နိုင်ငံတကာ

A d v e r t i s e m e n t With Us

March 2, 2021

အကြမ်းဖက်မှုများရပ်တန့်ရန်နှင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို လွှတ်ပေးရန် အာဆီယံဝန်ကြီးများတောင်းဆို

မြန်မာစစ်တပ်အနေနဲ့ အကြမ်းဖက်မှုတွေကို ရပ်တန်းကရပ်ဖို့၊ မြန်မာပြည်သူတွေရဲ့ ဆန္ဒကို လေးစားဖို့နဲ့ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်အပါအဝင် ဖမ်းဆီးခံထားရတဲ့ နိုင်ငံရေးအကျဉ်းသားတွေ အားလုံးကို ပြန်လွှတ်ပေးဖို့   အာဆီယံနိုင်ငံခြားရေးဝန်ကြီးတွေက တောင်းဆိုလိုက်ပါတယ်။

အာဆီယံနိုင်ငံခြားရေးဝန်ကြီးများအစည်းအဝေးကို  ဒီကနေ့ မတ်လ ၂ ရက်မှာ အွန်လိုင်းကနေ ကျင်းပရာမှာ  အာဏာသိမ်း မြန်မာစစ်ခေါင်းဆောင်တွေကို ခုလို သတင်းစကားပါးလိုက်တာ ဖြစ်ပါတယ်။ 

မြန်မာနိုင်ငံရဲ့ အခြေအနေကို စိုးရိမ်တဲ့အကြောင်း သက်ဆိုင်သူအားလုံးအနေနဲ့ အကြမ်းဖက်မှုတွေ ထပ်မြင့်တက်မလာအောင် ရှောင်ရှားဖို့နဲ့ ဘက်အားလုံးအနေနဲ့  အဆုံးစွန်ထိ ထိန်းထိန်းသိမ်းသိမ်း အပျော့ပြောင်းဆုံး  လုပ်ဆောင်ကြဖို့ အာဆီယံက တောင်းဆိုပါတယ်။

မြန်မာပြည်သူတွေနဲ့ သူတို့ရဲ့ လူမှုဘဝ ကျိုးစီးပွားအတွက်  သက်ဆိုင်သူအားလုံးအနေနဲ့ အပြုသဘောဆွေးနွေးညှိနှိုင်းပြီး ငြိမ်းချမ်းစွာ အဖြေရှာဖို့  သက်ဆိုင်သူအားလုံးကို အာဆီယံအနေနဲ့ တောင်းဆိုတယ်၊ ဒါနဲ့ ပတ်သက်ပြီး အာဆီယံအနေနဲ့ မြန်မာကို  အပြုသဘော အကူအညီပေးဖို့ အသင့်ရှိတယ်လို အာဆီယံကြေညာချက်မှာ ဖော်ပြထားပါတယ်။ 

ဒီကြေညာချက်ကို အခုနှစ် အာဆီယံ အလှည်ကျ ဥက္ကဋ္ဌ တာဝန်ယူထားတဲ့ ဘရူနိုင်းနိုင်ငံက အာဆီယံနိုင်ငံခြားရေးဝန်ကြီးများအစည်းအဝေးအပြီး ထုတ်ပြန်လိုက်တာဖြစ်ပါတယ်။ 

မြန်မာ့အရေးနဲ့ ပတ်သက်ပြီး အာဆီယံအနေနဲ့ ဆက်လက်ညှိနှိုင်းဆောင်ရွက်လိုပေမဲ့ ပြဿနာရဲ့ အဖြေကတော့ မြန်မာနိုင်ငံထဲမှာပဲ မူတည်နေတယ်လို့ စင်ကာပူနိုင်ငံခြားရေးဝန်ကြီး ဗီဗီရန်ဘာလာခရီရှနန်က  အစည်းအဝေး အပြီးမှာ မီဒီယာတွေကို ပြောပါတယ်။ 

