ဘောလုံး

May 26, 2022

ကွန်းဖရန့်လိဂ် ဗိုလ်လုပွဲတွင် ရိုးမားအသင်း အနိုင်ရဗိုလ်စွဲ

ဥရောပကွန်းဖရန့်လိဂ် ဗိုလ်လုပွဲအဖြစ် အီတလီကလပ် ရိုးမားနဲ့ ဒတ်ချ်ကလပ် ဖီယင်နုတို့ မေလ ၂၅ ရက် မနေ့ညက ယှဉ်ပြိုင်ရာ ရိုးမားအသင်းက တဂိုး ဂိုးမရှိနဲ့နိုင်ပြီး ဗိုလ်စွဲသွားပါတယ်။

ရိုးမားအသင်းအတွက် တလုံးတည်းသော အနိုင်ဂိုးကိုတော့ ပွဲချိန် ၃၂ မိနစ်မှာ ဇာနီအိုလိုက သွင်းယူပေးခဲ့ပါတယ်။

ဖီယင်နုအသင်းဟာ ဦးဆောင်ဂိုး ပေးလိုက်ရပြီးနောက် ချေပဂိုးရဖို့ တိုက်စစ်မြှင့်ကစားခဲ့ပြီး ဂိုးကန်သွင်းချက်ရော ဘောလုံးပိုင်ဆိုင်မှာပါ အသာစီးရယူနိုင်ခဲ့ပေမယ့် လိုအပ်တဲ့ ချေပဂိုး မရခဲ့ဘဲ အရှုံးပေးခဲ့ရတာပါ။

ဒီပွဲမှာ ဖီယင်နုအသင်းရဲ့ တိုက်စစ်ကို အကောင်းဆုံး ဟန့်တား ကာကွယ်နိုင်ခဲ့တဲ့ ရိုးမားအသင်း နောက်ခံလူ စမောလင်းကို ကွန်းဖရန့်လိဂ် ဗိုလ်လုပွဲရဲ့ အကောင်းဆုံးကစားသမားအဖြစ် ရွေးချယ်ခဲ့ပါတယ်။

စမောလင်းဟာ ဖီယင်နုအသင်းတိုက်စစ်မှူးတွေဖြစ်တဲ့ ဒက်ဆာစ်၊ ဆာနစ္စတယ်ရာတို့ရဲ့ အားကောင်းလှတဲ့ တိုက်စစ်ကို ပွဲချိန်ပြည့် ကာကွယ်နိုင်ခဲ့တာ ဖြစ်ပါတယ်။

UEFA Technical Observer အဖွဲ့က စမောလင်းကို ရိုးမားအသင်း နောက်တန်းမှာ ခိုင်မာတဲ့ ကျောက်ဆောင်တခုလို စွမ်းဆောင်နိုင်ကြောင်း ချီးကျူးခဲ့ကြပါတယ်။

ရိုးမားနည်းပြ မော်ရင်ဟိုအတွက်လည်း ဒီရာသီမှာ ပထမဆုံးအကြိမ် ကျင်းပတဲ့ ကွန်းဖရန့်လိဂ်မှာ ပထမဆုံး အောင်ပွဲရယူနိုင်တဲ့ မှတ်တမ်းကောင်းကို ပိုင်ဆိုင်သွားသလို ချန်ပီယံလိဂ်ဖလား ၂ ကြိမ်၊ ယူရိုပါလိဂ် - ၂ ကြိမ်၊ ကွန်းဖရန့်လိဂ် - ၁ ကြိမ် စုစုပေါင်း ဥရောပမေဂျာဖလား ၅ လုံး ဆွတ်ခူးနိုင်တဲ့ နည်းပြအဖြစ် မှတ်တမ်းဝင်သွားပါတယ်။

2 days Ago

တိုက်စစ်မှူး အန်ကတ်တီယာကို ၅ နှစ်သက်တမ်းတိုးစာချုပ်ဖြင့် အာဆင်နယ် ကမ်းလှမ်း

အာဆင်နယ်အသင်းဟာ လူငယ်တိုက်စစ်မှူး အန်ကတ်တီယာကို ၅ နှစ်သက်တမ်းတိုး စာချုပ်ချုပ်ဆိုနိုင်ဖို့ နီးစပ်နေဖြစ်ပါတယ်။

