ပြည်တွင်းရွှေဈေးဟာ မနှစ်က စံချိန်တင် အမြှင့်ဆုံးဈေးနှုန်းကို ကျော်လွန်ပြီး အတက်ကြမ်းလာတဲ့အပြင် နေ့စဉ်နဲ့အမျှ ဈေးနှုန်းပြောင်းလဲနေတာကြောင့် သတိထားကြဖို့ ရွှေဈေးကွက်ကျွမ်းကျင်သူတွေက ပြောဆိုလိုက်ပါတယ်။

ပြည်တွင်းအကယ်ဒမီရွှေဈေးက တကျပ်သားကို မနှစ်က ၁,၃၃၃,၅၀၀ ကျပ်နဲ့ အမြှင့်ဆုံး စံချိန်တင်ခဲ့တာပါ။ ဒါပေမဲ့ လက်ရှိမှာတော့ ပြည်တွင်းအကယ်ဒမီရွှေဈေးက တကျပ်သားကို ၂,၆၀၀,၀၀၀ ကျပ်အထိ အတက်ကြမ်းလာပါတယ်။ ဒါကြောင့် ရွှေဈေးက တနှစ်အတွင်းမှာ ကျပ် ၁,၂၆၆,၅၀၀  တက်လာပြီး ၄၈ ရာခိုင်နှုန်းအထိ မြှင့်တက်လာပါတယ်။

ပြည်တွင်းရွှေဈေးနှုန်း အခုလို အတက်ကြမ်းလာတာက နှစ်စဉ် ပုံမှန်ဖြစ်လေ့ရှိတဲ့ မိုးတွင်းကာလ ဇူလိုင်နဲ့ သြဂုတ်လတွေမှာ ရွှေတူးဖော်ရေးလုပ်ငန်းတွေဟာ အကြောင်းအမျိုးမျိုးကြောင့် ရပ်နား နေရတဲ့အပြင် ကုန်သည်တွေကြောင့်လည်း ပါတယ်လို့ ဈေးကွက်သုတေသီတွေက ပြောပါတယ်။

ရွှေလုပ်ငန်းရှင်တဦးက “လူတွေအကုန်လုံးက ရွှေဈေးကို အတက်ပဲ မြင်ပြီဆိုရင် ရွှေဈေးက ပြန်ကျတတ်တယ်နော်။ အဲဒီအတွက်ကြောင့် ဒီလအတွက်ပဲ မှန်းထားတယ်၊ ပြန်ကျဖို့ ရှိတယ်။ ဘာလို့လဲဆိုတော့ လူတွေက ရွှေဈေးကို တက်မယ်ထင်ပြီး သူ့ထက်ငါ အပြိုင်လိုက်ဝယ်လာတာ ကြာပြီလေ။ ကြာပြီဆိုတော့ လူတွေရဲ့ လက်ထဲ တော်တော်များများမှာ ရွှေက ပြည့်နေပြီ။ ပြီးတော့ ဒီလိုကာလတွေမှာ ဖြစ်တာက ရွှေတူးဖော်ရေး မိုင်းတွေမှာ ရွှေထုတ်လို့ မရဘူး။ ရေဝင်တာနဲ့ မြေပြိုမှာစိုးလို့ မလုပ်ကြတာ။ နောက်တချက်က လှောင်သမားတွေ စပါး၊ ပဲ  သီးနှံလှောင်ကုန်သမားတွေက ဒီရာသီမှာ သူတို့လှောင်ထားတဲ့ ကုန်တွေကို ထုတ်ရောင်းကြတယ်။ အဲဒီကရတဲ့ငွေနဲ့ သူတို့က ရွှေကို ပြန်သိမ်းကြတယ်။ ရွှေကို ပြန်သိမ်းတဲ့အတွက် ဈေးကွက်မှာ ဝယ်လိုအားပြီး ထုတ်လုပ်မှုက မရှိတော့ ဈေးတွေ တက်သွားတာ။ ပြီးတော့ ပြည်တွင်းရွှေဈေးက ဒေါ်လာငွေလဲနှုန်းပေါ်မှာ အခြေခံတာဖြစ်လို့လည်း ငွေလဲနှုန်းနဲ့အတူ ရွှေဈေးက ပါသွားတာ။ ဒါပေမဲ့ နောက်လလောက်ဆိုရင် ဈေးက ပြန်ငြိမ်သွားလိမ့်မယ်” လို့ ဒီဗွီဘီကို ပြောပါတယ်။