“ရေရှည်အတွက်ခိုင်မာတဲ့ အဖြေရဖို့တခုတည်းသော နည်းလမ်းကတော့ အမျိုးသားပြန်လည်ရင်ကြားစေ့ရေး ဖြစ်ပေါ်ဖို့ဖြစ်ပြီး အထူးဖြင့် သမ္မတ ဦးဝင်းမြင့်နဲ့  နိုင်ငံတော်အတိုင်ပင်ခံ ပုဂ္ဂိုလ်ဒေါ်အောင်ဆန်းစုကြည်နဲ့ တခြား နိုင်ငံရေးအကျဉ်းသားတွေအားလုံးကို ပြန်လွှတ်ပေးဖို့ ကျနော်တို့ တောင်းဆိုပါတယ်” လို့  စင်ကာပူ နိုင်ငံခြားရေးဝန်ကြီးက ပြောပါတယ်။ 

ဒါ့အပြင် စင်ကာပူနိုင်ငံအနေနဲ့ အာဏာသိမ်းစစ်ကောင်စီကို မြန်မာအစိုးရအဖြစ် အသိအမှတ်မပြုဘူးလို့လည်း ပြောပါတယ်။

“စစ်ခေါင်းဆောင်တွေကို မြန်မာအစိုးရအဖြစ် ကျနော်တို့ အသိအမှတ်မပြုပါဘူး။ ဒါပေမဲ့ ၂၀၀၈ အခြေခံဥပဒေအရ မြန်မာ့နိုင်ငံရေးမှာ စစ်တပ်ဟာ  အထူးအခန်းကဏ္ဍရှိတဲ့ အဖွဲ့အစည်းဆိုတာ အသိအမှတ်ပြုတယ်” လို့  စင်ကာပူနိုင်ငံခြားရေးဝန်ကြီးကပြောပါတယ်။

အလားတူ မလေးရှား နိုင်ငံခြားရေးဝန်ကြီး ဟစ်ဟမ်မူဒင်ဟူစိန်ကလည်း  နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နဲ့ တခြားဖမ်းဆီးခံနေရသူတွေကို  ချက်ချင်းလွှတ်ပေးဖို့တောင်းဆိုလိုက်ပြီး အခြေအနေဆိုးလာရင် ဒေသတွင်း ငြိမ်းချမ်းရေး၊ တည်ငြိမ်းရေးနဲ့သာယာဝပြောရေးကို ထိခိုက်လိမ့်မယ်လို့ သတိပေး ပြောပါတယ်။

အင်ဒိုနီးရှားနိုင်ငံခြားရေးဝန်ကြီး ရတ်နိုမာဆီဒီကတော့ မြန်မာနိုင်ငံမှာ ဒီမိုကရေစီစနစ် ပြန်လည် ဖော်ဆောင်ရမယ်လို့  ပြောပါတယ်။  

အင်ဒိုနီးရှားအနေနဲ့ မြန်မာပြည်သူတွေရဲ့ ဆန္ဒ၊ အသံနဲ့ အကျိုးစီးပွားကို အလေးထားတဲ့အကြောင်း သက်ဆိုင်သူအားလုံးဆွေးနွေးမှုတွေ စတင်ဖို့ တောင်းဆိုတဲ့ အကြောင်းနဲ့ နိုင်ငံရေး အကျဉ်းသားတွေကိုလွှတ်ပေးတာအပါအဝင် ဆက်သွယ်ဆောင်ရွက်နိုင်တဲ့ အခြေအနေ ဖန်တီးဖို့လိုတယ်လို့လည်းပြောပါတယ်။

ဖိလစ်ပိုင်နိုင်ငံခြားရေးဝန်ကြီးကလည်း နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို လွှတ်ပေးဖို့ တောင်းဆိုလိုက်ပါတယ်။ ထိုင်းနိုင်ငံကတော့ အသံတိတ်နေခဲ့ပြီး မြန်မာနိုင်ငံရဲ့ ဖြစ်ပေါ်တိုးတက်မှုအခြေအနေတွေကို စိုးရိမ်စွာ စောင့်ကြည့်နေတယ်လို့ ထိုင်းနိုင်ငံခြားရေး ဝန်ကြီးက ပြောပါတယ်။

