စိုက်ပျိုးရေး/တောင်သူလယ်သမား

September 16, 2022

ရေးမြို့နယ်တွင် ကွမ်းသီးရောင်းဝယ်ရေးလုပ်ငန်းများ ရပ်နားထားရ

နယ်စပ်ကုန်သွယ်ရေးမတည်ငြိမ်တာကြောင့် ပြည်တွင်းက ကွမ်းသီး အရောင်းအဝယ်ဈေးကွက်မှာ လည်း ဝယ်လိုအားမရှိဘဲ ကွမ်းသီးရောင်းဝယ်ရေး ရပ်နားထားရတယ်လို့ မွန်ပြည်နယ် ရေးမြို့နယ်က ကုန်သည်တွေက ပြောပါတယ်။

နယ်ကုန်သည်တယောက်က “ကွမ်းသီးအရောင်းအဝယ်က တပတ်လောက်ရှိပြီ၊ ပြည်တွင်းဘက်လည်း အဝယ်တွေရပ်ထားတယ်။ ဘဏ်ငွေလည်ပတ်စီးဆင်းတဲ့ ငွေထုတ်ရတာလည်း ခက်ခဲတော့ ကုန်သည်တွေမှာက ကွမ်းသီးလာရောင်းရင် ငွေစိုက်ပြီး ရှင်းပေးရတော့ အရောင်းအဝယ်လည်း မရှိတော့ လုပ်ငန်းပါ ရပ်နားထားရတယ်” လို့ ပြောပါတယ်။

အခု နယ်တွေဘက်မှာက နည်းနည်းပါးပါး ကြိုက်ရောင်းကြိုက်ဝယ်ပဲရှိပြီး ငွေရှိတဲ့သူက ရင်းနှီးမြှုပ်နှံ သိုလှောင်ထားကာ ဈေးအတက်ဘက်ကို စောင့်ပြီး ဝယ်လှောင်တဲ့သူလောက်ပဲ ရှိပါတယ်လို့ နယ်ကုန်သည်တယောက်က ထပ်ပြောပါတယ်။

ခြံသမားတယောက်က “အခုလို ကွမ်းသီးဒိုင်တွေ ပိတ်ထားတာ ရက်ရှည်ကြာလွန်းရင် မကောင်းဘူး။ ခြံကထွက်တဲ့ ကွမ်းသီးရောင်းမှ ငွေက ရမှာဆိုတော့ အခုက မရောင်းရဘူးဆို ငွေမရှိရင် လတ်တလော သုံးစွဲဖို့ မရှိပြန်ရင် စားဝတ်နေရေးမှာ အခက်အခဲတွေနဲ့ ကြုံရတယ်” လို့ ပြောပါတယ်။

စစ်တပ်အာဏာသိမ်းပြီး ၁ နှစ်ကျော်အတွင်း ပြီးခဲ့တဲ့ရာသီက စံချိန်တင်ဈေး ကျပ် ၁၀,၀၀၀ ကျော်အထိ ရရှိရာကနေ ကျပ် ၅,၀၀၀ ကျော်အထိ ပြန်ကျဆင်းခဲ့ပါတယ်။

အခုရာသီမှာ ကျပ် ၈,၀၀၀ ကနေ ၉,၂၀၀ အထိဖြစ်ပေမဲ့ ကွမ်းသီးအဝင်လည်း မရှိသလို ရောင်းသူလည်းမရှိတော့ ဈေးက ကျပ် ၈,၀၀၀ အထိ ပြန်လည်ဆင်းသက်ပြီး ဒီနေ့အခြေအနေမှာ ကြိုက်ရောင်း ကြိုက်ဝယ်နဲ့သာ ရှိနေပါတယ်။