ဈေးကွက်အတွင်းမှာ မည်သည့်ကုန်အမျိုးအစားပဲဖြစ်ဖြစ် ဈေးအတက် ကြမ်းပါက အကျလည်း ကြမ်းနိုင်တာကြောင့် သတိပြုဖို့ လိုပါတယ်။

ဈေးကွက်သုတေသီတဦးက “ရွှေ တမျိုးတည်း မဟုတ်ပါဘူး။ ဘယ်အရာပဲဖြစ်ဖြစ် ဝုန်းခနဲ တက်သွားလို့ရှိရင် ဝုန်းခနဲ ပြန်ကျတက်တယ်နော်။ ဒါကြောင့် ဈေးကွက်ထဲမှာ ငြိမ်ငြိမ်လေးနဲ့တက်သွားတဲ့ ဈေးက အခိုင်ဆုံးပဲ။ အဲ့လိုမဟုတ်ဘဲနဲ့ အတက်ကြမ်းလို့ ရှိရင် အကျလည်း ကြမ်းတယ်။ ပြီးတော့ အခုချိန်ကျမှ ရွှေလိုက်ဝယ်ရင်တော့ မြတ်လည်း နည်းနည်းပဲ မြတ်မှာနော်။ မတော်လို့ ကျပြီဆိုရင် ပြေးဖို့ မမှီတော့ဘူး။ အကျကြမ်းရင်တော့ ရွှေဈေးက ၂၂ နဲ့ ၂၃ သိန်းလောက်အထိ ရောက်သွားနိုင်တယ်။ အဲဒီတော့ ဒီအချိန်မှာ အရောင်းအဝယ် သတိထားကြဖို့ လိုတယ်။  ဘာကြောင့်ဆို မြတ်ရင် နည်းနည်းပဲ မြတ်မယ်။ ရှုံးရင် များများ ရှုံးနိုင်တယ်။ တကယ်လို့ပေါ့ မမြင်နိုင်တဲ့ အရေးကိစ္စတွေပေါ်လာ ရင်တော့ မပြောတတ်ဘူးပေါ့ နော်” လို့ ဒီဗွီဘီကို ပြောပါတယ်။

ပြည်တွင်းရွှေဈေးကွက်မှာ အကယ်ဒမီရွှေဈေးက တကျပ်သားကို ၂,၆၀၀,၀၀၀ အထိ ဈေးပေါက်နေပေမယ့် ပြည်တွင်းရွှေဈေးနှုန်းအတွက် ရန်ကုန်တိုင်း ရွှေလုပ်ငန်းရှင်များအသင်းက နေ့စဉ်ထုတ်ပြန်ပေးတဲ့ ရည်ညွှန်း ရွှေဈေးနှုန်းမှာ ဒီကနေ့ (သြဂုတ် ၁၂ ရက်၊ နေ့လယ်ခင်း ၁၂း၁၅ နာရီ အထိ) ပြည်တွင်းအကယ်ဒမီရွှေဈေးက တကျပ်သားကို ၂,၀၉၁,၀၀၀ ကျပ်သာ ရှိပါတယ်။

ဒါကြောင့် ရန်ကုန်တိုင်းရွှေလုပ်ငန်းရှင်များအသင်းက ထုတ်ပြန်တဲ့ ရည်ညွှန်းဈေးနှုန်းဟာ ဈေးကွက်မှာ ဖြစ်ပေါ်နေတဲ့ ဈေးနှုန်းနဲ့ယှဉ်ရင် တကျပ်သားကို ၅၀၉,၀၀၀ ကျပ်ကွာဟနေတာ တွေ့ရပါတယ်။ ကမ္ဘာ့ရွှေဈေးကတော့ တအောင်စကို အမေရိကန်ဒေါ်လာ ၁၇၉၁ ဒေါ်လာရှိပါတယ်။

