စစ်ကိုင်းတိုင်း၊ ကန့်ဘလူမြို့နယ်၊ ရေအေးကျေးရွာတောင်ဘက်မှာ စက်တင်ဘာလ ၂၇ ရက် နေ့လယ်ပိုင်းမှာ ခရီးသွားပြည်သူနှစ်ဦးကို စစ်တပ်က အကြောင်းမဲ့ပစ်သတ်လိုက်တယ်လို့ ဒေသခံတွေဆီက သိရပါတယ်။
“ငှက်ပျောတိုင်းနဲ့ စပါယ်နံ့သာကြားက ရေအေးကျေးရွာတောင်ဘက်မှာပါ။ ခရီးသွားပြည်သူနှစ်ဦးကို စစ်တပ်က ပစ်သတ်တယ်လို့ သိရတယ်။ ဘယ်သူဘယ်ဝါ ဖြစ်တယ်ဆိုတာတော့ မသိရသေးဘူး” လို့ ဒေသခံတစ်ဦးက ပြောပါတယ်။
ဒါ့အပြင် အခင်းဖြစ်နေရာဟာ ရွာနဲ့ အလှမ်းဝေးတာကြောင့် ပြည်သူ ၂ ဦးအား စစ်တပ်က ဘာကြောင့် ပစ်သတ်လိုက်တယ်ဆိုတာ မသိရသေးဘူးလို့ ဆိုပါတယ်။
သေဆုံးသူတွေကို ကန့်ဘလူ ရဲတွေက ဆေးရုံပို့လိုက်ပြီး ကရုဏာရှင် ကျန်းမာရေးဝန်ဆောင်မှုအသင်းက မီးသင်္ဂြိုဟ်ပေးလိုက်တယ်လို့ သိရပါတယ်။
အခင်းဖြစ်နေရာဟာ ရွှေဘို-မြစ်ကြီးနား ကားလမ်းမပေါ်မှာ တည်ရှိပြီး စစ်တပ်က စစ်ဆေးရေးဂိတ်လုပ်ကာ ကားဆိုင်ကယ်တွေ တားဆီးစစ်ဆေးနေခဲ့တာ လအတန်ကြာပြီလို့ သိရပါတယ်။
စစ်ကိုင်းတိုင်းဒေသကြီး၊ ရွှေဘိုခရိုင်၊ ဒီပဲယင်းမြို့နယ် ရွာသစ်ကျေးရွာကြား မိုင်တိုင်အမှတ် (၁/၁၂၈) မှာ စက်တင်ဘာ ၂၇ ရက်နေ့ ညနေ ၄ နာရီလောက်က ယာဉ်တစီး ရေမြောင်းထဲ ထိုးကျတိမ်းမှောက်မှု ဖြစ်ပွားခဲ့တာကြောင့် ၁ ဦးသေဆုံးပြီး ၁ ဦး ဒဏ်ရာရရှိခဲ့ပါတယ်။
အေဒီဘင်အမျိုးအစား အဖြူရောင်မော်တော်ယာဉ်ဟာ ကားရှေ့မှ ဖြတ်သန်းသွားတဲ့ ကလေးငယ်အား တိမ်းရှောင်ရာမှ လမ်းဘေးရှိ ရေမြောင်းထဲကို ထိုးကျတိမ်းမှောက်မှု ဖြစ်ပွားခဲ့တာလို့ မီးသတ်တပ်ဖွဲ့က ထုတ်ပြန်ပါတယ်။
ဒီပဲယင်းမြို့နယ်မီးသတ်စခန်းက မီးငြှိမ်းသတ်ယာဉ် ၁ စီး၊ သန္ဓေတပ်ဖွဲ့ဝင်တွေနဲ့ ရှာဖွေကယ်ဆယ်ရေးလုပ်ငန်းတွေ သွားရောက်ကူညီဆောင်ရွက်ခဲ့ပါတယ်။
ယာဉ်တိမ်းမှောက်မှုကြောင့် ယာဉ်ပေါ်ပါ အမျိုးသမီး ၁ ဦးသေဆုံးခဲ့ပြီး အမျိုးသား ၁ ဦးထိခိုက်ဒဏ်ရာ (မစိုးရိမ်ရ) ရရှိခဲ့တာကြောင့် ဒီပဲယင်းမြို့နယ်ပြည်သူ့ဆေးရုံကို ပို့ဆောင်ပေးခဲ့ပါတယ်။
မွန်ပြည်နယ် သထုံမြို့နယ်၊ ဝင်းစိန်ကျေးရွာအုပ်ချုပ်ရေးမှူး ဦးသာစိုင်းဟာ စက်တင်ဘာ ၂၇ ရက် ဒီနေ့မနက်ပိုင်းက သေနတ်နဲ့ ပစ်ခတ်ခံခဲ့ရလို့ ဒဏ်ရာရသွားတယ်လို့ ဒေသခံတွေက ပြောပါတယ်။
စစ်ကောင်စီခန့် ကျေးရွာအုပ်ချုပ်ရေးမှူး ဦးသာစိုင်းဟာ သူ့နေအိမ်ကနေ ကျေးရွာအုပ်ချုပ်ရေးမှူးရုံးကို ဆိုင်ကယ်နဲ့ လာစဉ် အမည်မသိ သေနတ်သမား ၂ ဦး ဆိုင်ကယ်တစ်စီးနဲ့ ရောက်ရှိလာပြီး အနီးကပ် သေနတ်ဖြင့် ပစ်ခတ်ခဲ့တာ ဖြစ်ပါတယ်။
အုပ်ချုပ်ရေးမှူး ဦးသာစိုင်းဟာ သေနတ် ဒဏ်ရာ ၂ ချက် ရရှိခဲ့ပြီး သထုံခရိုင်ပြည်သူ့ဆေးရုံမှာ တက်ရောက်ကုသနေပေမဲ့ စိုးရိမ်ရတဲ့အခြေအနေမှာ ရှိတယ်လို့ လူမှုကယ်ဆယ်ရေးအဖွဲ့က ပြောပါတယ်။
အုပ်ချုပ်ရေးမှူး ဦးသာစိုင်းကို သေနတ်ဖြင့် ပစ်ခတ်ခဲ့တာဟာ သူတို့ လက်ချက်ဖြစ်တယ်လို့ အာဠာဝက ပြောက်ကျားအင်အားစုက ထုတ်ပြန်ပါတယ်။
အုပ်ချုပ်ရေးမှူး ပစ်ခတ်ခံရပြီးနောက် စစ်ကောင်စီတပ်ဖွဲ့ဝင်တွေ ကျေးရွာအတွင်း လှည့်ပတ် စစ်ဆေးနေသလို သထုံ အဝင်အထွက်မှာလည်း လုံခြုံရေးတင်းကျပ်ထားပါတယ်။
သထုံမြို့နယ်မှာတော့ စစ်တပ်အာဏာသိမ်းပြီးနောက် စစ်ကောင်စီက ခန့်အပ်ထားတဲ့ ကျေးရွာအုပ်ချုပ်ရေးမှူး ၃ ဦး သေနတ်နဲ့ ပစ်သတ်ခံထားရပါတယ်။