အခု မြန်မာငွေတန်ဖိုးတွေ ကျဆင်းလာတဲ့အတွက် ခြံရဲ့ကုန်ကျစရိတ်တွေနဲ့ဆို ကွမ်းသီးဈေး သိပ်မရရင် တွက်ခြေမကိုက်သလို အခု နယ်မြေတွေ မအေးချမ်းလို့ ခြံထွက်ပစ္စည်းတွေမှာ ပျောက်ဆုံးတာတွေလည်း ရှိတယ်လို့ ခြံသမားတယောက်က ပြောပါတယ်။

ရေးမြို့နယ်က ထွက်ရှိလာတဲ့ ကွမ်းသီးတွေကို ပြည်တွင်းသာမက အိန္ဒိယ၊  ဘင်္ဂလားဒေ့ရှ်၊ တရုတ်ဘက်အထိ တင်ပို့ရောင်းချရပြီး နှစ်စဉ် ကွမ်းသီးတင်ပို့မှု တန်ချိန် ၁ သိန်းနီးပါးလောက် ရှိနေပါတယ်။

1 week Ago

September 14, 2022

၅ လအတွင်း ပြည်ပကို ဆန်နှင့် ဆန်ကွဲ တန်ချိန် ၈၈၀,၀၀၀ ကျော် တင်ပို့ထား

အခု ၂၀၂၂-၂၀၂၃ ဘဏ္ဍာနှစ် ၅ လအတွင်း ပြည်ပကို ဆန်နဲ့ဆန်ကွဲ တန်ချိန် ၈၈၀,၀၀၀ ကျော် တင်ပို့ထားတယ်လို့ မြန်မာနိုင်ငံ ဆန်စပါးအသင်းချုပ် (MRF) က ထုတ်ပြန်တဲ့စာရင်းအရ သိရပါတယ်။

အဲဒီ တန်ချိန် ၈၈၀,၀၀၀ ကျော်ထဲမှာ တရုတ်၊ ဘယ်လ်ဂျီယံနဲ့ ဖိလစ်ပိုင်နိုင်ငံတို့က ဝယ်ယူမှု အများဆုံးဖြစ်ပြီး တရုတ်နိုင်ငံရဲ့ ဝယ်ယူမှုက တန်ချိန် ၂၄၀,၀၀၀ ကျော်၊ ဘယ်ဂျီယံနိုင်ငံရဲ့ ဝယ်ယူမှုက ၁၈၀,၀၀၀ ကျော်နဲ့ ဖိလစ်ပိုင်နိုင်ငံရဲ့ ဝယ်ယူမှုက တန်ချိန် ၉၅,၀၀၀ ကျော်ထိ ရှိပါတယ်။

ပင်လယ်ရေကြောင်း ကုန်သွယ်ရေးကနေ တန်ချိန် ၇၈၀,၀၀၀ ကျော် တင်ပို့ခဲ့တာဖြစ်ပြီး နယ်စပ်ကတဆင့် တင်ပို့မှုက တန်ချိန် ၁၀၀,၀၀၀ ကျော်သာ ရှိခဲ့ပါတယ်။

ပြည်ပကို ပြီးခဲ့တဲ့ ၅ လအတွင်း တင်ပို့မှုကနေ အမေရိကန်ဒေါ်လာ သန်း ၃၀၀ ကျော် ပို့ကုန်ဝင်ငွေ ရရှိထားတယ်လို့ MRF ထုတ်ပြန်ထားချက်အရ သိရပါတယ်။

မြန်မာ့ဆန်နဲ့ဆန်ကွဲကို တရုတ်၊ ဖိလစ်ပိုင်၊ ဘယ်လ်ဂျီယံ၊ အိုင်ဗရီကို့စ်၊ နယ်သာလန်နိုင်ငံတို့ကို အဓိက အများဆုံးတင်ပို့နေတာဖြစ်ပြီး ပြီးခဲ့တဲ့ မီနီဘတ်ဂျတ်ကာလအတွင်းမှာလည်း ဆန်တန်ချိန် ၁ ဒသမ ၄ သန်းထိ တင်ပို့နိုင်ခဲ့ပြီး ပုံမှန်တင်ပို့မှုထက် တိုးတက်မှုရှိခဲ့ပါတယ်။