အလားတူ နိုင်ငံခြားငွေလဲလှယ်နှုန်းကလည်း ပြင်ပဈေးကွက်မှာ အမေရိကန် ၁ ဒေါ်လာကို မြန်မာငွေ ၂၈၉၀ နဲ့ ၂၈၃၀ ကျပ်အကြားမှာ အရောင်းအဝယ် ရှိနေပါတယ်။ စစ်ကောင်စီ လက်အောက်ခံ ဗဟိုဘဏ်က ထုတ်ပြန်ပေးထားတဲ့ ရည်ညွှန်းငွေလဲနှုန်းကတော့ အမေရိကန် ၁ ဒေါ်လာကို မြန်မာငွေ ၂၁၀၀ ကျပ်နှုန်း သတ်မှတ်ထားပါတယ်။

ကချင်ပြည်နယ်အတွင်း မြစ်ကြီးနား၊ ဗန်းမော်၊ ဝိုင်းမော်၊ မိုးညှင်း၊ မိုးကောင်း၊ နမ္မတီးနဲ့ ပူတာအိုမြို့တွေမှာ စက်သုံးဆီစျေးတွေ မြင့်တက်လာပြီး ဆိုင်အများစုက ဆီပြတ်လပ်နေတယ်ဆိုကာ အကန့်အသတ်နဲ့သာ ရောင်းချပေးနေတယ်လို့  ဒေသခံတွေက ပြောပါတယ်။

မြစ်ကြီးနားဒေသခံတဦးက “ဆီမရောင်းနိုင်ဘူးဆိုရင်လည်း ဆိုင်မပိတ်ထားဘူး။ ဆိုင်ထဲဝင်သွားတော့မှ ဆီမရှိဘူးပြောတယ်။ ဆီဈေးနှုန်း ဆိုင်းဘုတ်မှာလည်း ဈေးနှုန်းတွေ ရေးထားလို့ ရမယ်ထင်ပြီး ဆီဝင်ထည့်တာ မရဘူးပြောတယ်။ ဒါနဲ့ တခြားဆိုင် သွားထည့်ပြီး ပြန်လာတော့ ခုနက ဆီမရှိဘူးပြောတဲ့ဆိုင်မှာ ဆိုင်ကယ်တွေ ဆီထည့်ပေးနေပြန်ရော။ ဘာတွေမှန်းကို မသိတော့ပါဘူးဗျာ” လို့ ပြောပါတယ်။

မြစ်ကြီးနားမြို့ပေါ်က တချို့ဆိုင်တွေမှာတော့ ဆိုင်ကယ်တစီးကို ကျပ် ၂,၀၀၀ ဖိုးနဲ့ ကားတစီး ကျပ် ၁၀,၀၀၀ ဖိုးထည့်ပေးတဲ့ဆိုင် ရှိသလို ကျပ် ၃၀,၀၀၀ ဖိုး ထည့်ပေးတဲ့ဆိုင်လည်း ရှိနေပါတယ်။

မိုးညှင်းမြို့နယ်က စက်သုံးဆီရောင်းချနေသူတဦးက “ဆီကတော့ အကန့်အသတ်နဲ့ပဲ ရောင်းနိုင်တယ်။ တချို့ ပုံးတွေနဲ့ အများကြီးလာဝယ်တယ်။ မရောင်းပေးနိုင်ဘူး။ ဆိုင်ကယ်တစီး ကျပ် ၂,၀၀၀ ဖိုးပဲ ရောင်းပေးနိုင်တယ်။ ဘာကြောင့် လိုသလောက် မရောင်းပေးလဲဆိုတော့ ဆီပြတ်သွားရင် သွားလာရေး ပိုခက်ခဲသွားမှာစိုးလို့ ခုကတည်းက အကန့်အသတ်နဲ့ ရောင်းပေးနေတာပါ” လို့ ပြောပါတယ်။

