မြန်မာသတင်း

August 12, 2022

ရှားစေးချက်ရွာကို စစ်တပ် မီးရှို့ဖျက်ဆီး၊ ပြည်သူအချို့ဖမ်းဆီးခံရပြီး ၁ ဦး အသတ်ခံရ

မကွေးတိုင်း၊ ပေါက်မြို့နယ်၊ ရှားစေးချက်ရွာကို ဩဂုတ် ၁၂ ရက်မနက်ပိုင်းမှာ စစ်ကောင်စီတပ်တွေ မီးရှို့ခဲ့တာကြောင့် အိမ်ခြေ ၂၀ လောက် မီးလောင်ဆုံးရှုံးခဲ့ပြီး အပြစ်မဲ့ ပြည်သူတယောက်အား သတ်ဖြတ်ကာ ၅ ယောက်ကို ဖမ်းသွားတယ်လို့ ဒေသခံတွေက ပြောပါတယ်။

စစ်ကောင်စီတပ်ဟာ ဩဂုတ် ၁၁ ရက်နေ့ ညနေပိုင်းမှာ ရှားစေးချက်ရွာဘက်ကို စစ်ကြောင်းထိုးဝင်ရောက် ညအိပ်စခန်းချပြီးနောက် ဒီနေ့မနက် မီးရှို့ဖျက်ဆီးခဲ့တာလို့ ရွာခံတယောက်က လို့ ဒီဗွီဘီကို ပြောပါတယ်။

“ဒီနေ့ ဩဂုတ်လ ၁၂ ရက်နေ့ မနက်ပိုင်း သူတို့ ပြန်ထွက်ခါနီးမှာ မီးရှို့ ဖျက်ဆီးခဲ့ကြလို့ အိမ်ခြေ ၂၀ လောက် မီးလောင်ကျွမ်းခဲ့တယ်။ စစ်(…)တွေဟာ ရွာကို ညနေပိုင်း ဝင်ဝင်ချင်း ရွာရဲ့ ပ.က.ဖ ကင်းကို ဖျက်ဆီးလိုက်တယ်။ ပြည်သူတွေမွေးမြူထားတဲ့ ကြက်တွေ၊ ဆိတ်တွေကို သတ်ဖြတ်စားသောက်ခဲ့ပြီး ဒီနေ့မနက်ပိုင်းမှာတော့ သူတို့ ညအိပ်စခန်းချခဲ့တဲ့ အိမ်ကနေ မီးစရှို့ခဲ့ကြတာ။ တချို့ မလောင်တဲ့အိမ်တွေမှာဆိုရင် ကုတင်အောက်တွေမှာ လောင်စာတွေ သွင်းပြီး မီးရှို့သွားတယ်။” 

စစ်ကောင်စီတပ်ဟာ ရွာတောင်ဘက်နားမှာ အသက် ၂၀ အရွယ် လူငယ်တယောက်ကို သတ်ဖြတ်သွားသလို ပြည်သူ ၈ ယောက်ကိုလည်း ညကတည်းက ဖမ်းဆီးသွားပြီး မနက်ပိုင်းမှာ ၃ ယောက်သာ ပြန်လွှတ်ပေးခဲ့တယ်လို့ ဆိုပါတယ်။

“စစ်(…)တွေ ရွာဘက်ကို စစ်ကြောင်းထိုးလာပြီလို့ သတင်းကြားကတည်းက ရွာလုံးကျွတ် အသက်လုပြီး ထွက်ပြေးခဲ့ရတာ။ စားနပ်ရိက္ခာတွေလည်း ပါမလာကြဘူး။ တောထဲတွေမှာပဲ ဖြစ်သလို နေနေကြရတယ်။ ရွာသားတချို့နဲ့ ကာကွယ်ရေးတပ်ဖွဲ့တွေ ပေါင်းပြီး မီးဝင်ငြှိမ်းပေးတာတွေ၊ မီးလောင်တဲ့ နေအိမ်တွေကို ရှင်းလင်းပေးတာတွေ ပြုလုပ်ပေးခဲ့ကြပြီး ရွာထဲမှာတော့ ပြန်မနေရဲသေးဘူး” လို့ ရှာစေးချက်ရွာခံက ပြောပါတယ်။

မကွေးတိုင်းအတွင်းမှာ စစ်တပ်အာဏာသိမ်းတဲ့ ဖေဖော်ဝါရီ ၁ ရက်ကနေ မေ ၃၁ ရက်အထိ အိမ်ခြေ ၃,၀၅၅ လုံးကို စစ်ကောင်စီတပ်တွေက မီးရှို့ဖျက်ဆီးခဲ့ကြပြီး တနိုင်ငံလုံး အတိုင်းအတာနဲ့ဆိုရင် အိမ်ခြေပေါင်း ၁၈,၈၈၆ လုံး မီးရှို့ဖျက်ဆီးခံခဲ့ရတယ်လို့ Data For Myanmar က ဇွန်လ ၇ ရက်နေ့မှာ ထုတ်ပြန်ထားပါတယ်။

14 seconds Ago

ပြည်တွင်းရွှေဈေး အတက်ကြမ်းသဖြင့် သတိထားကြရန် ဈေးကွက်ကျွမ်းကျင်သူများ ပြော

ပြည်တွင်းရွှေဈေးဟာ မနှစ်က စံချိန်တင် အမြှင့်ဆုံးဈေးနှုန်းကို ကျော်လွန်ပြီး အတက်ကြမ်းလာတဲ့အပြင် နေ့စဉ်နဲ့အမျှ ဈေးနှုန်းပြောင်းလဲနေတာကြောင့် သတိထားကြဖို့ ရွှေဈေးကွက်ကျွမ်းကျင်သူတွေက ပြောဆိုလိုက်ပါတယ်။

ပြည်တွင်းအကယ်ဒမီရွှေဈေးက တကျပ်သားကို မနှစ်က ၁,၃၃၃,၅၀၀ ကျပ်နဲ့ အမြှင့်ဆုံး စံချိန်တင်ခဲ့တာပါ။ ဒါပေမဲ့ လက်ရှိမှာတော့ ပြည်တွင်းအကယ်ဒမီရွှေဈေးက တကျပ်သားကို ၂,၆၀၀,၀၀၀ ကျပ်အထိ အတက်ကြမ်းလာပါတယ်။ ဒါကြောင့် ရွှေဈေးက တနှစ်အတွင်းမှာ ကျပ် ၁,၂၆၆,၅၀၀  တက်လာပြီး ၄၈ ရာခိုင်နှုန်းအထိ မြှင့်တက်လာပါတယ်။

ပြည်တွင်းရွှေဈေးနှုန်း အခုလို အတက်ကြမ်းလာတာက နှစ်စဉ် ပုံမှန်ဖြစ်လေ့ရှိတဲ့ မိုးတွင်းကာလ ဇူလိုင်နဲ့ သြဂုတ်လတွေမှာ ရွှေတူးဖော်ရေးလုပ်ငန်းတွေဟာ အကြောင်းအမျိုးမျိုးကြောင့် ရပ်နား နေရတဲ့အပြင် ကုန်သည်တွေကြောင့်လည်း ပါတယ်လို့ ဈေးကွက်သုတေသီတွေက ပြောပါတယ်။

ရွှေလုပ်ငန်းရှင်တဦးက “လူတွေအကုန်လုံးက ရွှေဈေးကို အတက်ပဲ မြင်ပြီဆိုရင် ရွှေဈေးက ပြန်ကျတတ်တယ်နော်။ အဲဒီအတွက်ကြောင့် ဒီလအတွက်ပဲ မှန်းထားတယ်၊ ပြန်ကျဖို့ ရှိတယ်။ ဘာလို့လဲဆိုတော့ လူတွေက ရွှေဈေးကို တက်မယ်ထင်ပြီး သူ့ထက်ငါ အပြိုင်လိုက်ဝယ်လာတာ ကြာပြီလေ။ ကြာပြီဆိုတော့ လူတွေရဲ့ လက်ထဲ တော်တော်များများမှာ ရွှေက ပြည့်နေပြီ။ ပြီးတော့ ဒီလိုကာလတွေမှာ ဖြစ်တာက ရွှေတူးဖော်ရေး မိုင်းတွေမှာ ရွှေထုတ်လို့ မရဘူး။ ရေဝင်တာနဲ့ မြေပြိုမှာစိုးလို့ မလုပ်ကြတာ။ နောက်တချက်က လှောင်သမားတွေ စပါး၊ ပဲ  သီးနှံလှောင်ကုန်သမားတွေက ဒီရာသီမှာ သူတို့လှောင်ထားတဲ့ ကုန်တွေကို ထုတ်ရောင်းကြတယ်။ အဲဒီကရတဲ့ငွေနဲ့ သူတို့က ရွှေကို ပြန်သိမ်းကြတယ်။ ရွှေကို ပြန်သိမ်းတဲ့အတွက် ဈေးကွက်မှာ ဝယ်လိုအားပြီး ထုတ်လုပ်မှုက မရှိတော့ ဈေးတွေ တက်သွားတာ။ ပြီးတော့ ပြည်တွင်းရွှေဈေးက ဒေါ်လာငွေလဲနှုန်းပေါ်မှာ အခြေခံတာဖြစ်လို့လည်း ငွေလဲနှုန်းနဲ့အတူ ရွှေဈေးက ပါသွားတာ။ ဒါပေမဲ့ နောက်လလောက်ဆိုရင် ဈေးက ပြန်ငြိမ်သွားလိမ့်မယ်” လို့ ဒီဗွီဘီကို ပြောပါတယ်။

ဈေးကွက်အတွင်းမှာ မည်သည့်ကုန်အမျိုးအစားပဲဖြစ်ဖြစ် ဈေးအတက် ကြမ်းပါက အကျလည်း ကြမ်းနိုင်တာကြောင့် သတိပြုဖို့ လိုပါတယ်။

ဈေးကွက်သုတေသီတဦးက “ရွှေ တမျိုးတည်း မဟုတ်ပါဘူး။ ဘယ်အရာပဲဖြစ်ဖြစ် ဝုန်းခနဲ တက်သွားလို့ရှိရင် ဝုန်းခနဲ ပြန်ကျတက်တယ်နော်။ ဒါကြောင့် ဈေးကွက်ထဲမှာ ငြိမ်ငြိမ်လေးနဲ့တက်သွားတဲ့ ဈေးက အခိုင်ဆုံးပဲ။ အဲ့လိုမဟုတ်ဘဲနဲ့ အတက်ကြမ်းလို့ ရှိရင် အကျလည်း ကြမ်းတယ်။ ပြီးတော့ အခုချိန်ကျမှ ရွှေလိုက်ဝယ်ရင်တော့ မြတ်လည်း နည်းနည်းပဲ မြတ်မှာနော်။ မတော်လို့ ကျပြီဆိုရင် ပြေးဖို့ မမှီတော့ဘူး။ အကျကြမ်းရင်တော့ ရွှေဈေးက ၂၂ နဲ့ ၂၃ သိန်းလောက်အထိ ရောက်သွားနိုင်တယ်။ အဲဒီတော့ ဒီအချိန်မှာ အရောင်းအဝယ် သတိထားကြဖို့ လိုတယ်။  ဘာကြောင့်ဆို မြတ်ရင် နည်းနည်းပဲ မြတ်မယ်။ ရှုံးရင် များများ ရှုံးနိုင်တယ်။ တကယ်လို့ပေါ့ မမြင်နိုင်တဲ့ အရေးကိစ္စတွေပေါ်လာ ရင်တော့ မပြောတတ်ဘူးပေါ့ နော်” လို့ ဒီဗွီဘီကို ပြောပါတယ်။

ပြည်တွင်းရွှေဈေးကွက်မှာ အကယ်ဒမီရွှေဈေးက တကျပ်သားကို ၂,၆၀၀,၀၀၀ အထိ ဈေးပေါက်နေပေမယ့် ပြည်တွင်းရွှေဈေးနှုန်းအတွက် ရန်ကုန်တိုင်း ရွှေလုပ်ငန်းရှင်များအသင်းက နေ့စဉ်ထုတ်ပြန်ပေးတဲ့ ရည်ညွှန်း ရွှေဈေးနှုန်းမှာ ဒီကနေ့ (သြဂုတ် ၁၂ ရက်၊ နေ့လယ်ခင်း ၁၂း၁၅ နာရီ အထိ) ပြည်တွင်းအကယ်ဒမီရွှေဈေးက တကျပ်သားကို ၂,၀၉၁,၀၀၀ ကျပ်သာ ရှိပါတယ်။

