ငြိမ်းချမ်းရေး/စစ်ရေး

September 28, 2022

ကျောက်တော်တွင် စစ်တပ်က လက်နက်ကြီးဖြင့် ပစ်ခတ်သဖြင့် ကလေးငယ် ၁ ဦး သေဆုံးပြီး ပြည်သူအချို့ ဒဏ်ရာရ

ရခိုင်ပြည်နယ်၊ ကျောက်တော်မြို့နယ်မှာ စစ်ကောင်စီတပ်တွေက စက်တင်ဘာ ၁၉ ရက်နေ့ကစပြီး လက်နက်ကြီးတွေနဲ့ ပစ်ခတ်နေလို့ ၈ နှစ်အရွယ် ကလေးငယ်တယောက် အပါအဝင် ရွာသားတချို့ ထိခိုက်ဒဏ်ရာရရှိကာ နေအိမ်တွေ ပျက်စီးခဲ့တယ်လို့ ဒေသခံတွေဆီကနေ သိရပါတယ်။

ကျောက်တော်မြို့နယ် နဂရာကျေးရွာကို အာဏာသိမ်းစစ်ကောင်စီရဲ့ စကခ ၉ တပ်မက စက်တင်ဘာ ၁၉ ရက်ကနေ စက်တင်ဘာ ၂၇ ရက်အထိ လက်နက်ကြီးတွေနဲ့ ပစ်ခတ်ခဲ့တာလို့ နဂရာကျေးရွာ ဒေသခံတယောက်က ဒီဗွီဘီကို ပြောပါတယ်။

“စစ်(...)တွေဘက်က စက်တင်ဘာလ ၁၉ ရက်နေ့မှာ ပစ်လိုက်တဲ့ လက်နက်ကြီးက ဒေါ်ဦးယဥ်သန်းရဲ့ နေအိမ်မှာ ကျရောက်ပြီး ပြည်သူ ၄ ယောက် ဒဏ်ရာရရှိခဲ့တယ်။ စက်တင်ဘာ ၂၀ ရက်နေ့မှာတော့ ဦးထွန်းအေးရဲ့ စပါးကျီမှာ ကျရောက်ပြီး ကုန်းလျား(ပျဥ်)တချောင်း ကျိုးသွားတယ်။ စက်တင်ဘာလ ၂၅ ရက်နေ့ညမှာတော့ ဦးရွှေသန်းမောင်ရဲ့ နေအိမ်မှာ စစ်(...)တွေပစ်လိုက်တဲ့ လက်နက်ကြီးကျည်ကျရောက်ပြီး နေအိမ်တခုလုံး ပျက်စီးကာ စစ်ဘေးရှောင်ရင်း လာအိပ်နေတဲ့ အသက် ၈ နှစ်အရွယ် ကလေးငယ်တယောက် သေဆုံးကာ တယောက်ကတော့ ဒဏ်ရာရရှိခဲ့တယ်။ ကျနော်တို့ ရွာသားတွေဟာ စစ်(...)တွေ လက်နက်ကြီးနဲ့ ပစ်ခတ်တာကို ကြောက်လန့်ပြီး ညပိုင်းရောက်ရင် အိမ်မှာမနေရဲတော့ဘဲ ဘေးလွတ်ရာ ကျေးရွာဘက်တွေကို သွားအိပ်ကြရတယ်။”

နဂရာကျေးရွာမှာ အိမ်ခြေ ၂၂၂ လုံးနဲ့ လူဦးရေ ၁,၂၆၃ ယောက်ရှိပြီး အိမ်ခြေ ၂၀ လောက်ကတော့ ညောင်ချောင်း စစ်ဘေးရှောင်စခန်းကို ထွက်ပြေး တိမ်းရှောင်နေကြပါတယ်။ လတ်တလောမှာ သက်ကြီးရွယ်အိုတွေ၊ အမျိုးသမီးတွေ၊ ကိုယ်ဝန်ဆောင်တွေနဲ့ ကလေးသူငယ်တွေကို ဒုက္ခသည်စခန်းတခုလောက်မှာ ခိုလှုံလို့ရရင် ပိုအဆင်ပြေမယ်လို့ ဒေသခံက ဆိုပါတယ်။

“စစ်(...)တွေဘက်က လက်နက်ကြီးတွေနဲ့ စတင်ပစ်ခတ်တဲ့နေ့ကစလို့ ကျောက်တော်မြို့ကို ရေကြောင်းသွားလာမှုတွေ တားမြစ်ထားတာကြောင် စားနပ်ရိက္ခာတွေ ပြတ်တောက်တော့မယ်။ ကုန်းလမ်းကနေ သွားမယ်ဆိုရင်လည်း စခက ၉ ကို ဖြတ်သန်းပြီးမှ သွားရမှာဖြစ်လို့ ဘယ်သူမှလည်း မသွားရဲတာကြောင့် ပြည်သူတွေ စားဝတ်နေရေး အခက်အခဲ ဖြစ်နေကြတယ်။”

စစ်ကောင်စီတပ်တွေက ရခိုင်သားဆိုရင် ULA/AA လို့ သတ်မှတ်ပြီး ရခိုင်ပြည်နယ်က ကျေးရွာတွေကို ရန်သူအဖြစ် သတ်မှတ်ပြီး ရည်ရွယ်ချက်ရှိရှိနဲ့ လက်နက်ကြီးတွေနဲ့ ပစ်ခတ်နေကြတာလို့ နဂရာကျေးရွာ ရပ်မိရပ်ဖတယောက်က ပြောပါတယ်။

“စစ်ပွဲဆိုတာကတော့ ဘယ်သူမှလည်း မကြိုက်ပါဘူး။ နှစ်ဖက် တိုက်ပွဲဖြစ်ပွားတာမျိုး မဟုတ်ဘဲနဲ့ စစ်ကောင်စီတပ်ဘက်က အပြစ်မဲ့ပြည်သူတွေကို အကြောင်းမဲ့ ပစ်ခတ်တာကတော့ မလုပ်သင့်ပါဘူး။ ဒီလုပ်ရပ်က လူ့အခွင့်အရေး ချိုးဖောက်တာ ဖြစ်သလို နိုင်ငံတကာ စစ်ရာဇဝတ်မှုကို ကျူးလွန်နေတာဖြစ်တယ်။”

မင်းပြားမြို့နယ်ဘက်မှာလည်း ခလရ ၅၄၁ တပ်ရင်းက တိုက်ပွဲဖြစ်ပွားတာမရှိဘဲ စက်တင်ဘာ ၂၇ ရက်နေ့မှာ ကျေးရွာတွေကို လက်နက်ကြီးတွေနဲ့ ဆက်တိုက်ပစ်ခတ်ခဲ့လို့ နေအိမ်တချို့ ထိခိုက်ပျက်စီးကာ အပြစ်မဲ့ပြည်သူ ၆ ယောက် လက်နက်ကြီးကျည်စ ထိမှန်ဒဏ်ရာရရှိခဲ့ပြီး ကျေးရွာ ၆ ရွာလောက်က ပြည်သူတွေ ဘေးလွတ်ရာကို ထွက်ပြေးနေကြရတယ်လို့ သိရပါတယ်။