စင်ကာပူဝန်ကြီးချုပ် လီရှန်လွန်းကတော့ မြန်မာအပေါ် ပိတ်ဆို့ဒဏ်ခတ်မှုတွေလုပ်ရင် စစ်တပ်နဲ့ ဗိုလ်ချုပ်ကြီးတွေကို ထိခိုက်မှာမဟုတ်ဘဲ မြန်မာပြည်သူတွေကို ထိခိုက်နစ်နာမှာ ဖြစ်တယ်လို့  ဒီကနေ့ ဘီဘီစီနဲ့ မေးမြန်းရာမှာ ပြောပါတယ်။ 

ပြီးခဲ့တဲ့ တနင်္ဂနွေနေ့က မြန်မာနိုင်ငံမှာ ငြိမ်းချမ်းစွာဆန္ဒပြတဲ့ ပြည်သူတွေကို စစ်တပ်က အကြမ်းဖက်ပစ်ခတ်နှိမ်နင်းခဲ့လို့   လူ ၂၀ လောက် သေဆုံးခဲ့ပြီးနောက်မှာ  ဒီအစည်းအဝေးကျင်းပခဲ့တာဖြစ်ပြီး  အာဏာသိမ်း စစ်ကောင်စီကခန့်အပ်တဲ့ ဦးဝဏ္ဏမောင်လွင်လည်း တက်ရောက်ခဲ့ပါတယ်။

REF- Agencies

5 hours Ago

မြန်မာ့အရေးဆွေးနွေးပွဲက အာဆီယံအတွက် အကြီးမားဆုံးသံတမန်ရေးစိန်ခေါ်မှု ဖြစ်လာမလား

လတ်တလော ဖြစ်ပျက်နေတဲ့ မြန်မာ့အရေးနဲ့ ပတ်သက်ပြီး အာဆီယံ နိုင်ငံခြားရေးဝန်ကြီးတွေအကြား အထူးအစည်းအဝေး ဆွေးနွေးပွဲတရပ်ကို ဒီကနေ့ ကျင်းပဖို့ ရှိနေပါတယ်။

ဒီဆွေးနွေးပွဲမှာတော့ အာဆီယံ ၁၀ နိုင်ငံအနေနဲ့ ဒေသတွင်း အဖွဲ့ဝင် နိုင်ငံတနိုင်ငံ အနေနဲ့ ဒီမိုကရေစီလမ်းကြောင်းပေါ်မှာ ရုတ်တရက်ရင်ဆိုင်ရတဲ့အခြေအနေတွေနဲ့ ပတ်သက်ပြီး ဆွေးနွေးသွားကြမှာ ဖြစ်ပါတယ်။

လက်ရှိအချိန်ထိတော့ မြန်မာနိုင်ငံမှာ ပြီးခဲ့တဲ့ ဖေဖော်ဝါရီ ၁ ရက်က စတင်ပြီး ၅ နှစ်သက်တမ်းရှိ အရပ်သားအစိုးရကို စစ်တပ်က အာဏာသိမ်းမှုအပေါ် ဒေသတွင်း သံတမန်ရေးရာ တုံ့ပြန်မှုအနေနဲ့ အင်ဒိုနီးရှားနိုင်ငံက ဦးဆောင်နေတာကို တွေ့ရပါတယ်။

ဒီကနေ့ ပြုလုပ်မယ့် အာဆီယံနိုင်ငံခြားရေးဝန်ကြီးတွေ အစည်းအဝေးမှာတော့ အာဏာသိမ်း စစ်တပ်က အသစ်ခန့်အပ်ထားတဲ့ နိုင်ငံခြားရေး၀န်ကြီး ဦးဝဏ္ဏမောင်လွင်က မြန်မာနိုင်ငံ ကိုယ်စားပြုအနေနဲ့ တက်ရောက်ဆွေးနွေးလိမ့်မယ်လို့ မျှော်မှန်းရပါ တယ်။