ဒါကြောင့် ရန်ကုန်တိုင်းရွှေလုပ်ငန်းရှင်များအသင်းက ထုတ်ပြန်တဲ့ ရည်ညွှန်းဈေးနှုန်းဟာ ဈေးကွက်မှာ ဖြစ်ပေါ်နေတဲ့ ဈေးနှုန်းနဲ့ယှဉ်ရင် တကျပ်သားကို ၅၀၉,၀၀၀ ကျပ်ကွာဟနေတာ တွေ့ရပါတယ်။ ကမ္ဘာ့ရွှေဈေးကတော့ တအောင်စကို အမေရိကန်ဒေါ်လာ ၁၇၉၁ ဒေါ်လာရှိပါတယ်။

အလားတူ နိုင်ငံခြားငွေလဲလှယ်နှုန်းကလည်း ပြင်ပဈေးကွက်မှာ အမေရိကန် ၁ ဒေါ်လာကို မြန်မာငွေ ၂၈၉၀ နဲ့ ၂၈၃၀ ကျပ်အကြားမှာ အရောင်းအဝယ် ရှိနေပါတယ်။ စစ်ကောင်စီ လက်အောက်ခံ ဗဟိုဘဏ်က ထုတ်ပြန်ပေးထားတဲ့ ရည်ညွှန်းငွေလဲနှုန်းကတော့ အမေရိကန် ၁ ဒေါ်လာကို မြန်မာငွေ ၂၁၀၀ ကျပ်နှုန်း သတ်မှတ်ထားပါတယ်။

5 mins Ago

ထားဝယ်တွင် စက်သုံးဆီ အလုံအလောက်ဝယ်မရသဖြင့် ဒေသခံများ အခက်တွေ့

တနင်္သာရီတိုင်း၊ ထားဝယ်မြို့က စက်သုံးဆီဆိုင်တချို့မှာ စက်သုံးဆီပြတ်လပ်နေပြီး တချို့ဆိုင်တွေကတော့ ခွဲတမ်းနဲ့သာ ရောင်းပေးနေတဲ့အတွက် အလုံအလောက် ဝယ်မရ ဖြစ်နေတယ်လို့ ထားဝယ်မြို့ခံတွေက ပြောပါတယ်။

DDPC စက်သုံးဆီဆိုင် ၂ ခုအနက် တခုမှာသာ သြဂုတ် ၁၂ ရက်၊ မနက် ၁၁ နာရီလောက်အထိ ရောင်းချပေးပြီး ဆိုင်ကယ်တစီး အများဆုံး ကျပ် ၂,၀၀၀ ဖိုးနဲ့ ကားတစီး အများဆုံး ကျပ် ၁၀,၀၀၀ ဖိုးအထိသာ ရရှိတယ်လို့ ထားဝယ်မြို့ခံတဦးက ပြောပါတယ်။ 

“ဓာတ်ဆီ နှစ်ထောင်ဖိုးလောက်နဲ့က ဘယ်မှသွားလာလို့မရဘူး။ ငါးထောင်ဖိုးလောက် ထည့်ဖို့ကို တဆိုင်ပြီးတဆိုင် လိုက်ထည့်နေရတယ်။ တချို့ဆိုင်တွေမှာက ဆီလုံးဝမရှိတော့ဘူး” လို့ ပြောပါတယ်။

စက်သုံးဆီဆိုင်ကြီးတခုဖြစ်တဲ့ ရနံ့သစ် ဆိုင်မှာတော့ ဆိုင်ကယ်တစီးကို အများဆုံး ၃,၀၀၀ ဖိုးအထိသာ ရောင်းချပေးနေပြီး ယာဥ်တစီးကို တရက်တကြိမ်သာ ဝယ်ယူခွင့်ပေးပါတယ်။

အခုလို စက်သုံးဆီ လုံးဝပြတ်လပ်ရတာက ဆီသယ်ယာဥ် အချိန်မီရောက်မလာလို့ဖြစ်ပြီး ဆီသယ်ယာဥ် ရောက်လာပါက ခွဲတမ်းနဲ့ ပြန်လည်ရောင်းချပေးမယ်လို့ အမည်မဖော်လိုတဲ့ စက်သုံးဆီဆိုင်ဝန်ထမ်းတဦးက ပြောပါတယ်။

ထားဝယ်မြို့မှာ သြဂုတ် ၆ ရက်က ဓာတ်ဆီ 92 တလီတာစျေးနှုန်း ၁,၆၈၀ ကျပ် ရှိခဲ့ရာကနေ ဒီကနေ့ သြဂုတ် ၁၂ ရက်နေ့မှာတော့ ၂,၃၁၅ ကျပ်ဖြစ်နေတဲ့အတွက် တပတ်အတွင်း စျေးနှုန်း ကျပ် ၆၀၀ လောက်အထိ မြင့်တက်လာပါတယ်။

24 mins Ago

ကျောက်ကြီးမြို့နယ် တိုက်ပွဲများ၌ စစ်ကောင်စီဘက်က ၄၀ ကျော် သေဆုံး

ပဲခူးတိုင်း ကျောက်ကြီးမြို့နယ်အတွင်း ဩဂုတ် ၈ ရက်ကစပြီး KNU တပ်ရင်း ၉ နယ်မြေ စစ်တောင်းမြစ်ဘေး လိမ်ပင်ကျေးရွာနဲ့ ပဲ့သောင်ရွာနားဖြစ်ပွားတဲ့ တိုက်ပွဲတွေမှာ  စစ်ကောင်စီ ဘက်က ဒုတပ်ရင်းမှူးအပါအဝင် စစ်ကောင်စီတပ်ဖွဲ့ဝင် ၄၀ ကျော်‌သေဆုံးကာ အများအပြား ဒဏ်ရာရခဲ့တယ်လို့ KNLA နဲ့ နီးစပ်သူတွေက ပြောပါတယ်။

၈ ရက်နေ့ တိုက်ပွဲအတွင်း စစ်ကောင်စီ ဒုတပ်ရင်းမှူး သေတာကြောင့် ရဟတ်ယာဉ်နဲ့ ပစ်ကူလာပေးပြီး စစ်တောင်းမြစ်အနောက်ဘက်ကမ်း ဒိုးတန်းရွာကနေပါ စစ်ကူတွေ ထပ်လာ တယ်လို့ ဆိုပါတယ်။

စစ်ကောင်စီရဲ့ လက်နက်ကြီး ကျရောက်ပေါက်ကွဲတာကြောင့် လိမ်ပင်ရွာက ​အမျိုးသမီး တဦး ခေါင်းကို ကျည်စ ရှပ်ထိသွားတယ်လို့လည်း ပြောပါတယ်။

စစ်ကောင်စီတပ်တွေဟာ ဩဂုတ် ၁၁ ရက် ညနေကစပြီး စစ်တောင်းမြစ်အနောက်ဘက်ကမ်းကို အကုန်ဆုတ်ခွာ ပြေးကြရပြီး ကရင်အမျိုးသားလွတ်မြောက်ရေးတပ်မတော် (KNLA) ဘက်က လိုက်လံပစ်ခတ်ခဲ့ကြောင်း၊ မြစ်ထဲမှာတော့ စစ်ကောင်စီအလောင်းတွေ တွေ့ရတယ်လို့ ရွာခံ တဦးက ပြောပါတယ်။

​ဩဂုတ် ၁၀ ရက်ကလည်း တပ်ရင်း ၈ နယ်မြေ တိုင်ပင်ကျေးရွာနဲ့ မျက်ရဲကျေးရွာနားမှာ စစ်ကောင်စီကားကို KNLA က မိုင်းဆွဲ တိုက်ခိုက်ရာမှာ ၅ ယောက် သေပြီး ဒဏ်ရာရသူတွေ ရှိပေမဲ့ အရေအတွက်ကိုတော့ အတည်ပြုလို့ မရသေးပါဘူး။

တိုက်ပွဲအတွင်း တပ်ဖွဲ့ဝင်တွေ သေဆုံးဒဏ်ရာရမှု အခြေအနေကို စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။

ကျောက်ကြီးမြို့နယ်အတွင်း စစ်ကောင်စီတပ်နဲ့ KNLA တပ်တို့ ဇွန် ၂၅ ရက်ကစပြီး တိုက်ပွဲတွေ ဖြစ်ပွားနေတာကြောင့် ဒေသခံတွေဟာ ဘေးလွတ်ရာနေရာတွေကို စစ်ဘေးရှောင်နေကြရတယ်လို့ လည်း သိရပါတယ်။

41 mins Ago

ရွှေပြည်သာနှင့် မြောက်ဒဂုံက ရပ်ကွက်အုပ်ချုပ်ရေးမှူးရုံးများ ဗုံးပေါက်၊ ၄ ဦးဒဏ်ရာရ

ရန်ကုန်မြို့၊ ရွှေပြည်သာမြို့နယ်နဲ့ မြောက်ဒဂုံမြို့နယ်ရှိ ရပ်ကွက်အုပ်ချုပ်ရေးမှူးရုံးတွေမှာ သြဂုတ် ၁၁ ရက် ညပိုင်းက ဗုံးပေါက်ကွဲမှုတွေဖြစ်ခဲ့ပြီး ရာအိမ်မှူးနဲ့ ဆယ်အိမ်မှူး ၄ ဦး ဒဏ်ရာရရှိခဲ့တယ်လို့ မြို့ခံတွေက ပြောပါတယ်။

ရွှေပြည်သာမြို့နယ် ၇ ရပ်ကွက်၊ နဝရတ်လမ်းမပေါ်ရှိ ရပ်ကွက်အုပ်ချုပ်ရေးမှူးရုံးမှာ မနေ့ည ၇ နာရီက ဗုံးပေါက်ကွဲမှုဖြစ်ခဲ့ရာ ရာအိမ်မှူးနဲ့ ဆယ်အိမ်မှူး ၃ ဦး ထိခိုက်ဒဏ်ရာ ရရှိခဲ့တယ်လို့ ရပ်ကွက်နေသူတဦးက ဒီဗွီဘီကိုပြောပါတယ်။

“ရုံးမှာ ဆွမ်းချက်နေတဲ့အချိန် ဗုံးထပေါက်တာ၊ ရပ်မိရပ်ဖနဲ့ ရာအိမ်မှူး ဆယ်အိမ်မှူးသုံးဦး ဒဏ်ရာရတယ်။ ဒဏ်ရာက သိပ်မစိုးရိမ်ရဘူး။”

အလားတူ ရွှေပြည်သာမြို့နယ် ၁၀ ရပ်ကွက် အုပ်ချုပ်ရေးမှူးရုံးမှာလည်း ည ၇ နာရီခွဲက ထပ်မံဗုံးပေါက်ကွဲခဲ့ရာ ရာအိမ်မှူးတဦး ထိခိုက်ဒဏ်ရာရရှိခဲ့တယ်လို့ ရပ်ကွက်နေသူတဦးက ပြောပါတယ်။

ဒါ့အပြင် မြောက်ဒဂုံမြို့နယ် ၂၄ ရပ်ကွက်၊ သခင်အုန်းဖေကြီးလမ်းရှိ အုပ်ချုပ်ရေးမှူးရုံးကို မနေ့ညနေပိုင်းက ဆိုင်ကယ်တစီးနဲ့ ဗုံးလာပစ်ခဲ့ရာ ဗုံးပေါက်ကွဲမှုဖြစ်ခဲ့ပေမဲ့ ထိခိုက်ဒဏ်ရာရသူ မရှိဘူးလို့ မြို့ခံတွေက ပြောပါတယ်။

ဗုံးပေါက်ကွဲမှုတွေ ဖြစ်ပြီးနောက် ရွှေပြည်သာနဲ့ မြောက်ဒဂုံမြို့နယ်တွေမှာ စစ်ကောင်စီတပ်တွေက ဧည့်စာရင်းစစ်ဆေးတာတွေ ပြုလုပ်ခဲ့တယ်လို့ ဆိုပါတယ်။

ရန်ကုန်တိုင်း မြို့နယ်တချို့မှာ သြဂုတ်လအတွင်း ပစ်ခတ်မှုနဲ့ ဗုံးပေါက်ကွဲမှုတွေကြောင့် သေဆုံးသူတွေနဲ့ ထိခိုက်ဒဏ်ရာရသူတွေ ရှိခဲ့ပြီး ဖမ်းဆီးခံရသူတွေလည်း ရှိပါတယ်။

