ပညာရေး/နည်းပညာ

September 26, 2021

အင်တာနက်ဖြတ်တောက်ခံရသည့်မြို့ပေါင်း ၂၅ မြို့အထိရှိလာ

စစ်အာဏာသိမ်းပြီးကတည်းက အင်တာနက်ဖြတ်တောက်မှုတွေ မကြာခဏကြုံတွေ့ခဲ့ရတဲ့ မြန်မာနိုင်ငံမှာ လတ်လော စစ်ကောင်စီတပ်တွေ စစ်ဆင်ရေးလုပ်နေတဲ့  တိုင်းနဲ့ပြည်နယ်တချို့ထဲက မြို့ပေါင်း  ၂၅ မြို့အထိ အင်တာနက်တွေ ဖြတ်တောက်ခံထားရပါတယ်။

တိုက်ပွဲဖြစ်ပွားနေတဲ့  ချင်းပြည်နယ်၊ ကချင်ပြည်နယ်၊ မကွေးတိုင်း၊ စစ်ကိုင်းတိုင်းနဲ့ မန္တလေးတိုင်းတွေထဲမှာ အင်တာနက်ဖြတ်တောက်ခံထားရတာ မြို့ပေါင်း ၂၅ မြို့အထိ ရှိလာနေပါတယ်။

ကချင်ပြည်နယ်ထဲ ဖားကန့်မြို့နယ်မှာဆိုရင် ဩဂုတ် ၂၀ ရက်နေ့ကတည်းက အင်တာနက်ပြတ်တောက်နေတာ တစ်လကျော်ကြာမြင့်နေပြီဖြစ်ပါတယ်။

နောက်ဆုံးရရှိထားတဲ့ သတင်းတွေအရ စက်တင်ဘာလ ၂၆ ရက်နေ့မနက်ပိုင်းကစပြီး တိုက်ပွဲ ဖြစ်ပွားနေတဲ့ ကောလင်း၊ ဝန်းသို၊ ပင်လည်ဘူးမြို့နယ်တွေမှာလည်း အင်တာနက်လိုင်းတွေအပြင် ဖုန်းလိုင်းတွေပါ ဖြတ်တောက်ခံထားရပါတယ်။

အခုဆိုရင် အင်တာနက် ဖြတ်တောက်ခံထားရတာ ချင်းပြည်နယ်မှာ ၈ မြို့နယ်၊ စစ်ကိုင်းတိုင်းမှာ ၁၀ မြို့နယ်၊ မကွေးတိုင်းမှာ ၄ မြို့နယ်၊ မန္တလေးတိုင်းမှာ  ၂ မြို့နယ်နဲ့ ကချင်ပြည်နယ်ထဲမှာ ဖားကန့်မြို့တို့ ဖြစ်ကြပြီး ဆက်သွယ်ရေး ညွှန်ကြားမှုဦးစီးဌာနရဲ့ လမ်းညွန်ချက်အရ အင်တာနက်ပိတ်ထားတယ်ဆိုလို့ MPT Call Center ကိုကိုးကားပြီး  VOA သတင်းမှာ ဖော်ပြပါတယ်။

ဖေဖော်ဝါရီ ၁ ရက် စစ်တပ်က အာဏာသိမ်းလိုက်တဲ့နောက်ပိုင်း မြန်မာနိုင်ငံရဲ့အင်တာနက် လွတ်လပ်ခွင့်အခြေအနေဟာ အရင်နှစ်ကထက် အဆင့် ၁၄ ဆင့်လောက် ကျဆင်းသွားတယ်လို့ Freedom House အဖွဲ့နဲ့ Freedom of Expression Myanmar အဖွဲ့တို့က အစီရင်ခံစာမှာ ထုတ်ပြန်ထားပါတယ်။

တာဝါတိုင်တွေ ဖျက်ဆီးခံရလို့   အင်တာနက်လိုင်းတွေ ပြတ်တောက်နေတာ ဖြစ်တယ်လို့ စစ်ကောင်စီ နိုင်ငံခြားရေးဌာနက စက်တင်ဘာ ၂၅ ရက်က ထုတ်ပြန်ထားပါတယ်။

2 days Ago

September 25, 2021

အခြေခံပညာကျောင်းအားလုံး အောက်တိုဘာ ၂၄ ထိ ဆက်ပိတ်

နိုင်ငံတဝန်း ပုဂ္ဂလိကကျောင်းနဲ့ ဘုန်းတော်ကြီးသင်ပညာရေးကျောင်းတွေအပါအဝင် အခြေခံပညာကျောင်းတွေကို အောက်တိုဘာ ၂၄ ရက်‌အထိ ဆက်လက်ပိတ်ထားမယ်လို့ အကြမ်းဖက်စစ်ကောင်စီက သတင်းထုတ်ပြန်ပါတယ်။

ကိုဗစ်-၁၉ ရောဂါပိုးကူးစက်ပျံ့နှံ့မှုကို ထိန်းချုပ်နိုင်ဖို့ ယာယီပိတ်ထားတာလို့လည်း ဆိုထားပါတယ်။

မြန်မာနိုင်ငံရဲ့ ကိုဗစ်-၁၉ ရောဂါပိုးကူးစက်ပြန့်ပွားမှု အခြေအနေမှာ စက်တင်ဘာ ၂၄ ရက်ထိ ပိုးတွေ့လူနာ စုစုပေါင်း ၄၅၅၀၇၄ ဦးရှိခဲ့ပြီး သေဆုံးသူ ၁၇၄၁၃ ဦးရှိကာ ဆေးရုံ ဆင်းခွင့်ရသူ ၄၀၂၉၂၉  ဦးတယ်လို့ စစ်ကောင်စီရဲ့ကျန်းမာရေးဌာနက ထုတ်ပြန်ထားပါတယ်။

အာဏာသိမ်းစစ်ကောင်စီဟာ ပြီးခဲ့တဲ့ ဇွန် ၁ ရက်နေ့မှာ စာသင်ကျောင်းတွေကို အတင်းအကျပ် ပြန်လည်ဖွင့်လှစ်ခဲ့ပြီးနောက် ကိုဗစ်-၁၉ ရောဂါ ကူးစက်မှု တိုးမြင့်လာတာကြောင့် ဇူလိုင် ၁၅ ရက်နေ့ကစတင်ပြီး ကျောင်းတွေ ပြန်ပိတ်ထားခဲ့တာလည်း ဖြစ်ပါတယ်။

3 days Ago
More News
Up