သဘာဝပတ်ဝန်းကျင်/ရာသီဥတု/မိုးလေဝသ

A d v e r t i s e m e n t With Us

January 31, 2021

မိုးညိုနှင့်အုတ်ဖိုတွင် မိုးသက်လေပြင်းကြောင့် ​နေအိမ် ၅၀ ခန့်ပြိုကျ၊ ၃၀၀ ကျော် အမိုးလန်ပျက်စီး

ပဲခူးတိုင်း၊ မိုးညိုနဲ့ အုတ်ဖိုမြို့နယ်တို့မှာ အချိန်အခါမဟုတ် မိုးသက်လေပြင်း တိုက်ခတ်မှုကြောင့် ​နေအိမ် ၅၀ လောက် ပြိုကျခဲ့ပြီး နေအိမ် ၃၀၀ ကျော် အမိုးလန်ပျက်စီးခဲ့တယ်လို့ သိရပါတယ်။

မိုးညိုမြို့နယ်မှာ ဇန်နဝါရီ  ၃၀ ရက်နေ့ က လေပြင်းတိုက်ခတ်ခဲ့တာကြောင့် နေအိမ် ၄၀ ပြိုကျပြီး စာသင်ကျောင်း ၁ ကျောင်း နဲ့  နေအိမ် ၁၈၀ ကျော် အမိုးလန်ပျက်စီးခဲ့တယ်လို့ မိုးညိုမြို့နယ် အထွေထွေအုပ်ချုပ်ရေးဦးစီးဌာနက သိရပါတယ်။

မိုးညိုမြို့နယ်၊ မြို့နယ်အုပ်ချုပ်ရေးမှူး ဦးတင်ဦးကျော်က “မနေ့က နေ့လယ်ပိုင်းလောက်ကစပြီး မိုးသက်​လေပြင်း ကျရောက်ခဲ့တာကြောင့် ကျေးရွာအုပ်စု ၁၁ အုပ်စုက ရွာပေါင်း ၂၆ ရွာက အိမ်တွေ ပြိုတယ်၊ အမိုးတွေလန်တယ်၊ တစ်စိတ်တစ်ပိုင်း ပျက်စီးမှုတွေ ဖြစ်သွားတယ်။ ကရင်ချောင်းကုန်းရွာက ကွာရန်တင်းလုပ်ထားတဲ့ စာသင်ကျောင်း တစ်ကျောင်း ထိခိုက်ပျက်စီးသွားတဲ့အတွက် ကွာရန်တင်းဝင်နေတဲ့လူတွေကိုတော့ နေရာရွှေ့ပေးထားပါတယ်။ လူမှုဝန်ထမ်းဦးစီးဌာန နဲ့ ချိတ်ဆက်ပြီး ပြုပြင်ပေးနိုင်ဖို့အတွက် အမြန်ဆုံး ဆောင်ရွက်နေပါတယ်” လို့ ပြောပါတယ်။

အချိန်အခါမဟုတ် မိုးသက်လေပြင်း ကျရောက်မှုကြောင့် မြေဇာအုပ်စု၊ ပတ္ထော်၊ ငါးကယ်၊ မြောက်လုပ်ကုန်း၊ ကျွန်းညို၊ ရွာသာယာ၊ ထန်းပင်ကုန်း၊ ဆုံကုန်း၊ အိုးဘိုကျွန်း၊ ကရင်ချောင်း၊ ရေကင်းနဲ့ ညောင်လေးပင် စတဲ့ ကျေးရွာအုပ်စုတွေက နေအိမ်တွေ ပြိုကျ အမိုးလန် ပျက်စီးခဲ့တာပါ။

မနေ့က ညနေပိုင်းကလည်း သာယာဝတီခရိုင်၊ အုတ်ဖိုမြို့နယ်မှာ အချိန်အခါမဟုတ် မိုးရွာသွန်းပြီး လေပြင်းတိုက်ခတ်တာကြောင့် ရပ်ကွက် ၂ ရပ်ကွက်၊ ကျေးရွာအုပ်စု ၁၃ အုပ်စုမှာ နေအိမ် ၆ လုံး ပြိုကျခဲ့ပြီး နေအိမ် ၁၂၀ ကျော်နဲ့  စာသင်ကျောင်းအချို့ အမိုးလန်ပျက်စီးခဲ့တယ်လို့ မြို့နယ်အထွေထွေအုပ်ချုပ်ရေးဦးစီးဌာန စာရင်းအရ သိရပါတယ်။

မိုးရာသီကာလမှာတော့ နှစ်စဥ်နှစ်တိုင်း လေပြင်းကျရောက်တာတွေ ဖြစ်ပေါ်လေ့ ရှိပေမဲ့ အခု​ကျရောက်သော မိုးသက်လေပြင်းကတော့ အချိန်အခါမဟုတ်ဘဲ ပြင်းပြင်းထန်ထန် တိုက်ခတ်ခဲ့တာလို့ ဒေသခံတွေက ပြောပါတယ်။

သတင်း - ဝဏ္ဏထွန်း၊ ဓာတ်ပုံ - ဒေသခံ

4 weeks Ago

January 27, 2021

မုံရွာ ညောင်ကိုင်းအင်းတွင် ဆောင်းခိုငှက်များ နည်းပါးလာ

စစ်ကိုင်းတိုင်း၊ မုံရွာမြို့ရှိ ညောင်ကိုင်းအင်းအတွင်းမှာ တနှစ်ထက်တနှစ် ဆောင်းခိုငှက်တွေ နည်းပါးလာတယ်လို့ သိရပါတယ်။