ရခိုင်ပြည်နယ်အတွင်းမှာ စစ်ကောင်စီတပ်တွေနဲ့ ရက္ခိုင်တပ်တော် (အေ‌ေအ) တို့ တကျော့ပြန် တိုက်ပွဲတွေ ပြန်ဖြစ်ပြီးနောက်ပိုင်း မြို့အများအပြားမှာ စစ်ကောင်စီက ဧည့်စာရင်း စစ်ဆေးတာတွေ၊ ပရဟိတသမားတွေနဲ့ အပြစ်မဲ့ပြည်သူတွေကို မတရား ဖမ်းဆီးတာတွေ၊ ခရီးသည်တင်ယာဥ်တွေနဲ့ ကုန်တင်ယာဥ်တွေ ကုန်းလမ်း၊ ရေလမ်းတွေ အားလုံးကို ပိတ်ဆို့တာတွေ ဆက်တိုက်ပြုလုပ်နေပါတယ်။

1 hour Ago

လွိုင်ကော်တွင် စစ်ကောင်စီတပ်ဖွဲ့ဝင် ၇ ဦး စနိုက်ပါ ထိမှန်သေဆုံး၊ ဒီးမော့ဆိုတွင် KDF ရဲဘော် ၁ ဦး ကျဆုံး

ကရင်နီ (ကယား) ပြည်နယ်၊ လွိုင်ကော်မြို့၊ ကယန်းသာယာ လမ်းခွကုန်းမှာ တပ်စွဲထားတဲ့ စစ်ကောင်စီတပ်ဖွဲ့ဝင် ၇ ယောက် စနိုက်ပါနဲ့ ပစ်ခတ်ခံရပြီး သေဆုံးသွားတယ်လို့ သိရပါတယ်။

စက်တင်ဘာ ၂၇ ရက် မနက် ၁၀ နာရီလောက်က အလယ်ပိုင်းတိုင်း အထူးစစ်ဆင်ဆေရး စနိုက်ပါအဖွဲ့နဲ့ KNDF B O2  စနိုက်ပါ အဖွဲ့တို့ ပူးပေါင်းပြီး ကယန်းသာယာ လမ်းခွကုန်းမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေကို စနိုက်ပါတွေနဲ့ ပစ်ခတ်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၇ ယောက် သေဆုံးသွားတယ်လို့ အလယ်ပိုင်းတိုင်း အထူးစစ်ဆင်ရေး အဖွဲ့က ထုတ်ပြန်ပါတယ်။

မနက်  ၁၀ နာရီကနေ နေ့လယ် ၁၂ နာရီခွဲအထိ တိုက်ပွဲဖြစ်ပွားခဲ့ပြီး စစ်ကောင်စီဘက်က အထိနာသွားတာကြောင့် စက်လက်တွေ၊ စနိုက်ပါတွေ၊ ၆၀ မမတွေနဲ့ ပြန်လည်ပစ်ခတ်ခဲ့ပေမဲ့ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ အလယ်ပိုင်းတိုင်း အထူးစစ်ဆင်ရေးအဖွဲ့ တာဝန်ရှိသူက ပြောပါတယ်။

ဒါ့အပြင် လက်တွေ့ မြေပြင်မှာ ကြုံတွေ့နေရတဲ့ ပြည်သူ့ရဲဘော်တွေရဲ့ လိုအပ်ချက်တွေဖြစ်တဲ့ လက်နက်ခဲယမ်းတွေ၊ ကျည်ဆန်တွေ ကူညီထောက်ပံ့ပေးကြဖို့ အလယ်ပိုင်းတိုင်း အထူးစစ်ဆင်ရေးအဖွဲ့က တောင်းဆိုထားပါတယ်။

ဒီးမော့ဆိုမြို့၊ ကုန်းသာကျေးရွာတိုက်ပွဲမှာတော့ ကယား (ကရင်နီ) တော်လှန်ရေးတပ်ပေါင်းစု KRU တပ်ဖွဲ့ဝင် ကရင်နီဒီမိုကရက်တစ်တပ်ဦး (KDF) တပ်ဖွဲ့မှ ရဲဘော်တယောက် လက်နက်ကြီးကျည် ထိမှန်ဒဏ်ရာကို ဆေးကုသမှုခံယူရင်း ကျဆုံးသွားတယ်လို့ KRU က ထုတ်ပြန်ပါတယ်။

စက်တင်ဘာ ၂၆ ရက်က ကုန်းသာကျေးရွာ တိုက်ပွဲအတွင်း စစ်ကောင်စီတပ်က ပစ်ခတ်လိုက်တဲ့ လက်နက်ကြီးထိမှန်ပြီး ဒဏ်ရာအပြင်းအထန် ရရှိခဲ့တဲ့ ရဲဘော် ခွန်စိုးပိုင်သူ (ခ) ခွန်ပေး (ခ) အခြောက်မဟာ ဆေးဝါးကုသမှု ခံယူနေရင်း ၂၇ ရက်နေ့ မနက် ၁၀ နာရီခွဲလောက်မှာ ကျဆုံးသွားတယ်လို့ KRU တာဝန်ရှိသူက ဒီဗွီဘီကို ပြောပါတယ်။

“ကျဆုံးသွားတဲ့ ရဲဘော်က ခါးအရိုးတွေပါ ထိသွားတာ။ ဒဏ်ရာက တော်တော်ပြင်းပါတယ်။ ဆေးရုံမှာ တောင့်ခံရင်း ကျဆုံးသွားတာ။ ဒီးမော့ဆိုမြို့ ကုန်းသာတိုက်ပွဲမှာ တိုက်ပွဲဖြစ်နေတာ ၇ လ ကြာပါပြီ။ တိုက်ပွဲတွေအတွင်း KRU မှ ရဲဘော် ၂ ဦး သေဆုံးပြီး ၅ ဦးက ခြေလက်အင်္ဂါ ဆုံးရှုံးထားပါတယ်။”

ဒီးမောဆိုမြို့ ကုန်းသာကျေးရွာမှာ စစ်ကောင်စီက တပ်စွဲထားပြီး တိုက်ပွဲတွေအတွင်း လေကြောင်းကို ဆက်တိုက်အသုံးပြုလာသလို လက်နက်ကြီးအသုံးပြုမှုတွေလည်း ပိုမို များပြားလာတယ်လို့ ဆိုပါတယ်။