48 mins Ago

အိုးဘိုထောင်တွင်း အစာငတ်ခံဆန္ဒပြပွဲ ဦးဆောင်သူ ရိုက်နှက်ခံရ၊ အသက်အန္တရာယ် စိုးရိမ်ရပြီး ဆေးကုခွင့်မရ

မန္တလေး အိုးဘိုထောင်အတွင်း အစာငတ်ခံဆန္ဒပြပွဲ ဦးဆောင်သူ ရန်ကုန်ပညာရေးတက္ကသိုလ် ကျောင်းသားများသမဂ္ဂ ဥက္ကဋ္ဌဟောင်း ကိုနောင်ထက်အောင်ဟာ ထောင်အာဏာပိုင်တွေရဲ့ ရိုက်နှက်ခံရတယ်လို့ သိရပါတယ်။

ဒီလို ရိုက်နှက်ခံရတဲ့အတွက် ရှေ့သွားကျိုး၊ ခေါင်းပေါက်၊ ကျောကွဲဒဏ်ရာတွေ ရရှိခဲ့ပြီး အသက်အန္တရာယ် စိုးရိမ်ရပေမဲ့ ဆေးကုသခွင့်မရဘူးလို့ ဗကသများအဖွဲ့ချုပ်က ထုတ်ပြန်ပါတယ်။

ကိုနောင်ထက်အောင်ရဲ့ ကျန်းမာရေးအခြေအနေဟာ ထောင်တွင်းမှာ အလွန်ဆိုးဝါးနေပြီး စစ်ကောင်စီဘက်ကလည်း အိုးဘိုထောင်တွင်း သတင်းတွေကို ဖုံးကွယ်ထားတယ်လို့ သိရပါတယ်။

စစ်ကောင်စီရဲ့ တရားမမျှတတဲ့၊ ပွင့်လင်းမြင်သာမှု မရှိတဲ့ တရားစီရင်ရေးစနစ်ကို ပူးပေါင်းဆောင်ရွက်တော့မှာ မဟုတ်ဘဲ ဩဂုတ် ၁ ရက်က စတင်ပြီး တရားစီရင်ရေးစနစ်ကို သပိတ်မှောက်ကာ တရားမျှတမှု ရရှိရေးအတွက် တဆင့်ပြီးတဆင့် ဆက်လက်ဆောင်ရွက်သွား မယ်လို့ အိုးဘိုထောင်တွင်းမှ နိုင်ငံရေးအကျဉ်းသူ/သားတွေက ဇူလိုင် ၂၉ ရက်မှာ စာထုတ် ထားပါတယ်။

ထုတ်ပြန်ချက်အတိုင်း ဩဂုတ်လပထမပတ်အတွင်း အိုးဘိုထောင်တွင်း အစာငတ်ခံဆန္ဒပြပွဲကို လုပ်ဆောင်ခဲ့တာလို့ သိရပါတယ်။

အများပြည်သူအနေနဲ့ ထောင်တွင်း တိုက်ပွဲတွေအပေါ် အာရုံစိုက်ကြဖို့ ဗကသများအဖွဲ့ချုပ်က တိုက်တွန်းထားပါတယ်။

1 hour Ago

ကော့သောင်း ဝါတန်းငါးဖမ်းလှေ ၃ စီး မီးလောင်မှု၊ သေဆုံးသူ ၆ ဦးအထိရှိ

တနင်္သာရီတိုင်း၊ ကော့သောင်းမြို့မှာ ဩဂုတ် ၈ ရက်က ကမ်းဝေး ဝါတန်းငါးဖမ်းလှေသုံးစီး မီးလောင်ကျွမ်းမှု ဖြစ်ပွားခဲ့ပြီး သေဆုံးသူ ၆ ဦးအထိ ရှိလာတယ်လို့ မြို့ကယ်ဆယ်ရေးအဖွဲ့တွေထံက သိရပါတယ်။

ဝါတန်းလှေ မီးလောင်မှုကြောင့် ရေထဲပြုတ်ကျ မျောပါနေတဲ့ အမျိုးသားအလောင်းတလောင်း ထပ်မံတွေ့ရှိတာကြောင့် သေဆုံးသူ စုစုပေါင်း ၆ ဦးအထိ ရှိလာတာပါ။

ကယ်ဆယ်ရေးအဖွဲ့ဝင်တဦးက “တဦးကတော့ ပေါက်ကွဲမှုဖြစ်တုန်းက ရေထဲလွင့်စင်သွားပုံ ရတယ်။ သူ့ရဲ့အလောင်းကို အနီးအနားက ရေပြင်ထဲမှာ ပြန်ရှာတွေ့တယ်” လို့ ပြောပါတယ်။

မီးစလောင်တဲ့နေ့က သေဆုံးသူတဦးနဲ့ ထိခိုက်ဒဏ်ရာရသူ လေးဦးသာရှိခဲ့ပြီး ဩဂုတ် ၉ ရက်က မီးလောင်တဲ့နေရာမှာ ဆက်လက်ရှာဖွာတာတွေ ပြုလုပ်ခဲ့တာကြောင့် အမျိုးသားအလောင်း ၄ လောင်း ထပ်မံရှာဖွေတွေ့ရှိခဲ့တယ်လို့ ဆိုပါတယ်။

အေးရိပ်ငြိမ်ရပ်ကွက် ရွှေဝက်ဝံတံတားမှာ ဆိုက်ကပ်ထားတဲ့ ဦးစိုးလွင်ပိုင်ဆိုင်တဲ့ ဝါတန်းငါးဖမ်းလှေ ၅ စီးအနက် ထက်ထက်ပိုင် ၂၇ ဝါတန်းလှေက လျှပ်စစ်ဝါယာကြိုး ရှော့ဖြစ်ပြီး မီးစတင်လောင်ကျွမ်းခဲ့တာလို့ သိရပါတယ်။

မီးလောင်မှုကြောင့် သေဆုံးသူတွေဟာ ကော့သောင်းမြို့ခံ ရေလုပ်သားတွေ အပါအဝင် တခြားမြို့တွေက လာရောက်လုပ်ကိုင်တဲ့ ရွှေ့ပြောင်းရေလုပ်သားတွေ ပါဝင်တယ်လို့ သိရပါတယ်။

2 hours Ago

စစ်အုပ်စုက နိုင်ငံရေးပြဿနာကို ဆွေးနွေးအဖြေရှာလိုသည့် အရိပ်အယောင်မတွေ့ဟု ဗိုလ်ချုပ်ကြီး မူတူးစေဖိုး ပြော

နိုင်ငံ့အာဏာကို မတရားသိမ်းယူထားတဲ့ စစ်အုပ်စုရဲ့ သဘောထားရပ်တည်ချက်နဲ့ လုပ်ဆောင်ချက်တွေဟာ လက်နက်ကိုင်ခုခံတော်လှန်မှုကို တရားမျှတစွာ တွေ့ဆုံဆွေးနွေးပြီး နိုင်ငံရေးပြဿနာတွေကို အဖြေရှာလိုတဲ့ အရိပ်အယောင် တစုံတရာကိုမျှ မတွေ့ရဘူးလို့ ကရင်အမျိုးသား အစည်းအရုံး (ကေအန်ယူ) ဥက္ကဋ္ဌ ဗိုလ်ချုပ်ကြီး စောမူတူးစေဖိုးက ပြောကြားလိုက်ပါတယ်။ 

ကရင်အမျိုးသားအစည်းအရုံး (ကေအန်ယူ) ရဲ့ နိုင်ငံ‌ရေးဆိုင်ရာ သဘောထား ရပ်တည်ချက်ဟာ နိုင်ငံရေးပြသနာကို နိုင်ငံ‌ရေးအရ တွေ့ဆုံဆွေးနွေးအဖြေရှာခြင်းသာ ဖြစ်တယ်လို့ ဆိုပါတယ်။ 

ဩဂုတ် ၁၂ ရက် ဒီနေ့ ကျရောက်တဲ့ ကရင်အမျိုးသားအာဇာနည်နေ့အတွက် ပေးပို့တဲ့ သဝဏ်လွှာမှာ ပြောကြားလိုက်တာဖြစ်ပြီး လက်ရှိအခြေအနေမှာ ကေအန်ယူအနေနဲ့ လက်နက်ကိုင် ခုခံတော်လှန်နေရတဲ့ အချိန်အခါမှာသာ ရှိနေသေးကြောင်းနဲ့ နိုင်ငံရေးပြဿနာတွေကို နိုင်ငံရေး၊ သံတမန်ရေးနဲ့ လူမှုဆိုင်ရာ နည်းလမ်းပေါင်းစုံ အဖြေရှာသွားမယ်လို့ ဆိုပါတယ်။

ဒါ့အပြင် မိမိတို့ အမျိုးသားများ အဓွန့်ရှည် ရှင်သန်နိုင်ဖို့နဲ့ ဖွံ့ဖြိုးတိုးတက်နိုင်ဖို့ မိမိတို့နိုင်ငံဟာ ဖက်ဒရယ်ဒီမိုကရေစီနိုင်ငံသာ ဖြစ်ရမှာဖြစ်ပြီး မိမိတို့နိုင်ငံ ငြိမ်းချမ်းရေးရရှိဖို ဖယ်ဒရယ် အခြေခံမူပေါ် တည်ဆောက်ပြီး ပြည်သူလူထုတရပ်လုံးအတွက် ဒီမိုကရေစီအခွင့်အရေး အပြည့်အဝ ရရှိဖို့ လိုအပ်ကြောင်းလည်း ထောက်ပြပြောဆိုထားပါတယ်။

ကရင့်အမျိုးသားလွတ်မြောက်ရေးတပ်မတော် (KNLA) ကလည်း ခုခံတော်လှန်ရေးတလျှောက်မှာ ကရင့်အမျိုးသားအစည်းအရုံးကနေ လက်နက်ကိုင်ပဋိပက္ခရဲ့ အရင်းအမြစ်ဖြစ်တဲ့ နိုင်ငံရေး ပြဿနာတွေကို နိုင်ငံရေးနည်းနဲ့ ဖြေရှင်းဖို့ တစိုက်မတ်မတ် တောင်းဆိုခဲ့ပေမယ့် လူမျိုးကြီးဝါဒကို စွဲကိုင်နေတဲ့ အုပ်ချုပ်သူ အစိုးရတွေနဲ့ စစ်အုပ်ချုပ်ရေးစနစ်က နိုင်ငံရေးအရ နည်းမှန်လမ်းမှန် ကြိုးပမ်းအားထုတ်မရှိခဲ့ဘူးလို့ ထောက်ထားထုတ်ပြန်ထားပါတယ်။

ဒါ့အပြင် ကရင့်တော်လှန်ရေးဟာ နှစ်ပေါင်း ၇၂ နှစ်တိုင်ရောက်ခဲ့ပြီဖြစ်ပြီး ကရင့်ခေါင်းဆောင် စောဘဦးကြီးနဲ့တကွ အာဇာနည်ပီပီ အသက်စွန့်ပေးလှူသွားတဲ့ ခေါင်းဆောင်တွေ၊ ရဲဘော်တွေ၊ ပြည်သူတွေရဲ့ ခရီးလမ်းဟာ မဆုံးသေးတဲ့အတွက် ရှေ့ဆက်ပြီး မပြီးဆုံးသေးတဲ့ သမိုင်းပေးတာဝန်ကို ဆက်လက်ထမ်းရွက်ဖို့ တိုက်တွန်းကြောင်းလည်း ကရင်အမျိုးသားလွတ်မြောက်ရေးတပ်မတော်က ထုတ်ပြန်ထားပါတယ်။

ဩဂုတ် ၁၂ ရက် ဒီနေ့ ကျရောက်တဲ့ ကရင်အမျိုးသားအာဇာနည်နေ့ အခမ်းနားတွေကိုတော့ ကရင်အမျိုးသားတွေရှိရာ နိုင်ငံတဝန်းမှာ ကျင်းပပြုလုပ်ခဲ့ကြပါတယ်။