ကချင်ပြည်နယ်အတွင်း စက်သုံးဆီဈေးနှုန်းဟာ နေရာဒေသပေါ်မူတည်ပြီး မြစ်ကြီးနားမြို့ပေါ်မှာ 92 တလီတာကို ၁,၉၅၀ ကျပ်မှ ၂,၀၀၀ အတွင်း၊ 95 တလီတာကို ၂,၄၀၀ ကျပ်မှ ၂,၅၀၀ ကျပ်အတွင်း တန်းစီစနစ် အကန့်အသတ်နဲ့ ရောင်းချပေးနေပါတယ်။

ဗန်းမော်မြို့မှာတော့ စက်သုံးဆီအရောင်းဆိုင်တွေဖြစ်တဲ့ BOC၊ ဟိန်းအောင်၊ ရွှေတောင်တန်း၊ မိသားစု၊ ပါဝါလိုက် အစရှိတဲ့ ဓာတ်ဆီဆိုင်ကြီးတွေမှာ ဆိုင်ဖွင့်ထားပေမဲ့ ဆီပြတ်နေတယ်ဆိုပြီး မရောင်းချဘဲ DENKO တဆိုင်တည်းမှာပဲ ရောင်းချပေးနေတဲ့အတွက် ဒေသခံတွေ အခက်တွေ့နေကြပါတယ်။

မြို့ခံတဦးက “ဒီသြဂုတ်လထဲ ပိုဆိုးလာပြီ။ စဥ်းစားမရတာက ဓာတ်ဆီဆိုင်တွေ တော်တော်များများက ဆီပြတ်တယ်ပြောပြီး ပြိုင်တူမရောင်းကြတာ၊ DENKO မှာလည်း အကန့်အသတ်နဲ့ပဲ ရောင်းပေးနေတာ။ ဆိုင်ကယ်တစီးကို ၃,၀၀၀၊ သုံးဘီးတစီးဆို ၅,၀၀၀၊ အိမ်စီးကားဆို ၁၅,၀၀၀၊ ၂၀,၀၀၀ ပဲ ထည့်ပေးတော့တာ။ နေပူကြီးထဲ၊ မိုးရွာကြီးထဲ နာရီဝက်လောက် တန်းစီပြီးမှသာ ထည့်ကြရတယ်” လို့​ ပြောပါတယ်။

ဒီနေ့ သြဂုတ် ၁၁ ရက်အထိ ဓာတ်ဆီတလီတာ ပေါက်စျေးမှာ 92 ၂,၂၆၅ ကျပ်၊ 95 ၂,၃၄၅ ကျပ်၊ ဒီဇယ် ၂,၅၉၀ ကျပ်၊ ပရီမီယမ်ဒီဇယ် ၂,၆၆၀ ကျပ်နဲ့ အသီးသီးရောင်းချနေပြီး ၂၄ နာရီလုံး မရောင်းချဘဲ ည ၈ နာရီမှ မနက် ၆ နာရီအထိ ဆိုင်တွေကို ပိတ်ထားပါတယ်။

အာဏာသိမ်းစစ်ခေါင်းဆောင်က စက်သုံးဆီတင်သွင်းမှုကို လျှော့ချမယ်လို့ ပြောဆိုပြီးတဲ့နောက် မြန်မာပြည်တွင်းမှာ စက်သုံးဆီ ဈေးနှုန်းက ရက်ပိုင်းအတွင်းမှာ တရှိန်ထိုးမြှင့်တက်တဲ့အပြင် ရန်ကုန် မန္တလေးမြို့ကြီးတွေ အပါအဝင် တနိုင်ငံလုံးမှာ ဆီလက်ကျန်နည်းလာပြီး ပြတ်လပ်လာတဲ့ အကြောင်း အသေးစားနဲ့ အလတ်စား စက်သုံးဆီအရောင်းဆိုင်ရှင်တွေက ပြောပါတယ်။

နေပြည်တော်မှာ သြဂုတ်လ ၈ ရက်နေ့က ပြုလုပ်ခဲ့တဲ့ စစ်ကောင်စီအစည်းအဝေးမှာ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က  စွမ်းအင်ကဏ္ဍနဲ့ ပတ်သက်ပြီး အမေရိကန် ဒေါ်လာ ၁ ဒသမ ၃ ဘီလီယံလောက်  ပြည်ပမှ ရေနံနဲ့ ရေနံထွက်ပစ္စည်းတွေတင်သွင်းမှုကို လျှော့ချသွားဖို့ လိုတယ်လို့ ပြောဆိုခဲ့တာပါ။