စစ်ကောင်စီတပ်နဲ့ တိုက်ပွဲတွေအတွင်း ကယား (ကရင်နီ) တော်လှန်ရေးတပ်ပေါင်းစု KRU မှ ရဲဘော်တွေအနေနဲ့ လက်နက်ခဲယမ်း အဓိက လိုအပ်ချက်ရှိနေပြီး အကန့်အသတ်နဲ့ တိုက်ပွဲဝင်နေရသလို ကျည်ဆန်ကုန်သွားပါက တိုက်ပွဲအတွင်း ထိုင်နေရပြီး နောက်တန်းပြန်ဆုတ်ဖို့ ခက်ခဲတယ်လို့ KRU က ပြောပါတယ်။

1 hour Ago

ပုလောမြို့နယ်၊ သရက်ချောင်းမြို့နယ်နှင့် ရေးမြို့နယ်တို့တွင် စစ်ကောင်စီတပ်များ တိုက်ခိုက်ခံရ

တနင်္သာရီတိုင်း၊ မြိတ်ခရိုင်၊ ပုလောမြို့နယ် ကဒဲရွာနဲ့ သင်္ကန်းတောရွာကြားမှာ စစ်ကောင်စီ  ယာဉ်တန်းကို ပြည်သူ့ကာကွယ်ရေးပူးပေါင်းတပ်က ကြားဖြတ် ပစ်ခတ်တိုက်ခိုက်ခဲ့တယ်လို့ Palaw Regional Defense Force (PRDF) က ထုတ်ပြန်ပါတယ်။

စက်တင်ဘာ ၂၇ ရက် ညနေ ၄ နာရီလောက်က ထားဝယ်မြို့ကနေ မြိတ်မြို့ဘက်ကို ဆင်းလာတဲ့ စစ်ကောင်စီယာဉ်တန်းကို Palaw People Defense Force (PPDF) နဲ့ PRDF မဟာမိတ်တပ်ပေါင်းစုတို့ ပူးပေါင်းတိုက်ခိုက်ခဲ့တာပါ။

အဆိုပါ ထားဝယ်မြို့မှထွက်ခွာလာတဲ့ စစ်ကောင်စီ ယာဉ်တန်းဟာ ပုလောမြို့ အခြေစိုက် ခလရ ၂၈၅ တပ်ရင်းကို နေ့လယ် ၁ နာရီလောက်က ရောက်ရှိခဲ့တာဖြစ်ပြီး ၂ နာရီခွဲဝန်းကျင်မှာ မြိတ်ဘက်ကို ဆက်လက်ထွက်ခွာလာစဉ် တိုက်ခိုက်ခဲ့တာလို့ ထုတ်ပြန်ချက် အရ သိရပါတယ်။

ကြားဖြတ်တိုက်ခိုက်ခံရမှုကြောင့် ထိခိုက်ဒဏ်ရာရတဲ့ စစ်ကောင်စီတပ်ဖွဲ့ဝင်တွေကို ပလမြို့မှာ အရေးပေါ်လူနာတင်ယာဉ်လေးစီးနဲ့ လာရောက်တင်ဆောင်သွားတယ်လို့ စုံစမ်းသိရှိရပေမဲ့ သေဆုံးထိခိုက်ဒဏ်ရာရတဲ့ အရေအတွက်ကို မသိရသေးပါဘူး။

အဲဒီတိုက်ခိုက်မှုကို နန်းထိုက်အောင်စစ်ဆင်ရေးရဲ့ တစိတ်တပိုင်းအရ ပုလောဒေသ ကာကွယ်ရေးတပ်ပေါင်းစုက လုပ်ဆောင်ခဲ့တာဖြစ်တယ်လို့ ထုတ်ပြန်ချက်အရ သိရပါတယ်။

တနင်္သာရီတိုင်း၊ ထားဝယ်ခရိုင်၊ သရက်ချောင်းမြို့နယ်၊ အောက်သရက်ချောင်းကျေးရွာမှာလည်း စက်တင်ဘာ ၂၆ ရက် မွန်းလွဲ ၁ နာရီကျော်လောက်မှာ စစ်ကောင်စီယာဉ်တန်းကို ကြားဖြတ်တိုက်ခိုက်ခဲ့တယ်လို့ ကစယ်ဒိုဖက်ဒရယ်စစ်ကြောင်း People’s Defence Force – Federal Column က ထုတ်ပြန်ပါတယ်။

ပုလောမြို့က ထားဝယ်မြို့ဘက်ကို တက်လာတဲ့ စစ်ကောင်စီကား ၃ စီးကို ပြည်သူ့ကာကွယ်ရေးတပ်မတော်၊ ထားဝယ်ခရိုင်တပ်ရင်း (၂)၊ ကစယ်ဒိုကျားတပ်ဖွဲ့၊ ညီနောင်မဟာမိတ်တွေနဲ့ ဖွဲ့စည်းထားတဲ့ ကစယ်ဒိုဖက်ဒရယ်စစ်ကြောင်းတို့က တိုက်ခိုက်ခဲ့တာဖြစ်ပါတယ်။

တိုက်ခိုက်ခံရမှုကြောင့် စစ်ကောင်စီတပ်ဖွဲ့ဝင် ၄ ဦးသေဆုံးပြီး တချို့ဒဏ်ရာရရှိကာ ပြည်သူ့ကာကွယ်ရေးတပ်ဖွဲ့က တစုံတရာထိခိုက်မှုမရှိဘဲ အောင်မြင်စွာ ဆုတ်ခွာနိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ပြီးခဲ့တဲ့ရက်ပိုင်းကလည်း ပုလောမြို့နယ်အတွင်း စစ်ကောင်စီယဉ်တန်း နှစ်ကြိမ်တိုက်ခိုက်ခံခဲ့ရတာကြောင့် စစ်ကောင်စီတပ်သား ၁၀ ဦးထက်မနည်း သေဆုံးနိုင်ပြီး ထိခိုက်ဒဏ်ရာရသူများလည်းရှိတယ်လို့ ပုလော ပကဖက ထုတ်ပြန်ထားပါတယ်။

မွန်ပြည်နယ်၊ ရေး-မော်လမြိုင်သွားကားလမ်းရှိ ရေးမြို့နယ်မှာလည်း နှင်းစုံကျေးရွာအနီး ရှိ မိုင်းခွဲခံရတဲ့ ချောင်းကူးတံတားပြုပြင်နေတဲ့ ဆောက်လုပ်ရေးလုပ်သားတွေကို ကင်းစောင့်ပေးနေတဲ့ စစ်ကောင်စီတပ်ဖွဲ့ဝင်တွေကို စက်တင်ဘာ ၂၇ ရက် ညနေ ၅ နာရီလောက်မှာ တိုက်ခိုက်ခဲ့တယ်လို့ YST F ရေးတပ်ဖွဲ့က ပြောပါတယ်။

စစ်ကောင်စီတပ်ကို ကိုက် ၁၅၀ ဝန်းကျင် အကွာအဝေးကနေ သွားရောက်ချုံခိုတိုက်ခိုက်ခဲ့ပြီး စစ်တပ်ဘက်က တောင်ပံဖြန့်ကာ တပ်ဖြန့်ထားတာကြောင့် ထိတွေ့မှု အနည်းငယ် ပြင်းထန်ခဲ့တယ်လို့ ဆိုပါတယ်။