2 hours Ago

အင်းစိန်မြို့နယ်တွင် အရန်မီးသတ်တပ်ခွဲမှူးအပါအဝင် ၂ ဦး ပစ်ခတ်ခံရ

ရန်ကုန်တိုင်း၊ အင်းစိန်မြို့နယ်၊ တညင်းကုန်းရပ်ကွက်၊ စက်မှုဇုန် (၃)၊ မြတ်ဧရာလမ်းသွယ် (၂) မှာ ဩဂုတ် ၁၂ ရက် ဒီကနေ့ မနက်ပိုင်းက အရန်မီးသတ်တပ်ခွဲမှူးအပါအဝင်နှစ်ဦး  သေနတ်နဲ့ ပစ်ခံရတယ်လို့ မြို့ခံတွေဆီက သိရပါတယ်။

အင်းစိန်မြို့နယ် အရန်မီးသတ်တပ်ခွဲမှူးနဲ့ သူငယ်ချင်းဖြစ်သူတို့ ကားပြင်နေစဥ် ဆိုင်ကယ်နဲ့ အမျိုးသား သုံးဦး ရောက်လာပြီး သေနတ်နဲ့ပစ်ခတ်ခဲ့တာဖြစ်တယ်လို့ ရပ်ကွက်နေသူ တဦးက  ပြောပါတယ်။

"ကားဘီးပေါက်လို့ လဲနေတဲ့အချိန် ဆိုင်ကယ်နဲ့လူ သုံးဦး ရောက်လာပြီး ဝိုင်းပစ်တာ ငါးချက်လောက်ရှိမယ်။"

သေနတ်နဲ့ပစ်ခတ်ခံရတဲ့ အင်းစိန်မြို့နယ် တညင်းကုန်းရပ်ကွက် အရန်မီးသတ်တပ်ခွဲမှူးဟာ ကိုလှိုင်မင်းထွန်းဖြစ်ပြီး ဒဏ်ရာ ရရှိသူနောက် တစ်ယောက်က သူ့ရဲ့သူငယ်ချင်း ကိုခင်မောင်ငြိမ်းဖြစ်တယ်လို့ မီးသတ်တပ်ဖွဲ့နဲ့ နီးစပ်သူတစ်ဦးက ပြောပါတယ်။

"မီးသတ်တပ်ခွဲမှူးက  ရင်ဘတ်ကိုထိတယ် စိုးရိမ်ရတယ်။ နောက်တစ်ယောက်က ပေါင်ကိုထိတယ် သိပ်မစိုးရိမ်ရဘူးအခု အင်းစိန်ဆေးရုံမှာ။"

လက်တလောမှာ စစ်ကောင်စီတပ်တွေဟာ တညင်းကုန်းလမ်းဆုံမှာ ဆိုင်ကယ်တွေနဲ့လမ်းသွား လမ်းလာတွေကို စစ်ဆေးနေတယ်လို့ မြို့ခံတွေဆီက သိရပါတယ်။ 

အင်းစိန်မြို့နယ်မှာ အခုလအတွင်း အုပ်ချုပ်ရေးမှူး နှစ်ယောက်နဲ့ ဇနီးဖြစ်သူ ပစ်ခတ်ခံရပြီး နှစ်ဦး သေဆုံးကာ တစ်ဦးဒဏ်ရာ ရရှိခဲ့ပါသေးတယ်။

2 hours Ago

ထားဝယ်ခရိုင် စစ်ဘေးရှောင်များ ဆေးဝါးအကူအညီ လိုအပ်နေ

တနင်္သာရီတိုင်း ထားဝယ်ခရိုင်မှာ စစ်ဘေးရှောင်သောင်းချီရှိနေပြီး ကျန်းမာရေးအတွက် ဆေးဝါး ရဖို့ အခက်အခဲဖြစ်နေတာကြောင့် တချို့မှာ အသက်သေဆုံးတဲ့အထိ ဖြစ်ခဲ့တယ်လို့ စစ်ဘေးရှောင် အကူအညီပေးနေသူတွေက ပြောပါတယ်။

စစ်ဘေးရှောင်စခန်းများမှာ လက်တလောအခြေအနေအရ ရာသီတုပ်ကွေးနဲ့ ငှက်ဖျားရောဂါ အဖြစ်များနေပြီး ဆက်စပ်ဆေးပစ္စည်းတွေ ဝယ်ယူရခက်ခဲတဲ့အပြင် တချို့ဆေးဆိုင်တွေမှာ  ဆေးဝယ်ယူတဲ့အခါ စောင့်ကြည့်ခံရတဲ့ အနေအထားမျိုး ရှိနေတယ်လို့ စစ်ဘေးရှောင်ကူညီသူ တဦးက ပြောပါတယ်။

စစ်ကောင်စီက ရိက္ခာသယ်ယူခွင့် ကန့်သတ်ထားတဲ့အပြင် ဆက်သွယ်ရေးဖုန်းလိုင်းတွေ  ဖြတ်တောက်ထားတာကြောင့် အခုလို အခက်အခဲတွေ ကြုံတွေ့နေရတယ်လို့ သိရပါတယ်။

အကူအညီပေးနေသူတဦးက “ဖုန်းလိုင်းတွေဖြတ်ထားတော့  ပြင်ပအလှူရှင်တွေကို အကူအညီတောင်းပေးပေမဲ့ အလှူရှင်တွေက  အကူအညီပေးဖို့ဟာကို ဘာတွေလိုနေမှန်း မသိရဘူး။ ဒုတိယတချက်က ဆေးဝါးနဲ့  ရိက္ခာ၊ ရိက္ခာတောင် ယူသွားဖို့ခက်ခဲနေတော့ ဆေးဝါးဆို ပိုဆိုးနေတဲ့  အနေအထားမျိုးဖြစ်နေတယ်” လို့ ပြောပါတယ်။

ဆေးဝါးဝယ်ယူ၊ သယ်ယူရအခက်အခဲကြောင့် ဂျာမဏီရွက် (ဒေသအခေါ် - ဘိစပ်ရွက်) ပြုတ် သောက်တာ၊ မီးပုံထဲ ငရုတ်သီး ပစ်ထည့်ပြီး ငရုတ်သီးမှိုင်းတိုက်တာစတဲ့ ရိုးရာဆေးမီးတို နည်းတွေကို အသုံးပြုနေရတယ်လို့ သိရပါတယ်။

ဩဂုတ် ၄ ရက်က ရေဖြူမြို့နယ် ဝဇွမ်းတောရွာက စစ်ရှောင်နေတဲ့ အသက်  ၁၁ နှစ်အရွယ် မောင်နိုးနိုးလပြည့်မှာ ရုတ်တရက်အမောဖောက်လာပြီး  ဆေးကုသခွင့်မရလို့ သေဆုံးခဲ့ရပါတယ်။

စစ်ဘေးရှောင်နေရတဲ့ ထားဝယ်မြို့ အရှေ့တောဒေသ မေတ္တာအလင်းမိဘမဲ့ ကလေးများ စောက်ရှောက်ရေးဂေဟာက ကလေး ၁၀ ယောက်လောက် ဖျားနာနေပြီး အစားအသောက်နဲ့  ဆေးဝါးတွေ လိုအပ်နေတယ်လို့ သိရပါတယ်။

ထားဝယ်ခရိုင်အတွင်း တောင်ပျောက်တိုက်နယ် စစ်ရှောင်စခန်းမှာ လူ ၇၀၀၀ ကျော်၊  အရှေ့တောမှာ ၇၀၀ ကျော်၊ လောင်းလုံးမှာ ၄၀၀၀ ကျော်၊ ရေဖြူမှာ ၁၀၀၀ ကျော်နဲ့ ဟာမြင်းကြီးစစ်ရှောင်စခန်းမှာ ၁၀၀ လောက် ရှိတယ်လို့ သိရပါတယ်။ 

မိုးသည်းထန်စွာ ရွာသွန်းလေ့ရှိတဲ့  ထားဝယ်ခရိုင်မှာ စစ်ကောင်စီက နယ်မြေစိုးမိုးရေးအတွက်  မိုးရာသီကို အခွင့်ကောင်းယူ လုပ်ဆောင်နေပြီး ပြည်သူ့ကာကွယ်ရေးတပ်ဖွဲတွေကို  စစ်ကြောင်း ထိုး တောနင်းရှာဖွေနေတာကြောင့် ထားဝယ်ခရိုင်မှာ  စစ်ဘေးရှောင်ပြည်သူများ အရင်လထက် သိသိသာသာ  ပိုမိုများပြားနေပါတယ်။

2 hours Ago

ရေးမြို့နယ်တွင် မိုးသည်းထန်‌ပြီး ရေကြီး

မွန်ပြည်နယ်၊ ရေးမြို့နယ်၊ ဟံဂံကျေးရွာမှာ သြဂုတ် ၁၂ ရက် ဒီကနေ့ မိုးအဆက်မပြတ် ရွာသွန်းမှုကြောင့် လူနေအိမ်တွေနဲ့ ဈေးဆိုင်တွေ ရေကြီးရေလျှံပြီး ဒေသခံတွေ ဘေးလွတ်ရာ စတင်ပြောင်းရွေ့ နေရပါတယ်။

အနိမ့်ပိုင်းက နေအိမ်တွေမှာ ရေနစ်မြုပ်ပြီး  လူတွေဆက်နေမရလို့ နီးစပ်ရာ ရေလွတ်ရာ နေအိမ်တွေဆီ ပြောင်းရွှေ့ နေရတယ်လို့ ဒေသခံတယောက်က ပြောပါတယ်။

“မိုးက ဆက်လက်အားကောင်းနေတုန်းပဲ။ ရေကလည်း ပင်လယ်ဒီရေနဲ့ဆို ရေက များမယ်ဆိုရင် စိုးရိမ်ရတဲ့ အခြေအနေမှာ ရောက်ရှိသွားပါမယ်။ လူအသေပျောက်တော့ မရှိသေးပေမဲ့ လက်တလောမှာတော့ အရေးပေါ်အကူညီလိုအပ်ရတယ်။”

ရေးချောင်းဖျားဒေသဘက်ရှိ ကားလမ်းတွေမှာလည်း လမ်းရေကျော်နေပြီး ဆိုင်ကယ်နဲ့ ကားတွေ သွားလာလို့မရဘူးလို့ ရေးချောင်းဖျားဘက်က ဒေသခံတဦးက ပြောပါတယ်။

မိုးဇလဌာနကတော့ အခုရက်တွေမှာ တောင်ပိုင်း ဒေသဘက်တွေ မိုးရွာသွန်းမှု အားကောင်းလာမှာဖြစ်ပြီး မြေနိမ့်ပိုင်းက နေထိုင်ကြတဲ့သူတွေကို ရေကြီးရေလျှံတာ၊ တောင်ပြိတာတွေ  ဖြစ်ပေါ်လာနိုင်လို့ သတိပြုကြဖို့  နှိုးဆော်ထားပါတယ်။

Credit -Banyar Aung Myat Thu

3 hours Ago

ဘုတလင်မြို့နယ် ဇီးတောစံပြကျေးရွာကို စစ်ကောင်စီတပ်က မီးရှို့

စစ်ကိုင်းတိုင်း၊ ဘုတလင်မြို့နယ်၊ ဇီးတောစံပြကျေးရွာကို စစ်ကောင်စီတပ်က ဩဂုတ် ၁၂ ရက် မနက် ၄ နာရီလောက်က မီးရှို့ခဲ့တာကြောင့် နေအိမ် ၄၀ လောက် ဆုံးရှုံးခဲ့တယ်လို့ ဒေသခံတွေက ပြောပါတယ်။

အိမ်ခြေ ၅၀၀ လောက်ရှိတဲ့ ဇီးတောစံပြကျေးရွာဟာ မုံရွာ-ဘုတလင်သွား ကားလမ်းဘေးမှာ ရှိပြီး စစ်ကောင်စီတပ်က အင်အား ၈၀ ကျော်နဲ့ လာရောက်မီးရှို့ခဲ့ကြတာပါ။

ဒေသခံအမျိုးသမီးတဦးက “မနေ့က အလုံမြို့ ကြီးဗတုံရွာကနေ ကျမတို့ရွာကို ဝင်ပြီး တပ်စွဲတယ်။ ဒီနေ့ ပြန်ထွက်တော့ အခုလို ရွာကို မီးရှို့သွားတယ်။ ရွာတောင်ဘက်မှာ တိုးဂိတ်ကနေ ပြည်သူ့ကာကွယ်ရေးအဖွဲ့တွေက လာလာပြီး သူတို့ကို မိုင်းဆွဲလို့ အခုလို မီးရှို့တာ ဖြစ်နိုင်တယ်။ အခု အိမ်ခြေ ၄၀ ကျော် မီးလောင်တယ်” လို့ ပြောပါတယ်။