အစောပိုင်းက ရောင်းချမယ့် ကစားသမားစာရင်းမှာ ပါဝင်ခဲ့ပေမဲ့ အခုနောက်ပိုင်းပွဲစဉ်တွေမှာ ခြေစွမ်းပြ ကစားနိုင်ခဲ့တာကြောင့် အာဆင်နယ်က သက်တမ်းတိုးဖို့ စီစဉ်ထားတာ ဖြစ်ပါတယ်။

အန်ကတ်တီယာကို ၅ နှစ်စာချုပ် ချုပ်ဆိုပြီး တပတ်လုပ်ခ ပေါင် ၁ သိန်း၊ လက်မှတ်ထိုးကြေး ပေါင် ၅ သန်း ပေးချေမယ်လို့လည်း မက်လုံးပေးထားပါတယ်။

အသက် ၂၂ နှစ်ရှိ အင်္ဂလန်တိုက်စစ်မှူးကို ဝက်စ်ဟမ်း၊ ခရစ္စတယ်ပဲလေ့စ် အသင်းတွေကလည်း ခေါ်ယူဖို့ စိတ်ဝင်စားခဲ့ဖူးပါတယ်။

အာဆင်နယ်အသင်းဟာ စာချုပ်သက်တမ်း ကုန်ဆုံးခဲ့တဲ့ ကွင်းလယ်လူ မိုဟာမက်အယ်လ်နန်နီကိုလည်း သက်တမ်းတိုးစာချုပ် ချုပ်ဆိုခဲ့ပါတယ်။

2 days Ago

လီဗာပူးနှင့် အနာဂတ်ကိစ္စ ချန်ပီယံလိဂ် ဗိုလ်လုပွဲအပြီး ဆုံးဖြတ်မည်ဟု မာနေးပြော

လီဗာပူးအသင်းနဲ့ အနာဂတ်ကိစ္စတွေကို ချန်ပီယံလိဂ် ဗိုလ်လုပွဲအပြီးမှာ ဆုံးဖြတ်ချက်ပေးမယ်လို့ တိုက်စစ်မှူး မာနေးက ပြောပါတယ်။

အသက် ၃ဝ အရွယ် ဆီနီဂေါတိုက်စစ်မှူးဟာ လီဗာပူးနဲ့ စာချုပ်သက်တမ်း ကုန်ဆုံးတော့မှာဖြစ်ပြီး အသင်းနဲ့ အနာဂတ်ကိစ္စ မသေချာမရေရာ ဖြစ်လာခဲ့တာပါ။

ရီးရဲလ်မက်ဒရစ်အသင်းနဲ့ ကစားမယ့် ချန်ပီယံလိဂ် ဗိုလ်လုပွဲစဉ်မှာ အနိုင်ယူပြီး အသင်းအတွက် ၇ ကြိမ်မြောက် ဆုဖလား ရယူနိုင်ခဲ့မယ်ဆိုရင် ထူးခြားတဲ့အောင်မြင်မှု ဖြစ်လိမ့်မယ်လို့ မာနေးက ပြောပါတယ်။

“အသင်းအတွက် ၇ ကြိမ်မြောက် ဆုဖလားကို မြှောက်နိုင်ခဲ့မယ်ဆိုရင် ထူးခြားတဲ့အောင်ပွဲ ဖြစ်လိမ့်မယ်။ ကျနော့်ရဲ့အနာဂတ်နဲ့ ပတ်သက်လို့ ဒီမှာဆက်ရှိမလား ဆိုတာကို ချန်ပီယံလိဂ် ဗိုလ်လုပွဲအပြီးမှာ ဖြေကြားသွားပါမယ်။”

မာနေးကို ဘိုင်ယန်မြူးနစ်အသင်းက ခေါ်ယူလိုနေသလို ပီအက်စ်ဂျီနဲ့ ရီးရဲလ်မက်ဒရစ် အသင်းတွေကလည်း ခေါ်ယူဖို့ ဆန္ဒရှိနေပါတယ်။

လီဗာပူးအသင်းဟာ သက်တမ်းကုန်ဆုံးတော့မယ့် တိုက်စစ်မှူး ဆာလက်နဲ့ ဖေမီနို တို့ကိုလည်း သက်တမ်းတိုး စာချုပ်ချုပ်ဆိုနိုင်ဖို့ လိုအပ်နေပါတယ်။

2 days Ago

May 25, 2022

အင်္ဂလန်လက်ရွေးစင်အသင်းတွင် ဂျရော့ဒ်ဘိုဝင်နှင့် ဂျက်စတင်တို့ ပထမဆုံးအကြိမ် ရွေးချယ်ခံရ

