အမျိုးသမီး/လူငယ်

September 26, 2022

ထိုင်းနိုင်ငံတွင် ၁၃ နှစ်အရွယ် မြန်မာမိန်းကလေးတဦး လိင်ပိုင်းဆိုင်ရာ စော်ကားခံရ

ထိုင်းနိုင်ငံအလယ်ပိုင်း နွန်ထပူရီခရိုင်ထဲမှာ အသက် ၁၃ နှစ်ရွယ် မြန်မာမိန်းကလေးကို အလုပ်ရှင်က အိမ်ဖော်လုပ်ဖို့ လာခေါ်သွားပြီး လမ်းခုလတ်မှာ လိင်ပိုင်းဆိုင်ရာ စော်ကားခဲ့တယ်လို့ မန်နေဂျာအွန်လိုင်း ထိုင်းသတင်းမှာ ဖော်ပြပါတယ်။ 

စက်တင်ဘာ ၂၂ ရက် မွန်းလွဲ ၁ နာရီလောက်က ၁၃ နှစ်ရွယ် သမီးဖြစ်သူကို အလုပ်ရှင်က အိမ်ဖော်အလုပ်ပေးမယ်ဆိုပြီး ခေါ်သွားရာက လမ်းခုလတ်မှာ လိင်ပိုင်းဆိုင်ရာ စော်ကားခဲ့တယ်လို့ မြန်မာရွှေ့ပြောင်းအလုပ်သမား စိုင်းကျော်ဝင်းက နွန်ထပူရီခရိုင် ဘန်ဘိုထောင်းန်နယ်မြေရဲ စခန်းမှာ သွားရောက်တိုင်တန်းခဲ့ပါတယ်။ 

ဒီမတိုင်ခင်က ဖေ့စ်ဘွတ်ခ်လူမှုကွန်ရက်မှာ အိမ်အကူအလိုရှိကြောင်း ကြော်ငြာထားတာ တွေ့လို့ ဆက်သွယ်ရာက ၂၂ ရက်မှာ စားသောက်ဆိုင်ဖွင့်ထားတယ်ဆိုတဲ့ အသက် ၃၉ နှစ်ရွယ် ထိုင်းအမျိုးသား နိုင်းဆူဖချိုင်းယင့်နိယုမ်းက  မိန်းကလေးကို အလုပ်သွင်းပေးမယ်ဆိုပြီး ခေါ်သွားခဲ့တာပါ။

ဒါပေမယ့် သူက အဲဒီမိန်းကလေးကို မိုတယ်တခုခေါ်သွားပြီး လက်နဲ့ဖြေဖျောက်ခိုင်းကာ ကိစ္စပြီးတော့ မိန်းကလေးကို  ကုန်တိုက်တခုရှေ့မှာ ကားပေါ်ကနေ ချထားခဲ့တယ်လို့ သိရပါတယ်။

ရဲတွေက သူ့ဖေ့စ်ဘွတ်ခ်အကောင့်နဲ့ ကားသွားရာလမ်းကြောင်းတွေ လိုက်လံစုံစမ်းပြီး စက်တင်ဘာ ၂၄ ရက် မနက် ၁ နာရီကျော်မှာတော့ ဘန်ဘိုးထောင်းမြို့နယ်၊ ကန်မဏီးရပ်ကွက်က နေအိမ် တအိမ်မှာ ပုန်းခိုနေတဲ့ နိုင်းဆူဖချိုင်းကို  သွားရောက်ဖမ်းဆီးခဲ့ပါတယ်။ သူနဲ့အတူ မိန်းကလေးကို သွားကြိုခဲ့တဲ့ မီးခိုးရောင်ယာလီကားနဲ့ အိုင်ဖုန်း တလုံးကိုပါ သက်သေအဖြစ် သိမ်းဆည်းခဲ့ပါတယ်။

