မနေ့ညက ယှဉ်ပြိုင်သွားတဲ့ အီတလီအိုးပင်း တင်းနစ်ပြိုင်ပွဲ နောက်ဆုံး ဗိုလ်လုပွဲမှာ ကမ္ဘာ့နံပါတ် ၁ နိုဗက် ဂျိုကိုဗစ်က ကမ္ဘာ့နံပါတ် ၅ စတီဖန်နို စီစီပက်စ်ကို အနိုင်ရသွားပါတယ်။
ဆားဗီးယားက ဂျိုကိုဗစ်အတွက် ဂရိက စီစီပက်စ်ကို ၆ ကြိမ် ဆက်တိုက် အနိုင်ရလိုက်တဲ့ ပွဲအဖြစ် မှတ်တမ်းဝင်သွားပါတယ်။
သူတို့ နှစ်ယောက်ဟာ မနှစ်တုန်းက ပြင်သစ်အိုးပင်းဗိုလ်လုပွဲမှာ တွေ့ခဲ့တုန်းကလည်း ဂျိုကိုဗစ်ကပဲ အနိုင်ရခဲ့ပါတယ်။
၂၀၁၇ အီတလီ အိုးပင်းချန်ပီယံကို အနိုင်ယူပြီး ဗိုလ်လုပွဲကို တက်လာတဲ့ စီစီပက်စ်အတွက် ဒီရာသီမှာ ပထမဆုံးဖလားရဖို့ အခွင့်အလမ်းနဲ့ လွဲချော်သွားရပြီ အီတလီ အိုးပင်းဖိုင်နယ်ကို ၁၂ ကြိမ် တက်ဖူးတဲ့ ဂျိုကိုဗစ်အတွက် ၆ လအတွင်း ပထမဆုံးအကြိမ် ချန်ပီယံဆုကို ကိုင်မြှောက်နိုင်ပြီဖြစ်ပါတယ်။
မေ ၈ ရက်နေ့ညက ယှဉ်ပြိုင်သွားတဲ့ မက်ဒရစ် အိုးပင်း တင်းနစ်ပြိုင်ပွဲရဲ့ နောက်ဆုံး ဗိုလ်လုပွဲမှာ စပိန်က ဆယ်ကျော်သက် တင်းနစ်သမား ကိုရို အာကာရတ်က ဂျာမနီက အလက်ဇန်းဒါး ဇာရဗ်ကို အနိုင်ရသွားပါတယ်။
ကမ္ဘာ့အဆင့် ၃ လက်ရှိ ချန်ပီယံကို ၆-၃ ၆-၁ နဲ့ အနိုင်လိုက်တာဟာ အသက် ၁၉ နှစ်ပဲ ရှိသေးတဲ့ အာကာရတ်အတွက် အလွန်အန္တရာယ်များတဲ့ ပြိုင်ပွဲရဲ့ ခရီးအဆုံး ဖြစ်ပါတယ်။
မက်ဒရယ် အိုးပင်း ပွဲစဉ်တလျှောက်လုံးမှာ သူဟာ ထိပ်တန်း တင်းနစ်သမားတွေကိုချည်း အံ့သြစရာကောင်းလောက်အောင် အနိုင်ယူပြီး ဗိုလ်လုပွဲကို တက်ရောက်လာသူပါ။
ကွာတားမှာ သူကိုယ်တိုင် အားကျခဲ့ရတဲ့ စပိန် တင်းနစ်အကျော်အမော် ရာဖာ နဒဲလ်၊ အကြိုဗိုလ်လုပွဲမှာ ဆားဗီးယားက ကမ္ဘာ့နံပါတ်တစ် ဂျိုကိုဗစ်နဲ့၊ အခု ဗိုလ်လုပွဲမှာ လက်ရှိ ချန်ပီယံ ဇာရဗ်တို့ကို ထိုက်ထိုက်တန်တန် အနိုင်ယူပြီး ချန်ပီယံ ဖြစ်လာပါတယ်။
ATP Tour သမိုင်းမှာတော့ သူဟာ ပြိုင်ပွဲတခုတည်းမှာ နံပါတ် ၁ ကနေ ၅ အတွင်း အဆင့်ရှိတဲ့ ထိပ်တန်း တင်းနစ်သမား ၃ ယောက်ကို ဆက်တိုက် အနိုင်ယူနိုင်တဲ့ အသက်အငယ်ဆုံး တင်းနစ်သမားအဖြစ်လည်း မှတ်တမ်းဝင်သွားပါတယ်။