ဇီးတောစံပြကျေးရွာဟာ စစ်ကောင်စီတပ် အခြေစိုက်စခန်းဖြစ်တဲ့ နမခဌာနချုပ်နဲ့ အနီးဆုံး ကျေးရွာတရွာလည်း ဖြစ်ပါတယ်။

သြဂုတ် ၁၁ ရက် ညပိုင်းကလည်း ယင်းမာပင်မြို့နယ် ဘန့်ဘွေးရွာမ (ဒေသခေါ် ပျူစောထီးရွာ) မှာ တပ်စွဲနေထိုင်တဲ့ စစ်ကောင်စီတပ်နဲ့ ပျူစောထီးအဖွဲ့တွေက အနီးဝန်းကျင်ကျေးရွာတွေကို လက်နက်ကြီးတွေနဲ့ ပစ်ခတ်နေတာကြောင့် ရွာသားတွေ ထွက်ပြေးနေကြရတယ်လို့ ဒေသခံတွေက ပြောပါတယ်။

အဲဒီစစ်ကောင်စီတပ်ဖွဲ့ဟာ ဘန့်ဘွေးရွာမအတွင်းမှာ သောက်စားပြီးတိုင်း ဘေးပတ်ဝန်းကျင်ကို လက်နက်ကြီးတွေနဲ့ ပစ်ခတ်တာတွေ အရင်ရက်တွေကလည်း ရှိခဲ့တယ်လို့ ဆိုပါတယ်။

အဲဒီလိုပစ်ခတ်မှုတွေကြောင့် အေးချမ်းစွာနေထိုင်နေကြတဲ့ ပြည်သူတွေဟာ လက်နက်ကြီး ထိမှန်ခံရမှာ ကြောက်တာကြောင့် နေအိမ်တွေမှာ မနေရဲကြဘဲ ထွက်ပြေးခဲ့ကြရသလို လူမရှိတဲ့ နေအိမ်တွေက အိမ်မွေးတိရစ္ဆာန်တွေကို အဲဒီ စစ်ကောင်စီတပ်နဲ့ ပျူစောထီးအဖွဲ့တွေက ခိုးယူစားသောက်တာ၊ သူတို့လိုချင်တဲ့ ပစ္စည်းတွေကိုလည်း ခိုးယူတာတွေ လုပ်ဆောင်နေကြတာလို့ ဒေသခံတဦးက ပြောပါတယ်။

ဘန့်ဘွေးရွာမဟာ မုံရွာ-ယာကြီး-ကလေးဝ လမ်းမကြီးဘေးမှာ တည်ရှိပြီး စစ်ကောင်စီတပ်နဲ့ ပျူစောထီးအဖွဲ့တွေ တပ်စွဲနေထိုင်လာတာ ၆ လ ဝန်းကျင် ရှိနေပြီဖြစ်ကာ ခရီးသွားပြည်သူတွေကို ဖမ်းဆီးငွေတောင်းတာ၊ အနီးတဝိုက်မှာရှိတဲ့ ပြည်သူတွေရဲ့ နေအိမ်တွေကို မီးရှို့ဖျက်ဆီးတာနဲ့ ပြည်သူတွေရဲ့ပစ္စည်းတွေ ခိုးယူတာတွေ လုပ်ဆောင်လေ့ရှိတယ်လို့ ဆိုပါတယ်။

ဒါ့အပြင် ယင်းမာပင်မြို့တွင်းမှာ တပ်စွဲနေထိုင်တဲ့ စစ်ကောင်စီတပ်ဖွဲ့ကလည်း သြဂုတ် ၁၀ ရက် ညပိုင်းက တခြားကျေးရွာတွေဘက်ကို လက်နက်ကြီးတွေနဲ့ ပစ်ခတ်တာကြောင့် ပြောင်းပြာ ကျေးရွာက ဒေသခံအမျိုးသမီး ၂ ဦး အပါအဝင် အိမ်မွေးတိရစ္ဆာန်တွေလည်း လက်နက်ကြီးစ ထိမှန်ခဲ့ပါတယ်။

ယင်းမာပင်မြို့နယ်အတွင်း စစ်ရေးတင်းမာနေဆဲဖြစ်ပြီး သြဂုတ် ၁၁ ရက် ညနေပိုင်းကလည်း ရင်ပေါင်တိုင်ကျေးရွာ အပါအဝင် တခြားကျေးရွာတချို့ကို စစ်ကောင်စီတပ်က ရဟတ်ယာဥ်တွေ အသုံးပြုပြီး ပစ်ခတ်ခဲ့လို့ ပြည်သူတချို့ သေဆုံးခဲ့ပေမဲ့ အရေအတွက် အတိအကျ မသိရသေးသလို ဖမ်းဆီးခံထားရသူတွေလည်း ရှိနေပြီး ဒေသခံအများအပြားလည်း ထွက်ပြေးနေကြရပါတယ်။

4 hours Ago

ကရင်တော်လှန်ရေးအင်အားစုများနှင့် လက်တွဲဆောင်ရွက်မည်ဟု ကရင်အာဇာနည်နေ့သို့ NUG သဝဏ်လွှာပေးပို့

ကရင်အမျိုးသားတော်လှန်ရေးအတွက်သာမက ပြီးခဲ့တဲ့နှစ်ပေါင်း ၇၀ ကျော်မှစတင်ကာ မျက်မှောက်ခေတ် နွေဦးတော်လှန်ရေးအထိ မြန်မာနိုင်ငံမှာ စစ်အာဏာရှင်စနစ်ချုပ်ငြိမ်းရေးနဲ့ ဖက်ဒရယ် ဒီမိုကရေစီပြည်ထောင်စု တည်ဆောက်ရေးအတွက် စွန့်လွှတ်အနစ်ခံပြီး ဦးဆောင် တိုက်ပွဲဝင်နေတဲ့ KNU/KNLA အတွက် များစွာ လေးစားဂုဏ်ယူတယ်လို့ NUG က ပြောပါတယ်။

ဩဂုတ် ၁၁ ရက် ဒီကနေ့ကျရောက်တဲ့ ကရင်အာဇာနည်နေ့ကို အမျိုးသားညီညွတ်ရေးအစိုးရ (NUG) က သဝဏ်လွှာပေးပို့ ပြောကြားလိုက်တာပါ။

ကရင်အမျိုးသားခေါင်းဆောင် စောဘဦးကြီးနဲ့တကွ ကရင်ခေါင်းဆောင်တွေ ကျဆုံးခဲ့တာဟာ ဒီကနေ့မှာတော့ ၇၂ နှစ်ပြည့်မြောက်ခဲ့ပြီဖြစ်ကာ ဒီနေ့ရက်အချိန်အခါဟာ ကရင်လူမျိုးတွေရဲ့ သမိုင်းနဲ့ ကရင် တော်လှန်ရေးသမိုင်းမှာ မေ့ပျောက်မရတဲ့ အောက်မေ့ဖွယ်နေ့ရက် ဖြစ်ပါတယ်။

NUG အစိုးရကတော့ စစ်အာဏာရှင်စနစ်ကို ချုပ်ငြိမ်းပြီး ခေတ်အဆက်ဆက် တိုင်းရင်းသားပြည်သူလူထုတရပ်လုံးက လိုလားတောင့်တခဲ့တဲ့ ဒီမိုကရေစီရေး၊ တန်းတူရေးနဲ့ ကိုယ်ပိုင်ပြဋ္ဌာန်းခွင့် အခွင့်အရေးတွေကို အပြည့်အဝအာမခံချက်ရှိတဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးအတွက် သန္နဋ္ဌာန်ချထားတဲ့ အစိုးရဖြစ်တယ်လို့ သဝဏ်လွှာမှာ ဖော်ပြပါတယ်။

ဒီကနေ့မှာတော့ NUG အစိုးရအနေနဲ့ ကရင်တမျိုးသားလုံးနဲ့ထပ်တူ ကရင်အာဇာနည်အပေါင်းကို အောက်မေအမှတ်ရနေပြီး ကရင်တော်လှန်ရေးအင်အားစုတွေနဲ့ လက်တွဲဆောင်ရွက်ကာ ကရင်လူမျိုးတွေနဲ့ တိုင်းရင်းသား ပြည်သူလူထုအားလုံး လိုလားတဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးအတွက် ကြိုးပမ်းဆောင်ရွက်သွားမယ်လို့ဆိုပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေကြား တိုက်ပွဲတွေလည်း ပြင်းထန်နေတာပါ။

ဒါ့အပြင် ပြည်သူ့ခုခံတွန်းလှန်စစ် ၁ နှစ်တာ ကာလအတွင်း စစ်ကောင်စီတပ်သား ၁၅,၀၀၀ နီးပါး သေဆုံးခဲ့ပြီး ထိခိုက်ဒဏ်ရာရသူ အယောက် ၄,၈၀၀ ကျော် ရှိခဲ့တယ်လို့ NUG အစိုးရ ကာကွယ်ရေးဝန်ကြီးဌာနက ဆိုပါတယ်။

ဒါဟာ ပြီးခဲ့တဲ့ ၂၀၂၁ ခုနှစ်၊ ဇွန် ၁ ရက်ကနေ အခုနှစ် မေ ၁၇ ရက်အထိ စုဆောင်းရရှိထားတဲ့ အချက်အလက်တွေအရ ဖော်ပြထားတာဖြစ်ပြီး မြန်မာပြည်အနှံ့ တိုက်ပွဲတွေမှာ တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ စစ်ကောင်စီဘက်ကတော့ သတင်းထုတ်ပြန်တာ မရှိပါဘူး။

ဒါ့အပြင် စစ်ကောင်စီရဲ့ အဆိုးဆုံး အကြမ်းဖက်ခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည်အထက်ပိုင်း လမ်းပိုင်းတွေရဲ့ ၉၀ ရာခိုင်နှုန်းကို PDF တွေက ထိန်းချုပ်ထားနိုင်ပြီလို့ NUG အစိုးရက ဇွန် ၂၁ ရက်နေ့ သတင်းစာရှင်းလင်းပွဲမှာ ပြောထားပြီး လက်ရှိ မြေပြင်မှာ အကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။

4 hours Ago

မီးရထားဝန်ထမ်းတဦးနေအိမ်မှ ကျပ်သိန်း ၁၃၀ ကျော်နှင့် ရွှေ ၆ ကျပ်သား ဓားပြတိုက်ခံရ

မင်္ဂလာတောင်ညွန့်မြို့နယ် စက်ဆန်းရပ်ကွက်၊ စက်ဆန်းမီးရထားဝင်းအတွင်းက ဝန်ထမ်းတဦး နေအိမ်မှာ သြဂုတ် ၁၁ ရက် ညနေ ၅ နာရီက ဓားပြတိုက်ခံရပြီး ငွေကျပ်သိန်း ၁၃၀ ကျော်နဲ့ ရွှေတွေပါသွားတယ်လို့ ရပ်ကွက်နေသူတွေက ပြောပါတယ်။

မနေ့ ညနေ ၅ နာရီလောက်က မီးရထားဝင်း လိုင်းအမှတ် ၈၀၊ အခန်း A နေ တံတားဘောင် အလုပ်ရုံမှ အလုပ်ကြပ် ဦးစိုးဝင်း နေအိမ်ကို အမျိုးသား ခြောက်ဦး ကားတစီးနဲ့  ရောက်လာပြီး ဓားပြတိုက်ခဲ့တယ်လို့ ရပ်ကွက်နေသူတဦးက ပြောပါတယ်။

"ကားနဲ့ဓားပြ လာတိုက်တာ၊ ပစ်တာခတ်တာ မရှိတော့ ရပ်ကွက်ထဲက လူတွေလည်း မသိဘူး။ အိမ်ကို လာလည်တဲ့ ဧည့်သည်ပဲထင်ကြတာ၊ နောက်မှ ဓားပြတိုက်ခံရမှန်း သိတာ။"

ဦးစိုးဝင်းဟာ ညီမဖြစ်သူနဲ့အတူ လိုင်းခန်းမှာ ရှိနေချိန် ဓားပြ တိုက်ခံရတာဖြစ်ပြီး ထိုးကြိတ် ရိုက်နှက်ခံရမှုကြောင့် ဦးစိုးဝင်း နဲ့ ညီမဖြစ်သူတို့ ထိခိုက်ဒဏ်ရာတွေ ရရှိခဲ့တယ်လို့ အုပ်ချုပ်ရေးနဲ့ နီးစပ်သူတဦးက ပြောပါတယ်။

