ကနီမြို့

August 2, 2021

ကနီမြို့ပေါ်တွင် စစ်တပ်က ပစ်ခတ်မှုကြောင့် ပြည်သူ ၁ ဦး သေဆုံး

စစ်ကိုင်တိုင်း၊ ကနီမြို့ပေါ် အထက ၁ ကျောင်းထဲ တပ်စွဲထားတဲ့ စစ်တပ်က  ဩဂုတ် ၁ ရက်နေ့ည ၆ နာရီခွဲကျော်လောက်မှာ သေနတ်နဲ့ပစ်ခတ်တာကြောင့် လမ်းသွားနေတဲ့ ပြည်သူတစ်ဦး ကျည်ထိမှန် သေဆုံးသွားပါတယ်။

မျက်မြင်သူတစ်ဦးက “ကျနော်နဲ့ ‌ကနီပြည်သူ့အားကစားကားကွင်းထောင့်က ကွမ်းယာဆိုင်မှာ ကွမ်းယာဝင်ဝယ်တော့ အတူဆုံဖြစ်လိုက်တာပေါ့။ ကိုယ်ကလည်း နယ်ဘက်ကဆိုတော့ ဘယ်သူဘယ်ဝါဆိုတာ မသိလိုက်ဘူးဗျ။ ကနီမြို့ပေါ်အမှတ် ၂ က ဖြစ်ဖို့များမယ်ထင်တယ်။ အသက်က ၃၀ ဝန်းကျင်လောက်ပေါ့။ သူကကွမ်းယာရလို့ မြို့ထဲဘက်အပြန်  အထက ၁ ရှေ့ရောက်တော့ သေနတ်တွေနဲ့ ဝိုင်းထုကြတာ။ ပစ်တဲ့အချက်အရေတွက်က အများကြီးပစ်ကြတာ။ သေနတ်သံတွေဆူညံနေတာပဲ။ အပစ်ခံရတဲ့သူကတော့ ကနီမြို့လယ်လမ်းပေါ်မှာ လဲကျနေတယ်” လို့ ပြောပါတယ်။

ဒါ့အပြင် ဩဂုတ် ၁ ရက်နေ့ညနေပိုင်းကလည်း မြို့ပေါ်မှာ တပ်စွဲထားတဲ့ တပ်သားတွေဟာ အရက်သောက်စားပြီး ကနီမြို့လယ်လမ်းကနေ ဖြတ်သွားသူမှန်သမျှကို ဖမ်းဆီးကာ ဆက်ကြေးတောင်းသလို ငွေကြေး တောင်းခံနေတယ်လို့ ဆိုပါတယ်။

စစ်ကောင်စီတပ်ရင်း ၃၃၊ ၄၄၊ ၉၉ စတဲ့ တပ်တွေဟာ ကနီမြို့နယ်အတွင်း ကျေးရွာတိုင်းနီးပါးကို ဝင်ရောက်စီးနင်းပြီး ဖမ်းဆီးသတ်ဖြတ်နေတာကြောင့် ဇူလိုင် ၁ လအတွင်း အသတ်ခံရတဲ့ အပြစ်မဲ့ပြည်သူ ၆၀ ကျော် ရှိတယ်လို့ သိရပါတယ်။

Pra Jaw

3 months Ago

ကနီမြို့နယ်အတွင်း ဖမ်းခံထားရသူများကို ၃လကြာအထိ တွေ့ခွင့်မရသဖြင့် မိသားစုဝင်များ စိုးရိမ်

ကနီမြိုနယ်အတွင်း ပြီးခဲ့တဲ့ မေ ၁၀ ရက်နေ့ကတည်းက ဖမ်းဆီးခံထားရတဲ့သူအားလုံးကို ၃ လနီးပါးအကြာ ဒီနေ့အထိ တွေ့ခွင့်မရသေးတာကြောင့် စိုးရိမ်နေကြပြီး အမြန်ဆုံးတွေ့ခွင့်ပေးဖို့ မိသားစုဝင်တွေက တောင်းဆိုလိုက်ပါတယ်။

စစ်ကိုင်းတိုင်း၊ ကနီမြိုနယ်၊ မင်းမကျေးရွာအနောက် စိမ့်အင်တိုင်တောပြင်နဲ့ ဇီးပင်တွင်းကျေးရွာက ပြည်သူတွေကို မေ ၁၀ ရက်နဲ့ ၁၂ ရက်မှာ စစ်ကောင်စီတပ်က ဖမ်းဆီးခဲ့ပြီး အသက်မပြည့်သူတွေနဲ့ အသက် ၇၀ ကျော်တွေကို ပြန်လွှတ်ပေးခဲ့ပါတယ်။

ဒီနေ့အထိ ပြန်လွတ်မလာသေးသူ ၂၁ ယောက်ရှိနေပြီး တွေ့ခွင့်မရသေးဘူးလို့ ဖမ်းဆီးခံရသူတွေရဲ့ မိသားစုဝင်တွေက ပြောပါတယ်။

