ကျန်းမာရေး

September 19, 2021

မြန်မာတွင် ကိုဗစ်-၁၉ ကြောင့် သေဆုံးသူပေါင်း ၁၇,၀၀၀ ကျော်ရှိလာ

မြန်မာနိုင်ငံမှာ တရက်တည်း ကိုဗစ်-၁၉ အတည်ပြုလူနာသစ် ၁,၉၀၀ ကျော်နဲ့ ၇၂ ယောက် ထပ်မံသေဆုံးခဲ့တယ်လို့ အကြမ်းဖက်စစ်ကောင်စီ ကျန်းမာရေးဝန်ကြီးဌာနက စက်တင်ဘာ ၁၈ ရက်ညပိုင်းမှာ ထုတ်ပြန်ပါတယ်။

ဒီစစ်ဆေးမှုဟာ အာဏာဖီဆန်ရေးလှုပ်ရှားမှု(CDM)မှာ ပါဝင်နေကြတဲ့ ဆေးရုံတွေ၊ ဓာတ်ခွဲ စမ်းသပ်ခန်းတွေ မပါဝင်ဘဲ စစ်အုပ်စုလက်အောက်ခံ တပ်မတော်ဆေးရုံတွေ အ များစုမှာ စမ်းသပ်စစ်ဆေးခဲ့တာမို့ ရောဂါကူးစက်မှု တိကျတဲ့ ပမာဏအတိုင်းအဆကိုတော့ မသိနိုင်သေးပါဘူး။

ဝန်ကြီးဌာန ထုတ်ပြန်ချက်ထဲမှာတော့ ပြီးခဲ့တဲ့ ၂၄ နာရီအတွင်း ဓာတ်ခွဲနမူနာ ၂၁,၀၃၆ ခုကို စစ်ဆေးခဲ့ရာမှာ ရောဂါကူးစက်မှုအသစ် ၁,၉၄၃ ယောက် တွေ့ရှိခဲ့တာမို့ ပိုးတွေ့နှုန်း ၉ ဒသမ ၂၃ ရာခိုင်နှုန်းကျော် ရှိနေပါတယ်။

ရောဂါပြန်လည်ပျောက်ကင်းသက်သာလာလို့ ဆေးရုံက ဆင်းခွင့်ရသူအရေအတွက်ကတော့ ၂,၃၉၆  ယောက်ရှိနေတယ်လို့ ဆိုပါတယ်။

လက်ရှိအချိန်ထိ မြန်မာနိုင်ငံမှာ ကိုဗစ်-၁၉ ကြောင့် သေဆုံးသူ စုစုပေါင်း ၁၇,၀၁၆ ယောက်နဲ့ ရောဂါကူးစက်ခံရသူ စုစုပေါင်း ၄၄၄,၈၇၁ ယောက် ရှိပါတယ်။

လတ်တလော ရောဂါကူးစက်မှုတွေ မြင့်တက်နေတာကြောင့် နိုင်ငံတဝန်း စာသင် ကျောင်းတွေ ပိတ်ထားသလို ရောဂါကိုထိန်းချုပ်နိုင်ဖို့ အများပြည်သူရုံးပိတ်ရက်အဖြစ် အခုစက်တင်ဘာလကုန်အထိ တိုးမြှင့်သတ်မှတ်ကြောင်း စစ်ကောင်စီက ကြေညာထားပါတယ်။  ဒါ့အပြင် ရောဂါကူးစက်မှုများတဲ့ နိုင်ငံတဝန်း မြို့နယ်ပေါင်း ၁၂၀ ကျော်ကို လည်း Stay At Home အမိန့်ထုတ်ထားပါတယ်။

10 seconds Ago

September 18, 2021

ပြည်သူ့ကျန်းမာရေးအတွက် Yangon Heroes က စေတနာ့ဝန်ထမ်း ဆရာဝန်များခေါ်ယူ

အွန်လိုင်းစာမျက်နှာကတဆင့် အများပြည်သူတွေအတွက် ကျန်းမာရေးကူညီစောင့်ရှောက်နိုင်ဖို့ Yangon Heroes အဖွဲ့က စေတနာ့ဝန်ထမ်း ဆရာဝန်တွေ ဖိတ်ခေါ်နေပါတယ်။ 

Yangon Heroes  အဖွဲ့ကိုတော့ စေတနာရှင်တွေရဲ့ ပံ့ပိုးကူညီမှု၊ စေတနာ့ဝန်ထမ်းတွေရဲ့ အားထုတ်ကြိုးပမ်းမှုတွေနဲ့ အများပြည်သူကျန်းမာရေးအတွက် အခမဲ့စောင့်ရှောက်မှုပေးနိုင်ဖို့ ရည်ရွယ်ချက်နဲ့ ပြီးခဲ့တဲ့ ဇူလိုင်လတုန်းက ဖွဲ့စည်းထူထောင်ခဲ့တာပါ။