"ပရိုဘောက်အဖြူရောင်နဲ့ လူခြောက်ယောက်ရောက်လာပြီး တယောက်က ညီမဖြစ်သူကို ဓားနဲ့ထောက်ထားတယ်။ ကျန်တဲ့သူ ငါးယောက်က ဦးစိုးဝင်းပါးစပ်ကို တိတ်နဲ့ကပ်ပြီး ဝိုင်းပြီး ထိုးကြိတ်ပြီး အိပ်ခန်းထဲက ငွေသိန်း ၁၃၀ ကျော်နဲ့ရွှေခြောက်ကျပ်သားကို ယူသွားတယ်။"

ဓားပြတိုက်မှုဖြစ်ပြီးနောက် စစ်ကောင်စီတပ်နဲ့ ရဲတွေဟာ စက်ဆန်းမီးရထားဝင်းမှာ ပိတ်ဆို့ ရှာဖွေခဲ့ပေမဲ့ ဖမ်းဆီးရမိခြင်း မရှိဘူးလို့ ရပ်ကွက်နေသူတွေက ပြောပါတယ်။

လတ်တလောမှာ ဓားပြတိုက်မှုနဲ့ ပတ်သက်လို့ မင်္ဂလာတောင်ညွန့်မြို့နယ် ရဲစခန်းမှာ အမှုဖွင့်လှစ်ထားတယ်လို့ ဆိုပါတယ်။

4 hours Ago

မောင်တောမြောက်ပိုင်းတွင် ဆုတ်ခွာသွားသည့် နယ်ခြားစောင့်စခန်း ၇ ခုအထိရှိ​ဟု အေအေ ပြော

ရခိုင်ပြည်နယ်၊ မောင်တောမြို့နယ်မြောက်ပိုင်းမှာ စစ်ကောင်စီလက်အောက်ခံ နယ်ခြားစောင့်စခန်းငယ် ၇ ခု ဆုတ်ခွာသွားတယ်လို့  ရက္ခိုင့်တပ်တော် (အေအေ) ပြောခွင့်ရ ဦးခိုင်သုခက သြဂုတ် ၁၁ ရက်မှာ ပြုလုပ်တဲ့ သတင်းစာရှင်းလင်းပွဲမှာ ပြောပါတယ်။

နောက်ဆုတ်သွားတဲ့ စခန်းတွေထဲမှာ နန်းရာကိုင်း၊ နွားရုံတောင်၊ ကြက်ရိုးပြင် စတဲ့ကျေးရွာတွေက စခန်းတွေအပြင် နယ်ခြားမှတ်တိုင်အမှတ် ၄၀ နယ်ခြားစောင့်စခန်းနဲ့ တခြား နယ်ခြားစောင့်စခန်းငယ်တွေပါ ပါဝင်တယ်လို့ သိရပါတယ်။

အေအေပြောခွင့်ရသူ ခိုင်သုခက “မောင်တောမြောက်ပိုင်းမှာ တိုက်ပွဲ တောက်လျှောက်ဖြစ်နေတယ်။ မြန်မာစစ်တပ်ဘက်က ဆုတ်ပေးလိုက်ရတဲ့ စခန်းငယ် ၇ ခုအထိ ရှိတယ်။ သိမ်းပိုက်တာတော့ မဟုတ်ဘူး။”လို့ပြောပါတယ်။

နယ်ခြားမှတ်တိုင်အမှတ် ၄၀ နယ်ခြားစောင့်စခန်းကို သြဂုတ် ၂ ရက် မနက် ၉ နာရီက အေအေဘက်က ဝင်ရောက်တိုက်ခိုက်ခဲ့သလို ညနေပိုင်းမှာ နယ်ခြားမှတ်တိုင်အမှတ် ၄၂ နဲ့ ၄၃ ကြား စခန်းတွေကိုပါ တိုက်ခိုက်ခဲ့ပြီး နန်ရာကိုင်း ကျေးရွာရှိ နယ်ခြားစောင့်စခန်းကိုတော့ သြဂုတ် ၅ ရက် ညပိုင်းမှာ အေအေဘက်က မီးရှို့ခဲ့ကြကြောင်း ဒေသခံတွေထံက သိရပါတယ်။

ရခိုင်ပြည်နယ်အတွင်းမှာ စစ်ကောင်စီအနေနဲ့ မတရားမှုတွေကို ဆက်တိုက်ကျူးလွန်နေပြီး ဆက်လက်လုပ်ဆောင်မယ်ဆိုပါက ရခိုင်ပြည်နယ်အတွင်း စစ်ကောင်စီတပ်နဲ့ ရက္ခိုင်တပ်တော် တို့အကြား တကျော့ပြန် တိုက်ပွဲတွေဖြစ်လာ နိုင်တယ်လို့ ဦးခိုင်သုခက ပြောကြားပါတယ်။

“စစ်ကောင်စီက ရခိုင်ပြည်နယ်အတွင်းမှာ ကုန်စည်စီးဆင်းမှုတွေ နှောင့်နှေးအောင်လုပ်တာတွေ၊ အပြစ်မဲ့ပြည်သူတွေကို မတရားဖမ်းဆီးတာတွေကို ရည်ရွယ်ချက်ရှိရှိနဲ့ လုပ်ဆောင်နေတယ်။ လက်နက်အားကိုးနဲ့ ပြည်သူကိုအနိုင်ကျင့်၊ ဖိအားပေးနေတာတွေ တွေ့ရတယ်။ လူမဆန်တဲ့ လုပ်ရပ်တွေ ဆက်တိုက်လုပ်ကိုင်နေတာတွေကို တွေရတယ်။ စစ်ကောင်စီ အနေနဲ့ ဒီလိုမတရားမှုတွေကို ဆက်လုပ်နေမယ်ဆိုရင် တကျော့ပြန်တိုက်ခိုက်မှုတွေ ပြန်ဖြစ်လာနိုင်တယ်။”

ရခိုင်ပြည်နယ် တောင်ပိုင်းမြို့နယ်တွေဖြစ်တဲ့ သံတွဲ၊ တောင်ကုတ်၊ ကျောက်ဖြူမြို့နယ်နဲ့ မာန်အောင်မြို့နယ်တွေမှာ စစ်ကောင်စီက ဇူလိုင်လကတည်းက အေအေနဲ့ ဆက်နွှယ်သူတွေကို လိုက်လံဖမ်းဆီးနေတာ မာန်အောင်မြို့နယ်မှာ အများဆုံးဖြစ်တယ်လို့ သိရပါတယ်။

ရခိုင်ပြည်နယ် မောင်တောမြို့နယ်နဲ့ ချင်းပြည်နယ် ပလက်ဝမြို့နယ်တွေမှာ စစ်ကောင်စီနဲ့ ရက္ခိုင်တပ်တော်တို့အကြား နေ့တိုင်းဆိုသလို့ ထိတွေ့တိုက်ပွဲဖြစ်ပွားနေတယ်လို့လည်း အေအေက ပါတယ်။

ရခိုင်ပြည်နယ်မှာ စစ်ကောင်စီနဲ့ ရက္ခိုင်တပ်တော်(အေအေ) အကြားစစ်ရေးတင်းမာနေချိန်မှာ စစ်ကောင်စီတပ်ဖွဲ့ဝင်တွေကို အေအေက ဖမ်းဆီးတာရှိနေသလို စစ်ကောင်စီကလည်း အရပ်သားတွေကိုဖမ်းဆီးကာ တရားစွဲဆိုနေတာတွေရှိနေပါတယ်။

မောင်တောမြို့နယ်မြောက်ပိုင်းမှာ အေအေအခြေစိုက် လက်ပံတောင်ကြောကို စစ်ကောင်စီတပ်တွေ ထိုးစစ်ဆင်လာနေလို့ တိုက်ပွဲငယ်တွေ ရက်ဆက်ဖြစ်ပွားနေတာလို့ ဒေသခံ သတင်းရင်းမြစ်တွေဆီကသိရပါတယ်။

ဓါတ်ပုံ=မောင်တောမြို့နယ်မြောက်ပိုင်း မှာ နောက်ဆုတ်သွားသည့် နန်းနာကိုင်းနယ်ခြားစောင့်စခန်းအားတွေ့ရစဥ်

6 hours Ago

ဗန်းမော်ခရိုင်ရှိ ဌာနဆိုင်ရာဝန်ထမ်းများ လုံခြုံရေးသတိရှိရန် စစ်ကောင်စီက လျှို့ဝှက်စာထုတ်ပြန်

ကချင်ပြည်နယ်၊ ဗန်းမော်ခရိုင်အတွင်း ဗန်းမော်၊ မံစီ၊ မိုးမောက်၊ ရွှေကူ မြို့နယ် ၄ မြို့နယ်ရှိ စစ်ကောင်စီလက်အောက်ခံ တပ်ရင်းတပ်ဖွဲ့တွေ၊ ဌာနဆိုင်ရာ ဝန်ထမ်းတွေ လုံခြုံရေးအထူးသတိပြု သွားလာလှုပ်ရှားနေထိုင်ကြဖို့ သြဂုတ် ၄ ရက် နေ့စွဲနဲ့ ထုတ်ပြန်တဲ့ လျှို့ဝှက်စာတစောင် ပေါက်ကြားလာတယ်လို့ ထွေအုပ်ဝန်ထမ်းတွေထံက သိရပါတယ်။

CRPH၊ NUG နဲ့ ပတ်သက်ဆက်သွယ်နေတဲ့ အဖွဲ့အစည်းတွေက အစိုးရဌာနဆိုင်ရာ အဆောက်အဦ၊ ပြည်သူပိုင်အဆောက်အဦတွေ၊ လမ်းတံတားတွေ၊ ဘုရားကျောင်းကန်တွေ မီးရှို့ဖျက်ဆီးတာ၊ ဗုံးခွဲတိုက်ခိုက်တာအပြင် နိုင်ငံ့ဝန်ထမ်းတွေကို ပစ်မှတ်ထား တိုက်ခိုက်လာလို့ ဗန်းမော်ခရိုင်အတွင်းရှိ တပ်ရင်း၊ တပ်ဖွဲ့ဝင်တွေ ဌာနဆိုင်ရာဝန်ထမ်းတွေ လုံခြုံရေးအသိ၊ လုံခြုံရေးသတိရှိကြဖို့ စစ်ကောင်စီရဲ့ ဗန်းမော်ခရိုင် ဒုညွှန်ကြားရေးမှူး သိန်းစိုး လက်မှတ်နဲ့ လျှို့ဝှက်စာ ထွက်ပေါ်နေတာဖြစ်ပါတယ်။

ဒါနဲ့ပတ်သက်ပြီး ဒေသခံ နိုင်ငံရေးသုံးသပ်သူတဦးက “စစ်ကောင်စီနဲ့ အပေါင်းပါတွေဟာ သူတို့ကိုယ်တိုင် အကြမ်းဖက်မှုတွေ ကျူးလွန်နေပြီး ပြည်သူက မခံရပ်နိုင်လွန်းလို့ တော်လှန်နေကြတာကို ပြည်သူကို ပြန်စော်ကားနေကြတယ်။ ပြည်သူတွေကို ဒုက္ခတွေ အကုန်ပေးထားပြီး တော်လှန်ရေးအားလျော့အောင် လုပ်နေတာ။ ပြည်သူရဲ့စိတ်ထဲကို အမုန်းတရားနဲ့ မကျေနပ်မှုတွေ၊ တန်ပြန်မှုတွေကို သူတို့ပဲ ဖြစ်အောင်လုပ်ခဲ့ကြတာ။ သူတို့ကို ကမ္ဘာမကြေပါဘူး။ ကျနော်တို့ပြည်သူအများစုကတော့ CRPH နဲ့ NUG၊ PDF တပ်ဖွဲ့တွေနဲ့ အကြမ်းဖက်စစ်ကောင်စီကို လက်နက်ကိုင် တော်လှန်နေကြတဲ့ အင်အားစုတွေနဲ့ တိုင်းရင်းသား လက်နက်ကိုင် တပ်မတော်တွေကို ယုံကြည်လေးစားပါတယ်”လို့ ပြောပါတယ်။