အဆိုပါတိုက်ခိုက်မှုမှာ လက်နက်ငယ်၊ လက်နက်ကြီးတွေနဲ့ မိနစ်အနည်းငယ်ကြာ အပြန်အလှန် ထိတွေ့ တိုက်ပွဲတွေ ဖြစ်ပွားခဲ့ပြီး YST F တပ်ဖွဲ့က အန္တရာယ်ကင်းစွာ ဆုတ်ခွာနိုင်ခဲ့ကာ စစ်ကောင်စီတပ်ဘက်က ထိခိုက်ကျဆုံးမှုကိုတော့ မသိရသေးသလို စစ်ကောင်စီဘက်ကလည်း သတင်းထုတ်ပြန်တာ မရှိသေးပါဘူး။

1 hour Ago

တိုက်ပွဲများကြောင့် ရခိုင်တွင် အိုးအိမ်စွန့်ခွာထွက်ပြေးရသူ ၉,၀၀၀ ခန့်ရှိလာဟု ကုလထုတ်ပြန်

ရခိုင်ပြည်နယ်မှာ ဖြစ်ပွားနေတဲ့ တိုက်ပွဲတွေကြောင့် ပြီးခဲ့တဲ့ ဩဂုတ်လကစတင်ပြီး အိုးအိမ်စွန့်ခွာ တိမ်းရှောင်ရသူ အရေအတွက်ဟာ ၉,၀၀၀ နီးပါးထိ ရှိလာပြီလို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ထုတ်ပြန်ပါတယ်။

လတ်တလော စစ်ကောင်စီတပ်တွေနဲ့ ရက္ခိုင့်တပ်တော်တို့အကြား တိုက်ပွဲတွေ ပြင်းထန်လာပြီး မြို့နယ်အများအပြားမှာ လက်နက်ကြီးပစ်ခတ်မှုတွေ၊ အရပ်သားပိုင် အိုးအိမ်ပျက်စီးမှုတွေ၊ အသွားအလာ ကန့်သတ်မှုတွေနဲ့ ဖမ်းဆီးမှုတွေ ဖြစ်ပွားနေတာဖြစ်ပြီး စက်တင်ဘာ ၂၃ ရက်က လက်နက်ကြီးပစ်ခတ်မှုနဲ့ စစ်သည်ဝင်ရောက်မှုတွေကြောင့် ဘူးသီးတောင်မြို့နယ်အတွင်း လူ ၃၀၀ လောက်ဟာ သူတို့နေထိုင်ရာ ကျေးရွာကနေ နေရပ်စွန့်ခွာ ထွက်ပြေးတိမ်းရှောင်ခဲ့ကြရတယ်လို့ ဆိုပါတယ်။

ဒါ့အပြင် အကြမ်းဖက်စစ်ကောင်စီဟာ ရခိုင်ပြည်နယ်က မြို့နယ် ၆ မြို့နယ်အတွင်း အကူအညီပေးရေးလုပ်ငန်းတွေ ရပ်ဆိုင်းထားဖို့ လူသားချင်းစာနာမှုဆိုင်ရာ အဖွဲ့အစည်းတွေကို ပြီးခဲ့တဲ့ စက်တင်ဘာ ၁၅ ရက်မှာ ညွှန်ကြားထားတယ်လို့ (UNOCHA) က ပြောထားပါတယ်။

နိုင်ငံတဝန်းမှာလည်း အကြမ်းဖက်စစ်ကောင်စီတပ်တွေနဲ့ တိုင်းရင်းသား လက်နက်ကိုင် အဖွဲ့တွေ၊ ပြည်သူ့ကာကွယ်ရေးတပ်ဖွဲ့တွေကြား တိုက်ပွဲတွေ ဆက်လက်ဖြစ်ပွားနေတာကြောင့် ပဋိပက္ခဖြစ်ပွားရာ ဒေသတွေက အရပ်သားပြည်သူတွေရဲ့ အသက်အိုးအိမ်စည်းစိမ် အကာအကွယ် ရရှိရေးကို ကြီးမားစွာ ခြိမ်းခြောက်နေဆဲဖြစ်ပါတယ်။

တိုးမြင့်လာတဲ့ စစ်ဆေးရေး ဂိတ်တွေနဲ့ လမ်းပိတ်ဆို့မှုတွေ အပါအဝင် လူအများ သွားလာမှုတွေနဲ့ လူသားချင်း စာနာမှုဆိုင်ရာ လုပ်ငန်းဆောင်ရွက်မှုတွေကို ထပ်တိုးကန့်သတ်တာတွေကြောင့် ပြည်နယ်တဝန်းရှိ ရွှေ့ပြောင်းအခြေချ ပြည်သူတွေနဲ့ ထိခိုက်ခံစားရသူတွေအတွက် လူမှုဘဝ အခက်အခဲတွေ ပိုမိုတိုးပွားလာနေတယ်လို့လည်း ကုလသမဂ္ဂ ထုတ်ပြန်ချက်မှာ ဖော်ပြပါတယ်။

မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး အထူးကိုယ်စားလှယ် တွမ်အန်ဒရူးစ်ကတော့ စစ်တပ်က အာဏာသိမ်းပြီးနောက်ပိုင်း မြန်မာနိုင်ငံက အခြေအနေတွေဟာ ပိုမိုဆိုးရွားလာနေရာကနေ ထိတ်လန့်ကြောက်မက်ဖွယ် အခြေအနေ ဖြစ်နေပြီလို့ စက်တင်ဘာ ၂၁ ရက်မှာ ပြောလိုက်ပါတယ်။

ကချင်ပြည်နယ်၊ ရွှေကူမြို့နယ်မှာလည်း စက်တင်ဘာ ၂၂ ရက်ကစတင်ပြီး အကြမ်းဖက် စစ်ကောင်စီတပ်တွေနဲ့ ပြည်သူ့ကာကွယ်ရေးတပ်ဖွဲ့တွေအကြား ဖြစ်ပွားတဲ့ တိုက်ပွဲတွေကြောင့် ကျေးရွာ ၃ ရွာက ပြည်သူ အယောက် ၄၀၀ လောက် အိုးအိမ်စွန့်ခွာ တိမ်းရှောင်ခဲ့ကြရတယ်လို့ ဆိုပါတယ်။

မြန်မာနိုင်ငံ အရှေ့တောင်ပိုင်းမှာတော့ စက်တင်ဘာလဆန်းပိုင်းက စတင်ပြီး လေကြောင်းတိုက်ခိုက်မှုနဲ့ လက်နက်ကြီး ပစ်ခတ်မှုတွေကြောင့် ရှမ်းပြည်နယ်တောင်ပိုင်း ဖယ်ခုံမြို့နယ် မိုးဗြဲမြို့က လူ ၅၅၀ လောက်ဟာ ကယားပြည်နယ်၊ လွိုင်ကော်မြို့နယ်ဘက်ကို ထွက်ပြေးတိမ်းရှောင်ခဲ့ရတယ်လို့ ကုလသမဂ္ဂစာရင်းတွေအရ သိရှိရပါတယ်။

ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီလကစတင်ကာ အာဏာသိမ်းယူမှုအပြီး ဖြစ်ပေါ်လာတဲ့ ပဋိပက္ခနဲ့ မလုံခြုံမှုတွေကြောင့် မြန်မာနိုင်ငံတဝန်းမှာ အိုးအိမ်စွန့်ခွာ ထွက်ပြေးရသူ ၉၈၉,၄၀၀ ဦး အပါအဝင် လူဦးရေ ၁ ဒသမ ၃ သန်းကျော်ဟာ နေရပ်စွန့်ခွာ တိမ်းရှောင်နေရဆဲ ဖြစ်ကြောင်း ကုလသမဂ္ဂရဲ့ စက်တင်ဘာ ၁၉ ရက်နေ့အထိ နောက်ဆုံးစာရင်းတွေအရ သိရပါတယ်။

1 hour Ago

ဘုရားသုံးဆူဒေသရှိ ဘုရားတောင်စခန်းကို KNLA ပူးပေါင်းအဖွဲ့ သိမ်းပိုက်

ကရင်ပြည်နယ်၊ ကြာအင်းဆိပ်ကြီးမြို့နယ်၊ ဘုရားသုံးဆူဒေသမှာ အခြေချထားတဲ့  စစ်ကောင်စီတပ်ရဲ့  ဘုရားတောင်စခန်းကို   KNLA ပူးပေါင်းတပ်တွေက စက်တင်ဘာ ၂၈ ရက် ဒီန့မနက်  ၉ နာရီခွဲမှာ သိမ်းပိုက်လိုက်တယ်လို့  ကရင်ပူးပေါင်းတပ်ဖွဲ့ သတင်းရင်းမြစ်ကနေ သိရတယ်။

အဆိုပါတိုက်ပွဲနဲ့ ပတ်သက်ပြီး နှစ်ဖက်တပ်တွေ ထိခိုက်ကျဆုံးမှု အခြေအနေ အသေးစိတ်ကိုတော့ လတ်တလော မသိရသေးပါဘူး။

စစ်ကောင်စီတပ်တွေဟာ ဒေသခံပြည်သူလူထုတွေကို ဖမ်းဆီး၊ နှိပ်စက်၊ သတ်ဖြတ်၊ နယ်မြေကျူးကျော်လာတဲ့အတွက် စခန်းသိမ်းခဲ့တာဖြစ်ပြီး ရှေ့ဆက်ပြီးလည်း ကရင်ပြည်နယ်ရှိ စစ်ကောင်စီတပ်စခန်းတွေ ပြန်လည်မဆုတ်ခွာပါက  စခန်းသိမ်းတိုက်ပွဲတွေ ဆက်လုပ်သွားမယ်လို့ KNLA ပူးပေါင်းတပ်ဖွဲ့ဝင်က ပြောပါတယ်။

စက်တင်ဘာ ၂၇ ရက်ကလည်း မြဝတီ- ဝေါလေလမ်းကြောရှိ ဘာဂျာဘုရားကုန်းကို KNLA၊ KNDO၊ PDF ပူးပေါင်းတပ်ဖွဲ့က သိမ်းပိုက်နိုင်ခဲ့ပြီး ဘုရားကုန်းမှာ အခြေချတပ်စွဲထားနိုင်ခဲ့သလို တောင်နီ- ဆုံဆည်းမြိုင်- ဝေါလေလမ်းကြောင်းတွေကို KNLA ပူးပေါင်းတပ်ဖွဲ့က ပိတ်ဆို့ထားနိုင်ခဲ့ပါတယ်။

ကေအန်ယူ တပ်မဟာ (၆) နယ်မြေ၊ တောင်နီကျေးရွာအနီးသို့ ကျူးကျော်ဖို့ ကြိုးစားလာတဲ့ စစ်ကောင်စီ တပ်မ (၄၄) လက်အောက်ခံ နည်းဗျူဟာ (၄၄၃) ကွပ်ကဲမှုရဲ့  ခမရ (၁၀၄) တပ်ဖွဲ့တွေကို KNLA တပ်ရင်း (၂၇) ကော်ဘရာစစ်ကြောင်းနဲ့ တပ်မဟာ စစ်ကြောင်း တပ်ခွဲ (၂) မှ စက်တင်ဘာ ၂၇ ရက်မွန်းလွဲပိုင်းမှာ တိုက်ခိုက်ခဲ့ပါတယ်။

အဆိုပါတိုက်ပွဲမှာ ပူးပေါင်းတပ်ဖွဲ့မှ လက်ဖြောင့်စနိုက်ပါ စစ်သည်တွေရဲ့ပစ်ခတ်မှုကြောင့်  စစ်ကောင်စီတပ်ဖွဲ့ဝင် ၄ ယောက်သေဆုံးသွားတယ်လို ကော်ဘရာတပ်ဖွဲ့က သတင်းထုတ်ပါတယ်။

3 hours Ago

ဖြစ်သင့်ဖြစ်ထိုက်သည့် ဖက်ဒရယ်သာပေးမည်၊ ပြည်ပ ပရောဂကြောင့် EAO များ ဝိဝါဒကွဲနေဟု စစ်ခေါင်းဆောင် ပြစ်တင်ဝေဖန်

ဖက်ဒရယ်အခွင့်အရေးတွေ ပေးအပ်ရာမှာ ဖြစ်သင့်ဖြစ်ထိုက်တဲ့ ဖက်ဒရယ်အခွင့်အရေးတွေကိုသာ ပေးအပ်မှာဖြစ်ကြောင်းနဲ့  ပြည်ပ ပရောဂတွေကြောင့် တိုင်းရင်းသားလက်နက်ကိုင် အဖွဲ့အစည်းတွေ အနေနဲ့ ဝိဝါဒကွဲပြားနေကြတယ်လို့ အာဏာသိမ်းစစ်ခေါင်းဆောင်က ပြောကြားလိုက်ပါတယ်။

စက်တင်ဘာ  ၂၇ ရက်က နေပြည်တော်မှာ ကျင်းပတဲ့ စစ်ကောင်စီအစည်းအဝေးမှာ အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က လက်ရှိ ငြိမ်းချမ်းရေးလုပ်ငန်းစဉ်တွေနဲ့ ပတ်သက်ပြီး ပြောဆိုခဲ့တာပါ။