အခုလိုပြောဆိုပြီးတဲ့နောက် ရက်ပိုင်းအတွင်းမှာ အောက်တိန်း အမျိုးအစား စက်သုံးဆီဈေးနှုန်းက သြဂုတ်လ ၆ ရက်မှာ ၁ လီတာကို ကျပ် ၁၆၀၀ စွန်းစွန်းသာ ရှိခဲ့ပေမယ့် သြဂုတ် ၉ ရက်မှာ ၁ လီတာကို ကျပ် ၁၈၀၀ ကျော်ရှိခဲ့ပြီး ဒီကနေ့ (သြဂုတ်လ ၁၁)မှာ ၁ လီတာကို ကျပ် ၂၁၄၀ ကျော်ရှိတာကြောင့် ရက်ပိုင်းအတွင်းမှာ ၁ လီတာကို ကျပ် ၅၄၀ ကျော် မြင့်တက်သွားပါတယ်။ ဒါဟာ  ရက်ပိုင်းအတွင်းမှာ ရာခိုင်နှုန်းအားဖြင့် ၂၅ ရာခိုင်နှုန်း တက်သွားတာပါ။

ပြည်တွင်းစက်သုံးဆီရောင်းဝယ်ရေးဈေးကွက်မှာ ဆီဈေးနှုန်းက ရုတ်တရက် တရှိန်ထိုး မြင့်တက်လာပေမယ့် အရောင်းဆိုင်တွေမှာတော့ စက်သုံးဆီက ပြတ်သလောက်နီးနီး ရှိနေပါတယ်။

မန္တလေးအခြေစိုက် စက်သုံးဆီအရောင်းဆိုင်ပိုင်ရှင်တဦးက “သူတို့က စက်သုံးဆီကို ခွဲတမ်းနဲ့သာ ချပေးတော့တဲ့အတွက် လုံလုံလောက်လောက် မရောင်းပေးနိုင်ဘူး ဖြစ်နေတယ်။ သဘောက ကျနော်တို့ဆို မန္တလေးကနေ ရန်ကုန်တက်လာပြီး တွဲကားနဲ့ ဆီသွားသယ်ရတယ်။ သွားသယ်တဲ့အခါ သူတို့က တစီးစာ မပေးဘူးဗျာ။ တဝက်တပျက်နဲ့ သွားသယ်ရတယ်။ ဆိုတော့ သယ်ယူစရိတ်တွေက ပိုကုန်တယ်ဗျာ။ ပြီးတော့ ခုရက်ပိုင်းဆို လူတွေက စက်သုံးဆီ လက်ကျန် နည်းလာလို့ ထိန်းထိန်းပြီး ရောင်းနေရတယ်။ ဆိုင်တိုင်းနီးပါးကလည်း ပြတ်သလောက် ရှိနေကြပြီ။ ဆိုင်ကြီးတွေဖြစ်တဲ့ အိတ်စပို့စ် ကုမ္ပဏီကြီးတွေမှာသာ ဆီက မပြတ်သေးတာ။ ကျနော်တို့လို sme ဆိုင်တွေတော်တော်များများက ပြတ်သလောက်နီးပါး ဖြစ်နေကြပြီ” လို့ ဒီဗွီဘီကို ပြောပါတယ်။

စစ်ကောင်စီက နိုင်ငံခြားငွေကြေးအပေါ် စီမံရာမှာ ဈေးနှုန်းသာ သတ်မှတ်ထားပြီး ရောင်းချပေးနိုင်မှု မရှိတဲ့ အခြေအနေတွေကြောင့် စက်သုံးဆီက ရှိသော်လည်း ဝယ်မရ ဖြစ်နေရပါတယ်။