ဗန်းမော်ခရိုင်အတွင်းရှိ ရွှေကူမြို့နယ်နဲ့ ကသာလမ်းတလျှောက်မှာ တိုက်ပွဲတွေ မကြာခဏ ဖြစ်ပွားနေပြီး သြဂုတ် ၁၀ ရက်ကလည်း  ဗန်းမော်ရှိ ခရိုင်စုပေါင်းရုံးနဲ့ နေရာတချို့မှာ မိုင်းကွဲမှု ၄ ကြိမ်ထက်မနည်း ဖြစ်ခဲ့ပါတယ်။

အဆိုပါ ပေါက်ကွဲမှုတွေကြောင့်  စစ်ကောင်စီလက်အောက်ခံ ဌာနဆိုင်ရာ ဝန်ထမ်းတချို့ ထိခိုက်ဒဏ်ရာရရှိခဲ့ပြီး ဝန်ထမ်းတွေရဲ့ ဆိုင်ကယ်အစီး ၃၀ ကျော် မီးလောင်ပျက်စီးခဲ့ပါတယ်။

6 hours Ago

စစ်ကိုင်းတွင် စစ်ကောင်စီတပ်၏ လောင်စာဆီတင်ကားများ မိုင်းဆွဲတိုက်ခိုက်ခံရ

စစ်ကိုင်းတိုင်းအတွင်းမှာ စစ်ကောင်စီတပ်ရဲ့ လောင်စာဆီတင်ဆောင်လာတဲ့ ဆီဘောက်ဆာကားတွေကို မိုင်းဆွဲတိုက်ခိုက်ခဲ့တယ်လို့ ဒေသခံ ပြည်သူ့ကာကွယ်ရေးတပ်တွေက ထုတ်ပြန်ကြေညာပါတယ်။

ဩဂုတ် ၁၀ ရက် ညနေ ၄ နာရီက စစ်ကိုင်း စစ်ကောင်စီတပ်မ ၃၃ ကနေ  ရွှေဘိုဘက်ကို  ထွက်ခွာလာတဲ့ ဆီဘောက်ဆာကား ၄ စီး၊ ခြောက်ဘီးကားတစီးနဲ့ ၁၂ ဘီးကားတစီး ပါဝင်တဲ့ စစ်ကောင်စီယာဉ်တန်းကို ဒေသခံ ပြည်သူ့ကာကွယ်ရေး ပူးပေါင်းတပ်တွေက ဝက်လက်မြို့နယ်၊ စိုင်နိုင်ဂွေ့တောင်ဘက်ကစပြီး မိုင်းဆွဲတိုက်ခိုက်ခဲ့တာလို့ Shwe Bo Defense Force (SBDF) က ထုတ်ပြန်ထားပါတယ်။

အဆိုပါ မိုင်းခွဲတိုက်ခိုက်မှုကို မဟာမိတ်တပ်ဖွဲ့ ၅ ဖွဲ့မှ တဖွဲ့ပြီးတဖွဲ့ မိုင်းပဒေသာ အလုံး ၁၀၀ လောက် အသုံးပြု တိုက်ခိုက်ခဲ့တယ်လို့ သိရပါတယ်။

ဖောက်ခွဲတိုက်ခိုက်မှုအပြီးမှာ စစ်ကောင်စီတပ် အင်အား ၁၀၀ လောက်က ကရိန်းကားတစီးနဲ့ ရောက်ရှိလာပြီး ထိခိုက်ပျက်စီးမှုတွေ၊ သေဆုံးမှုတွေနဲ့ မိုင်းတွေကို ရှင်းလင်းခဲ့ကြတယ်လို့ သိရပါတယ်။

မန္တလေး-ရွှေဘို-မြစ်ကြီးနား စတဲ့လမ်းမကြီးတွေပေါ်မှာ SBDF မိုင်းအဖွဲ့တွေနဲ့ မဟာမိတ်အဖွဲ့တွေ လှုပ်ရှားနေပြီး ပြည်သူတွေအနေနဲ့ ည ၇ နာရီကနေ မနက် ၅ နာရီအတွင်း သွားလာတာတွေ မပြုကြဖို့၊ ကားတွေကို မှန်ချမောင်းကြဖို့၊ စစ်ကားတွေနဲ့ ဝေးဝေးနေကြဖို့ Shwe Bo Defense Force (SBDF) က အထူးမေတ္တာရပ် ခံပန်ကြားထားပါတယ်။

အဆိုပါတိုက်ခိုက်မှုကို ရွှေဘိုခရိုင်တပ်ရင်း ၂၃၊ တပ်ခွဲ ၁ နဲ့ မဟာမိတ်တွေဖြစ်ကြတဲ့ Ghost Rider Special Task Force ပြောက်ကျားတပ်ဖွဲ့၊ သိဒ္ဓိရှင် တိုက်နယ် (ပကဖ) ပြည်သူ့ကာကွယ်ရေးတပ်ဖွဲ့၊ ဒေါင်းပြည်သူ့ကာကွယ်ရေး ပြောက်ကျားတပ်ဖွဲ့၊ Shwe Bo Defence Force (SBDF) ပြောက်ကျားတပ်ဖွဲ့တို့မှ ပူးပေါင်းတိုက်ခိုက်ခဲ့တာ ဖြစ်ပါတယ်။

အလားတူ စစ်ကိုင်းမှ မုံရွာဘက်ကိုလာတဲ့ ရဲအရာရှိကြီးတယောက်ရဲ့ ကိုယ်ပိုင်ကားနဲ့ လေယာဥ်ဆီတွေ တင်ဆောင်လာတဲ့ ထောက်ပို့ကားတွေကို ပြည်သူ့ကာကွယ်ရေးတပ်ဖွဲ့က ဩဂုတ် ၁၀ ရက်က တိုက်ခိုက်ခဲ့တယ်လို့ သိရပါတယ်။

ဩဂုတ် ၁၀ ရက် ညနေ ၄ နာရီမှာ မြင်းမူမြို့နယ် ကန်ဖျားဇရပ်နဲ့ ထီးဆောင်းကြားမှာ ရဲတပ်ဖွဲ့မှ ရာထူးကြီးသူတယောက် လိုက်ပါလာတဲ့ ကားတစီးကို မိုင်း ၅ လုံးနဲ့ ဖောက်ခွဲတိုက်ခိုက်ခဲ့တယ်လို့ Moe Nyo Revolution Force ကနေ သိရပါတယ်။

ဩဂုတ် ၁၀ ရက် ညနေ ၅ နာရီ ၁၅ မိနစ်မှာ မြင်းမူမြို့နယ် ကန်ဖျားဇရပ်နဲ့ ထီးဆောင်းကြားမှာ လေယာဥ်ဆီတွေ တင်လာတဲ့ ထောက်ပို့ကား ၂ စီးကို မိုင်း ၁၀ လုံးနဲ့ တိုက်ခိုက်ခဲ့တာလို့ ဆိုပါတယ်။

အဆိုပါစစ်ဆင်ရေးကို Moe Nyo Revolution Force M.N.R.F၊ PENTAGRAM ငါးထောင့်ကြယ်၊ People’s Guerillas Commando – Myinmu နဲ့ PEOPLE REVOLUTION FORCE P.R.F ညီနောင်လေးဖွဲ့ ပူးပေါင်းဆောင်ရွက်ခဲ့တာဖြစ်ပါတယ်။

6 hours Ago

စစ်ကိုင်းတိုင်းအတွင်း စစ်ကောင်စီတပ်များကို PDF ပူးပေါင်းတပ်ဖွဲ့များက အရှိန်မြှင့်တိုက်ခိုက်နေ

စစ်ကိုင်းတိုင်း၊ ဗန်းမောက်မြို့နယ်၊ ပေကုန်းကျေးရွာအနီးရှိ ဇရပ်တစ်ခုမှာ တပ်စွဲထားတဲ့ စစ်ကောင်စီတပ်သားတွေကို ဩဂုတ် ၁၁ ရက် နေ့လည် ၃ နာရီ လောက်က ကချင်လွတ်မြောက်ရေးတပ်မတော်  KIA နဲ့ PDF ပူးပေါင်းအဖွဲ့က သွားရောက်တိုက်ခိုက်ခဲ့တယ်လို့ Banmauk Revolution-BR အဖွဲ့ကထုတ်ပါတယ်။

ဗန်းမောက်မြို့ရဲ့ အနောက်တောင်ဘက် ပေကုန်းရွာအနီးရှိ ဇရပ်မှာ စစ်ကောင်စီတပ်သားအင်အား ၈၀ လောက် တပ်စွဲထားရာမှာ  KIA နဲ့ PDF ပူးပေါင်းတပ်ဖွဲ့က သွားရောက်တိုက်ခိုက်ခဲ့လို့ ၁ နာရီလောက်ကြာအောင် တိုက်ပွဲ ဖြစ်ပွားခဲ့တယ်လို့ BR အဖွဲ့ တာဝန်ရှိတစ်ဦးက‌ပြောပါတယ် ။

"သူတို့က အမြဲတမ်း ကျနော်တို့ရှိတဲ့ဘက်ကိုလည်း မလာနိုင်ဘူး။ နောက်ကိုလည်းပြန်မဆုတ်နိုင်ဘူး။ သူတို့တောနင်းတဲ့ပုံစံမျိုးနဲ့ ပေကုန်းရွာအနီးက ဇရပ်မှာ အထိုင်ချတဲ့အချိန်သွားတိုက်ပြီးတိုက်ပွဲဖြစ်ပွားခဲ့တာပါ"လို့ BR အဖွဲ့ တာဝန်ရှိသူတစ်ဦးက ဆိုပါတယ် ။

အဆိုပါ ထိတွေတိုက်ပွဲမှာ စစ်ကောင်စီတပ်သား သေဆုံးနိုင်တယ်လို့ BR အဖွဲ့က ခန့်မှန်းပေမဲ့  ထိခိုက်ဒဏ်ရာသူ အရေအတွက်အတိအကျအကိုတော့ မသိရပါဘူး။

စစ်ကိုင်း-ရွှေဘို လမ်းမကြီးပေါ်ရှိ ရွာသာကြီးနဲ့ လှတောအကြားမှာတော့ ဩဂုတ် ၁၀ ရက် ညနေ ၅ နာရီကျော်လောက်က ပျူစောထီးတွေနဲ့ စစ်ကောင်စီတပ်ဖွဲ့ဝင်တွေ လိုက်ပါလာတဲ့ကားတွေကို ပြည်သူ့ကာကွယ်ရေးတပ်တွေက မိုင်းခွဲတိုက်ခိုက်ခဲ့တာကြောင့် စစ်ကောင်စီတပ်သားတွေ သေဆုံးတာရှိတယ်လို့ ဆားတောင် မိုးကြိုး ပြည်သူ့ကာကွယ်ရေးတပ်ဖွဲ့ကနေ သိရပါတယ်။

စစ်ကောင်စီတပ်ဖွဲ့ဝင်တွေနဲ့ ပျူစောထီးတွေ စုစုပေါင်း အင်အား ၂၀၀ လောက် လိုက်ပါလာတဲ့ ၁၂ ဘီးကားတစီးနဲ့ ဒိုင်နာကား ၃ စီးကို မိုင်းခွဲတိုက်ခိုက်ခံရတာလို့ ဆားတောင် မိုးကြိုး ပြည်သူ့ကာကွယ်ရေးတပ်ဖွဲ့ကသတင်းပြန်ကြားရေးတာဝန်ခံကပြောပါတယ်။

“လေးစီးမှာ နှစ်စီးပဲ ခွဲလိုက်နိုင်တယ်။ အစကတော့ ၁၂ ဘီးတစီးပဲ သတင်းရတာ။ ဒီဘက်ရောက်တော့ တွေ့တဲ့ ဒိုင်နာသုံးစီးပေါ် ပြောင်းစီးပြီး လိုက်ခဲ့ကြတာ။ အားလုံး လေးစီးဖြစ်သွားတယ်။ သတင်းရလို့ မိုင်းနဲ့တိုက်ခိုက်ခဲ့တာပါ။”

အဆိုပါတိုက်ခိုက်မှုကြောင့် ၁၂ ဘီးကားတစီးနဲ့ ဒိုင်နာကားတစီး မိုင်းထိမှန်ခဲ့ပြီး ၁၂ ဘီးကား ပက်လက်လန်သွားကာ စစ်ကောင်စီနဲ့ ပျူစောထီးအဖွဲ့ဝင်တွေ သေဆုံးခဲ့တာ ဖြစ်တယ်လို့ ဆိုပါတယ်။

