ကန့်ကွက်

September 9, 2021

သံအမတ်ကြီး ဦးကျော်မိုးထွန်းကို ကြံ့ခိုင်ရေးပါတီအပါအဝင် မဟာမိတ် ၂၃ ပါတီက ကန့်ကွက်

သံအမတ်ကြီး ဦးကျော်မိုးထွန်းကို ကုလသမဂ္ဂရဲ့ မြန်မာနိုင်ငံဆိုင်ရာ အမြဲတမ်း ကိုယ်စားလှယ်အဖြစ် အမျိုးသားညီညွတ်ရေးအစိုးရက တင်သွင်းလျှောက်ထားတာကို ကြံ့ခိုင်ရေးပါတီနဲ့ မဟာမိတ်  ၂၃ ပါတီက  အပြင်းအထန်ကန့်ကွက်လိုက်ပါတယ်။

စက်တင်ဘာ ၁၄ ရက်နေ့မှာ စတင်ကျင်းပမယ့် ၇၆ ကြိမ်မြောက် ကမ္ဘာ့ကုလသမဂ္ဂ အထွေထွေ ညီလာခံအတွက် ဦးကျော်မိုးထွန်းကို မြန်မာနိုင်ငံကိုယ်စားလှယ်အဖြစ် တက်ရောက်နိုင်ဖို့ အရည်အချင်းစစ်ကော်မတီဆီကို အမည်စာရင်းတင်သွင်းထားတာပါ။

ပြီးခဲ့တဲ့ ရွေးကောက်ပွဲမှာ သုံးခဲ့တဲ့ မဲစာရင်းတွေဟာ ဆိုးဆိုးရွားရွားလွဲမှားနေပေမဲ့ အန်အယ်လ်ဒီအစိုးရက တာဝန်ယူမဖြေရှင်းဘဲ နိုင်ငံတော်ရဲ့ အချုပ်အခြာအာဏာကို အဓမ္မနည်းနဲ့ ရယူဖို့ ကြိုးစားလို့ ဖွဲ့စည်းပုံဥပဒေအရ နိုင်ငံတော်စီမံအုပ်ချုပ်ရေးကောင်စီက နိုင်ငံတော်အာဏာကို ထိန်းသိမ်းရယူခဲ့တယ်လို့  ကြံ့ခိုင်ရေးနဲ့ မဟာမိတ်တွေက  ဆိုပါတယ်။

ဒီတခါ သဘောထားထုတ်ပြန်ချက်မှာ ကြံ့ခိုင်ရေးပါတီအပါအဝင် ပါတီ ၂၃ ခု ပါဝင်ပြီး ၂၀၂၀ ရွေးကောက်ပွဲမှာ ကြံ့ခိုင်ရေးပါတီတခုကပဲ ကိုယ်စားလှယ်လောင်းနည်းနည်းအနိုင်ရခဲ့ပေမဲ့ ကျန်တဲ့ပါတီတွေကတော့ ကိုယ်စားလှယ် တယောက်မှ အနိုင်မရခဲ့ကြပါဘူး။

စစ်တပ်က အာဏာသိမ်းပြီးနောက်မှာ ပြည်သူ့လွှတ်တော်ကိုယ်စားပြုကော်မတီဖွဲ့စည်းပြီး အမျိုးသားညီညွတ်ရေးအစိုးရကို ဖွဲ့စည်းတာ၊ ဒီအဖွဲ့တွေက အကြမ်းဖက်လုပ်ရပ်တွေ လုပ်ဆောင်ဖို့ လှုံ့ဆော်တယ်လို့ မဲမနိုင်ပါတီတွေက စွပ်စွဲပြီး စစ်တပ်က ဒီအဖွဲ့တွေကို အကြမ်းဖက်အုပ်စုအဖြစ်သတ်မှတ်ကြေညာထားတယ်လို့လည်းဆိုပါတယ်။

ဒါ့အပြင် ကုလသမဂ္ဂအမြဲတမ်းကိုယ်စားလှယ် ဦးကျော်မိုးထွန်းကိုလည်း စစ်ကောင်စီက ရာထူးက ထုတ်ပြီး နိုင်ငံတော် သစ္စာဖောက်မှုနဲ့ တရားစွဲထားတယ်လို့ ဆိုပြီး အခုလို အမည်စာရင်း တင်သွင်းတဲ့အပေါ် ပြင်းပြင်းထန်ထန် ကန့်ကွက်တယ်လို့လည်း ဆိုပါတယ်။

မဲမနိုင်ပါတီတွေဟာ ဩဂုတ် ၄ ရက်နေ့ကလည်း မြန်မာနိုင်ငံဆိုင်ရာ Arria Formula အစည်းအဝေးမှာ ဦးကျော်မိုးထွန်းတက်ရောက်ဆွေးနွေးခဲ့တာကို ကန့်ကွက်ခဲ့ကြပါသေးတယ်။

အဲဒီတုန်းက ပါတီ ၂၈ ခုပါဝင်ပြီး ‘ဝ’ အမျိုးသားပါတီကလည်း လက်မှတ်ထိုးခဲ့ပေမဲ့ အဲဒီလို လက်မှတ်ထိုးတာဟာ ပါတီရဲ့ သဘောထားမဟုတ်တာကြောင့် လက်မှတ်ထိုးခဲ့သူ ဥက္ကဋ္ဌ လည်း နုတ်ထွက်သွားခဲ့ပြီး အခုတော့ ၂၃ ပါတီပဲ ပူးပေါင်း လက်မှတ်ထိုးထားကြပါတယ်။

