ကန်ကျနပူရီ

September 28, 2022

ထိုင်းနိုင်ငံ၊ ကန်ကျနပူရီတွင် တရားမဝင် ဝင်ရောက်လာသည့် မြန်မာ ၉၅ ဦး ဖမ်းဆီးခံရ

ထိုင်းနိုင်ငံအနောက်မြောက်ပိုင်း၊ ကန်ကျနပူရီခရိုင်ထဲမှာ စက်တင်ဘာ ၂၈ ရက် ဒီကနေ့မနက်က တရားမဝင် ဝင်ရောက်လာတဲ့ မြန်မာနိုင်ငံသား ၉၅ ယောက် ဖမ်းဆီးခံရတယ်လို့ ကန်ကျနပူရီ ဒေသတွင်းသတင်းမှာ ဖော်ပြပါတယ်။

နယ်မြေထဲမှာ တရားမဝင် ဝင်ရောက်မှုတွေ ရှိမယ်ဆိုတဲ့အကြောင်း ကြိုတင် သတင်းရထားချက်အရ စစ်တပ်၊ ရဲ၊ အုပ်ချုပ်ရေး၊ ကျန်းမာရေးနဲ့ ရပ်ကျေးလုံခြုံရေး တပ်ဖွဲ့ဝင်တွေဟာ နယ်စပ်တလျှောက်မှာ စောင့်ကြပ်စစ်ဆေးနေခဲ့ကြောင်း၊ ဒီကနေ့ မနက်စောစောမှာတော့ ကန်ကျနပူရီနဲ့ ထောင်းဖာဖူးမြို့နယ် ၂ ခုထဲက ၂ နေရာမှာ တရားမဝင် မြန်မာ ၉၅ ယောက်ကို ဖမ်းဆီးရမိခဲ့တာလို့ ဆိုပါတယ်။

ကန်ကျနပူရီမြို့နယ် ဘန့်ကောင်ကျေးရွာအုပ်စု ဖူးနမ့်ရွန့်ကျေးရွာအနီးမှာ အမျိုးသား ၁၀ ယောက်၊ အမျိုးသမီး ၃ ယောက်၊ ပေါင်း ၁၃ ယောက်ကိုလည်းကောင်း၊ ထောင်းဖာဖူးမြို့နယ် ထာ့ခနွန်ကျေးရွာအုပ်စု ဘန့်ထာ့ဖဲကျေးရွာနားမှာ အမျိုးသား ၆၃ ယောက်၊ အမျိုးသမီး ၁၉ ‌ယောက် ပေါင်း ၈၂ ယောက် အပြင် လမ်းပြအမျိုးသား ၂ ‌ယောက်ပါ ဖမ်းဆီးရမိခဲ့တယ်လို့ တာဝန်ရှိသူတွေက ပြောပါတယ်။

စစ်ဆေးချက်အရ သူတို့တွေဟာ မြန်မာပြည် မော်လမြိုင်၊ ရန်ကုန်၊ ပဲခူးနဲ့ ရခိုင်ဒေသက လာကြပြီး ထိုင်းနိုင်ငံ စမွတ်စခွန်း၊ လယောင်း၊ ကန်ကျနပူရီနဲ့ ဘန်ကောက်မှာ အလုပ်သွားလုပ်ဖို့ ပွဲစားကို တဦး ဘတ် ၁၅,၀၀၀ မှ ၃၀,၀၀၀ ထိ ပေးခဲ့ရတယ်လို့ ဆိုပါတယ်။

တာဝန်ရှိသူတွေက သူတို့ကို ကိုဗစ်-၁၉ ကာကွယ်ရေးအရ အပူချိန်တိုင်းတာပြီး လဝက ဥပဒေနဲ့ အရေးယူဖို့ ကန်ကျနပူရီရဲစခန်းကို ပို့ဆောင်ထားတယ်လို့ သိရပါတယ်။

1 day Ago

September 21, 2022

ကန်ကျနပူရီတွင် တရားမဝင် မြန်မာ ၃၄ ဦး ဖမ်းဆီးခံရ

ထိုင်းအနောက်မြောက်ပိုင်း ကန်ကျနပူရီခရိုင်ထဲမှာ စက်တင်ဘာ ၂၀ ရက် ညက တရားမဝင် ဝင်ရောက်လာတဲ့ မြန်မာနိုင်ငံသား ၃၄ ယောက် ဖမ်းဆီးရမိတယ်လို့ ကန်ကျနပူရီ ဒေသတွင်းသတင်းမှာ ဖော်ပြပါတယ်။

နယ်မြေထဲ တရားမဝင်သူတွေ ဝင်ရောက်လာဖို့ရှိကြောင်း မနေ့ စက်တင်ဘာ ၂၀ ရက် ညနေ ၆ နာရီက ကြိုတင်သတင်းရထားတဲ့အတွက် အုပ်ချုပ်ရေးရုံး၊ နယ်ခြားစောင့်တပ်၊ ရဲတပ်ဖွဲ့၊ ကျေးရွာလုံခြုံရေးနဲ့ ကျန်းမာရေးဌာနက ပူးပေါင်းအဖွဲ့ဝင်တွေဟာ နယ်စပ်လမ်းကြောင်း တလျှောက် စောင့်ကြည့်စစ်ဆေးခဲ့ကြောင်း၊ ည ၉ နာရီလောက်မှာတော့ ကန်ကျနပူရီမြို့နယ် ဘန့်ကောင်အုပ်စု ဖူးနမ့်ရွန့်ကျေးရွာအနီး တောလမ်းမှာ တရားမဝင် ဝင်ရောက်လာတဲ့ မြန်မာနိုင်ငံသား အမျိုးသား ၁၉ ယောက်၊ အမျိုးသမီး ၁၅ ယောက်၊ ပေါင်း ၃၄ ယောက်ကို ဖမ်းဆီးရမိတာလို့ တာဝန်ရှိသူတွေက ပြောပါတယ်။

မေးမြန်းချက်အရ သူတို့တွေဟာ မော်လမြိုင်၊ ရန်ကုန်၊ ပဲခူး၊ ရခိုင် စတဲ့ဒေသတွေကနေ ရောက်လာပြီး ထိုင်းနိုင်ငံ စမွတ်စခွန်း၊ လယောင်း၊ ကန်ကျနပူရီနဲ့ ဘန်ကောက်မြို့တွေမှာ အလုပ်သွားလုပ်ဖို့ ပွဲစားကို ၁ ‌ေယာက် ဘတ် ၁၅,၀၀၀ မှ ၃၀,၀၀၀ ထိ ပေးခဲ့ရတယ်လို့ ဆိုပါတယ်။

တာဝန်ရှိသူတွေက သူတို့ကို ကိုဗစ်-၁၉ ကာကွယ်ရေး အပူချိန်တိုင်းတာပြီး လဝကဥပဒေနဲ့ ဆက်လက်အရေးယူဖို့ ကန်ကျနပူရီနယ်မြေရဲစခန်းကို ပို့ဆောင်ထားတယ်လို့ သတင်းမှာ ဖော်ပြပါတယ်။

 Source -

1 week Ago
More News
Up