ကျန်းမာရေး

A d v e r t i s e m e n t With Us

February 23, 2021

အာရှကူးစက်မှုအမြင့်ဆုံးအိန္ဒိယတွင် ကိုဗစ်-၁၉ ရောဂါကူးစက်ခံရသူ ၁၁ သန်းကျော်ရှိလာ

အာရှဒေသတွင်း နိုင်ငံတနိုင်ငံဖြစ်တဲ့ အိန္ဒိယနိုင်ငံမှာ ကိုဗစ်-၁၉ ရောဂါကူးစက်ခံရ သူပေါင်း ၁၁ သန်းကျော်ရှိလာခဲ့ပြီး ဒေသတွင်း ကူးစက်မှုနဲ့ သေဆုံးမှုအမြင့်ဆုံးနိုင်ငံအဖြစ် ရပ်တည်နေပါတယ်။

လက်ရှိအချိန်ထိ အိန္ဒိယနိုင်ငံမှာ ရောဂါကူးစက်ခံရပြီး သေဆုံးသူ ၁၅၆,၄၇၀ ယောက်နဲ့ ရောဂါပြန်လည်သက်သာလာသူအရေအ တွက် ၁၀ ဒသမ ၇ သန်းကျော် ရှိနေ တာပါ။

ကမ္ဘာတဝန်းမှာတော့ ကိုဗစ်-၁၉ ရောဂါကူးစက်ခံရသူ စုစုပေါင်း ၁၁၂ သန်း ကျော်ရှိနေပြီး သန်းနဲ့ချီကူးစက်ခံရတဲ့ နိုင်ငံပေါင်း ၂၁ နိုင်ငံထိ ရှိလာခဲ့ပြီ ဖြစ်ပါတယ်။

တကမ္ဘာလုံးအတိုင်းအတာနဲ့ ရောဂါကူးစက်ခံရပြီး သေဆုံးသူ ၂ ဒသမ ၄၈ သန်း ကျော်နဲ့ ရောဂါပြန်လည်ပျောက်ကင်းလာသူအရေအတွက် ၈၇ ဒသမ ၄ သန်းကျော် ရှိနေ တာပါ။

ရောဂါဖြစ်ပွားမှု အမြင့်ဆုံးနိုင်ငံတွေထဲမှာတော့ အမေရိကန်နိုင်ငံက ကူးစက်ခံရသူ ၂၈ ဒသမ ၇ သန်းကျော်၊ သေဆုံးသူ ၅ သိန်းကျေိာ်နဲ့ ရှိနေပြီး သူ့နောက်မှာတော့ အိန္ဒိယ နိုင်ငံက ရှိနေတာ ဖြစ်ပါတယ်။

တတိယနေရာမှာတော့ ဘရာဇီးနိုင်ငံက ကိုဗစ်-၁၉ ရောဂါကူးစက်ခံရသူ ၁၀ သန်း ကျော်၊ သေဆုံးသူ ၂ သိန်း ၄ သောင်းကျော်နဲ့ ထိပ်ဆုံး ၃ နိုင်ငံ အနေနဲ့ အသီးသီး ရပ်တည် နေပါတယ်။

အဲဒီ ၃ နိုင်ငံနောက်မှာတော့ ရုရှား၊ ယူကေနိုင်ငံတွေက ကူးစက်ခံရသူ ၄ သန်း ကျော်စီ၊ ပြင်သစ်နဲ့ စပိန်နိုင်ငံတွေက ကူးစက်ခံရသူ ၃ သန်းကျော်စီ၊ အီတလီ၊ တူရကီ၊ ဂျာ မနီ၊ ကိုလံဘီယာ၊ အာဂျင်တီးနား၊ မက္ကဆီကိုနိုင်ငံတွေက ကူးစက်ခံရသူ ၂ သန်းကျော်စီ ရှိနေတာ ဖြစ်ပါတယ်။

အဲဒီနောက်မှာတော့ ပိုလန်၊ အီရန်၊ တောင်အာဖရိက၊ ယူကရိန်း၊ အင်ဒိုနီးရှား၊ ပီရူး၊ ချက်သမ္မတနိုင်ငံတွေနဲ့အတူ နယ်သာလန်နိုင်ငံမှာလည်း ကိုဗစ်-၁၉ ရောဂါ ကူးစက်ခံရ သူ အရေအတွက် ၁ သန်းကျော်လာခဲ့ပြီ ဖြစ်တာမို့ ခုချိန်ထိ ကမ္ဘာတဝန်း ကိုဗစ်-၁၉ ရော ဂါ ကူးစက်ခံရသူဦးရေ ၁ သန်းကျော်လာခဲ့တဲ့ နိုင်ငံပေါင်း ၂၁ နိုင်ငံထိ ရှိလာခဲ့ပြီလို့ Worldometers ဝက်ဘ်ဆိုက်ဒ်မှာ ဖော်ပြထားပါတယ်။