အဖွဲ့ရဲ့ ဖေ့စ်ဘွတ်ခ်လူမှုကွန်ရက်ပေါ်မှာတော့ ကိုဗစ်-၁၉ ရောဂါနဲ့ပတ်သက်ပြီး အများပြည်သူ သိသင့်သိထိုက်တဲ့ ကုသမှုဆိုင်ရာ ဆောင်ရန်၊ ရှောင်ရန်တွေကို အချိန်နဲ့ တပြေးညီ ဖြေကြားပေးနေတာ ဖြစ်ပါတယ်။

လက်ရှိမှာတော့ မြန်မာနိုင်ငံမှာ အာဏာသိမ်း အကြမ်းဖက်စစ်ကောင်စီရဲ့ လွဲမှားတဲ့ စနစ်တွေကြောင့် ကိုဗစ်-၁၉ ရောဂါကူးစက်မှုနဲ့ သေဆုံးမှုနှုန်းတွေ မြင့်တက်နေပြီး စစ်ကောင်စီဟာ အာဏာဖီဆန်ရေးလှုပ်ရှားမှု (CDM) မှာ ပါဝင်နေသူ ဆေးဘက်ဆိုင်ရာ ဝန်ထမ်းတွေနဲ့ စေတနာ့ဝန်ထမ်း အဖွဲ့အစည်းတွေမှာ ကူညီနေကြတဲ့ ဆရာဝန်တွေကို ဖမ်းဆီးမှုတွေကို လုပ်ဆောင်နေဆဲ ဖြစ်ပါတယ်။

အမျိုးသားညီညွတ်ရေးအစိုးရ (NUG)၊ ကျန်းမာရေးဝန်ကြီးဌာနက ကောက်ယူတဲ့ ကိုဗစ်-၁၉ ရောဂါ ဖြစ်ပွားမှုဆိုင်ရာစစ်တမ်းမှာတော့ ကိုဗစ်-၁၉ တတိယလှိုင်းကာလမှာ သေဆုံးသူတွေရဲ့ ၇၃ ရာခိုင်နှုန်းက လိုအပ်တဲ့ ဆေးရုံတွေမှာ တက်ရောက်ကုသခွင့်မရဘဲ နေအိမ်တွေမှာ သေဆုံးခဲ့ကြတယ်လို့ ဖော်ပြပါတယ်။

စစ်တမ်းမှာ တွေ့ရှိရတဲ့ အထောက်အထားတွေအရ ဆေးရုံမှာ စောင့်ရှောက်ကုသဖို့ လိုအပ်တဲ့ လူနာတွေ ဆေးရုံမတက်ရောက်နိုင်တာ၊ အွန်လိုင်းကသာ ကုသမှုခံယူနေကြ ရတာ၊ စစ်ကောင်စီက အမှန်တကယ် သေဆုံးနှုန်းကို မဖော်ပြနိုင်တာ စတဲ့အချက်တွေဟာ ထင်ရှားနေတာမို့ စစ်ကောင်စီဟာ ကိုဗစ်-၁၉ ကာကွယ်၊ ထိန်းချုပ်၊ ကုသမှုလုပ်ငန်းတွေမှာ မှားယွင်းညံ့ဖျင်းစွာ စီမံနေတယ်လို့ သုံးသပ်ထားပါတယ်။

Yangon Heroes အဖွဲ့မှာ အများပြည်သူကျန်းမာရေးအတွက် စေတနာ့ဝန်ထမ်းဆောင်လိုတဲ့ စေတနာ့ဝန်ထမ်း ဆရာဝန်တွေအနေနဲ့ ဖော်ပြပါ Google Doc Link ဖောင်ကို ဖြည့်စွက်ပေးပို့ကာ ပါဝင်နိုင်မှာ ဖြစ်ပါတယ်။

https://docs.google.com/forms/d/e/1FAIpQLScIjJFxHAosqiNrPmSjVisKStp7dNCOlLJjNcFdDbRF6qUYFw/viewform?vc=0&c=0&w=1&flr=0&fbclid=IwAR03jBACN4BEn24Ujy6YKBl57DEpGX3u4xlHjVaaYBlp4c0wDNbk7lgB2UY

13 hours Ago

မြဝတီမြို့တွင် ကိုဗစ်လူနာများအတွက် အောက်စီဂျင်စက်ရုံဖွင့်လှစ်

ကရင်ပြည်နယ် မြဝတီမြို့မှာ ကိုဗစ်လူနာတွေအတွက် တနေ့ကို  အောက်စီဂျင်အိုး ၁၀၀ ကျော် ထုတ်လုပ်နိုင်တဲ့  စက်ရုံကို စက်တင်ဘာ ၁၈ ရက် ဒီနေ့မနက်မှာ မြဝတီဖောင်ဒေးရှင်းက ဖွင့်လှစ်လိုက်ပါတယ်။

