တိုင်းရင်းသား

August 12, 2022

စစ်အုပ်စုက နိုင်ငံရေးပြဿနာကို ဆွေးနွေးအဖြေရှာလိုသည့် အရိပ်အယောင်မတွေ့ဟု ဗိုလ်ချုပ်ကြီး မူတူးစေဖိုး ပြော

နိုင်ငံ့အာဏာကို မတရားသိမ်းယူထားတဲ့ စစ်အုပ်စုရဲ့ သဘောထားရပ်တည်ချက်နဲ့ လုပ်ဆောင်ချက်တွေဟာ လက်နက်ကိုင်ခုခံတော်လှန်မှုကို တရားမျှတစွာ တွေ့ဆုံဆွေးနွေးပြီး နိုင်ငံရေးပြဿနာတွေကို အဖြေရှာလိုတဲ့ အရိပ်အယောင် တစုံတရာကိုမျှ မတွေ့ရဘူးလို့ ကရင်အမျိုးသား အစည်းအရုံး (ကေအန်ယူ) ဥက္ကဋ္ဌ ဗိုလ်ချုပ်ကြီး စောမူတူးစေဖိုးက ပြောကြားလိုက်ပါတယ်။ 

ကရင်အမျိုးသားအစည်းအရုံး (ကေအန်ယူ) ရဲ့ နိုင်ငံ‌ရေးဆိုင်ရာ သဘောထား ရပ်တည်ချက်ဟာ နိုင်ငံရေးပြသနာကို နိုင်ငံ‌ရေးအရ တွေ့ဆုံဆွေးနွေးအဖြေရှာခြင်းသာ ဖြစ်တယ်လို့ ဆိုပါတယ်။ 

ဩဂုတ် ၁၂ ရက် ဒီနေ့ ကျရောက်တဲ့ ကရင်အမျိုးသားအာဇာနည်နေ့အတွက် ပေးပို့တဲ့ သဝဏ်လွှာမှာ ပြောကြားလိုက်တာဖြစ်ပြီး လက်ရှိအခြေအနေမှာ ကေအန်ယူအနေနဲ့ လက်နက်ကိုင် ခုခံတော်လှန်နေရတဲ့ အချိန်အခါမှာသာ ရှိနေသေးကြောင်းနဲ့ နိုင်ငံရေးပြဿနာတွေကို နိုင်ငံရေး၊ သံတမန်ရေးနဲ့ လူမှုဆိုင်ရာ နည်းလမ်းပေါင်းစုံ အဖြေရှာသွားမယ်လို့ ဆိုပါတယ်။

ဒါ့အပြင် မိမိတို့ အမျိုးသားများ အဓွန့်ရှည် ရှင်သန်နိုင်ဖို့နဲ့ ဖွံ့ဖြိုးတိုးတက်နိုင်ဖို့ မိမိတို့နိုင်ငံဟာ ဖက်ဒရယ်ဒီမိုကရေစီနိုင်ငံသာ ဖြစ်ရမှာဖြစ်ပြီး မိမိတို့နိုင်ငံ ငြိမ်းချမ်းရေးရရှိဖို ဖယ်ဒရယ် အခြေခံမူပေါ် တည်ဆောက်ပြီး ပြည်သူလူထုတရပ်လုံးအတွက် ဒီမိုကရေစီအခွင့်အရေး အပြည့်အဝ ရရှိဖို့ လိုအပ်ကြောင်းလည်း ထောက်ပြပြောဆိုထားပါတယ်။

ကရင့်အမျိုးသားလွတ်မြောက်ရေးတပ်မတော် (KNLA) ကလည်း ခုခံတော်လှန်ရေးတလျှောက်မှာ ကရင့်အမျိုးသားအစည်းအရုံးကနေ လက်နက်ကိုင်ပဋိပက္ခရဲ့ အရင်းအမြစ်ဖြစ်တဲ့ နိုင်ငံရေး ပြဿနာတွေကို နိုင်ငံရေးနည်းနဲ့ ဖြေရှင်းဖို့ တစိုက်မတ်မတ် တောင်းဆိုခဲ့ပေမယ့် လူမျိုးကြီးဝါဒကို စွဲကိုင်နေတဲ့ အုပ်ချုပ်သူ အစိုးရတွေနဲ့ စစ်အုပ်ချုပ်ရေးစနစ်က နိုင်ငံရေးအရ နည်းမှန်လမ်းမှန် ကြိုးပမ်းအားထုတ်မရှိခဲ့ဘူးလို့ ထောက်ထားထုတ်ပြန်ထားပါတယ်။