ပြီးခဲ့တဲ့ တပတ်လောက်ကတော့ အင်ဒိုနီးရှား နိုင်ငံခြားရေးဝန်ကြီး ရက်တ်နိုမာဆုဒီနဲ့ ဦးဝဏ္ဏမောင်လွင်တို့ဟာ ထိုင်းနိုင်ငံမှာ အလွတ်သဘော တွေ့ဆုံခဲ့ကြပါတယ်။ အဲဒီတွေ့ ဆုံပွဲကို ထိုင်းနိုင်ငံခြားရေးဝန်ကြီးပါ တက်ရောက်ခဲ့ကာ ဒါဟာ မြန်မာအာဏာသိမ်း စစ်အစိုးရနဲ့ တရားဝင်ဆက်ဆံရေး ဖြစ်လာစေဖို့ဆိုပြီး လူ့အခွင့်အရေးအုပ်စုတွေအပါအဝင် အားလုံးက ဒေါသထွက်ခဲ့ကြပါတယ်။

ခုသီတင်းပတ်အတွင်း မြန်မာစစ်တပ်ရဲ့ ရက်ရက်စက်စက် အကြမ်းဖက်တိုက်ခိုက်မှုကြောင့် လမ်းပေါ်ထွက် ဆန္ဒပြသူ ၁၈ ဦးထက်မနည်း သေဆုံးမှုတွေရှိလာခဲ့ပြီးနောက် ပိုပြီးတော့ ပြစ်တင်ရှုတ်ချမှုတွေ ကျယ်ကျယ်လောင်လောင် ထွက်ပေါ်လာခဲ့ပါတယ်။

နယူးဇီလန်နိုင်ငံနဲ့ တခြားသော နိုင်ငံတွေလိုပဲ ဩစတြေးလျနိုင်ငံကိုလည်း အာဏာသိမ်းစစ် တပ်နဲ့ ဆက်သွယ်မှုပြုလုပ်ဖို့ ငြင်းဆိုဖို့နဲ့ ပိုမိုအားကောင်းတဲ့ ရပ်တည်ချက်အနေနဲ့ တွန်းအားပေးခံထားရပါတယ်။

အင်ဒိုနီးရှားနိုင်ငံကတော့ စစ်တပ်အာဏာပိုင်တွေနဲ့ ဆက်သွယ်ရုံသာမက တနှစ်အတွင်း ရွေးကောက်ပွဲ ပြန်လည်ကျင်းပဖို့ ကတိကဝတ်နဲ့ စစ်အာဏာသိမ်းမှုကို တရားဝင်ဖြစ်စေတဲ့ သဘောထားကြောင့် ကျယ်ကျယ်လောင်လောင် ဝေဖန်ခံနေခဲ့ရတာပါ။

ပြီးခဲ့တဲ့ ၂၀၂၀ ပြည့်နှစ် မြန်မာနိုင်ငံရဲ့ အထွေအထွေရွေးကောက်ပွဲမှာ ဒေါ်အောင် ဆန်းစုကြည်ဦးဆောင်တဲ့ အန်အယ်ဒီပါတီအနိုင်ရရှိခဲ့မှုဟာ အောင်ပွဲအသံတခုဖြစ်ခဲ့ပြီး ပါတီထောက်ခံသူတွေက ဒီရွေးကောက်ပွဲရလဒ်ဟာ တရားဝင်ဖြစ်တာမို့ ပြန်ပြီးတော့ ကျင်းပဖို့ မလိုအပ်ဘူးလို့ ငြင်းဆိုထားကြပါတယ်။

“ငါတို့မြန်မာပြည်သူတွေအားလုံးက ငါတို့အစိုးရကို ရွေးချယ်ခဲ့ကြပြီးပြီ။ ရွေးကောက်ပွဲ ပြန်ကျင်းပဖို့ မလိုအပ်ဘူး။ အလိုမရှိဘူး။ အာဆီယံအနေနဲ့ မြန်မာပြည်သူတွေရဲ့ မဲတွေကို လေးစားသင့်တယ်”လို့ တွစ်တာလူမှုကွန်ရက်ပေါ်မှာ မြန်မာနိုင်ငံသားတယောက်က ရေးတင်ထားပါတယ်။ 