ဒီဖြစ်ရပ်ဟာ လူမှုဝန်းကျင်အတွက် အန္တရာယ်ရှိတာကြောင့် အမှုကို  နွန်ထပူရီခရိုင်ရဲမှူးကြီး ကိုယ်တိုင် နိုင်းဆူဖချိုင်းကို အချိန် ၁ နာရီကျော် စစ်ဆေးရာမှာတော့ ပြစ်မှုကျူးလွန်ကြောင်း ဝန်ခံခဲ့ပါတယ်။

နိုင်းဆူဖချိုင်းဟာ အရင်ကလည်း  စားသောက်ဆိုင်ပိုင်ရှင်၊ ကုမ္ပဏီပိုင်ရှင် အယောင်ဆောင်ကာ မိန်းကလေးတွေကို မုဒိမ်းမှု ကျူးလွန်ခဲ့ကြောင်းနဲ့ အထူးသဖြင့် ရွှေ့ပြောင်းအလုပ်သမား မိန်းကလေးတွေကို ဦးတည်ကျူးလွန်ခဲ့တယ်လို့ ဆိုပါတယ်။

အဲဒီမိန်းကလေးတွေဟာ ထိုင်းစကားမတတ်၊ နေရာဒေသ မကျွမ်းကျင်၊ လမ်းမမှတ်မိ၊ တချို့က တရားမဝင်အလုပ်သမားဖြစ်လို့ ရဲကိုမတိုင်ရဲတာကြောင့် သူတို့ကိုပဲ ရွေးပြီး ကျူးလွန်ခဲ့တယ်လို့ ဝန်ခံခဲ့ပါတယ်။ 

ရဲစခန်းက သူ့ကို အရွယ်မရောက်သေးတဲ့မိန်းကလေးကို မိဘအုပ်ထိန်းသူနဲ့ကင်းကွာစေမှု၊ အရွယ်မရောက်သေးတဲ့ မိန်းကလေးအား သွေးဆောင်ဖြားယောင်းပြီး မုဒိမ်းကျင့်ဖို့ ကြံစည်မှု တွေနဲ့  အမှုဖွင့်အရေးယူထားပါတယ်။ 

ဒီမတိုင်ခင် သူ့ရဲ့လိင်ပိုင်းဆိုင်ရာကျူးလွန်မှုခံခဲ့ရတဲ့ မိန်းကလေးတွေအနေနဲ့လည်း ဘန်ဘိုးထောင်း ရဲစခန်းမှာ လာရောက်တိုင်ကြားပြီး သက်သေထွက်ဆိုပေးဖို့ ရဲတပ်ဖွဲ့က ကြေညာထားပါတယ်။ 

2 days Ago

September 15, 2022

ဆန္ဒပြ မြန်မာလုပ်သား ၂၇၀ လျော်ကြေး ဘတ် ၄ သန်းကျော်ရရှိ

ထိုင်းနိုင်ငံအလယ်ပိုင်း ပထုန်ဌာနီခရိုင် နဝနခွန်နယ်မြေရှိ အီလက်ထရောနစ် လျှပ်စစ်ပစ္စည်းစက်ရုံတရုံက မြန်မာအလုပ်သမား ၂၇၀ ဟာ ပြီးခဲ့တဲ့ စက်တင်ဘာ ၁၃ ရက်နေ့က  ရုတ်တရက် အလုပ်ထုတ်ခံခဲ့ကြရပါတယ်။ 

အဲဒီနေ့မနက် ၈ နာရီကစ အလုပ်ဆင်းလာသူတိုင်းကို စက်ရုံမန်နေဂျာက ပစ္စည်းတွေ အော်ဒါမလာလို့ အလုပ်မခန့်နိုင်တော့ကြောင်း ပြောပြီး  ရုတ်တရက် အလုပ်ဖြုတ်လိုက်တာကြောင့်  အလုပ်သမားတွေ မကျေနပ်ဖြစ်ပြီး ဆန္ဒပြခဲ့ကြတာလို့  အလုပ်သမား ကူညီစောင့်ရှောက်ရေးမဟာမိတ်အဖွဲ့ AAC  ခေါင်းဆောင် ကိုရဲမင်းက ဒီဗွီဘီကို ပြောပါတယ်။ 