ဒါ့အပြင် ကရင့်တော်လှန်ရေးဟာ နှစ်ပေါင်း ၇၂ နှစ်တိုင်ရောက်ခဲ့ပြီဖြစ်ပြီး ကရင့်ခေါင်းဆောင် စောဘဦးကြီးနဲ့တကွ အာဇာနည်ပီပီ အသက်စွန့်ပေးလှူသွားတဲ့ ခေါင်းဆောင်တွေ၊ ရဲဘော်တွေ၊ ပြည်သူတွေရဲ့ ခရီးလမ်းဟာ မဆုံးသေးတဲ့အတွက် ရှေ့ဆက်ပြီး မပြီးဆုံးသေးတဲ့ သမိုင်းပေးတာဝန်ကို ဆက်လက်ထမ်းရွက်ဖို့ တိုက်တွန်းကြောင်းလည်း ကရင်အမျိုးသားလွတ်မြောက်ရေးတပ်မတော်က ထုတ်ပြန်ထားပါတယ်။

ဩဂုတ် ၁၂ ရက် ဒီနေ့ ကျရောက်တဲ့ ကရင်အမျိုးသားအာဇာနည်နေ့ အခမ်းနားတွေကိုတော့ ကရင်အမျိုးသားတွေရှိရာ နိုင်ငံတဝန်းမှာ ကျင်းပပြုလုပ်ခဲ့ကြပါတယ်။

1 hour Ago

ကရင်တော်လှန်ရေးအင်အားစုများနှင့် လက်တွဲဆောင်ရွက်မည်ဟု ကရင်အာဇာနည်နေ့သို့ NUG သဝဏ်လွှာပေးပို့

ကရင်အမျိုးသားတော်လှန်ရေးအတွက်သာမက ပြီးခဲ့တဲ့နှစ်ပေါင်း ၇၀ ကျော်မှစတင်ကာ မျက်မှောက်ခေတ် နွေဦးတော်လှန်ရေးအထိ မြန်မာနိုင်ငံမှာ စစ်အာဏာရှင်စနစ်ချုပ်ငြိမ်းရေးနဲ့ ဖက်ဒရယ် ဒီမိုကရေစီပြည်ထောင်စု တည်ဆောက်ရေးအတွက် စွန့်လွှတ်အနစ်ခံပြီး ဦးဆောင် တိုက်ပွဲဝင်နေတဲ့ KNU/KNLA အတွက် များစွာ လေးစားဂုဏ်ယူတယ်လို့ NUG က ပြောပါတယ်။

ဩဂုတ် ၁၁ ရက် ဒီကနေ့ကျရောက်တဲ့ ကရင်အာဇာနည်နေ့ကို အမျိုးသားညီညွတ်ရေးအစိုးရ (NUG) က သဝဏ်လွှာပေးပို့ ပြောကြားလိုက်တာပါ။

ကရင်အမျိုးသားခေါင်းဆောင် စောဘဦးကြီးနဲ့တကွ ကရင်ခေါင်းဆောင်တွေ ကျဆုံးခဲ့တာဟာ ဒီကနေ့မှာတော့ ၇၂ နှစ်ပြည့်မြောက်ခဲ့ပြီဖြစ်ကာ ဒီနေ့ရက်အချိန်အခါဟာ ကရင်လူမျိုးတွေရဲ့ သမိုင်းနဲ့ ကရင် တော်လှန်ရေးသမိုင်းမှာ မေ့ပျောက်မရတဲ့ အောက်မေ့ဖွယ်နေ့ရက် ဖြစ်ပါတယ်။

NUG အစိုးရကတော့ စစ်အာဏာရှင်စနစ်ကို ချုပ်ငြိမ်းပြီး ခေတ်အဆက်ဆက် တိုင်းရင်းသားပြည်သူလူထုတရပ်လုံးက လိုလားတောင့်တခဲ့တဲ့ ဒီမိုကရေစီရေး၊ တန်းတူရေးနဲ့ ကိုယ်ပိုင်ပြဋ္ဌာန်းခွင့် အခွင့်အရေးတွေကို အပြည့်အဝအာမခံချက်ရှိတဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးအတွက် သန္နဋ္ဌာန်ချထားတဲ့ အစိုးရဖြစ်တယ်လို့ သဝဏ်လွှာမှာ ဖော်ပြပါတယ်။

ဒီကနေ့မှာတော့ NUG အစိုးရအနေနဲ့ ကရင်တမျိုးသားလုံးနဲ့ထပ်တူ ကရင်အာဇာနည်အပေါင်းကို အောက်မေအမှတ်ရနေပြီး ကရင်တော်လှန်ရေးအင်အားစုတွေနဲ့ လက်တွဲဆောင်ရွက်ကာ ကရင်လူမျိုးတွေနဲ့ တိုင်းရင်းသား ပြည်သူလူထုအားလုံး လိုလားတဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးအတွက် ကြိုးပမ်းဆောင်ရွက်သွားမယ်လို့ဆိုပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေကြား တိုက်ပွဲတွေလည်း ပြင်းထန်နေတာပါ။

