ကင်းသမား

April 28, 2021

ပြည်ကြီးတံခွန်၌ စစ်တပ်၏ ပစ်ခတ်မှုကြောင့် ကင်းသမား ၁ ဦးကျည်ထိမှန်ပြီး ၁ ဦးအဖမ်းခံရ

မန္တလေးတိုင်း၊ ပြည်ကြီးတံခွန်မြို့နယ်၊  ဋ ရပ်ကွက်မှာ  ဧပြီ ၂၈ ရက် ညပိုင်းက အကြမ်းဖက်စစ်ကောင်စီရဲ့တပ်တွေရဲ့ ဝင်ရောက်ပစ်ခတ်မှုကြောင့် ပြည်သူ့လုံခြုံရေး ကင်းစောင့်ပေးနေတဲ့ ကင်းသမား ၁ ဦး သေနတ်ကျည်ထိမှန်ခဲ့ပြီး နောက် ၁ ဦးအဖမ်းခံခဲ့ရတယ်လို့ ဒေသခံ တွေကပြောပါတယ်။

ညသပိတ်ပြုလုပ်ဖို့ လူစုနေချိန်မှာ ရဲနဲ့ စစ်တပ်ကား ၈ စီးနဲ့ရောက်ရှိလာပြီး ပစ်ခတ်ချိန်မှာ ကင်းသမားတွေ ရှောင်ချိန်မရဘဲ  ၁ ဦး ကျည်ထိမှန်ခဲ့ပြီး ၁ ဦးကို ကားပေါ်ဆွဲတင်သွားတာဖြစ်တယ်လို့ စစ်ကောင်စီရဲ့ပုဒ်မ ၅၀၅ နဲ့အမှုဖွင့်ခံထားရတဲ့ ဆရာတော်က မိန့်ပါတယ်။

ဒုမြို့တော်ဝန်အိမ်ဗုံးပေါက်ကွဲတဲ့နေရာကို စစ်တပ်နဲ့ရဲ ကား ၁၀ စီးနဲ့လာရင်း ၈ စီးက ခုလို ရပ်ကွက်ထဲဝင်ရောက်ပစ်ခတ်သွားတာလို့ ဆိုပါတယ်။

ရဲနဲ့စစ်တပ်ပြန်သွားချိန်မှာတော့ စစ်အာဏာရှင်ဆန့်ကျင်ရေး ညသပိတ်ကို ပြည်သူတွေက ဆက်လက်ပြုလုပ်ခဲ့ကြပါတယ်။

ပြည်ကြီးတံခွန်မြို့နယ်မှာ  ဧပြီလ ၂၀ ရက်ကလည်း ညသပိတ်ပြုလုပ် ဆန္ဒပြနေစဉ် စစ်တပ်နဲ့ရဲက လာရောက် ဖြိုခွင်းခဲ့ပါတယ်။

7 months Ago

March 13, 2021

မိုးကုတ် ကင်းသမား ၅ ဦးကို ရဲနဲ့စစ်တပ် အကြမ်းဖက်ဖမ်းဆီး၊ ၁ ဦး ဒဏ်ရာရ

မန္တလေးတိုင်းဒေသကြီး မိုးကုတ်မြို့မှာ မတ်လ ၁၂ ရက်နေ့ည ၁၀ နာရီဝန်းကျင်က ရဲနဲ့စစ်သားတွေဟာ အင်အားအလုံးအရင်းနဲ့ ရပ်ကွက်တွေထဲဝင်လာပြီး ကင်းသမားတွေကို လိုက်လံဖမ်းဆီးရာ ငါးဦးဖမ်းဆီးခံရပြီး တစ်ဦးဒဏ်ရာရရှိခဲ့တယ်လို့ သိရပါတယ်။

ရပ်ကွက်အချို့မှာ သေနတ်ပစ်ဖောက်သံကြားရပြီး ရဲနဲ့စစ်သားတွေဟာ မိုးကုတ်မြို့က လမ်းတွေမှာ ဝင်ရောက်လာတာကြောင့် ပြည်သူတွေဟာ စိုးရိမ်ထိတ်လန့်နေကြပါတယ်။

ကင်းသမားတွေကို စစ်တပ်နဲ့ရဲက အိမ်ထဲထိဝင်ဖမ်းကြပြီး ရေနွေးခွက်တွေကို ရိုက်ခွဲကြပြီး ဖမ်းဆီးခဲ့တာလို့ သိရပါတယ်။

မိုးကုတ်မြို့ရဲ့ အထင်ကရနေရာတစ်ခုဖြစ်တဲ့ မယ်နန်းကြည်တောင်ပေါ်မှာလည်း ည ၇ နာရီဝန်းကျင်ကနေ မီးလောင်နေရာ ည ၁၁ နာရီအထိ လောင်နေဆဲဖြစ်ပြီး တောမီးလို့ယူဆရ ပါတယ်။

9 months Ago
Up