ဒီလိုအခြေအနေမှာ အာဆီယံအနေနဲ့ ဘယ်လိုဆက်ဆံရေးမျိုးကို ဆက်လုပ်ကြမလဲ။ အင်ဒိုဝန်ကြီး ရက်တ်နိုက ဦးဝဏ္ဏမောင်လွင်ကို နိုင်ငံခြားရေးဝန်ကြီးအဖြစ် ရည်ညွှန်း တွေ့ဆုံခဲ့တာမျိုးကို ရှောင်ရှားနိုင်ဖို့၊ နို၀င်ဘာရွေးကောက်ပွဲမှာ အမတ်နေရာတွေ အနိုင်ရခဲ့တဲ့ ပြည်ထောင်စုလွှတ်တော်ကိုယ်စားပြုကော်မတီနဲ့လည်း ဆက်သွယ်ဖို့တွေ ရှိလာပါတယ်။

ခြံစည်းရိုးရဲ့ နှစ်ဘက်စလုံးမှာ လမ်းလျှောက်ရတာ မလွယ်ကူလှပါဘူး၊ ဒါပေမဲ့ အင်ဒိုနီးရှားသမ္မတ ဂျိုကိုဝီဒိုဒိုကတော့ သူ့ရဲ့လုပ်ရပ်တွေက မြန်မာပြည်သူတွေကို ကူညီနိုင်မယ်ဆိုရင် ဝေဖန်မှုတွေကို ခံနိုင်တယ်လို့ ပြောလိုက်ပါတယ်။

အင်ဒိုဝန်ကြီး ရက်တ်နိုကတော့ ဒီအရေးမှာ “အင်ဒိုနီးရှားက ရပ်တန့်နေမှာ မဟုတ်ပါဘူး။ ဘာမှမလုပ်တာက ရွေးချယ်စရာ မဟုတ်ဘူး” လို့ ဒေသတွင်း သတင်းမီဒီယာတွေကို ပြောခဲ့တာပါ။

ယူကေနိုင်ငံဆိုင်ရာ အင်ဒိုနီးရှား သံအမတ်ဟောင်းတဦးဖြစ်တဲ့ ရီဇယ်လ်ဆုခ်မာရဲ့ ထင်မြင်ချက်ကိုတော့ ပြီးခဲ့တဲ့ တပတ်က သည်ဂျကာတာပို့စ်သတင်းမှာ ဖော်ပြထားခဲ့ပါတယ်။

“အင်ဒိုနီးရှားအတွက် အလွယ်ဆုံး ရွေးချယ်မှုက စစ်အာဏာသိမ်းမှုကို ပြစ်တင် ရှုတ်ချပြီး အဆက်အသွယ်အားလုံးဖြတ်မယ်၊ ပိတ်ဆို့အရေးယူမှုတွေလုပ်ပြီး မြေပြင်မှာ ဘာတွေဖြစ်နေမလဲဆိုတာကို ထိုင်ကြည့်နေရုံပဲပေါ့။ ဒီချဉ်းကပ်မှုက ကောင်းတဲ့ ခံစားမှု ပေးပေမယ့် မြန်မာပြည်သူတွေအတွက်တော့ အများကြီး အကျိုးရှိမှာ မဟုတ်ပါဘူး။ ဒါကြောင့် အင်ဒိုနီးရှားအနေနဲ့ ဒီလိုချဉ်းကပ်မှုမျိုးကို မရွေးချယ်ပဲ သွေးထွက်သံယို ဖြစ်စေမှုတွေကို ရှောင်ရှားဖို့၊ ကုန်ကျစရိတ်တွေ အားလုံးကို ကာကွယ်နိုင်ဖို့ တက်တက်ကြွကြွ လုပ်ဆောင်ဖို့ လိုအပ်ပါတယ်”

စင်ကာပူနိုင်ငံ အပြည်ပြည်ဆိုင်ရာ မဟာဗျူဟာလေ့လာရေးအင်စတီကျု၊ အရှေ့ တောင်အာရှနိုင်ငံရေးပြောင်းလဲမှုနဲ့ နိုင်ငံခြားရေးမူဝါဒသုတေသီ အေရွန်ကော်နဲလီက “မြန်မာမှာ နှစ်ဘက်စလုံးက ဝေးနေသမျှကာလပတ်လုံး အဓိပ္ပာယ်ပြည့်ဝတဲ့ ဖျန်ဖြေမှု ဖြစ်မလာနိုင်တာက စိန်ခေါ်မှုတခု ဖြစ်ပါတယ်”လို့ ဆိုပါတယ်။