3 weeks Ago

June 11, 2021

အကြမ်းဖက်စစ်အုပ်စုကို တရုတ်အစိုးရက အသိအမှတ်ပြုလိုက်သည့်အပေါ် ကန့်ကွက်ရှုတ်ချ

တရုတ်အစိုးရက အကြမ်းဖက်စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့  အာဏာသိမ်း စစ်ကောင်စီအကြမ်းဖက်အဖွဲ့ကို အသိအမှတ်ပြုလိုက်တဲ့ လုပ်ရပ်ကို အရပ်ဘက်အဖွဲ့အစည်း ၄၂၆ ဖွဲ့က ပြင်းထန်စွာ ပူးပေါင်း ပြစ်တင် ကန့်ကွက်ရှုတ်ချလိုက်ပါတယ်။

တရုတ်နိုင်ငံရဲ့ ဇွန်လ ၅ ရက် ထုတ်ပြန်ကြေညာချက်မှာ မင်းအောင်လှိုင်အား “မြန်မာ့ခေါင်းဆောင်”အဖြစ် ရည်ညွှန်းဖော်ပြတာ၊ စစ်ကောင်စီရဲ့ နိုင်ငံခြားရေးဝန်ကြီးကို တရုတ်-အာဆီယံ အထူးအစည်းအဝေးမှာ မြန်မာကိုယ်စားလှယ်အဖြစ်တက်ရောက်ဖို့ ဖိတ်ကြားတာနဲ့ စစ်ကောင်စီအား စီးပွားရေးဆိုင်ရာပံ့ပိုးပေးဖို့ အဆိုပြုတာစတဲ့ လုပ်ရပ်တွေဟာ မြန်မာ့ပြည်တွင်းရေးကို တရုတ်နိုင်ငံမှ အလွန်အကျွံ ဝင်ရောက်စွက်ဖက်တာဖြစ်ပြီး  ‌ဒေသတွင်းတည်ငြိမ်ရေးကိုလည်း ခြိမ်းခြောက်နေတယ်လို့ဆိုပါတယ်။

မြန်မာနိုင်ငံ၏ အမျိုးသားညီညွတ်ရေးအစိုးရက တရုတ်နိုင်ငံခြားရေးဝန်ကြီး ဝမ်ယီအား ဇွန်လ ၇ ရက်က  ပေးပို့လိုက်တဲ့စာမှာ ဖော်ပြထားသလို  မင်းအောင်လှိုင်ဟာ  တရားဝင်ခေါင်းဆောင်မဟုတ်၊ စစ်အာဏာသိမ်းမှု မအောင်မြင်လို့ လက်တွေ့အရ တရားဝင်မှု (de facto) အာဏာကို အကြမ်းဖက်နည်းလမ်းနဲ့ ရယူဖို့ကြိုးပမ်းခဲ့ပြီး ထောင်ချီတဲ့ မြန်မာပြည်သူတွေ အသက်ဆုံးရှုံးခဲ့ရကာ လူပေါင်း ၁၀၀,၀၀၀ ကျော် နေရပ်စွန့်ခွာထွက်ပြေးတိမ်းရှောင်နေကြတယ်လို့ ဆိုပါတယ်။

စစ်တပ်ကို ထောက်ခံတဲ့လုပ်ရပ်ဟာ မြန်မာပြည်သူတွေအပေါ် စစ်တပ်မှ စစ်ပွဲဆင်နွှဲဖို့ နေရာဖန်တီးပေးတာဖြစ်သလို စစ်တပ်နဲ့ တိုင်းရင်းသားလက်နက်ကိုင်တော်လှန်ရေးအဖွဲ့တွေ အကြား တိုက်ပွဲ ပိုမိုဖြစ်ပွားစေကာ ပြည်တွင်းစစ်မီးကို ပိုတောက်လောင်စေမှာဖြစ်တယ်လို့ သတိပေးထားပါတယ်။

တရုတ်နိုင်ငံရဲ့ အခုလုပ်ရပ်ကြောင့် ပြည်တွင်းမငြိမ်မသက်မှုတွေဟာ အာရှ တောင်ပိုင်းနဲ့ အရှေ့တောင်အာရှအထိ ပျံ့နှံ့နေပြီးဖြစ်တာကြောင့်  လူသားချင်းစာနာထောက်ထားမှုဆိုင်ရာ အကျပ်အတည်း ပိုမိုဆိုးရွားစေတာနဲ့ ရှိနှင့်ပြီးသား နယ်ခြားဖြတ်ကျော် ဒုစရိုက်လုပ်ငန်းတွေကိုလည်း  ပိုမိုအားကောင်းစေမယ်လို့ ဆိုပါတယ်။

ယခုအကျပ်အတည်းအား ဖြေရှင်းဖို့ တစ်ခုတည်းသောနည်းလမ်းကတော့  မြန်မာလူထုရဲ့ သဘောဆန္ဒအား လေးစားဖို့၊ ဒီမိုကရေစီအစိုးရအား ပြန်လည်ထူထောင်ပေးဖို့ဖြစ်ပြီး တရုတ်နိုင်ငံအနေနဲ့ မင်းအောင်လှိုင်အား အကြမ်းဖက်မှု ချက်ချင်းရပ်တန့်ဖို့၊ နိုင်ငံရေးအကျဉ်းသားအားလုံး လွှတ်ပေးစေဖို့နဲ့ နိုင်ငံ့အနာဂတ်အတွက် နိုင်ငံရေးဆွေးနွေးဝိုင်းမှာ ပါဝင်ကာ ရေရှည်တည်တံ့တဲ့ နည်းလမ်းရှာဖွေဖို့ တိုက်တွန်းသင့်တယ်လို့လည်း အရပ်ဖက်အဖွဲ့တွေရဲ့ ကြေညာချက်မှာ အကြံပြုထားပါတယ်။ 

4 months Ago
More News
Up