အခုဘဏ္ဍာနှစ်မှာလည်း ပြည်ပတင်ပို့မှုက ဆက်လက် အရှိန်ကောင်းနေပြီး ဒေါ်လာစျေး မြင့်တက်နေတာကြောင့် ပြည်တွင်းဆန်စျေး၊ စပါးစျေးတွေလည်း လိုက်ပါမြင့်တက်နေပါတယ်။

လက်ရှိမှာ ဒေသတချို့က မိုးစပါး ဆန်အသစ်တွေ စျေးကွက်အတွင်းကို စတင် ဝင်ရောက်လာနေပြီး လာမယ့်သီတင်းပတ် အနည်းငယ်အတွင်း လှိုင်လှိုင်ထွက်လာတော့မှာ ဖြစ်ပါတယ်။

စပါးအသစ်ပေါ်ချိန်မှာ စျေးကျဆင်းလေ့ရှိပေမဲ့ အခုနှစ်က ရွှေ၊ ဒေါ်လာ၊ စိုက်ပျိုးရေး သွင်းအားစုတွေနဲ့ အထွေထွေကုန်စျေးနှုန်းတွေ အတက်ဘက်မှာရှိနေတဲ့အတွက် ဆန်စပါးစျေးလည်း အတက်ဘက်မှာပဲ ဆက်ရှိနေနိုင်တယ်လို့ ဆန်လုပ်ငန်းအသိုင်းအဝိုင်းက သုံးသပ်ထားကြပါတယ်။

စစ်ကိုင်းတိုင်းက စပါးစိုက်တောင်သူတယောက်က “စျေးကောင်းရမှ လယ်သမားက ခံနိုင်မှာ။ ဓာတ်မြေဩဇာစျေး၊ ဒီဇယ်စျေးက ဒီလောက် မချိမဆန့်တက်နေတာ။ အခုက ငွေကြေးဖောင်းပွမှုကြောင့် စျေးတက်နေရတာ။ ဆန်သစ်ပေါ်လို့သာ စျေးကျရင် တောင်သူအရင်ထိမှာပဲ” လို့ ပြောပါတယ်။

ဒါ့အပြင် နိုင်ငံတကာ ဆန်စျေးကွက်မှာလည်း ကမ္ဘာ့ထိပ်တန်း ဆန်တင်ပို့တဲ့ နိုင်ငံတချို့မှာ ရာသီဥတုဖောက်ပြန်ပြီး ဆန်စပါးအထွက်နှုန်း လျော့နည်းနိုင်တဲ့ အခြေအနေ ရှိနေတာကြောင့် မြန်မာ့ဆန်အပေါ် ဝယ်လိုအား မြင့်တက်လာနိုင်ခြေရှိတယ်လို့ ဆန်လုပ်ငန်းရှင်တချို့က သုံးသပ်ထားကြပါတယ်။

တဖက်မှာလည်း စိုက်ပျိုးရေးကုန်ကျစရိတ် ကြီးမြင့်နေတာ၊ ပဋိပက္ခတွေ ဖြစ်ပွားနေတဲ့ နေရာဒေသတွေမှာ စိုက်ပျိုးရေး ကောင်းကောင်းမလုပ်နိုင်တာတွေကြောင့် မြန်မာနိုင်ငံရဲ့ ဆန်စပါး စိုက်ဧကလည်း လျော့နည်းကျဆင်းနေပါတယ်။

မြန်မာ့ဆန်နဲ့ ဆန်ကွဲကို ဒေသတွင်းနိုင်ငံတွေအပြင် ဥရောပနဲ့ အာဖရိကနိုင်ငံတွေကိုပါ တင်ပို့ရောင်းချနေတာ ဖြစ်ပြီးတော့ နှစ်စဥ် ပျမ်းမျှ တန်ချိန် ၂ သိန်းကနေ ၂ သိန်းခွဲကြား တင်ပို့လေ့ရှိပါတယ်။

2 weeks Ago
More News
Up