မြန်မာနိုင်ငံမှာ ရေရှည်တည်တံ့မယ့် နိုင်ငံရေး ပြေလည်မှုတွေရရှိနိုင်ဖို့ သက်ဆိုင်တဲ့ အဖွဲ့အားလုံး တွေ့ဆုံဆွေးနွေး အဖြေရှာကြဖို့ စင်ကာပူနိုင်ငံခြားရေး၀န်ကြီး ဘာလာ ခရစ်ရှ်နန်ကလည်း တိုက်တွန်းထားပြီး ဒီလိုညှိနှိုင်းဆွေးနွေးတာတွေ လုပ်ဆောင်ဖို့ဆိုရင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ထိပ်တန်းခေါင်းဆောင်တွေကို ချက်ချင်းလွှတ်ပေးမှပဲ ဖြစ်မယ်လို့လည်း တောင်းဆိုထားပါတယ်။

ရွေးကောက်ပွဲ အနိုင်ရ အန်အယ်ဒီပါတီနဲ့ အာဏာသိမ်းစစ်တပ်ကြား နိုင်ငံရေး အကျပ်အတည်းကနေ ကျော်လွှားနိုင်ဖို့ အာဆီယံဟာ အရေးပါတဲ့ အခန်းကဏ္ဍမှာ ရှိနေတယ်လို့ ထင်မြင်မှုတွေလည်း ရှိနေသလို တဘက်ကလည်း အာဆီယံ ၁၀ နိုင်ငံ မိသားစု ခေါင်းစဉ်အောက်မှာ အဖွဲ့ဝင်နိုင်ငံတွေကြား နိုင်ငံရေးဆိုင်ရာ အလေးပေးမှုတွေတက် ဒေသတွင်း ဖွံ့ဖြိုးတိုးတက်မှုနဲ့ တည်ငြိမ်အေးချမ်းရေးတွေအပေါ်မှာသာ ပိုအလေးပေးတယ် ဆိုတဲ့ သုံးသပ်ချက်တွေလည်း ရှိနေပါတယ်။

REF: Emma Connors / Financial Review

11 hours Ago

March 1, 2021

ဆန္ဒပြပြည်သူများအား ပစ်ခတ်သတ်ဖြတ်မှု ကျူးလွန်သူများကို အရေးယူပေးရန် ဂျပန်တောင်းဆို

ငြိမ်းချမ်းစွာဆန္ဒပြနေကြတဲ့ မြန်မာအရပ်သားပြည်သူတွေအပေါ် အကြမ်းဖက်ပစ်ခတ်သတ်ဖြတ်မှု ကျူးလွန်သူတွေကို အရေးယူပေးဖို့ ဂျပန်အစိုးရက တောင်းဆိုလိုက်ပါတယ်။

မြန်မာစစ်တပ်နဲ့ လုံခြုံရေးတပ်ဖွဲ့ဝင်တွေက အကြမ်းဖက်ပစ်ခတ်မှုတွေကြောင့် ၁ ရက်အတွင်း အအများအပြားသေဆုံးကာ ပြင်းထန်စွာဒဏ်ရာမှုတွေကို ပြင်းထန်စွာဆန့်ကျင်ရှုတ်ချ တယ်လို့ ဒီနေ့မနက် ပြုလုပ်ခဲ့တဲ့ တိုကျိုသတင်းစာရှင်းလင်းပွဲမှာ ဂျပန်အစိုးရ ကက်ဘိနတ်အဖွဲ့ အတွင်းဝန်ချုပ် Mr Katsunobu Kato က ပြောကြားလိုက်တာပါ။

ဒါ့အပြင် အကြမ်းဖက်သတ်ဖြတ်မှု ကျူးလွန်သူတွေကို အရေးယူအပြစ်ဒဏ်ပေးဖို့နဲ့ ငြိမ်းချမ်းစွာဆန္ဒပြသူတွေကို အခုလို အကြမ်းဖက်နှိမ်နင်းမှုတွေ နောက်ထပ်မပြုလုပ်ဖို့၊ ဒေါအောင်ဆန်းစုကြည်အပါအဝင် ဖမ်းဆီးထားသူတွေကို အမြန်ဆုံးပြန်လွှတ်ပေးဖို့ အာဏာသိမ်းစစ်တပ်ကို တောင်းဆိုလိုက်ပါတယ်။