အဖမ်းဆီးခံရသူရဲ့ မိဘတဦးက “ကျနော်တို့ ဖမ်းဆီးခံရတဲ့နေ့ကစပြီး ဒီနေ့အချိန်အထိ လူချင်းတွေ့ခွင့်တရက်မှမရဘူးဗျ။ ထောင်ဝင်စာတောင် ကြားလူတစ်ယောက်နဲ့ လူကြုံပါးရတယ်။ လူချင်းတော့တွေ့ချင်တာပေါ့ဗျာ ဘယ်လိုပဲဖြစ်နေနေ။ လူချင်းတွေ့ရတော့ မိသားစုဝင်တွေ စိတ်ချမ်းသာရတာပေါ့ဗျာ။ အခုက ဘယ်လိုနေလို့ ဘယ်လိုထိုင်ရသလဲ မသိဘူးလေ။ ထောင်တွေမှာ ကိုဗစ်ကူးစက်တာတွေ ရှိနေတယ်ဆိုတဲ့ သတင်းတွေလည်း တက်နေတော့ ပိုစိတ်မချမ်းသာရတာပေါ့ဗျာ။ ဖြစ်နိုင်ရင်တော့ မိသားစုဝင်တွေနဲ့ တွေ့ခွင့်ပေးပါလို့ တာဝန်ရှိသူတွေကို အနူးအညွတ်တောင်းဆိုပါတယ်” လို့ ပြောပါတယ်။

စစ်ကောင်စီတပ်က ကနီမြို့နယ်အတွင်း မေလ ၁၀ ရက်နဲ့ ၁၂ ရက်တွေက မင်းမကျေးရွာ စိမ့်အင်တိုင်းတောပြင်နဲ့ ဇီးပင်တွင်းက ပြည်သူ ၃၁ ယောက်ကို လက်နက်တွေ့ရှိတယ်ဆိုပြီး ဖမ်းဆီးကာ မုံရွာအကျဉ်းထောင်မှာ ပို့ထားပါတယ်။ 

အဲဒီဖမ်းဆီးခံရသူ ၃၁ ယောက်ထဲက အသက်မပြည့်လူငယ်တွေနဲ့ အသတ် ၇၀ ကျော်အရွယ် ၁‌၀ ဦးကို ပြန်လွှတ်ပေးခဲ့တယ်လို့ ဆိုပါတယ်။

ဇူလိုင် ၃၀ ရက်နေ့ကလည်း ဇီးပင်တွင်းကျေးရွာက အပြစ်မဲ့ပြည်သူ ၁၃ ယောက်နဲ့ အမျိုးသမီး ၂ ယောက်ကို ထပ်မံဖမ်းဆီးခေါ်ဆောင်သွားတယ်လို့ ဇီးပင်တွင်းဒေသခံတွေဆီကနေ သိရပါတယ်။

3 months Ago

July 2, 2021

ကနီမြို့၌ ၂ လကျော်အတွင်း တိုက်ပွဲ ၃၀ ကျော်ဖြစ်၊ PDF ၂၇ ဦး ကျဆုံး

စစ်ကိုင်းတိုင်း ကနီမြို့နယ်မှာ ဧပြီ ၁၁ ရက်မှ ဇွန် ၂၀ ရက်အထိ ရက်ပေါင်း ၇၀ အတွင်း အကြမ်းဖက်စစ်တပ်နဲ့ ပြည်သူ့ကာကွယ်ရေးတပ်ဖွဲ့တို့ တိုက်ပွဲပေါင်း ၃၀ ကျော်ဖြစ်ပွားခဲ့ပြီး PDF ဘက်က ၂၇ ယောက် ကျဆုံးခဲ့တယ်လို့ ဇူလိုင် ၁ ရက်က ထုတ်ပြန်ပါတယ်။

အကြမ်းဖက်စစ်တပ်က ရက်ပေါင်း ၇၀ အတွင်း ကနီမြို့ပေါ် ၃ ရပ်ကွက်နဲ့ ရွာပေါင်း ၅၁ ရွာကို အကြမ်းဖက်ဝင်ရောက်စီးနင်းခဲ့ပါတယ်။

ပြည်သူပိုင်ပစ္စည်းတွေဖြစ်တဲ့ ရွှေ၊ ငွေ၊ ဆိုင်ကယ်နဲ့ တခြားတန်ဖိုးကြီးပစ္စည်းတွေ   ဆေးဝါး  အဝတ်အထည်၊ လူသုံးကုန်ပစ္စည်းတွေအပါအဝင် နွား၊ ဆိတ်၊ ကြက်၊ ဝက် စတဲ့ အိမ်မွေး တိရစ္ဆာန်တွေကို ယူဆောင်သွားပါတယ်။

လူနေအိမ်တွေနဲ့ ဆိုင်ကယ်တွေကိုလည်း ဖျက်ဆီးခဲ့ပြီး ကျပ်ငွေ သိန်းပေါင်းထောင်ချီ ပျက်စီးဆုံးရှုံးခဲ့ရတယ်လို့ ထုတ်ပြန်ချက်မှာ ပါရှိပါတယ်။

PDF တပ်ဖွဲ့ဝင်မဟုတ်တဲ့ ပြည်သူ ၄ ဦး အကြမ်းဖက်သတ်ဖြတ်ခံရပြီး ၃၉ ဦး ဖမ်းဆီး ထိန်းသိမ်းခံရကာ ၄၂ ဦးကိုလည်း ရိုက်နှက်စစ်ဆေးခဲ့ပါတယ်။

အကြမ်းဖက်စစ်တပ်များကြောင့် တောထဲထွက်ပြေးတိမ်းရှောင်ထွက်ပြေးစဉ် သွေးလွန် တုပ်ကွေးဖြစ်ပွားပြီး ဆေးကုသမှု မရတဲ့အတွက် ၉ နှစ်အရွယ် ကလေးငယ် ၁ ဦး အသက်ဆုံးရှုံး ခဲ့ရသလို ပြည်သူ ၅၀၀၀၀ ကျော် အိုးအိမ်စွန့်ခွာ ထွက်ပြေးတိမ်းရှောင်ခဲ့ရပါတယ်။

4 months Ago
More News
Up