ကင်ဆာရောဂါသည် ကျားမကြီးရင်ဘတ်မှ ၂ ကီလိုဂရမ် အကျိတ်ကြီးကို ခွဲထုတ်

January 22, 2018

ကင်ဆာရောဂါသည် ကျားမကြီးရင်ဘတ်မှ ၂ ကီလိုဂရမ် အကျိတ်ကြီးကို ခွဲထုတ်

ထိုင်းနိုင်ငံမှ တိရစ္ဆာန်ဆေးကုဆရာဝန်တွေ ပါဝင်တဲ့အဖွဲ့ဟာ ကင်ဆာရောဂါ ခံစားနေရတဲ့ ကျားမကြီးတကောင်ဆီက ၂ ကီလိုဂရမ် အလေးချိန်ရှိတဲ့ အကျိတ်ကြီးကို ခွဲထုတ်ကာ ကုသပေးနိုင်ခဲ့ကြတယ်လို့ ဘန်ကောက်ပို့စ်သတင်းမှာ ဇန်နဝါရီ ၂၁ ရက်နေ့က ဖော်ပြပါတယ်။ ကျားမကြီးရဲ့ နာမည်ကိုတော့ အော်နွိုင်လို့ သိရပြီး ဟက်ရိုင်ခရိုင်တွင်းမှ ငချန် သားရိုင်းတိရစ္ဆာန် ဘေးမဲ့တောထဲမှဖြစ်ကာ အသက် ၂၀ အရွယ်ရှိနေပြီလို့ ဆိုပါတယ်။ ကျားမကြီးမှာ အလေးချိန် ၂ ကီလိုဂရမ် အလေးချိန်ရှိတဲ့ ဒီအကျိတ်ကြီးကြောင့် တခြား ကိုယ်တွင်းအင်္ဂါတွေကိုပါ ထိခိုက်ပျက်စီးမှုတွေ ရှိလာနိုင်တဲ့အတွက် ခုလို ကုသနိုင်ဖို့ ကြိုးစားခဲ့ကြရတာပါ။ ဒီကုသမှုကိုတော့ သားရိုင်းတိရစ္ဆာန်နှင့် သစ်တောထိန်းသိမ်းရေးဌာန၊ အမျိုးသား သဘာဝဥယျာဉ်များဌာနနဲ့ ပရင့်စ်အော့ဖ်ဆောင်ခလာတက္ကသိုလ်မှ တိရစ္ဆာန်ဆေးကုသရေးအဖွဲ့က တာဝန်ယူ ဆောင်ရွက်ပေးခဲ့ကြတာ ဖြစ်ပါတယ်။ သဘာဝဘေးမဲ့ဥယျာဉ် တာဝန်ရှိသူတွေဟာ ကျားမကြီးမှာ ရင်သားအကျိတ် ဖြစ်နေခဲ့တာကို လွန်ခဲ့တဲ့ ၂ လလောက်ကတည်းက သတိထားမိခဲ့ကြတာလို့ ဒေသတွင်း သားရိုင်းတိရစ္ဆာန် ထိန်းသိမ်းကာကွယ်ရေးဆိုင်ရာ ဒါရိုက်တာတဦးဖြစ်တဲ့ သနစ် နူရင်မ်က ပြောပါတယ်။ ဆေးစစ်ဆေးချက်တွေအရ သူ့ရဲ့ကိုယ်တွင်းမှာ အဆုတ်အပါအဝင် တခြား ကိုယ်တွင်းအင်္ဂါတွေမှာပါ ကင်ဆာအမြစ်တွေ ပျံ့နှံ့နေခဲ့တာလို့ ဆိုပါတယ်။ ခွဲစိတ်ပြီးတဲ့အချိန်မှာတော့ ကျားမကြီးရဲ့ ကျန်းမာရေးအခြေအနေဟာ ကောင်းမွန်နေပြီး အနီးကပ်စောင့်ကြပ်မှုတွေ ဆက်လက်လုပ်ဆောင်သွားရဦးမယ်လို့ ဆိုပါတယ်။
3 years Ago
Up