မြန်မာ-ထိုင်းနယ်စပ် မြဝတီမြို့မှာ ပြီးခဲ့တဲ့လပိုင်းက ကိုဗစ်-၁၉ ရောဂါကူးစက်မှုများခဲ့ပြီး လူနာတွေအတွက် အောက်စီဂျင် ဖြည့်ရတဲ့အခက်ခဲအမျိုး ပေါင်းများစွာကြုံရခဲ့ရပြီးနောက် မြဝတီမြို့ခံ စီးပွားရေးသမားတွေ၊ ရပ်မိရပ်ဖတွေ၊ လက်နက်ကိုင်ကရင်တိုင်းရင်းသားအဖွဲ့တွေနဲ့ တခြား အလှူရှင်တို့နဲ့ ပူးပေါင်းဆောင်ရွက်မှုကြောင့်  ခုလို အောက်စီဂျင်စက်ရုံ တည်ဆောက်နိုင်ခဲ့တာ ဖြစ်ပါတယ်။

အဆိုပါ စက်ရုံကနေ တစ်ရက်လျှင် လီတာ ၄၀ ဆံ့ အောက်စီဂျင် အလုံးပေါင်း ၈၀ မှ ၁၁၀ အထိထုတ်လုပ်နိုင်ပြီး မြဝတီခရိုင်အတွင်းရှိ လိုအပ်နေတဲ့ ကိုဗစ်လူအတွက် ကူညီပေးနိုင်မှာဖြစ်ပါတယ်။ 

အသက်ရှူဖို့ အခက်အခဲရှိနေတဲ့ ကိုဗစ်လူနာတွေနဲ့ တခြားလူနာတွေကို ဦးစားပေးပြီ အောက်စီဂျင် ထည့်ပေးမှာ ဖြစ်တဲ့အပြင် လုပ်ငန်းသုံးအတွက်လည်း အောက်စီဂျင်အရည်ဖြည့် လီတာ ၄၀ ကို  ရန်ပုံငွေအဖြစ် ကျပ် ၈၀၀၀ မှ ကျပ် ၁၀၀၀၀ အထိ အခကြေးငွေယူပြီး ဝန်ဆောင်မှုပေးသွားမယ်လို့လည်း သိရပါတယ်။

လက်ရှိဖွင့်လိုက်တဲ့စက်ရုံအတွက် အောက်စီဂျင်စက်ကတော့ သြဂုတ်လ ၁၅ ရက်နေ့မှာမြဝတီမြို့ကို ရောက်ရှိစတင်လည်ပတ်ခဲ့ပြီး ဒီကနေ့  စက်တင်ဘာလ ၁၈ ရက်နေ့မှာတော့ စက်ရုံ တရားဝင်ဖွင့်လှစ်နိုင်ခဲ့တာပါ။

စက်ရုံအတွက် အောက်စီဂျင်စက်ဟာ  တရုတ်နိုင်ငံက ထုတ်လုပ်တဲ့စက်ပြီး တန်ဖိုး ကျပ် သိန်း ၈၁၀ ကုန်ကျကာ၊ စက်ရုံတည်ဆောက်မှုကိုတော့ ကျပ် သိန် ၅၂၀ နဲ့ အောက်စီဂျင်ဘူးလွတ် အလုံး ၁၅၀ ကုန်ကျပ်စရိတ် ကျပ် သိန်း ၂၆၀ ကုန်ကျတယ်လို့သိရပါတယ်။

19 hours Ago

မကွေးတိုင်း ကျန်းမာရေးဌာနတွင် မြွေဆိပ်ဖြေဆေး ပြတ်လပ်

မကွေးတိုင်း ကျန်းမာရေးဌာနမှာ မြွေဆိပ်ဖြေဆေး ပြတ်လပ်နေတယ်လို့ ဝန်ထမ်းတစ်ဦးက ပြောပါတယ်။ 

အခုလို မိုးရာသီဟာ တောင်သူတွေအတွက် မြွေအန္တရာယ်အရှိဆုံး ကာလဖြစ်ပြီး မြွေဆိပ်ဖြေဆေး ပြတ်လပ်တာက တောင်သူတွေအတွက် အတော်ဆိုးဝါးပါတယ်လို့ အဲဒီ ဝန်ထမ်းက ဆိုပါတယ်။ 

မကွေးတိုင်း ဆေးရုံကြီးမှာ မြွေဆိပ်ဖြေဆေး အလုံး ၄၀ ပဲ ရှိပြီး မြို့နယ်ဆေးရုံတချို့မှာတော့ လုံးဝ ပြတ်လပ်နေတယ်လို့ သိရပါတယ်။ 