အင်္ဂလန်လက်ရွေးစင် ၂၇ ဦးစာရင်းကို နည်းပြ ဆောက်ဂိတ်က ထုတ်ပြန်ကြေညာခဲ့ရာမှာ ဝက်စ်ဟမ်းတိုက်စစ်မှူး ဘိုဝင်နဲ့ လက်စတာနောက်ခံလူ ဂျက်စတင်တို့ ပထမဆုံးအကြိမ် ရွေးချယ်ခံခဲ့ရပါတယ်။

အင်္ဂလန်အသင်းဟာ လာမယ့်ဇွန်လဆန်းပိုင်းမှာ ယူအီးအက်ဖ်အေ နေးရှင်းလိဂ် ပွဲစဉ်တွေအဖြစ် ဟန်ဂေရီ၊ ဂျာမနီ၊ အီတလီအသင်းတွေနဲ့ ယှဉ်ပြိုင်ကစားသွားရမှာပါ။

ဝက်စ်ဟမ်းအသင်းမှာ ခြေစွမ်းပြခဲ့တဲ့ ဂျရော့ဒ်ဘိုဝင်ဟာ သက်တမ်းအလိုက် လက်ရွေးစင်အသင်းတွေမှာလည်း ရွေးချယ်ခံခဲ့ရခြင်း မရှိခဲ့ဘဲ လက်ရှိအချိန်မှသာ အင်္ဂလန်အသင်းမှာ ပထမဆုံးအကြိမ် ရွေးချယ်ခံခဲ့ရတာပါ။

လက်စတာ နောက်ခံလူ ဂျိမ်းစ်ဂျက်စတင်ကတော့ အင်္ဂလန်ယူ-၂၁ လက်ရွေးစင် ကစားသမားဟောင်းတဦးဖြစ်ပြီး လက်ရွေးစင်အသင်းမှာ ပထမဆုံးအကြိမ် ပါဝင်လာခဲ့တာပါ။

နည်းပြဆောက်ဂိတ်ဟာ အေစီမီလန်နဲ့အတူ စီးရီးအေချန်ပီယံဖြစ်ခဲ့တဲ့ နောက်ခံလူ တိုမော်ရီကိုလည်း ပြန်ခေါ်ခဲ့ပြီး အာဆင်နယ်နောက်ခံလူ ဘန်ဝှိုက်နဲ့ ခရစ္စတယ်ပဲလေ့စ် နောက်ခံလူ ဂူယီတို့ကိုလည်း ပြန်လည်ရွေးချယ်ခဲ့ပါတယ်။

လက်စတာကွင်းလယ်လူ မက်ဒီဆန်၊ အဲဗာတန်တိုက်စစ်မှူး ကယ်ဗက်လီဝင်၊ လီဗာပူးကွင်းလယ်လူ ဟန်ဒါဆန်၊ ဗီလာနောက်ခံလူ တိုင်ရုန်မင်စ်တို့ကိုတော့ နည်းပြဆောက်ဂိတ်က ချန်လှပ်ခဲ့ပါတယ်။

3 days Ago

ဗန်ဒိုက်ကို သမိုင်းတလျှောက် အကောင်းဆုံးနောက်ခံလူအဖြစ် မိုက်ကယ်အိုဝင် သတ်မှတ်

လီဗာပူးနောက်ခံလူ ဗန်ဒိုက်ဟာ ဘောလုံးသမိုင်းတလျှောက် အကောင်းဆုံးနောက်ခံလူဖြစ် တယ်လို့ အင်္ဂလန်တိုက်စစ်မှူးဟောင်း မိုက်ကယ်အိုဝင်က ချီးကျူးပါတယ်။ 

ဟော်လန်နောက်ခံလူ ဗန်ဒိုက်ဟာ လီဗာပူးအသင်းကို ချန်ပီယံလိဂ်နဲ့ ပရီးမီးယားလိဂ်ဆုဖလားတွေ ရရှိအောင် စွမ်းဆောင်နိုင်ခဲ့ပြီး အခုနှစ်ရာသီမှာလည်း ဆုဖလား ၃ လုံးရယူနိုင်မယ့် အခွင့်အရေးရှိနေပါတယ်။ 

ဗန်ဒိုက်စ်ဟာ ခြေစွမ်းပိုင်းနဲ့ ပတ်သက်လို့ အားလုံးထက်သာလွန်ပြီး ချန်ပီယံဆုဖလားရယူနိုင်မှု နည်းပါးနေသေးတာတခုပဲ ပြောစရာရှိတယ်လို့ အိုဝင်က ပြောပါတယ်။ 

