ကနီ PDF

September 29, 2021

ကနီမြို့နယ်တွင် စစ်ကောင်စီတပ်နှင့် PDF တပ်ဖွဲ့ တိုက်ပွဲ ၃ ကြိမ်ဖြစ်

စစ်ကိုင်းတိုင်း၊ ယင်းမာပင်ခရိုင်၊ ကနီမြို့နယ်၊ ချင်းတွင်းမြစ်ကြောင်းအတွင်းမှာ လက်နက်ခဲယမ်းတွေ၊ စားနပ်ရိက္ခာပစ္စည်းတွေ၊ အကြမ်းဖက်စစ်ကောင်စီ တပ်သားတွေ တင်ဆောင်လာတဲ့ အကြမ်းဖက် စစ်ရေယာဥ်အုပ်စုကို ကနီမြို့နယ် ပြည်သူ့ကာကွယ်ရေးတပ်ဖွဲ့က စက်တင်ဘာ ၂၉ ရက်နေ့မှာ ပစ်ခတ်တိုက်ခိုက်ခဲ့တယ်လို့ သိရပါတယ်။

ချင်းတွင်းမြစ်ရေကြောင်း ပွတ်လုံးပွတ်လန်တောင်ကွေ့ အနီးဝဲယာမှာ တိုက်ခိုက်မှု တစ်ကြိမ် စတင်ခဲ့ပြီး မျိုးချောင်းပေါက် ဆင်တော်ဝဲကွေ့မှာလည်း တစ်ကြိမ် ထပ်မံဖြစ်ပွားခဲ့ပါတယ်။ 

နောက်တစ်ကြိမ်မှာ မြွေပိုင်းတောင်အနီးမှာ တိုက်ခိုက်မှု တစ်ကြိမ်နဲ့ စုစုပေါင်း တိုက်ခိုက်မှု ၃ ကြိမ် ဖြစ်ပွားခဲ့တယ်လို့ ကနီ PDF က ထုတ်ပြန်ထားပါတယ်။

အဲဒီတိုက်ပွဲ ၃ ကြိမ်မှာ ကနီမြို့နယ် ပြည်သူ့ကာကွယ်ရေးတပ်ဖွဲ့မှ တော်လှန်ရေးရဲဘော် ၅ ဦးမှာ ထိခိုက်ဒဏ်ရာရ (မစိုးရိမ်ရ အခြေအနေ) ရှိခဲ့ပြီး ကျဆုံး၊ ပျောက်ဆုံး တော်လှန်ရေးရဲဘော်များ မရှိခဲ့ဘူးလို့ ဖော်ပြထားပါတယ်။

အကြမ်းဖက်စစ်ကောင်စီတပ်သားတွေ သေဆုံးဒဏ်ရာရရှိမှု စာရင်းကို အတိအကျ မသိရသေးပေမဲ့ ဒီနေ့တိုက်ပွဲမှာ ဆုံးရှုံးမှု အများဆုံးတိုက်ပွဲ ဖြစ်တယ်လို့ ထုတ်ပြန်ထားပါတယ်။

4 months Ago

September 13, 2021

ကနီ PDF ပူးပေါင်းအဖွဲ့နှင့် စစ်ကောင်စီတပ် တိုက်ပွဲဖြစ်

ကနီမြို့နယ် ဝင်မနားကျေးရွာမှာ ပြည်သူ့ကာကွယ်ရေးအဖွဲ့နဲ့ စစ်ကောင်စီတပ်တို့ တိုက်ပွဲနှစ်ကြိမ်ဖြစ်ပွားကာ စစ်တပ်က သုံဦးထက်မနည်းကျဆုံးကြောင်း ကနီ PDF-1 အဖွဲ့က ထုတ်ပြန်ပါတယ်။

စစ်ကိုင်းတိုင်း၊ ကနီမြို့နယ်၊ ဝင်မနားနယ်မြေခံရဲစခန်းကို ကနီ PDF-1 နဲ့ Myanmar Defence Force ပူးပေါင်းအဖွဲ့က စီးနင်းကာ ပြည်သူနဲ့အတူပူပေါင်းဖို့ ညှိနှိုင်းကမ်းလှမ်းမှုတွေ ပြုလုပ်ခဲ့ပေမယ့် လက်မခံတာကြောင့် နှစ်ဖက်တိုက်ပွဲဖြစ်ပွားခဲ့တာလို့ ဆိုပါတယ်။

စက်တင်ဘာ ၁၂ ရက်နေည ၁၀ နာရီကနေ စတင်တိုက်ပွဲဖြစ်ပွားပြီး ည ၁၂ နာရီဝန်းကျင်မှာ မိုးရွာတာကြောင့် ပစ်ခတ်မှု ရပ်နားလိုက်တယ်လို့ ဆိုပါတယ်။

စက်တင်ဘာ ၁၂ ရက်နေ့ မနက် ၉ နာရီမှာ တိုက်ပွဲပြန်လည်စတင်ဖြစ်ပွားခဲ့ကာ နေ့လယ် ၁ နာရီလောက်မှာ စစ်ကောင်စီဘက်က ဂျက်လေယာဉ်ကို အသုံးပြုပြီး လေကြောင်းတိုက်ခိုက်မှုတွေနဲ့ စစ်ကူဖြည့်တင်းမှုတွေ လုပ်ခဲ့တယ်လို့ ဖော်ပြထားပါတယ်။

အဲလိုစစ်ကောင်စီဘက်က လေးကြောင်းကနေ ခေတ်မီ လက်နက်အသာစီးယူ ပစ်ခတ်ခဲ့တာကြောင့် ကနီပြည်သူ့ကာကွယ်ရေးပူးပေါင်းအဖွဲ့က ထိုးစစ်ဆင်မှုကို ရပ်တန့်ကာ ဆုတ်ခွာနိုင်ခဲ့တယ်လို့ ဆိုပါတယ်။

မြေပြင်သတင်းတွေအရ စစ်ကောင်စီတပ်က ၃ ဦးထက် မနည်းကျဆုံးကာ PDF ပူးပေါင်းအဖွဲ့က ရဲဘော်တစ်ဦး ဒဏ်ရာရခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

တိုက်ပွဲအတွင်း စစ်ကောင်စီဘက်က သေဆုံးမှုအခြေအနေနဲ့ ပတ်သက်ပြီး ဒီဗွီဘီက သီးခြား အတည်မပြုနိုင်သေးပါဘူး။

4 months Ago
Up