တပ်မတော်ဟာ နိုင်ငံတော်ကာကွယ်ရေးအတွက် ခိုင်မာတဲ့ အဖွဲ့အစည်းတစ်ခုဖြစ်ကြောင်း၊ လက်တွေ့နယ်ပယ်မှာ PDF တွေနဲ့ ဆက်နွှယ်တဲ့ EAO အဖွဲ့တွေနဲ့ ထိခိုက်မှုများ များပြားနေကြောင်း၊ အဆိုပါ ထိတွေ့တိုက်ခိုက်မှုဖြစ်ပွားတဲ့ ဒေသတွေထိခိုက်ဆုံးရှုံး ပိုမိုများပြားကြောင်း၊  ပြည်သူလူထု၊ တပ်မတော်နဲ့ ရဲတပ်ဖွဲ့တွေ ထိခိုက်မှုရှိလာမယ်ဆိုပါက လက်တွေ့ကျတဲ့တုံ့ပြန်မှု ဆောင်ရွက်သွားမှာဖြစ်ကြောင်း၊ တပ်မတော်အနေနဲ့ နိုင်ငံတော်ကို ပါတီစုံဒီမိုကရေစီလမ်းကြောင်းပေါ်မှာ လျှောက်လှမ်းနိုင်ရေးဆောင်ရွက်နေပြီး ဒီမိုကရေစီနှင့် ဖက်ဒရယ်စနစ်ကိုအခြေခံတဲ့ ပြည်ထောင်စုကို တည်ဆောက် နေခြင်းဖြစ်ကြောင်း၊ ဖက်ဒရယ်အခွင့်အရေးတွေပေးအပ်ရာမှာ ဖြစ်သင့်ဖြစ်ထိုက်တဲ့ ဖက်ဒရယ်အခွင့်အရေးတွေကိုသာ ပေးအပ်မှာဖြစ်ကြောင်း၊ ဖက်ဒရယ်စနစ် ကျင့်သုံးတဲ့ တခြားနိုင်ငံတွေမှာလည်း အလားတူပဲလို့ စစ်ခေါင်းဆောင်က ပြောပါတယ်။

အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ဟာ စက်တင်ဘာ ၂၆ ရက်မနက်က  'ဝ'ပြည်သွေးစည်းညီညွတ်ရေးပါတီ (UWSP)၊ အမျိုးသားဒီမိုကရက်တစ်မဟာမိတ်တပ်မတော်  (NDAA) မိုင်းလားအဖွဲ့နဲ့ ရှမ်းပြည်တိုးတက်ရေးပါတီ (SSPP) အဖွဲ့ ၃ ဖွဲ့က ခေါင်းဆောင်တွေနဲ့  နေပြည်တော်မှာ ဒုတိယအကြိမ် တွေ့ဆုံပါတယ်။

ဒီတွေ့ဆုံပွဲမှာ   ‘ဝ’ ပြည်နယ်ထူထောင်ခွင့်နဲ့ မိုင်းလားကိုယ်ပိုင်အုပ်ချုပ်ခွင့်ပေးဖို့ စစ်ခေါင်းဆောင်က မူအားဖြင့် သဘောတူခဲ့သလို SSPP ကလည်း ဗမာပြည်နယ်ဖွဲ့စည်းရေးကိစ္စတွေ ဆွေးနွေးခဲ့တယ်လို့ သတင်းတွေ ထွက်ပေါ်ခဲ့တာပါ။ 

လက်ရှိငြိမ်းချမ်းရေးနဲ့ပတ်သက်လို့ ပထမအဆင့် တွေ့ဆုံဆွေးနွေးခဲ့ပြီး ဒုတိယအဆင့် တွေ့ဆုံဆွေးနွေးမှုတွေ ပြုလုပ်နေကြောင်း၊ ၂၀၀၈ ဖွဲ့စည်းပုံအခြေခံဥပဒေနဲ့ တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် NCA ကို မျက်ကွယ်ပြုလို့မရကြောင်း၊ ပြည်ပ ပရောဂတွေကြောင့် တိုင်းရင်းသားလက်နက်ကိုင်အဖွဲ့အစည်းတွေ အနေနဲ့ ဝိဝါဒကွဲပြားမှုများရှိကြောင်း၊ လက်နက်ကိုင်တိုင်းရင်းသားအဖွဲ့တွေရဲ့ တောင်းဆိုချက်တွေမှာ ဖွဲ့စည်းပုံအခြေခံဥပဒေ ပြင်ဆင်ရေးဆိုင်ရာကိစ္စရပ်တွေ ပါဝင်ပြီး လွှတ်တော်လမ်းကြောင်းမှသာ ဆောင်ရွက်နိုင်မယ်လို့ စစ်ခေါင်းဆောင်ကပြောပါတယ်။

လွတ်လပ်ပြီး တရားမျှတတဲ့ ရွေးကောက်ပွဲတစ်ခုကျင်းပနိုင်ရေး ဆောင်ရွက်နေပြီး နောင်လာမယ့်လွှတ်တော်သက်တမ်းမှာ  နိုင်ငံရေးပါတီတွေနဲ့ တွေ့ဆုံဆွေးနွေးခဲ့တဲ့ သဘောတူညီချက်တွေနဲ့ တိုင်းရင်းသားလက်နက်ကိုင်အဖွဲ့တွေနဲ့ တွေ့ဆုံဆွေးနွေးခဲ့တဲ့ သဘောတူညီချက်တွေကိုပေါင်းစပ်ကာ  လွှတ်တော်မှာ ဆွေးနွေးသွားမယ်လို့လည်း  စစ်ခေါင်းဆောင်က ပြောပါတယ်။

တိုင်းရင်းသားလက်နက်ကိုင်အဖွဲ့တွေနဲ့ ငြိမ်းချမ်းရေးဆွေးနွေးဖို့ စစ်ခေါင်းဆောင် မင်းအောင်လှိုင်က ပြီးခဲ့တဲ့ ဧပြီလမှာ စတင်ဖိတ်ခေါ်ခဲ့တာဖြစ်ပြီး ပထမအကြိမ်အဖြစ် တိုင်းရင်းသားလက်နက်ကိုင်အဖွဲ့တချို့နဲ့ မေလကစတင် တဖွဲ့ချင်းတွေ့ဆုံဆွေးနွေးခဲ့ပြီး ဒုတိယအကြိမ်အဖြစ် ဩဂုတ်ကစတင်ပြီး ထပ်မံတွေ့ဆုံနေတာ ဖြစ်ပါတယ်။

စစ်ခေါင်းဆောင် ဖိတ်ခေါ်တဲ့ ငြိမ်းချမ်းရေးဆွေးနွေးပွဲကို သွားရောက်တဲ့ အဖွဲ့အများစုဟာ  ဆယ်စုနှစ်တွေနဲ့ချီပြီး စစ်ကောင်စီတပ်နဲ့ တိုက်ပွဲတွေဖြစ်ပွားတာမရှိတဲ့ တိုင်းရင်းသား လက်နက်ကိုင်အဖွဲ့တွေ ဖြစ်ပါတယ်။