ပိတ်ဆို့အရေးမှုဥပဒေနဲ့ပတ်သက်ပြီး စာနယ်ဇင်းတွေက မေးမြန်းရာမှာတော့ ဂျပန်အစိုးရအနေနဲ့ အနီးကပ်ဆက်လက်စောင့်ကြည်နေကြောင်း Mr Katsunobu Kato က ဖြေကြားသွားပါတယ်။

2 days Ago

စစ်တပ်က အင်အားသုံးဖြိုခွင်းမှုကို ချက်ချင်းရပ်တန့်ရန် ကုလသမဂ္ဂ တောင်းဆို

လတ်တလော မြန်မာနိုင်ငံမှာ ဖြစ်ပွားနေတဲ့ စစ်အာဏာရှင် ဆန့်ကျင်ရေး လူထု လှုပ်ရှားမှုတွေမှာ စစ်တပ်က အင်အားသုံးဖြိုခွင်းတာတွေကို ချက်ချင်းရပ်တန့်ဖို့ ကုလသမဂ္ဂလူ့အခွင့်အရေးရုံးက သတင်းထုတ်ပြန်ပါတယ်။

ဖေဖော်ဝါရီ ၂၈ ရက်စွဲနဲ့ ထုတ်ပြန်ချက်ထဲမှာတော့ ပြောရေးဆိုခွင့်ရှိသူ Ravina Shamdasani က မြန်မာနိုင်ငံမှာ ဆန္ဒထုတ်ဖော်မှုတွေအပေါ် အကြမ်းဖက်မှုတွေ ပိုမိုဆိုး ရွားပြင်းထန်လာနေတာကို  ပြင်းထန်စွာရှုတ်ချကြောင်း၊ စစ်တပ်အနေနဲ့ ငြိမ်းချမ်းစွာ ဆန္ဒထုတ်ဖော်နေသူတွေအပေါ် အင်အားသုံး ဖြိုခွင်းတာကို ချက်ချင်းရပ်တန့်ဖို့ တောင်း ဆိုကြောင်း ဖော်ပြထားတာပါ။

တနေ့လုံး၊ နိုင်ငံအနှံ့ နေရာများစွာမှာ ရဲနဲ့ စစ်တပ်အင်အားစုတွေက ငြိမ်းချမ်းစွာ ဆန္ဒပြနေသူတွေကို လူသေစေလောက်တဲ့ အင်အားသုံးပြီးတော့ရော အသက်သေဆုံး လောက်အောင် မပြင်းထန်တဲ့ အင်အားတွေ သုံးပြီးတော့ပါ တိုက်ခိုက်ခဲ့လို့  အနည်းဆုံး ၁၈ ဦး အသက်ဆုံးရှုံးခဲ့ပြီး လူပေါင်း ၃၀ ကျော် ထိခိုက်ဒဏ်ရာရခဲ့ကြောင်း ကုလသမဂ္ဂ လူ့အခွင့်အရေးရုံးက ခိုင်လုံတဲ့ သတင်းအချက်အလက်တွေအရ လက်ခံရရှိထားတယ်လို့ ဆိုပါတယ်။

သေဆုံးမှုတွေ ဖြစ်ပွားခဲ့ရတဲ့ထဲမှာ ရန်ကုန်၊ ထားဝယ်၊ မန္တလေး၊ မြိတ်၊ ပဲခူးနဲ့ ပခုက္ကူမြို့တွေမှာ ကျည်ဆန်အစစ်တွေအသုံးပြုပြီး လူအုပ်တွေထဲကို ပစ်ခတ်ခဲ့တဲ့အတွက် ကြောင့် ဖြစ်ကာ နေရာအနှံ့ အသံမြည်ဗုံး၊ မီးဗုံးနဲ့ မျက်ရည်ယိုဗုံးတွေကိုလည်း အသုံးပြုခဲ့ ကြကြောင်း ဖော်ပြထားပါတယ်။