ဒါ့အပြင် ပြည်သူ့ခုခံတွန်းလှန်စစ် ၁ နှစ်တာ ကာလအတွင်း စစ်ကောင်စီတပ်သား ၁၅,၀၀၀ နီးပါး သေဆုံးခဲ့ပြီး ထိခိုက်ဒဏ်ရာရသူ အယောက် ၄,၈၀၀ ကျော် ရှိခဲ့တယ်လို့ NUG အစိုးရ ကာကွယ်ရေးဝန်ကြီးဌာနက ဆိုပါတယ်။

ဒါဟာ ပြီးခဲ့တဲ့ ၂၀၂၁ ခုနှစ်၊ ဇွန် ၁ ရက်ကနေ အခုနှစ် မေ ၁၇ ရက်အထိ စုဆောင်းရရှိထားတဲ့ အချက်အလက်တွေအရ ဖော်ပြထားတာဖြစ်ပြီး မြန်မာပြည်အနှံ့ တိုက်ပွဲတွေမှာ တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ စစ်ကောင်စီဘက်ကတော့ သတင်းထုတ်ပြန်တာ မရှိပါဘူး။

ဒါ့အပြင် စစ်ကောင်စီရဲ့ အဆိုးဆုံး အကြမ်းဖက်ခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည်အထက်ပိုင်း လမ်းပိုင်းတွေရဲ့ ၉၀ ရာခိုင်နှုန်းကို PDF တွေက ထိန်းချုပ်ထားနိုင်ပြီလို့ NUG အစိုးရက ဇွန် ၂၁ ရက်နေ့ သတင်းစာရှင်းလင်းပွဲမှာ ပြောထားပြီး လက်ရှိ မြေပြင်မှာ အကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။

3 hours Ago

August 11, 2022

မဏိပူရ်ပြည်နယ်တွင် စစ်ဘေးရှောင် မြန်မာဒုက္ခသည် ၅ ဦး ဖမ်းဆီးခံရ

အိန္ဒိယနိုင်ငံ၊ မဏိပူရ်ပြည်နယ်၊ ချူရချန်ပူရ်ခရိုင်၊ ငသဲကျေးရွာရှိ  မြန်မာနိုင်ငံသားတွေ ခိုလှုံနေထိုင်တဲ့နေရာကို  ဩဂုတ် ၉ ရက်က အိန္ဒိယရဲတပ်ဖွဲ့ဝင်တွေက ဝင်ရောက်စစ်ဆေးပြီး အမျိုးသား ၄ ဦးနဲ့ အမျိုးသမီး ၁ ဦး အပါအဝင် မြန်မာနိုင်ငံသား စစ်ဘေးရှောင်ဒုက္ခသည် ၅ ဦးကို ဖမ်းဆီး‌ခေါ်ဆောင်သွားတယ်လို့ အိန္ဒိယရဲတပ်ဖွဲ့ရဲ့ ထုတ်ပြန်ချက်အရ သိရပါတယ်။

ဖမ်းဆီးခံရတဲ့ စစ်ဘေးရှောင် မြန်မာနိုင်ငံသားတွေဟာ အိန္ဒိယမှာ တရားဝင်နေထိုင်ခွင့် စာရွက်စာတမ်း အထောက်အထားမရှိကြတာ‌ကြောင့် ဖမ်းဆီးခံရတာဖြစ်တယ်လို့ သိရပါတယ်။

ဖမ်းဆီးခံရသူတွေဟာ ၂၀၂၁ ခုနှစ် ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက် ဒေသတွင်း တိုက်ပွဲတွေနဲ့ စစ်ကောင်စီတပ်တွေရဲ့ ကျေးရွာတွေကို မီးရှို့ဖျက်ဆီး၊ ဒေသခံတွေကို ဖမ်းဆီးနှိပ်စက် သတ်ဖြတ်မှုတွေကြောင့် ဘေးလွတ်ရာကို ထွက်ပြေးတိမ်းရှောင်နေကြသူတွေ ဖြစ်ပါတယ်။