“ဗန်ဒိုက်က ဘောလုံးသမိုင်းတလျှောက် အကောင်းဆုံးဗဟိုနောက်ခံလူပါ။ သူက အားလုံးထက် သန်မာတယ်၊ မြန်တယ်၊ ဘောလုံးနဲ့အတူ ကစားနိုင်သလို ဂိုးတွေလည်း သွင်းနိုင်တယ်။ အရင်က ဒီလိုနောက်ခံလူကို ကျနော် တခါမှ မမြင်ခဲ့ဖူးပါဘူး။ လက်ရှိအချိန်မှာ ပြောစရာရှိတာက ဆုဖလားရယူနိုင်မှုနည်းပါးတာပဲ ရှိတာပါ။ သူက ပရီးမီးယားလိဂ်နဲ့ ချန်ပီယံလိဂ်ဆုဖလားတွေပဲ ရယူနိုင်သေးတယ်” လို့ မိုက်ကယ်အိုဝင်က ပြော ပါတယ်။ 

ကမ္ဘာ့ဘောလုံးသမိုင်းမှာ အကောင်းဆုံးဗဟိုနောက်ခံလူတွေအဖြစ် ကမ္ဘာ့ဖလားချန်ပီယံဆု ဖလားတွေ ရယူနိုင်ခဲ့တဲ့  ဘက်ကင်ဘောင်ဝါ၊ ကန်နာဗာရို၊ ဆာဂျီယိုရာမို့စ်၊ ကာလက်စ်ပူယိုးလ် အစရှိသူတွေကို သတ်မှတ်လေ့ရှိပါတယ်။

3 days Ago

ဗီလာရီးရဲလ်နောက်ခံလူ ပါအူတောရက်စ်ကို ခေါ်ယူရန် မန်ယူအသင်း ဆွေးနွေး

မန်ယူအသင်းဟာ ဗီလာရီးရဲလ်အသင်းက စပိန်လက်ရွေးစင်နောက်ခံလူ ပါအူတောရက်စ်ကို ခေါ်ယူနိုင်ဖို့ ဆွေးနွေးမှုတွေ လုပ်ဆောင်နေပါတယ်။ 

နည်းပြတန်ဟတ်ဂ်ဟာ ဘောလုံးပေးပို့မှု ကောင်းမွန်တဲ့ ဗဟိုနောက်ခံလူ တဦးခေါ်ဖို့ ဆန္ဒရှိတာကြောင့် စပိန်လက်ရွေးစင်နောက်ခံလူ ပါအူတောရက်စ်ကို ဦးစားပေးပစ်မှတ်အဖြစ် သတ်မှတ်ထားတယ်လို့ သိရပါတယ်။ 

ဗီလာရီးရဲလ် အသင်းဘက်ကတော့ ပါအူတောရက်စ်အတွက် ယူရိုသန်း ၅၀ သတ်မှတ်ထားပြီး ယူနိုက်တက်ဘက်က ဦးစားပေးပစ်မှတ်အနေနဲ့ သတ်မှတ်ထားလို့ မဖြစ်မနေခေါ်ယူ ဖို့ရှိတယ်လို့ စပိန်သတင်းစာမာကာက ဖော်ပြခဲ့ပါတယ်။ 

ယူကေသတင်းစာ Express ကတော့ ကစားသမားရဲ့အေးဂျင့်တွေဖြစ်တဲ့ တာရက်ဂါနဲ့ ဖော်ရက်စ်တို့ဟာ ဒီတစ်ပတ်အတွင်းမှာပဲ မန်ချက်စတာကိုလာပြီး အပြောင်းအရွှေ့ကိစ္စနဲ့ ပတ်သက်ပြီး ဆွေးနွေးဖို့ရှိတယ်လို့ ဖော်ပြခဲ့ပါတယ်။ 

ဗီလာရီးရဲလ် အသင်းဟာ အခုနှစ်ရာသီမှာ ချန်ပီယံလိဂ်ဆီမီးဖိုင်နယ်အထိ တက်ရောက်ခဲ့ပေမယ့် လာမယ့်နှစ်မှာ ယူရိုကွန်းဖရန့်လိဂ်ပြိုင်ပွဲသာ ကစားခွင့်ရခဲ့လို့ နောက်ခံလူ ပါအူတောရက်စ်ဘက်ကလည်း အသင်းပြောင်းရွှေ့လိုနေတယ်လို့ သိရပါတယ်။

3 days Ago
More News
Up