ညောင်ကိုင်းအင်းဟာ အရင်က  ဆောင်းခိုငှက်မျိုးစိတ်အစုံ လာရောက်နားခိုတဲ့အင်းဖြစ်ပြီး လူနေအိမ်တွေ ချဲ့ထွင်လာမှုတွေနဲ့ ငှက်မုဆိုးတွေကြောင့် လွန်ခဲ့တဲ့ ၄ နှစ်လောက်က စတင်ကာ တဖြည်းဖြည်း နည်းပါးလာရတာဖြစ်တယ်လို့ သိရပါတယ်။

မုံရွာမြို့ ဒေသခံ ကိုမောင်ညိုက "အရင်ကဆိုနှစ်တိုင်း ဆောင်းခိုငှက်မျိုးစုံလာတယ်။ အခုက လူနေအိမ်ခြေများလာတယ်၊ ဒါတွေကလည်း အင်းမြေကို အကွက်ရိုက်ရောင်းလာကြတာ၊ အဲ့ဒီတော့ ငှက်နားဖို့ ခြုံကိုင်းလည်း မရှိတော့ဘူး။ ‌အဆိုးဆုံးက ငှက်ထောင်တဲ့ မုဆိုးတွေပဲ။ ကောင်းကင်ပိုက်နဲ့ ထောင်နေကြတဲ့ လူတွေ ရှိတယ်။ တခါမိရင် အကောင် ၃၀ အထက်မှာရှိတယ်။ အဲ့ဒီတော့ ဘယ်ငှက်မှ သိပ်မလာရဲ ကြတော့ဘူး။ အရင်က ဒီအချိန် ရှားပါးငှက်မျိုးစုံလာတယ်။ အခုဆို တောဘဲတောင် သိပ်မမြင်ရတော့ဘူး" လို့  ‌ ပြောပါတယ်။

အရင်ကဆိုရင် ဆောင်းလာခိုကြတဲ့ ဗျိုင်းမျိုးစိတ်တွေ၊ ဟင်္သာ၊ တင်ကြီးငှက်၊ ဂျိုးကြာငှက်၊ တောဘဲ၊ ရေကြက်၊ ခရုတုပ်၊ ခရုစုပ်၊ ဒညှင်း စတဲ့ ငှက်အမျိုးစားတွေအပြင် တခြားရှားပါး ငှက်မျိုးစိတ်များစွာလည်း ညောင်ကိုင်းအင်းမှာ ထောင်နဲ့ချီ လာရောက်ကျက်စားလေ့ရှိတယ်လို့ သိရပါတယ်။

စစ်ကိုင်းတိုင်းသစ်တောဦးစီးဌာနအနေနဲ့ ဆောင်းခိုငှက်တွေကို ဖမ်းဆီးသတ်ဖြတ်တာ၊ ရောင်းချတာတွေ မပြုလုပ်ဖို့ အသိပညာပေးမှုတွေရှိနေပေမယ့် ညောင်ကိုင်းအင်းအတွင်းမှာ‌ ကောင်းကင်ပိုက်တန်းထောင် ဖမ်းဆီးမှုလည်း  များပြားလာတယ်လို့ သိရပါတယ်။

ဒါ့အပြင် အင်းမြေအကွက်ရိုက်ရောင်းတာတွေနဲ့ လူနေအဆောက်ဦ များပြားလာတာတွေ ကြောင့်လည်း ဆောင်းခိုငှက်တွေဟာ နားခိုတာမလုပ်ရဲတော့ဘဲ  တဖြည်းဖြည်း နည်းပါးလာရတယ်လို့လည်း ဆိုပါတယ်။

မုံရွာမြို့ခံ ဦးအောင်မြင့်က "အခုဟာ အလွန်ဆုံးရှိ ရေကြက်နဲ့ ဘဲလောက်ပဲ ရှိတော့မယ်။  ကျူးကျော်အိမ်ခြေတိုးလာတာတွေရော၊ အင်းမြေကို မြေကွက်ရိုက်ရောင်းချလာတာတွေကြောင့် အဆောက်အအုံတွေ လုပ်လာကြတော့ တကယ့်ဆောင်းခိုငှက် ရှားပါးအကောင်ကြီးတွေက မဆင်းရဲ ကြတော့ဘူး။ သိပ်မကြာသေးခင်ကမှ ငါးလုပ်ငန်းဦးစီးဌာနက အင်းထဲ မြေကွက်ရိုက် မရောင်းချဖို့ ဆိုင်းဘုတ်တွေ လာထောင်ထားတယ် " လို့ ပြောပါတယ်။

ညောင်ကိုင်းအင်းကို အခုလိုရာသီချိန်မှာ ရှားပါးငှက်မျိုးစိတ်တွေ လေ့လာသူတွေအနေနဲ့ ‌လာရောက်လေ့လာနိုင်စရာနေရာအဖြစ် သက်ဆိုင်ရာတာဝန်ရှိသူတွေက ထိန်းသိမ်းပံ့ပိုးပေးဖို့ရာ မုံရွာမြို့ ဒေသခံပြည်သူတွေက လိုလားနေကြပါတယ်။

‌မုံရွာမြို့ရှိ ညောင်ကိုင်းအင်းဟာ ထန်းတောရပ်ကွက်နဲ့ ပြည်ထောင်စုလမ်းဘေးမှာတည်ရှိပြီး အင်းဧရိယာဟာ ဧက ၃၀၀ ကျော် ကျယ်ဝန်းပါတယ်။

1 month Ago
More News
Up