သိရပါတယ်။

2 months Ago

September 22, 2021

ကန်ကြီးထောင့်မြို့နယ်၌ မြို့ပြပြောက်ကျားစခန်းငယ်ကို စစ်တပ်ဝင်ရောက်စီးနင်း

ဧရာဝတီတိုင်း၊ ကန်ကြီးထောင့်မြို့နယ်မှာ စက်တင်ဘာလ ၂၁ ရက် ညပိုင်းက မြို့ပြပြောက်ကျား တော်လှန်ရေးတပ်ဖွဲ့ရဲ့ စခန်းငယ် တစ်ခုကို စစ်တပ်က လာရောက်ပစ်ခတ်ခဲ့တယ်လို့ သိရပါတယ်။

မဂူကျွန်းကျေးရွာအနောက်ဘက် တောထဲမှာ စခန်းချထားတဲ့ မြို့ပြပြောက်ကျား တော်လှန်ရေးတပ်ဖွဲ့ဝင်တွေကို ည ၈ နာရီကျော်လောက်မှာ ပိတ်ဆို့ပစ်ခတ်ခဲ့တာလို့ မြို့ပြပြောက်ကျားတပ်ဖွဲ့ရဲ့ တာဝန်ရှိသူ တဦးက ဒီဗွီဘီကိုပြောပါတယ်။

" စစ်တပ်က အင်အား ၃၀ လောက်နဲ့ လာဝိုင်းပစ်တာ ကျနော်တို့ ဘက်ကတော့ ပြန်မပစ်ဘူး၊ မိုင်း ၂ လုံးခွဲလိုက်တယ်။ တပ်ကူတွေလွှတ်ပြီး ဖောက်ထွက်နိုင်ခဲ့တယ်''လို့ ပြောပါတယ်။

စစ်တပ်ကလာဝိုင်းတဲ့အချိန်မှာ မိုင်း ၂ လုံးခြောက်လှန့်ဖောက်ခွဲခဲ့ပြီးနောက်  တပ်ကူတွေရောက်လို့ ထွက်ဖို့ပြင်ချိန်မှာ စစ်တပ်ဘက်က သေနတ်နဲ့ နောက်က လိုက်လံပစ်ခတ်ခဲ့ပေတယ်လို့လည်း ဆိုပါတယ်။ ပစ်ခတ်တိုက်ခိုက်မှုတွေကြားမှာ ပြောက်ကျားတပ်တွေ အထိခိုက်မရှိဖောက်ထွက်နိုင်ခဲ့ တယ်လို့ သိရပါတယ်။

ကန်ကြီးထောင့်မြို့နယ်ထဲမှာ မြို့ပြပြောက်ကျားတပ်ဖွဲ့စခန်းကို စစ်ကောင်စီတပ်ကပ လာဝိုင်းပြီးပစ်ခတ်တိုက်ခိုက်တာ  ပထမဆုံးအကြိမ်လည်းဖြစ်ပါတယ်။

2 months Ago
More News
Up