လူနာတစ်ယောက်ကို ကိုယ်အလေးချိန်ပေါ် မူတည်ပြီး မြွေဆိပ်ဖြေဆေး ၁၅ လုံးကနေ အလုံး ၃၀ လောက်အထိ လိုအပ်တယ်လို့လည်း ဝန်ထမ်းက ပြောပါတယ်။ 

မြွေအန္တရာယ်အရှိဆုံး ရာသီတွေကတော့ ဧပြီကနေ ဇွန်လအထိဖြစ်ပြီး မကွေးတိုင်း နဲ့ မန္တလေးတိုင်းတို့မှာတော့ အောက်တိုဘာလောက်အထိ အဖြစ်များတာပါ။ 

၂၀၁၉ ခုနှစ် စစ်တမ်းတွေအရ လူဦးရေ ၁ သိန်းမှာ ၁၅၀၀၀ နှုန်းဖြစ်ပွားပြီး ၁၀ ရာခိုင်နှုန်းက သေဆုံးတယ်လို့ သိရပါတယ်။

20 hours Ago

တရက်တည်း ကိုဗစ်-၁၉ အတည်ပြုလူနာသစ် ၂၁၀၀ ကျော်၊ ၇၅ ဦး ထပ်မံသေဆုံး

မြန်မာနိုင်ငံမှာ တရက်တည်း ကိုဗစ်-၁၉ အတည်ပြုလူနာသစ် ၂,၁၀၀ ကျော်နဲ့ ၇၅ ယောက် ထပ်မံသေဆုံးခဲ့တယ်လို့ အကြမ်းဖက်စစ်ကောင်စီ ကျန်းမာရေးဝန်ကြီးဌာနက စက်တင်ဘာ ၁၇ ရက်ညပိုင်းမှာ ထုတ်ပြန်ပါတယ်။

ဒီစစ်ဆေးမှုဟာ အာဏာဖီဆန်ရေးလှုပ်ရှားမှု (CDM) မှာ ပါဝင်နေကြတဲ့ ဆေးရုံတွေ၊ ဓာတ်ခွဲ စမ်းသပ်ခန်းတွေ မပါဝင်ဘဲ စစ်အုပ်စုလက်အောက်ခံ တပ်မတော်ဆေးရုံတွေ အများစုမှာ စမ်းသပ် စစ်ဆေးခဲ့တာမို့ ရောဂါကူးစက်မှု တိကျတဲ့ ပမာဏအတိုင်းအဆကိုတော့ မသိနိုင်သေးပါဘူး။

ဝန်ကြီးဌာန ထုတ်ပြန်ချက်ထဲမှာတော့ ပြီးခဲ့တဲ့ ၂၄ နာရီအတွင်း ဓာတ်ခွဲနမူနာ ၂၂,၈၀၀ ခုကို စစ်ဆေးခဲ့ရာမှာ ရောဂါကူးစက်မှုအသစ် ၂,၁၈၇ ယောက် တွေ့ရှိခဲ့တာမို့ ပိုးတွေ့နှုန်း ၉ ဒသမ ၅၉ ရာခိုင်နှုန်းကျော် ရှိနေပါတယ်။

ရောဂါပြန်လည်ပျောက်ကင်းသက်သာလာလို့ ဆေးရုံက ဆင်းခွင့်ရသူအရေအ တွက်ကတော့ ၂,၁၉၁  ယောက်ရှိနေတယ်လို့ ဆိုပါတယ်။

လက်ရှိအချိန်ထိ မြန်မာနိုင်ငံမှာ ကိုဗစ်-၁၉ ကြောင့် သေဆုံးသူ စုစုပေါင်း ၁၆,၉၄၄ ယောက်နဲ့ ရောဂါကူးစက်ခံရသူ စုစုပေါင်း ၄၄၂,၉၂၈ ယောက် ရှိပါတယ်။

လတ်တလော ရောဂါကူးစက်မှုတွေ မြင့်တက်နေတာကြောင့် နိုင်ငံတဝန်း စာသင်ကျောင်းတွေ ပိတ်ထားသလို ရောဂါကိုထိန်းချုပ်နိုင်ဖို့ အများပြည်သူရုံးပိတ်ရက်အဖြစ် အခုစက်တင်ဘာလကုန်အထိ တိုးမြှင့်သတ်မှတ်ကြောင်း စစ်ကောင်စီက ကြေညာထားပါတယ်။  ဒါ့အပြင် ရောဂါကူးစက်မှုများတဲ့ နိုင်ငံတဝန်း မြို့နယ်ပေါင်း ၁၂၀ ကျော်ကို လည်း Stay At Home အမိန့်ထုတ်ထားပါတယ်။

23 hours Ago
More News
Up