ကူကီး‌ကျောင်းသားလူငယ်တဦးက “အဲ့ဒီ စစ်ဘေးရှောင်ဒုက္ခသည်တွေဟာ အများအားဖြင့် စစ်ကိုင်းတိုင်းတွင်းက စစ်ဘေးရှောင်တွေဖြစ်တယ်။ တမူးမြို့နယ်နဲ့ ကလေးမြို့နယ်က စစ်ရှောင်တွေ အများစုပါဝင်ပြီး မုံရွာနယ်က စစ်ဘေးရှောင်တချို့လည်း ပါဝင်တယ်။ အိန္ဒိယအစိုးရအနေနဲ့ မြန်မာနိုင်ငံသားတွေ အခုလို ဒုက္ခရောက်နေချိန်မှာ ကူညီထား‌သင့်တယ်” လို့ပြောပါတယ်။

စစ်ဘေးရှောင် ဒုက္ခသည်တွေအတွက် သက်ဆိုင်ရာ အစိုးရတာဝန်ရှိသူတွေကနေ အမြန်ဆုံး ဆောင်ရွက်ကူညီပေးကြဖို့လည်း ကူကီး‌ကျောင်းသားလူငယ်တွေက တိုက်တွန်းပါတယ်။ 

အခုလို မြန်မာ့နိုင်ငံရေး အခြေအနေ အကျပ်အတည်းဖြစ်နေတဲ့ကာလမှာ နယ်နိမိတ်ချင်း ထိစပ်နေတဲ့ အိမ်နီးချင်း မဏိပူရ်အစိုးရအနေနဲ့ မြန်မာပြည်သူလူထုတွေကို အမှုကြီးကြီးတပ်ပြီး ဖမ်းဆီးနေတာဟာ လူသားချင်း စာနာထောက်ထားမှုကို အလေးမထားတဲ့အပြင် အိမ်နီးနားချင်းနိုင်ငံ မပီဘူးလို့ ရှုမြင်သုံးသပ်တယ်လို့ ကူကီးကျောင်းသားများအဖွဲ့က ထုတ်ပြန်ထားပါတယ်။

အဆိုပါ ဖမ်းဆီးခံ စစ်ဘေးရှောင်တွေကို အိန္ဒိယအာဏာပိုင်တွေက နိုင်ငံခြားသားဥပဒေအရ တရားစွဲ အရေးယူထားတယ်လို့ သိရပြီး ဒီဥပဒေအရ အနိမ့်ဆုံး ထောင်ဒဏ် ၁ နှစ်ကနေ ၅ နှစ်အထိ ချမှတ်နိုင်တယ်လို့ သိရပါတယ်။

ဇွန် ၂၈ ရက်ကလည်း အဆိုပါ ငသဲကျေးရွာမှာ ခိုလှုံနေကြတဲ့ ကလေးငယ် အယောက် ၂၀ အပါအဝင် မြန်မာနိုင်ငံသား စစ်ဘေးရှောင် အယောက် ၈၀ ကို အိန္ဒိယရဲတပ်ဖွဲ့က ဖမ်းဆီးအရေးယူခဲ့ပါတယ်။

ဒါကြောင့် အိန္ဒိယအစိုးရအနေနဲ့ ဖမ်းဆီးခံ မြန်မာပြည်သူတွေကို လူသားချင်း စာနာထောက်ထားမှု အရလည်းကောင်း၊ အိမ်နီးနားချင်းနိုင်ငံအချင်းချင်း အပြန်အလှန် ကူညီဖေးမမှု အရလည်းကောင်း မြန်မာပြည်ရဲ့ လက်ရှိအခြေအနေ အခက်အခဲအရလည်းကောင်း မြန်မာ  ဒုက္ခသည်တွေအပေါ် စာနာနာလည်း ကူညီပေးဖို့  ကူကီးကျောင်းသားများ ဒီမိုကရက်တစ်တပ်ဦးက ဇွန်လ ၂၉ ရက်က သဘောထားထုတ်ပြန်‌ တောင်းဆိုထား‌‌ပါတယ်။ 

အိန္ဒိယအစိုးရကတော့ ဖမ်းဆီးခံရတဲ့ စစ်‌ဘေးရှောင် မြန်မာနိုင်ငံသားတွေကို ပြန်လွှတ်မပေးတဲ့ အပြင် ထပ်မံဖမ်းဆီးနေတာလည်း ဖြစ်ပါတယ်။

14 hours Ago

ဖားကန့် ရှဒူးဇွပ်ကျေးရွာအနီးရှိ ပြည်သူ့စစ်စခန်း ၂ ခုကို ကေအိုင်အေ တိုက်ခိုက်

ကချင်ပြည်နယ်၊ ဖားကန့်မြို့နယ်၊ ရှဒူးဇွပ်ကျေးရွာအနီး စစ်ကောင်စီလက်အောက်ခံ မင်းဇင်သန့် ဦးဆောင်တဲ့ ပြည်သူ့စစ်စခန်း ၂ ခုကို ကချင်လွတ်မြောက်ရေးတပ်မတော် (ကေအိုင်အေ) က ဩဂုတ် ၁၁ ရက် မနက်ပိုင်းမှာ သွားရောက်ပစ်ခတ်ခဲ့တယ်လို့ ဒေသခံတဦးက ပြောပါတယ်။