ရောဂါဖြစ်ပွားမှုစတင်ရာ တရုတ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အ ရေအတွက် ၈၉,၈၄၂ ယောက်၊ စုစုပေါင်း သေဆုံးသူ ၄,၆၃၆ ယောက်နဲ့ နိုင်ငံအလိုက် အ မှတ်စဉ် ၈၄ နေရာထိ ကျဆင်းသွားခဲ့ပါတယ်။

အာရှဒေသတွင်း နိုင်ငံတွေထဲမှာတော့ ကိုဗစ်-၁၉ ရောဂါကူးစက်ပြန့်ပွားမှု အမြင့် ဆုံး အိန္ဒိယ၊ တူရကီ၊ အီရန်၊ အင်ဒိုနီးရှားနိုင်ငံတွေပြီးရင် အစ္စရေးနိုင်ငံက ရောဂါကူး စက်ခံရသူဦးရေ ၇ သိန်းခွဲကျော်၊ အီရတ်နိုင်ငံက ရောဂါကူးစက်ခံရသူဦးရေ  ၆ သိန်း ၇ သောင်းကျော်စီနဲ့ အသီးသီး ရှိနေပါတယ်။

အာဆီယံနိုင်ငံတွေထဲမှာတော့ အင်ဒိုနီးရှားနိုင်ငံပြီးရင် ဖိလစ်ပိုင်နိုင်ငံက ကိုဗစ်-၁၉ ရောဂါကူးစက်ခံရသူဦးရေ ၅ သိန်း ၆ သောင်းကျော်နဲ့ သေဆုံးသူ ၁၂,၀၉၄ ယောက်နဲ့ ဒုတိယနေရာမှာ ရှိနေပါတယ်။

မြန်မာနိုင်ငံမှာတော့ ဖေဖော်ဝါရီ ၂၂ ရက်ည ၈ နာရီအထိ ကိုဗစ်-၁၉ အတည်ပြု လူနာစုစုပေါင်း ၁၄၁,၇၆၁ ယောက်၊ သေဆုံး သူ ၃,၁၉၇ ယောက်နဲ့ ဆေးရုံက ဆင်းခွင့်ရ သူပေါင်း ၁၃၁,၃၁၈ ယောက်ရှိပြီလို့ ကျန်းမာရေးဝန်ကြီးဌာနက ထုတ်ပြန်ထားပြီး အာဆီယံနိုင်ငံတွေထဲမှာ ကိုဗစ်-၁၉ ရောဂါကူးစက်ခံရပြီး သေဆုံးမှုအများဆုံး ၃ နိုင်ငံထဲမှာ ပါဝင်နေပါတယ်။

မလေးရှားနိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၂၈၅,၇၆၁ ယောက်နဲ့ သေဆုံးသူ ၁,၀၆၂ ယောက် ရှိပါတယ်။

စင်ကာပူနိုင်ငံကတော့ ရောဂါကူးစက်ခံရသူအရေအတွက် ၅၉,၈၇၉ ယောက်နဲ့ ခု ရက်ပိုင်း သေဆုံးသူအရေအတွက် ထပ်တိုးမလာဘဲ ၂၉ ယောက် ရှိနေတာ ဖြစ်ပါတယ်။

မြန်မာနဲ့ အိမ်နီးချင်းနိုင်ငံတနိုင်ငံဖြစ်တဲ့ ထိုင်းနိုင်ငံမှာတော့ ကိုဗစ်-၁၉ ရောဂါကူး စက်ခံရသူ အရေအတွက် ၂၅,၅၀၄ ယောက်နဲ့ သေဆုံးသူ ၈၃ ယောက် ရှိနေပါတယ်။

ဗီယက်နမ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၂,၃၉၂ ယောက်နဲ့ သေဆုံးသူအရေအတွက် ခုရက်ပိုင်းမှာ တိုးမလာဘဲ ၃၅ ယောက် ရှိနေပြီး ဘရူနိင်းနိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၁၈၅ ယောက်နဲ့ သေဆုံးသူ ၃ ယောက် ရှိနေတာပါ။

ကမ္ဘောဒီးယားနဲ့ လာအိုနိုင်ငံတွေမှာတော့ ကိုဗစ်-၁၉ ရောဂါကူးစက်ခံရသူ အရေ အတွက် ၅၆၈ ယောက်နဲ့  ၄၅ ယောက်စီ အသီးသီးရှိနေပေမယ့် သေဆုံးလူနာ ခုချိန်ထိ မရှိသေးပါဘူး။