ဒါ့အပြင် မြန်မာပြည်သူတွေအနေနဲ့ ငြိမ်းချမ်းစွာစုဝေးခွင့်နဲ့ ဒီမိုကရေစီကို ပြန် လည်ထူထောင်ရေး တောင်းဆိုပိုင်ခွင့်ရှိကြောင်း၊ အကြမ်းဖက် သွေးထွက်သံယို ဖိနှိပ်မှု မပြုလုပ်ဘဲ အဲဒီအခြေခံ ရပိုင်ခွင့်တွေကို စစ်တပ်နဲ့ ရဲတပ်ဖွဲ့က လေးစားရမှာဖြစ်ကြောင်းနဲ့ နိုင်ငံတကာ လူ့အခွင့်အရေး စံနှုန်းတွေအရ အကြမ်းမဖက်တဲ့ ဆန္ဒပြသူတွေအပေါ် သေစေနိုင်တဲ့ အင်အားအသုံးပြုမှုဟာ လုံးဝ မလျော်ကန်‌ကြောင်းလည်း ဖော်ပြထားပါ တယ်။

မြန်မာနိုင်ငံမှာ စစ်အာဏာသိမ်းတဲ့ ဖေဖော်ဝါရီ ၁ ရက်နေ့ကစပြီး ရဲတပ်ဖွဲ့နဲ့ လုံခြုံရေး တပ်ဖွဲ့တွေဟာ  နိုင်ငံရေးခေါင်းဆောင်တွေ၊ တက်ကြွလှုပ်ရှားသူတွေ၊ အရပ်ဖက် လူမှုအဖွဲ့အစည်းမှ အဖွဲ့ဝင်တွေ၊ သတင်းစာဆရာတွေနဲ့ ဆေးဘက်ဆိုင်ရာဝန်ထမ်းတွေကို ဖမ်းဆီးပြီး အတိုက်အခံတွေနဲ့ ဆန္ဒပြသူတွေရဲ့ အသံတွေကို ပိုမိုပစ်မှတ်ထားလာခဲ့ တယ်လို့ ဆိုပါတယ်။

ဖေဖော်ဝါရီ ၂၈ ရက်နေ့တရက်တည်းတင်ပဲ ရဲတပ်ဖွဲ့က ဆေးဘက်ဆိုင်ရာ ပညာရှင်နဲ့ ကျောင်းသားကျောင်းသူ အနည်းဆုံး ၈၅ ယောက်နဲ့ သတင်းစာဆရာ ၇ ယောက်တို့ကို ဆန္ဒပြပွဲမှာပါဝင်နေတဲ့အတွက် ဖမ်းဆီးထိန်းသိမ်းခဲ့ပြီး အာဏာသိမ်းပြီး ချိန်ကစ တရားလက်လွတ် ဖမ်းဆီးထိန်းသိမ်းခံရသူ စုစုပေါင်း ၁၀၀၀ ကျော်ရှိသွားပြီ ဖြစ် ကြောင်းလည်း ဖော်ပြထားပါတယ်။

  ဒီမိုကရေစီနည်းအရ ရွေးကောက်တင်မြှောက်ခံထားရတဲ့ အစိုးရအဖွဲ့ဝင်တွေ အပါအဝင် တရားလက်လွတ်ထိန်းသိမ်းခံထားရသူအားလုံးကို အမြန်ဆုံးလွှတ်ပေးဖို့ ကုလသ မဂ္ဂလူ့အခွင့်အရေးရုံးက ထပ်လောင်း တောင်းဆိုလိုက်ပြီး နိုင်ငံတကာ အသိုက် အဝန်းအနေနဲ့ ဆန္ဒပြသူတွေနဲ့ မြန်မာနိုင်ငံ ဒီမိုကရေစီ ပြန်လည်ထွန်းကားရေးအတွက် ဆောင်ရွက်နေသူတွေအားလုံးနဲ့ တသားတည်းအတူ ရပ်တည်ရမှာဖြစ်တယ်လို့ ဆိုပါ တယ်။

2 days Ago
More News
Up