ရှဒူးဇွပ်ကျေးရွာအနီးက စံပြပြည်သူ့စစ်စခန်းနဲ့ ကိုင်းတောပြည်သူ့စစ်စခန်း ၂ ခုကို ဒီကနေ့ မနက် ၃ နာရီလောက်က သွားရောက်ပစ်ခတ်ခဲ့တာလို့ ဆိုပါတယ်။

“ကေအိုင်အေ တပ်မဟာ ၂၊ တပ်ရင်း ၁၄ က သွားတိုက်တာ။ တိုက်ပွဲကတော့ မနက် ၃ နာရီကနေ ၇ နာရီအထိ ဖြစ်နေတာ။ ရှဒူးဇွပ်ကျေးရွာအခြေစိုက် စစ်ကောင်စီတပ် ခလရ ၂၉၇ ကနေလည်း လက်နက်ကြီးတွေနဲ့ ဆယ်ကြိမ်ထက်မနည်း ပစ်ကူပေးခဲ့တယ်။ ပြည်သူ့စစ်တွေဘက်က အထိအခိုက်များတယ်ထင်တယ်။ အတိအကျတော့ မသိရသေးဘူး။”

ရှဒူးဇွပ်ကျေးရွာဒေသမှာ စစ်ကောင်စီလက်အောက်ခံ မင်းဇင်သန့် ဦးဆောင်တဲ့ ပြည်သူ့စစ်အဖွဲ့က သူတို့အဖွဲ့တည်ရှိတဲ့ စံပြကျေးရွာ၊ ရှဒူးဇွပ်ကျေးရွာအဝင် တံတားအနီး တနေရာနဲ့ ကိုင်းတောမှော်အဝင် စတဲ့ ၃ နေရာမှာ ငွေကြေးကောက်ခံနေတာ ဖြစ်ပါတယ်။

မင်းဇင်သန့် ဦးဆောင်တဲ့ ပြည်သူ့စစ်အဖွဲ့ဟာ စစ်အာဏာသိမ်းပြီးနောက် ရှဒူးဇွပ်ဒေသမှာ နယ်မြေစိုးမိုးနိုင်ဖို့ အရင်ကထက် စစ်အင်အားအများအပြားသုံးပြီး စစ်ရေးလှုပ်ရှားမှုတွေ ပိုမိုလုပ်ဆောင်လာပြီး ရှဒူးဇွပ်ကျေးရွာအနီးရှိ ကနွယ်သူမှော်ရှိ ကေအိုင်အေတပ်စခန်းတခုကိုလည်း ဇူလိုင် ၁၈ ရက်က ပထမဆုံးအကြိမ် သွားရောက်တိုက်ခိုက်မှုတွေ ရှိခဲ့ပါတယ်။

16 hours Ago

တိုကျိုမြို့တွင် အကြမ်းဖက်အာဏာသိမ်းစစ်ကောင်စီကို ကန့်ကွက်ရှုတ်ချဆန္ဒပြ

၇၂ နှစ်မြောက် ကရင်အာဇာနည်နေ့ အထိမ်းအမှတ် ဂုဏ်ပြုအခမ်းအနားနဲ့ အာဏာသိမ်းအကြမ်းဖက်စစ်အုပ်စုကို ရှုတ်ချကန့်ကွက်ပွဲကို ဂျပန်နိုင်ငံ တိုကျိုမြို့ရှိ ကုလသမဂ္ဂ အဆောက်အဦရှေ့မှာ  ဩဂုတ် ၁၁ ရက် ညနေပိုင်းက ကျင်းပပါတယ်။

ဒီလှုပ်ရှားမှုမှာ ပြည်ပရောက် ကရင်အမျိုးသားများ (OKO) ဂျပန်အဖွဲ့က  ဦးဆောင်ခဲ့ပြီး ဂျပန်နိုင်ငံရောက် တိုင်းရင်းသားအဖွဲ့အစည်းတွေ၊ နွေဦးတော်လှန်ရေးအင်အားစုတွေနဲ့ မြန်မာ့အရေး အားပေးကူညီနေတဲ့ ဂျပန်လူမျိုးတွေ စုစုပေါင်း ၁၅၀ လောက် ပူးပေါင်းပါဝင်ခဲ့ကြပါတယ်။