“အလုပ်သမားတွေက ဆက်သွယ်လာလို့ ကျနော်တို့လည်း သက်ဆိုင်ရာ အလုပ်သမားကာကွယ် စောင့်ရှောက်ရေးရုံး၊ အလုပ်သမားရုံး၊ လဝက ရဲတွေနဲ့အတူ သွားပြီးညှိနှိုင်းဖြေရှင်းပေးခဲ့ပါတယ်။ ကျနော်တို့မရောက်ခင် မနက်ပိုင်းမှာ လုံးဝအဆင်မပြေပါဘူး၊ အလုပ်ရှင်က နစ်နာကြေးတွေ မပေးချင်ဘူးပေါ့။ အဲဒါနဲ့ အလုပ်သမားကိုယ်စားလှယ်၊ စက်ရုံကိုယ်စားလှယ်၊ အလုပ်သမားရုံး တာဝန်ရှိသူတွေရယ်၊ ပြီးတော့ ကျနော်တို့ အေအေစီအဖွဲ့ ၄ ပွင့်ဆိုင် ဆွေးနွေးညှိနှိုင်းကြပါတယ်။ ညနေ ၄ နာရီလောက်မှာ အားလုံး ပြေလည်မှုရခဲ့ကြတယ်ခင်ဗျ။”

ညှိနှိုင်းချက်အရ အလုပ်ရှင်ကနေပြီး အလုပ်သမား ၂၇၀ ဦးစလုံးရဲ့ ရသင့်ရထိုက်တဲ့ ၁ လစာ လုပ်အားခကိုရော၊ ကြိုတင်အကြောင်းမကြားဘဲ ရုတ်တရက်အလုပ်ထုတ်ပစ်လို့ နစ်နာကြေးအနေနဲ့ ၁၅ ရက်စာ လုပ်အားခတွေရော စုစုပေါင်း ဘတ် ၄ သန်းကျော်ကို ပေးဖို့နဲ့ အလုပ်သမားတွေရဲ့ စာရွက်စာတမ်း သက်သေအထောက်အထားဆိုင်ရာကိစ္စတွေလည်း ဒီလ ၁၉ ရက်နေ့အပြီး ဆောင်ရွက်ပေးဖို့  သဘောတူလိုက်တယ်လို့ ဆိုပါတယ်။

အဆိုပါစက်ရုံမှာ မြန်မာနဲ့ထိုင်းလုပ်သား ရာနဲ့ချီရှိပြီး ရုတ်တရက် အလုပ်ထုတ်ခံရတဲ့ထဲမှာ ထိုင်းအလုပ်သမားတွေလည်း ပါဝင်ကြောင်း၊ သူတို့လည်း သူတို့အစီအစဉ်နဲ့ ညှိနှိုင်းတောင်းဆိုလိမ့်မယ်လို့ ဆိုပါတယ်။ 

ဒီမတိုင်ခင် ပြီးခဲ့တဲ့ ၁၀ ရက်နေ့ကလည်း နခွန်းပထုံခရိုင် အုန်းယိုင်မြို့ရှိ အထည်ချုပ်စက်ရုံ ၁ ရုံမှာ မြန်မာလုပ်သား ၂၀၀ ကျော် အကြောင်းမဲ့အလုပ်ထုတ်ခံရပါသေးတယ်။ 

အဆိုပါကိစ္စကို သွားရောက်ဖြေရှင်းပေးရာမှာ  အလုပ်သမားကတ် စာရွက်စာတမ်းတွေ အဆင်ပြေပေမယ့် နစ်နာကြေးကိစ္စတွေမှာ အဆင်မပြေလို့ ရဲစခန်းမှာ အမှုဖွင့်ထားကြောင်း၊ မနေ့ကတော့ စက်ရုံဘက်က တရားမစွဲဖို့လာပြောလို့ အလုပ်သမားတွေဘက်က ရသင့်ရထိုက်တာတွေ အကုန်ရဖို့ ပြန်ပြီးညှိနှိုင်းနေတယ်လို့ ကိုရဲမင်း AAC က ပြောသွားပါတယ်။

2 weeks Ago
More News
Up