အခုလက်ရှိ တိုက်ပွဲ ပြင်းထန်ဖြစ်ပွားနေတဲ့ KNU၊ KIA ၊ KNPP ၊ CNF ၊ AA နဲ့ TNLA စတဲ့ တိုင်းရင်းသားလက်နက်ကိုင်တပ်ဖွဲ့တွေကတော့ စစ်ခေါင်းဆောင်ဖိတ်ခေါ်တဲ့ ငြိမ်းချမ်းရေးဆွေးနွေးပွဲကို အယုံအကြည်မရှိတဲ့အတွက်  သွားရောက်ခြင်းမရှိပါဘူး။

4 hours Ago

မုံရွာနှင့် ချောင်းဦးကြားတွင် စစ်တပ်ယာဉ်တန်း ၂ ကြိမ် မိုင်းဆွဲတိုက်ခိုက်ခံရ

စစ်ကိုင်းတိုင်း၊ မုံရွာနဲ့ ချောင်းဦးကြားမှာ စစ်ကောင်စီယာဉ်တန်းကို စက်တင်ဘာ ၂၇ ရက် မနက်က ပဒေသာမိုင်းတွေနဲ့ ဖောက်ခွဲတိုက်ခိုက်ခဲ့တယ်လို့ ဒေသကာကွယ်ရေးတပ်ဖွဲ့က ပြောပါတယ်။

အဲ့ဒီစစ်ယာဉ်တန်းဟာ မန္တလေး-မုံရွာ လမ်းပိုင်းမှာ စက်တင်ဘာ ၂၆ ရက်က မိုင်းထိပျက်စီးပြီး ကျန်ရစ်ခဲ့တဲ့ ကား ၂ စီးကို မုံရွာမြို့ဘက် ပြန်လည်ဆွဲယူလာတာဖြစ်ပြီး မုံရွာနဲ့ ချောင်းဦးကြားမှာ ‌ပဒေသာမိုင်း ၃ လုံးတွဲနဲ့ ဖောက်ခွဲတိုက်ခိုက်ခဲ့တာလို့ ဆိုပါတယ်။

ဒေသကာကွယ်ရေးတပ်ဖွဲ့ဖြစ်တဲ့ People's Defence Force - South Monywa မှ တာဝန်ရှိသူက “ပျက်စီးလို့ ဆွဲလာတဲ့ ကားနှစ်စင်း အပါအဝင် စစ်ယာဉ်တန်းမှာ စုစုပေါင်း ၆ စင်း မောင်းလာတာ။ ပဒေသာမိုင်းနဲ့ ပထမအကြိမ် တိုက်ခိုက်တာ ၃ စင်းမြောက်နဲ့ ၅ စင်းမြောက်ကားတွေကို အတိအကျ ထိမှန်ပါတယ်။ အဲ့ဒီမှာ သူတို့ဘက်က RPG တလုံး အပါအဝင် လက်နက်ငယ်တွေနဲ့ ရမ်းပစ်ပြီး မောင်းပြေးသွားတယ်။ ကျနော်တို့ဘက်ကတော့ ရဲဘော်တချို့ ပွန်းပဲ့ဒဏ်ရာ အနည်းငယ်ကလွဲရင် ကြီးကြီးမားမား ဘာမှမဖြစ်ခဲ့ပါဘူး” လို့ ပြောပါတယ်။

ဒါ့အပြင် မောင်းပြေးသွားတဲ့ အဲ့ဒီစစ်ယာဉ်တန်းကို ၁၅ မိနစ်လောက်အကြာမှာ ပဒေသာမိုင်း ၃ လုံးနဲ့ ထပ်မံဖောက်ခွဲတိုက်ခိုက်ရာ ၆ စီးမြောက်ကား ကိုယ်ထည်ကို ထိမှန်ခဲ့တဲ့အပြင် ကားမှန်တွေလည်း ပျက်စီးသွားပြီး အချိန်အတန်ကြာ ထိုးရပ်သွားခဲ့တယ်လို့ ဆိုပါတယ်။

အဲ့ဒီနောက် ‌ရှေ့ယာဥ်တန်းမှာ မောင်းသွားတဲ့ စစ်ကားတစီးက ပြန်လှည့်ကာ မိုင်းထိသွားတဲ့ ကားကို ဆွဲယူသွားတယ်လို့ သိရပါတယ်။

ပထမအကြိမ် မိုင်းဆွဲတိုက်ခိုက်မှုမှာ စစ်ကောင်စီတပ်ဖွဲ့ဝင် ၃ ယောက် သေဆုံးခဲ့ပြီး ဒုတိယအကြိမ် တိုက်ခိုက်မှုမှာတော့ ၇ ယောက် သေဆုံးသွားတဲ့အပြင် ဒဏ်ရာရသူလည်း များပြားတယ်လို့ ဒေသကာကွယ်ရေးတပ်ဖွဲ့က ပြောပါတယ်။

အဲ့ဒီတိုက်ခိုက်မှုတွေကို People's Defence Force - South Monywa၊ Monywa Ranger Group/Truth Army နဲ့ Farmers Revolution Force တို့က ‌လုပ်ဆောင်ခဲ့တာလို့ သိရပါတယ်။

စက်တင်ဘာ ၂၅ ရက်နေ့ကလည်း မုံရွာ-ချောင်းဦး လမ်းပိုင်းမှာ မိုင်းထိမှန်ပျက်စီးသွားတဲ့ စစ်ကားကို ပြုပြင်နေတဲ့ စစ်ကောင်စီတပ်ဖွဲ့ဝင်တွေကို ချောင်းဦးဒေသကာကွယ်ရေး ပူးပေါင်းအဖွဲ့တွေက ဝင်ရောက်ပစ်ခတ်တိုက်ခိုက်ခဲ့ရာ စစ်သား ၈ ယောက် သေဆုံးပြီး သေနတ် ၃ လက်နဲ့အတူ ကျည်တွေကိုလည်း သိမ်းဆည်းရမိခဲ့တယ်လို့ သိရပါတယ်။

4 hours Ago

မြစ်ကြီးနားမြို့ပေါ်တွင် မိုင်းသတိပေး ကြေညာချက်ကြောင့် ဒေသခံများ စိုးရိမ်

ကချင်ပြည်နယ်၊ မြစ်ကြီးနားမြို့ပေါ်မှာ မိုင်းရှိသည်ဆိုတဲ့ သတိပေးကြေညာချက် ကပ်ထားတဲ့အတွက် စိုးရိမ်ထိတ်လန့်နေတယ်လို့ ဒေသခံတွေက ပြောပါတယ်။

သီတာရပ်ကွက်မှာရှိတဲ့ စစ်ဘက်ရေးရာလုံခြုံရေးတပ်ဖွဲ့ရုံး ခြံစည်းရိုး အုတ်တံတိုင်းမှာ မိုင်းရှိသည်၊ ဖြတ်သန်းသွားလာခြင်းမပြုရ ဆိုတဲ့ သတိပေးကြေညာချက် ချိတ်ဆွဲထားတဲ့အတွက် စိုးရိမ်ထိတ်လန့်နေကြတာလို့ ဆိုပါတယ်။