မြန်မာနိုင်ငံမှာ တိုင်းရင်းသားအသီးသီးရဲ့ သမိုင်းတွေ ရှိကြတာမို့ တိုင်းရင်းသားအချင်းချင်း သမိုင်းတွေသိရအောင်နဲ့ ကရင်တမျိုးသားလုံးအတွက် အသက်ပေး ကြိုးစားခဲ့တဲ့ ကရင်အာဇာနည်ခေါင်းဆောင် စောဘဦးကြီး အပါအဝင် စစ်အာဏာရှင်ဆန့်ကျင်ရင်း တိုင်းပြည်အတွက် အသက်ပေးစွန့်လွှတ်ခဲ့ကြသူတွေကို ဦးညွှတ်ဂုဏ်ပြုချင်တာကြောင့် အခုလို ကျင်းပရတာလို့ ဦးဆောင်ကျင်းပရေး အဖွဲ့ဝင်တဦးဖြစ်တဲ့ စောဖလုံက ပြောပါတယ်။

အခမ်းအနားမှာ အကြမ်းဖက်စစ်ကောင်စီကို ရှုတ်ချ ဆန့်ကျင်ကြောင်းနဲ့ ဖက်ဒရယ်ပြည်ထောင်စု အမြန်ပေါ်ရေးတို့ကို ဂျပန်-မြန်မာ နှစ်ဘာသာနဲ့ ကြွေးကြော်ခဲ့ကြပါတယ်။

လက်ရှိ နွေဦးတော်လှန်ရေးမှာ မိခင်အဖွဲ့အစည်းရဲ့ ချမှတ်ထားတဲ့ လမ်းညွှန်ချက်တွေနဲ့အညီ အားသွန်ခွန်စိုက် ပူးပေါင်းပါဝင်မှာဖြစ်ပြီး တိုင်းရင်းသားအားလုံး ညီညွတ်စွာ အကြမ်းဖက်စစ်ကောင်စီကို ဖြုတ်ချနိုင်မှ တနိုင်ငံလုံး အားလုံးမျှော်မှန်းနေတဲ့ ဖက်ဒရယ်ပြည်ထောင်စုကို အမြန်ဆုံးရောက်နိုင်မယ်လို့လည်း စောဖလုံက တိုက်တွန်း ပြောပါတယ်။

သတင်း -ဓာတ်ပုံ ဇော်ဇော်လှိုင်

18 hours Ago

ကယန်းစာပေနှင့် ယဉ်ကျေးမှုကော်မတီ ဥက္ကဋ္ဌ ဦးဖရန်စစ္စကို လုပ်ကြံသတ်ဖြတ်ခံရ

ကယန်းစာပေနှင့် ယဉ်ကျေးမှုကော်မတီဥက္ကဋ္ဌ ဦးဖရန်စစ္စကိုဟာ ဒီကနေ့ သြဂုတ် ၁၁ ရက်မှာ ဖယ်ခုံမြို့က ပြောင်းခြံသွားစဉ် သေနတ်နဲ့ လုပ်ကြံသတ်ဖြတ်ခံခဲ့ရတယ်လို့ မိသားစုဝင်တွေဆီက သိရပါတယ်။

ဒီကနေ့မနက် ၁၀ နာရီလောက်က ဖယ်ခုံမြို့ အရှေ့ဘက်ကမ်းက သူ့ပြောင်းခြံကို သွားနေချိန်မှာ ဆိုင်ကယ်စီးလာတဲ့လူနှစ်ဦးက သေနတ်နဲ့ လုပ်ကြံသွားတာလို့ ဆိုပါတယ်။

ကယန်းစာပေနှင့် ယဉ်ကျေးမှုကော်မတီဥက္ကဋ္ဌ ဦးဖရန်စစ္စကိုဟာ အရင်က ကြံ့ခိုင်ရေးနဲ့ ဖွံ့ဖြိုးရေးပါတီဝင်တဦးဖြစ်ပြီး ၂၀၁၅ ခုနှစ်မှာတော့ ပါတီက အနားယူခဲ့ပြီး ဖယ်ခုံမြို့နယ် ပါတီနာယက အနေနဲ့ပဲ နေထိုင်ခဲ့ပါတယ်။

လူမျိုးရေး၊ ဘာသာရေးနဲ့ ပတ်သက်လာရင်တော့ ကယန်းလူမျိုးအများစုက လေးစားသူဖြစ်ပြီး သူ့ကို ကယန်းစာပေနဲ့ ယဉ်ကျေးမှုဥက္ကဋ္ဌ ရွေးချယ်ထားတာလို့ ကယန်းလူမျိုးတဦးက ပြောပါတယ်။