ရန်ကုန်အခြေစိုက် စက်သုံးဆီအရောင်းဆိုင်မှ လုပ်ငန်းရှင်တဦးက “ကျနော်တို့လည်း ဆီပြတ်တော့မယ်။ ရောင်းစရာ ဆီက မရှိတော့ဘူး။ စစ်ကောင်စီက ဒေါ်လာလဲလှယ်နှုန်းကို အသေ သတ်မှတ်လိုက်တာက သူရောင်းချပေးနိုင်ရင်တော့ အကြောင်းမဟုတ်ဘူးလေ။ အခုက ဈေးနှုန်းပဲ ရှိပြီး ဒေါ်လာမရှိတဲ့ အနေအထားမှာဆိုတော့ သွင်းကုန်လုပ်တဲ့သူတွေ အကုန်အခက်အခဲ ဖြစ်ကုန်တာပေါ့။ နိုင်ငံခြားကို ပို့ကုန်ပဲဖြစ်ဖြစ် သွင်းကုန်ပဲဖြစ်ဖြစ် ဒေါ်လာဝယ်ပြီးမှ လုပ်လို့ရတယ်လေ။ အခုဆိုရင် ဘယ်လောက် ရာခိုင်နှုန်း အရင်သွင်းဆိုပြီး သတ်မှတ်ထားတာ။ အဲ့လိုအနေအထားမှာ အပြင်ဈေးက ၂၈၀၀ ရှိနေပေမယ့် အခုသတ်မှတ်ဈေးက ၂၁၀၀ ဆိုတော့ ကျပ် ၁၀၀၀ လောက်ရှုံးနေပြီ။ ဘယ်လိုမျှ အဆင်မပြေဘူး။ ရောင်းရှုံး ဖြစ်နေပြီ” လို့ ဒီဗွီဘီကို ပြောပါတယ်။

အကြမ်းဖက်စစ်ခေါင်းဆောင်ကတော့ ပြည်တွင်းမှာ အထိုက်အလျှောက် ရေနံထွက်ရှိပြီး တချို့ဒေသတွေမှာတော့ တွင်းတိမ်ရေနံတူးဖော်ထုတ်လုပ်မှုလုပ်ငန်းတွေကို စနစ်တကျ ဖြစ်ဖို့လိုအပ်ကြောင်းနဲ့  ရေနံထုတ်လုပ်မှုလုပ်ငန်းတွေကို တိုင်းပြည်အတွက် အကျိုးရှိအောင် စနစ်တကျ ကြပ်မတ်ဆောင်ရွက်သွားဖို့လိုတယ်လို့  စစ်ကောင်စီ စီမံခန့်ခွဲရေး ကော်မတီ အစည်းအဝေးမှာ ပြောပါတယ်။

စစ်ကောင်စီလက်အောက်ခံ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေး ကော်မတီက သြဂုတ် ၁၁ ရက်အတွက် ထုတ်ပြန်တဲ့ ရည်ညွှန်းလက်ကားဈေးနှုန်းမှာ ရန်ကုန်ဈေးကွက်အတွက် ၁ လီတာကို အောက်တိန်း(၉၂ အမျိုးအစား) ၂၁၄၀ ကျပ်၊ အောက်တိန်း(၉၅ အမျိုးအစား) ၂၂၁၀ ကျပ် သတ်မှတ်ထားပြီး မန္တလေးဈေးကွက်အတွက် ၂၁၈၅ ကျပ် နဲ့ ၂၂၆၀ ကျပ် သတ်မှတ်ပေးထားပါတယ်။

တရက်အတွင်း စက်သုံးဆီတလီတာကို ကျပ် ၃၀၀ ဝန်းကျင် မြင့်တက်လာပြီး ရန်ကုန် အပါအဝင် နယ်ဒေသတချို့မှာ စက်သုံးဆီ ဝယ်ယူရခက်တဲ့ အခြေအနေတွေ ထပ်မံဖြစ်ပေါ်လာပါတယ်။

အဲဒီလို စျေးနှုန်းကြီးမြင့်တာ၊ အရောင်းဆိုင်တွေမှာ ဆီပြတ်လပ်ပြီး ဝယ်ယူရခက်တဲ့ ဖြစ်စဉ်တွေဟာ စစ်အာဏာသိမ်းမှုနောက်ပိုင်း မကြာခဏ ဖြစ်ပေါ်နေတာပါ။