2 weeks Ago

February 10, 2021

အစိုးရသစ်ဖွဲ့ချိန်အထိ အလုပ်ပိတ်ရက်အဖြစ်သတ်မှတ်ကြောင်း ဧရာဝတီတိုင်းအစိုးရ ကြေညာ

ဧရာဝတီတိုင်းဒေသကြီးအစိုးရအဖွဲ့ လက်အောက်မှာရှိတဲ့ ဌာနဆိုင်ရာ အရာရှိ၊ အရာထမ်း၊ ဝန်ထမ်းတွေအားလုံးကို  ၂ဝ၂ဝ ရွေးကောက်ပွဲ အနိုင်ရကိုယ်စားလှယ်တွေ အစိုးရသစ်ဖွဲ့ချိန်အထိ အလုပ်ပိတ်ရက်အဖြစ် သတ်မှတ်လိုက်ကြောင်း ထိန်းသိမ်းခံ ဧရာဝတီတိုင်းအစိုးရအဖွဲ့က ဒီကနေ့ ကြေညာပါတယ်။

ဖေဖော်ဝါရီလ ၁ ရက်နေ့မှာ တပ်မတော်က ဖွဲ့စည်းပုံအခြေခံဥပဒေကို လိုရာဆွဲအဓိပ္ပါယ်ဖွင့်ဆို၍ ဥပဒေမဲ့အာဏာ သိမ်းယူခဲ့ကြောင်း၊ ဒီလိုအာဏာသိမ်းတဲ့အတွက် ပြည်သူ့ဝန်ထမ်း အလွှာ အသီးသီးနဲ့ ပြည်သူတို့ အခက်အခဲများစွာ ကြုံတွေ့ခဲ့ရပြီး အာဏာသိမ်း စစ်တပ်လက်အောက် အမှုမထမ်းလိုတဲ့အတွက်  ဆန့်ကျင်အာဏာဖီဆန်နေကြောင်း ကြေညာချက်မှာ ဖော်ပြထား ပါတယ်။

စစ်တပ်က အာဏာသိမ်းယူတာဟာ ဥပဒေမဲ့ ပြုကျင့်ခြင်းဖြစ်တဲ့အတွက် တရားဝင်မှုမရှိကြောင်းနဲ့ တိုင်းဒေသကြီးအစိုးရအဖွဲ့ ဥပဒေပုဒ်မ ၂၉ အရ ဧရာဝတီတိုင်းအစိုးရအဖွဲ့ လက်အောက်မှာ တာဝန်ထမ်းဆောင်နေတဲ့ ဦးစီးဌာန၊ အဖွဲ့အစည်းတွေနဲ့ လက်အောက်ခံ ရုံးဌာနအသီးသီးမှ အရာရှိ၊ အရာထမ်း၊ ဝန်ထမ်းတွေ အားလုံးကို ၂ဝ၂ဝ ရွေးကောက်ပွဲအနိုင်ရကိုယ်စားလှယ်တွေ အစိုးရသစ်ဖွဲ့စည်းချိန်အထိ အလုပ်ပိတ်ရက်အဖြစ် သတ်မှတ်ပေးလိုက်ကြောင်း ကြေညာချက်မှာ ဖော်ပြပါတယ်။

ဒါ့အပြင် စစ်တပ်က ဥပဒေမဲ့အာဏာသိမ်းယူမှုအား ရဲဝံ့စွာဖီဆန်ပြီး ဆုံးဖြတ်ချက်ပြတ်သားသူ  ပြည်သူ့ဝန်ထမ်းတွေကို အလေးအနက်ထား မှတ်တမ်းတင်ဂုဏ်ပြုပါကြောင်း ကြေညာချက်မှာ ရေးသားဖော်ပြပါတယ်။

ဒီကြေညာချက်ကို ဝန်ကြီးချုပ် ဦးလှမိုးအောင်ကိုယ်စား လူမှုရေးဝန်ကြီး ဒေါက်တာလှမြတ်သွေးက လက်မှတ်ရေးထိုး ထုတ်ပြန်ခဲ့တာလည်း ဖြစ်ပါတယ်။

တပ်မတော်က ဖေဖော်ဝါရီ ၁ ရက်နေ့မှာ နိုင်ငံတော်အာဏာ သိမ်းယူပြီးတဲ့နောက် နိုင်ငံတော် သမ္မတ ဦးဝင်းမြင်နဲ့ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ အပါအဝင် ပြည်နယ်နဲ့တိုင်း ဝန်ကြီးချုပ်နဲ့ အစိုးရအဖွဲ့ဝင်အားလုံးကို လက်ရှိအချိန်အထိ ထိမ်းသိမ်းထားဆဲ ဖြစ်ပါတယ်။

တပ်မတော်ရဲ့ ဖမ်းဆီးထိမ်းသိမ်းခံထားရတဲ့အထဲက ရှမ်းပြည်နယ်၊ ဧရာဝတီတိုင်းနဲ့ မန္တလေးတိုင်း အစိုးရအဖွဲ့တွေဟာ အခုလို  ကြေညာချက် ထုတ်ပြန်ခဲ့တာ ဖြစ်ပါတယ်။

မင်းထက်မုန်း

4 weeks Ago
More News
Up