“သူက ကြံ့ခိုင်ရေးဆိုပေမဲ့ လူမျိုးရေး၊ ဘာသာရေးမှာ အားလုံးက လေးစားကြတယ်။”

ဒါ့အပြင် သူဟာ ၂၀၂၁ ခုနှစ် စစ်အာဏာသိမ်းပြီးနောက်ပိုင်း ဆန္ဒပြပွဲတွေမှာ ဖမ်းဆီးခံရတဲ့သူတွေ ပြန်လွှတ်ပေးရေး ညှိနှိုင်းဆောင်ရွက်ပေးခဲ့သူ ဖြစ်သလို တော်လှန်ရေး အဖွဲ့အစည်းနဲ့ စစ်ဘေးရှောင်တွေကိုလည်း ကူညီပေးသူဖြစ်တယ်လို့ နောက်ထပ် ကယန်းလူငယ် စစ်ဘေးရှောင်ကူညီသူတဦးက ပြောပါတယ်။

ဦးဖရန်စစ္စကို ကို ဘယ်သူက လုပ်ကြံသတ်ဖြတ်သွားလဲဆိုတာ စုံစမ်းနေဆဲ ဖြစ်ပါတယ်။

အမျိုးသားညီညွတ်ရေးအစိုးရ လူ့အခွင့်အခွင့်အရေးဆိုင်ရာ ပြည်ထောင်စု ဒုတိယဝန်ကြီး ခွန်းဗဟန်းထန်ကတော့ သူ့ဆရာဖြစ်သူ ကယန်းစာပေနဲ့ ယဉ်ကျေးမှုဥက္ကဋ္ဌ ခွန်းဖရန်စစ္စကို လုပ်ကြံခံရတဲ့အပေါ် တုန်လှုပ်ကြေကွဲရကြောင်း သူ့ရဲ့ လူမှုကွန်ရက်မှာ ရေးသားထားပါတယ်။

“ဒီနေ့ မထင်မှတ်ဘဲ သတင်းဆိုးတခုကြားရလို့ အင်မတန် တုန်လှုပ်ကြေကွဲရပါတယ်။ ဒီသတင်းဟာ ကျနော့်ဆရာ ဖရန်းစစ္စကို လုပ်ကြံခံရလို့ ဆုံးသွားပြီဆိုတဲ့ သတင်းပဲ။ ဆရာနဲ့ အရင်နှစ် နောက်ဆုံးပြောခဲ့တဲ့စကားက ဆရာနဲ့ မင်းနဲ့ နိုင်ငံရေးခံယူချက်၊ အတွေးအခေါ်၊ အယူအဆ၊ အမြင်တွေ ကွဲလွဲရင် ကွဲလွဲလိမ့်မယ်။ ဒါပေမဲ့ ကယန်းအမျိုးသားရေးမှာတော့ အတူလက်တွဲ လုပ်ဆောင်ရအောင်လို့ ဆရာက ပြောခဲ့တယ်။ ဆရာ့ရဲ့စကားကို ကျနော် အမြဲအမှတ်ရနေပါတယ်။ လက်ရှိမှာ ဆရာကို့ဟာ ကျနော်တို့ ကယန်းစာပေနဲ့ ယဉ်ကျေးမှုဥက္ကဋ္ဌလည်း ဖြစ်ပါတယ်။ မထင်မှတ်ဘဲ ဆရာရဲ့ ဒီလို ရုတ်တရက် ကျနော်တို့နဲ့ ထာဝရခွဲခွာသွားတာဟာ ကယန်းတမျိုးသားလုံးရဲ့ အင်မတန်ကြီးမားတဲ့ ဆုံးရှုံးမှုကြီးတခု ဖြစ်ပါတယ်။ မိသားစုနှင့်အတူ ကျနော်တို့ ကယန်းတမျိုးသားလုံး ဝမ်းနည်းကြေကွဲရပါတယ်။”

ကယန်းစာပေနှင့် ယဉ်ကျေးမှု ဗဟိုကော်မတီကလည်း ကော်မတီဥက္ကဋ္ဌ ဦးဖရန်စစ္စကို ကို အမည်မသိ လူ ၂ ဦးက ရက်ရက်စက်စက် သေနတ်နဲ့ လုပ်ကြံပစ်ခတ်ခဲ့ကြောင်း ထုတ်ပြန်ပါတယ်။

ဦးဖရန်စစ္စကိုဟာ ကယန်း လူမျိုးရေး၊ စာပေနဲ့ ယဉ်ကျေးမှုအရေးကို တက်တက်ကြွကြွ ပါဝင် ဦးဆောင်ပေးရုံမက ပညာရေး၊ လူမှုရေး၊ ဘာသာရေး လုပ်ငန်းတွေကိုလည်း အမြဲပံ့ပိုးကူညီသူ ဖြစ်တယ်ဆိုတာ အားလုံးအသိဖြစ်ကြောင်း ထုတ်ပြန်ပါတယ်။