သီတာရပ်ကွက်နေ ပြည်သူတယောက်က “မြို့ပေါ်ရပ်ကွက်ထဲမှာ ဒါမျိုး မိုင်းသတိပေးကြေညာချက် ကပ်တာ တခါမှ မတွေ့ခဲ့ရဘူး။ ကလေးတွေက ခြံစည်းရိုးနား သွားကစားနေတာ။ အဲ့နား သွားမဆော့အောင်တော့ ပြောထားရတယ်။ ကိုယ် သတိလက်လွတ်ဖြစ်နေတဲ့အချိန် အဲ့အနားသွားဆော့လို့ တခုခုဖြစ်သွားမှာ စိုးရိမ်တယ်” လို့ ပြောပါတယ်။

မိုင်းရှိသည် သတိပေးကြေညာချက်ကို စက်တင်ဘာ ၂၇ ရက်က စစ်ကောင်စီလက်အောက်ခံ အဖွဲ့တွေ လိုက်ကပ်ခဲ့တာဖြစ်ပြီး အရင်ရက်တွေကလည်း စ.ရ.ဖရုံးနဲ့ ဆုတောင်းပြည့် ဘုရားအနီး ဖြတ်သန်းသွားလာတဲ့ ဆိုင်ကယ်တွေကို စစ်ကောင်စီတပ်ဖွဲ့ဝင်တွေက Tool Box ဖွင့်ခိုင်းပြီး စစ်ဆေးခဲ့တယ်လို့ ဆိုပါတယ်။

မြစ်ကြီးနားမြို့ သီတာရပ်ကွက်မှာရှိတဲ့ စစ်ဘက်ရေးရာလုံခြုံရေးတပ်ဖွဲ့ (စ.ရ.ဖ) ရုံးကို စက်တင်ဘာ ၈ ရက်က ဒေသခံ ပြည်သူ့ကာကွယ်ရေးတပ် KPDF က သွားရောက် တိုက်ခိုက်ခဲ့ပါသေးတယ်။

4 hours Ago

ဆင်မင်းရွာတိုက်ပွဲတွင် စစ်ကောင်စီတပ်ဖွဲ့ဝင် ၂ ဦးနှင့် PDF ၁ ဦး ကျဆုံး

စစ်ကိုင်းတိုင်း၊ မြောင်မြို့နယ်၊ ဆင်မင်းကျေးရွာမှာ စက်တက်ဘာ ၂၇ ရက် မနက် ၄ နာရီလောက်က တိုက်ပွဲဖြစ်ပွားခဲ့ပြီး စစ်ကောင်စီတပ်က ၂ ဦးကျဆုံးပြီး ၅ ဦး ဒဏ်ရာရခဲ့တယ်လို့ သိရပါတယ်။

မြောင်မြို့နယ် ကျောက်ရစ်စခန်းကနေ မနက် ၃ နာရီလောက် ဆင်မင်းရွာကို ဝင်ရောက်လာတဲ့ စစ်ကောင်စီတပ်နဲ့ ပြည်သူ့ကာကွယ်ရေးတပ် (PDF) တို့ တိုက်ပွဲဖြစ်ပွားခဲ့ကြတာလို့ သိရပါတယ်။

မြောင်မြို့နယ် ပြည်သူ့တပ်မတော်အဖွဲ့မှ ကိုသမန်းကျားက “သူတို့ထွက်လာပြီဆိုတဲ့သတင်း ကြားတာနဲ့ ဆင်မင်းရွာထိပ်ကနေ ကြိုတင်ကင်းစောင့်ဖို့ အသွားမှာ စစ်ကောင်စီတပ်နဲ့ ထိပ်တိုက်တိုးပြီး မီတာ ၅၀ အကွာအဝေးလောက်မှာ တိုက်ပွဲဖြစ်ပွားခဲ့တယ်။ သူတို့ဘက်ကတော့ အသေအပျောက် ၂ ဦးရှိကာ ၅ ဦး ဒဏ်ရာရတယ်လို့ သိရတယ်။ ကျနော်တို့ဘက်ကတော့ တပ်စိပ်မှူး ဗိုလ်စနေ ကျဆုံးသွားရတယ်။ ကျဆုံးသွားတဲ့ ရဲ‌ဘော်ရဲ့ အသက်က ၂၅ နှစ်လောက်ပဲရှိမယ်” လို့ ပြောပါတယ်။

ဒေသခံရွာသားတဦးက “မနက်ခင်း အစောကြီး တိုက်ပွဲဖြစ်ပွားကြတာ။ သူတို့လာမယ်ဆိုတာ ကြိုမသိထားတော့ အိပ်နေရာကနေ ထပြေးရတာဗျ။ PDF တွေကတော့ ရွာသားတွေကို ကယ်ထုတ်ပေးတယ်။ စစ်ကောင်စီကတော့ ရွာက ဦးဇင်းလေးကို ခေါင်းကို ခြေထောက်နဲ့ လေးငါးချက်လောက်ကန်ပြီး သူတို့ကို သေနတ်နဲ့ပစ်တဲ့ PDF တွေက ဘယ်သူလဲလို့ စစ်မေးတာတွေ လုပ်ခဲ့တယ်။ နောက်ပြီး သူတို့ထဲက အသေအလောင်းနှစ်လောင်းကို သင်္ကန်းတွေနဲ့ ပုခက်လုပ်ပြီး မနက် ၄ နာရီ‌လောက် ကျောက်ရစ်စခန်းကို ပြန်သွားကြတယ်။ ဒဏ်ရာရတဲ့သူကလည်း ၅ ဦးလောက်ရှိမယ်” လို့ ပြောပါတယ်။

မြောင်မြို့နယ်အတွင်း စစ်ကောင်စီတပ်တွေက ညဘက် စစ်ကြောင်းထိုးတာတွေ ပြုလုပ်နေတာကြောင့် ညအချိန် ထွက်ပြေးနေရပြီး ဒုက္ခရောက်ရတယ်လို့ ဒေသခံတွေက ပြောပါတယ်။

အခုတိုက်ပွဲဖြစ်ရာ ဆင်မင်းကျေးရွာဟာ အိမ်ခြေ ၁၇၀ လောက်ရှိပြီး စစ်ကောင်စီ အထိုင်ချစခန်းဖြစ်တဲ့ ကျောက်ရစ်စခန်းနဲ့ နှစ်မိုင်လောက်သာဝေးတဲ့ ကျေးရွာဖြစ်တယ်လို့ သိရပါတယ်။

မြောင်မြို့နယ်အတွင်း စစ်ကောင်စီတပ်နဲ့ ဒေသခံ ပြည်သူ့ကာကွယ်ရေး ပူးပေါင်းတပ်တို့ စစ်ရေးအခြေအနေ နေ့စဉ်တိုင်းလိုလို တင်းမာနေတယ်လို့ ဒေသခံတွေက ပြောပါတယ်။

4 hours Ago
More News
Up