စက်သုံးဆီ ပြတ်လပ်မှုကြောင့် မနေ့က ဈေးကွက်အတွင်း ဆိုင်တချို့ အရောင်းအဝယ် ရပ်နားထားတာ တွေ့ရပြီး ဒီနေ့ ဈေးကွက်ဖွင့်ချိန်မှာတော့ တလီတာကို ကျပ် ၃၀၀ ဝန်းကျင်ထိ စျေးထိုးတက်လာပါတယ်။

မော်လမြိုင်မြို့ခံ ပြည်သူတဦးက “ဒီနေ့ ၃၀၀ ကျော်လောက် ထပ်တက်တယ်။ မရှိမဖြစ် သုံးနေရတော့ ဈေးကြီးလည်း ဝယ်ထည့်ရတာပဲ။ ဆီဈေးလည်း တက်တယ်ဆိုတော့ ဆီပြတ်ပါပြီဆိုပြီး မနေ့ကပိတ်ထားတဲ့ ဆိုင်တွေက အရောင်းပြန်ဖွင့်နေတာ တွေ့ရတယ်” လို့ ပြောပါတယ်။

ဒီကနေ့ ရန်ကုန်ဈေးကွက်မှာ အောက်တိန်း 92 Ron တလီတာကို ၂,၁၄၀ ကျပ်၊ အောက်တိန်း 95 Ron တလီတာကို ၂,၂၁၀ ကျပ်၊ ဒီဇယ် တလီတာကို ၂,၄၄၀ ကျပ်နဲ့ ပရီမီယမ်ဒီဇယ် တလီတာကို ၂,၅၁၅ ကျပ်နဲ့ အမြင့်ဈေးမှာ ရပ်တည်နေပါတယ်။

ဗဟိုဘဏ်က ဒေါ်လာဈေးမပြောင်းမီ ဩဂုတ် ၇ ရက်က ရန်ကုန်ဈေးကွက်မှာ အောက်တိန်း 92 Ron တလီတာကို ၁,၆၁၅ ကျပ်၊ အောက်တိန်း 95 Ron တလီတာကို ၁,၆၆၅ ကျပ်၊ ဒီဇယ် တလီတာကို ၁,၉၇၀ ကျပ်၊ ပရီမီယမ်ဒီဇယ် တလီတာကို ၂,၀၂၅ ကျပ် အသီးသီးရှိခဲ့ပြီး ဒေါ်လာရည်ညွှန်းဈေး ၁,၈၅၀ ကျပ်ကနေ ၂,၁၀၀ ကျပ်ကို ပြောင်းလဲပြီး ၄ ရက်အကြာ ဒီကနေ့မှာတော့ စက်သုံးဆီ အမျိုးအစားအလိုက် တလီတာကို ကျပ် ၅၀၀ ဝန်းကျင်ထိ ဈေးထိုးတက်လာတာ ဖြစ်ပါတယ်။

ပြီးခဲ့တဲ့ ဇွန်လ ဒုတိယပတ်က အောက်တိန်း 92 Ron တလီတာကို ကျပ် ၂,၃၀၀ အထက်ထိ စံချိန်တင် အမြင့်ဈေး ‎ရောက်ရှိခဲ့ပြီး အခုအခါ တလီတာ ကျပ် ၂,၀၀၀ အထက်ကို တကျော့ပြန်လည် ရောက်ရှိလာတာ ဖြစ်ပါတယ်။

အခုလို စက်သုံးဆီအမြင့်ဈေး ရပ်တည်နေချိန် စစ်ကောင်စီကတော့ ပြည်ပကနေ စက်သုံးဆီပါဝင်တဲ့ ရေနံထွက်ပစ္စည်း တင်သွင်းမှုကို လျှော့ချဖို့ ကြိုးပမ်းနေပြီး ပြည်တွင်းထုတ်လုပ်မှုကို တွန်းအားပေးဖို့ လုပ်ဆောင်နေပါတယ်။