နိုင်ငံရေးအရှုပ်အထွေးကာလမှာ ကယန်းစာပေနဲ့ ယဉ်ကျေးမှု ဗဟိုကော်မတီ ဥက္ကဋ္ဌ ဦးဖန်းစစ္စကို ကို လုပ်ကြံသတ်ဖြတ်တာဟာ မှန်ကန်တဲ့ ပြဿနာဖြေရှင်းနည်း မဟုတ်တဲ့အပြင် ကယန်းစာပေနဲ့ ယဉ်ကျေးမှု၊ ကယန်းလူမျိုးအတွက် များစွာ ထိခိုက်နစ်နာ ဆုံးရှုံးရတဲ့အတွက် ဒီဖြစ်ရပ်အပေါ် ပြင်းထန်စွာ ရှုတ်ချကြောင်း ထုတ်ပြန်ထားပါတယ်။

24 hours Ago

မွန်တော်လှန်ရေးနေ့ အထိမ်းအမှတ် အခမ်းအနား ကျင်းပ (ဓာတ်ပုံ)

၇၅ နှစ်မြောက် မွန်တော်လှန်ရေးနေ့ အထိမ်းအမှတ် အခမ်းအနားကို ဒီကနေ့ သြဂုတ် ၁၁ ရက်က မွန်ပြည်သစ်ပါတီ ထိန်းချုပ်နယ်မြေတွေ အပါအဝင် မွန်လူမျိုးတွေနေထိုင်ရာ ဒေသတချို့မှာ ကျင်းပခဲ့ပါတယ်။

မွန်တော်လှန်ရေးနေ့ ဗဟိုအခမ်းအနားကိုတော့ မွန်ပြည်နယ်၊ မော်လမြိုင်မြို့ရှိ ရာမညဟိုတယ်မှာ ကျင်းပခဲ့ပြီး အခမ်းအနားမှာတော့ မွန်ပြည်သစ်ပါတီဥက္ကဋ္ဌ နိုင်ဟံသာ အပါအဝင် သက်ဆိုင်ရာ အဖွဲ့အစည်းအသီးသီးက ပေးပို့တဲ့ သဝဏ်လွှာတွေကို ဖတ်ကြားခဲ့ပါတယ်။

မွန်တော်လှန်ရေးနေ့မှာ မွန်လူမျိုးတွေအနေနဲ့ အာဏာရှင်စနစ် ဖျက်သိမ်းရေး၊ အမျိုးသားရေး လွတ်မြောက်ရေးတို့အတွက် မပြီးသေးတဲ့ တော်လှန်ရေးမှာ နိုင်ငံရေးတိုက်ပွဲ၊ လူ့အခွင့်အရေး တိုက်ပွဲ၊ စစ်ရေးတိုက်ပွဲတို့နဲ့ နည်းလမ်းမျိုးစုံအသုံးပြု တိုက်ပွဲဝင်ကြဖို့ မွန်ပြည်ကြားကာလ ပူးပေါင်းဆောင်ရွက်ရေး ကော်မတီ (MSICC) က တိုက်တွန်းထားပါတယ်။

ဒါ့အပြင် မွန်ပြည်သစ်ပါတီကလည်း စစ်မှန်တဲ့ပြည်ထောင်စု အကောင်အထည်ဖော် တည်ဆောက်နိုင်ဖို့ မွန်တမျိုးသားလုံးအနေနဲ့ အောင်နိုင်တဲ့ စိတ်ဓာတ်ကို အရယူပြီး ဇွဲ၊ ဝီရိယ ခိုင်ခိုင်မာမာနဲ့ ညီညွတ်ရေးရှိရှိ တိုင်းရင်းသားပြည်သူတွေနဲ့ အတူတကွ ဆက်လက် တိုက်ပွဲဝင်သွားကြဖို့ တိုက်တွန်းထားတာပါ။

မွန်ပြည်နယ်တော်လှန်ရေးနေ့ဟာ ၁၉၄၈ ခုနှစ် ဝါခေါင်လပြည့်နေ့မှာ ကရင်ပြည်နယ် ဇာသပြင်ရှိ ရဲစခန်းတခုကို မွန်လူငယ် ၂၀ ကျော်က ဝင်ရောက်တိုက်ခိုက်ခဲ့တဲ့နေ့ကို မွန်တော်လှန်ရေးနေ့အဖြစ် သတ်မှတ်ခဲ့တာ ဖြစ်ပါတယ်။

24 hours Ago
More News
Up