အဆိုပါမိုင်းဆွဲတိုက်ခိုက်မှုကို ဆားတောင် မိုးကြိုး ပြည်သူ့ကာကွယ်ရေးတပ်ဖွဲ့နဲ့ တွေ့မရှောင် ပူးပေါင်းမဟာမိတ်တပ်ဖွဲ့တို့ ပူးပေါင်းတိုက်ခိုက်ခဲ့တာဖြစ်ပါတယ်။

စစ်ကိုင်းတိုင်း၊ ချောင်းဦးမြို့ ပြည်သူ့အားကစားကွင်းနဲ့ ဆည်မြောင်းရုံးတို့မှာ တပ်စွဲထားတဲ့ စစ်ကောင်စီတပ်တွေကတော့ ဩဂုတ် ၁၀ ရက်က မိုင်းရှာထွက်လာရာ ပြည်သူ့ကာကွယ်ရေးတပ်က မိုင်းခွဲတိုက်ခိုက်ခဲ့တာကြောင့် ၁၄ ဦးထက်မနည်း သေဆုံးပြီး အများအပြား ထိခိုက်ဒဏ်ရာရရှိခဲ့တယ်လို့ ချောင်းဦးမြို့နယ် ပြည်သူ့ကာကွယ်ရေးတပ်ဖွဲ့ (CHUPDF) က ထုတ်ပြန်ထားပါတယ်။

အောင်ချမ်းသာကျေးရွာနဲ့ ခင်မွန်ကျေးရွာကြားမှာ CHUPDF တပ်ခွဲ ၁ နဲ့ CDF တို့မှ မိုင်းခွဲတိုက်ခိုက်ခဲ့ပြီး အဆိုပါနေရာမှာ သွေးကွက်တွေ တွေ့ရှိကာ ထိခိုက်တဲ့ အရေအတွက်ကိုတော့ မသိရှိရသေးဘူးလို့ ဆိုပါတယ်။

အဆိုပါ စစ်ကောင်စီမိုင်းရှာအဖွဲ့ဟာ JAMMER ကားတစီးနဲ့ အင်အား ၃၀ ခန့်၊ ခြေလျင်အင်အား ၁၅ ဦးခန့်၊ စုစုပေါင်း အင်အား ၄၅ ဦးခန့်ရှိတယ်လို့ သိရပါတယ်။

အဆိုပါစစ်ကြောင်းကို ခင်မွန်ကျေးရွာမှ မုံရွာမြို့ဘက် အထွက်လမ်း‌မှာ CHUPDF တပ်ခွဲ ၄ (မိုင်းတပ်ခွဲ) မှ ထပ်မံမိုင်းခွဲတိုက်ခိုက်ခဲ့တယ်လို့ ချောင်းဦးမြို့နယ် ပြည်သူ့ကာကွယ်ရေးတပ်ဖွဲ့ (CHUPDF) က သတင်းထုတ်ပြန်ထားပါတယ်။

စစ်ကိုင်းတိုင်း၊ ပုလဲမြို့နယ်ရှိ စစ်ကောင်စီထောက်ခံသူတွေနဲ့ ပျူစောထီးတွေ နေထိုင်တဲ့  အင်မထီးကျေးရွာမှာလည်း ဩဂုတ် ၁၀ ရက်‌ မနက် ၆ နာရီနဲ့ ညနေ ၅ နာရီလောက်က လက်နက်ကြီး၊ လက်နက်ငယ်တွေနဲ့ ပစ်ခတ်တာတွေ ရှိခဲ့တယ်လို့ ဒေသခံတွေရဲ့ ပြောပြချက်အရ သိရပါတယ်။

အင်မထီးရွာနဲ့အနီးဆုံး ကျေးရွာတရွာက ဒေသခံတဦးက “မနေ့က မနက်ပိုင်းကတကြိမ်၊ ညနေပိုင်းကတကြိမ် စုစုပေါင်းနှစ်ကြိမ် ပြည်သူ့ကာကွယ်ရေးအဖွဲ့တွေက ပစ်ခတ်ကြတယ်။ ဘာကြောင့်ပစ်တယ်ဆိုတာတော့ မသိဘူး။ အပြန်အလှန် ပစ်တာတော့ သိတယ်။ ဒီခေတ်ကြီးလည်း မြန်မြန်ပြီးစေချင်လှပါပြီဗျာ။ တောင်သူလုပ်ငန်းလည်း ကောင်းကောင်းမလုပ်ရ၊ စစ်ကောင်စီလာရင်လည်း ပြေးရ၊ ပျူစောထီး အနိုင်ကျင့်တာလည်း ခံနေရတယ်” လို့ ပြောပါတယ်။

ပုလဲမြို့နယ်အတွင်း စစ်ကောင်စီတပ်က လတ်တလော စစ်ကြောင်းထိုးတာတွေ ရပ်တန့်နေသလို ဒေသခံပြည်သူတချို့ကတော့ နေရပ်စွန့်ခွာကာ ဖားကန့်၊ ဟောင်ပါး စတဲ့ ရွှေမျော၊ ကျောက်တွင်းတွေဆီ သွားရောက်နေထိုင်တာတွေလည်း ရှိနေတယ်လို့ ဒေသခံတွေက ပြောပါတယ်။

ကျားသစ်နက် ပြောက်ကျားတပ်ဖွဲ့ တာဝန်ရှိသူ ကိုဥက္ကာက “ဘာကြောင့် အခုလိုတိုက်ရတာလဲဆိုတော့ အင်မထီးပျူတွေက လက်နက်အားကိုး၊ စစ်ကောင်စီအားကိုးတွေနဲ့ အနီးပတ်ဝန်းကျင်က ကျေးရွာကို ဆက်ကြေးကောက်တာတွေ လုပ်တယ်။ မပေးနိုင်တဲ့ရွာကို မီးရှို့တာတွေ အကြိမ်ကြိမ်လုပ်လို့ အခုလို ပစ်ခတ်တာတွေ လုပ်ဆောင်ရတာပါ။ ပစ်တာကတော့ ပထမ ကျနော်တို့က စပစ်တယ်။ နောက်တော့ အပြန်အလှန် သူတို့ကလည်း ပြန်ပစ်တာတွေ ရှိခဲ့တယ်။ အကျအဆုံးကတော့ ကျနော်တို့ဘက်ကတော့ မရှိခဲ့ဘူး။ ပျူတွေဘက်ကတော့ အကျအဆုံး ရှိနိုင်တယ်။ အတိအကျတော့ မပြောနိုင်ဘူး” လို့ ပြောပါတယ်။

အဆိုပါတိုက်ပွဲကို ပုလဲမြို့နယ် ပြည်သူ့ကာကွယ်ရေးတပ်ရင်းပေါင်းစုံ၊ local တော်လှန်ရေးအဖွဲ့စုံနဲ့ ကျားသစ်နက် ပြောက်ကျားတပ်ဖွဲ့တို့ ပူးပေါင်းတိုက်ခိုက်ခဲ့တာဖြစ်ပါတယ်။

အဆိုပါ တိုက်ပွဲတွေနဲ့ ပတ်သက်ပြီး စစ်ကောင်စီဘက်က သတင်းထုတ်ပြန်တာ မရှိသလို အသေအပျောက် ဒဏ်ရာတဲ့ အရေအတွက်ကိုလည်း သီးခြား အတည်ပြုနိုင်ခြင်းမရှိပါဘူး။ 

6 hours Ago

၆ လတာတိုက်ပွဲများအတွင်း စစ်ကောင်စီတပ်ဖွဲ့ဝင် ၉၀၀ ကျော်သေဆုံးဟု ချင်းကာကွယ်ရေးတပ်ဖွဲ့များ ထုတ်ပြန်

ချင်းပြည်နယ်ထဲမှာ ၂၀၂၂ ခုနှစ် ဖေဖော်ဝါရီလမှ ဇူလိုင်လကုန်အထိ ၆ လတာအတွင်းတိုက်ပွဲ ပေါင်း ၂၂၀ ဖြစ်ပွားခဲ့ကာ စစ်ကောင်စီဘက်ကတပ်သား ၉၂၇ ဦးသေဆုံးခဲ့ပြီး ဒေသခံချင်းကာကွယ်ရေးတပ်ဖွဲ့ဝင်တွေဘက်က ၅၃ ဦးကျဆုံးခဲ့တယ်လို့ Cinland Join Defense Committee (CJDC)က  သြဂုတ်လ ၁၁ ရက်မှာ ထုတ်ပြန်ပါတယ်။

ဟားခါးမြို့နယ်မှာ တိုက်ပွဲ ၄၅ ကြိမ်၊ ဖလမ်းမြို့နယ်မှာ ၄၄ကြိမ်၊ မင်းတပ်မြို့နယ်မှာ ၃၅ ကြိမ်၊ ကန်ပက်လက်မြို့နယ်မှာ ၂၄ကြိမ်၊ မတူပီမြို့နယ်မှာ ၁၈ကြိမ်၊ တီးတိန်မြို့နယ်မှာ ၁၃ကြိမ်၊ ထန်တလန်မြို့နယ်မှာ ၉ ကြိမ်၊ ပလက်၀မြို့နယ်မှာ ၇ ကြိမ်၊ တွန်းဇန်မြို့နယ်မှာ ၂ ကြိမ်နဲ့ CDF-KKG လှုပ်ရှားတဲ့ တခြားနယ်မြေမှာ ၂၃ ကြိမ်တိုက်ပွဲဖြစ်ပွားခဲ့တာလို့ ထုတ်ပြန်ချက်မှာဖော်ပြထားပါတယ်။

ကလေးမြို့နယ်နဲ့ ဂန့်ဂေါ်မြို့နယ်မှာ အဓိကလှုပ်ရှားနေတဲ့ CDF-KKG တပ်ဖွဲ့ဟာချင်းပြည်နယ်အတွင်း စစ်ရေးလှုပ်ရှားမှုမပြုပေမဲ့  CJCD အဖွဲ့၀င်ဖြစ်လို့ အဆိုပါ စာရင်းမှာထည့်သွင်းဖော်ပြထားတာလို့ ဆိုပါတယ်။

ထန်တလန်မြို့နယ်မှာတော့ တိုက်ပွဲ ၉ ကြိမ်ဖြစ်ပွားခဲ့တယ်လို့ ဖော်ပြထားပြီး ထန်တလန်မြို့တွင်း အသေးစားစစ်ရေးလှုပ်ရှားမှုတွေကိုတော့  ထည့်သွင်းထားတာမရှိပါဘူး။

အဆိုပါတိုက်ပွဲတွေမှာ နှစ်ဖက်တပ်ဖွဲ့တွေ ထိခိုက်သေဆုံးဒဏ်ရာရတဲ့ အခြေအနေနဲ့ ပတ်သက်ပြီး သီးခြားအတည်ပြုနိုင်ခြင်းမရှိသေးလို့ စစ်ကောင်စီပြန်ကြားရေးကလည်း  သူတို့တပ်တွေ ထိခိုက်သေဆုံးမှု အခြေအနေကို သတင်းထုတ်ပြန်ခြင်းမရှိပါဘူး။ 

6 hours Ago

ယင်းမာပင် ကျေးရွာအချို့ကို စစ်ကောင်စီတပ်က လေကြောင်းမှ အကြမ်းဖက်တိုက်ခိုက်

စစ်ကိုင်းတိုင်း၊ ယင်းမာပင်မြို့နယ်အတွင်းက ကျေးရွာတချို့ကို  သြဂုတ် ၁၁ ရက် နေ့လယ် ၃ နာရီလောက်မှာ  စစ်ကောင်စီတပ်က ရဟတ်ယာဉ်အသုံးပြုပြီး အကြမ်းဖက် ပစ်ခတ်တိုက်ခိုက်ခဲ့တယ်လို့ ဒေသခံတွေက ပြောပါတယ်။

စစ်ကောင်စီတပ်ဖွဲ့တွေဟာ လေယာဥ် (ရဟတ်ယာဥ်) ၃ စီး အသုံးပြုပြီး ရင်ပေါင်တိုင်ကျေးရွာ အပါအဝင် အေးကုန်းရွာ၊ ပန်းမထုံးရွာ၊ ပုထိုးသားရွာ၊ ဆင်စွယ်ရွာ စတဲ့ ကျေးရွာတွေတဝိုက်ကို ပစ်ခတ်နေတာဖြစ်ပါတယ်။

ဒေသခံတဦးက “ရင်ပေါင်တိုင်စျေးအတွင်းကို လေယာဥ်ဗုံးသီး ၄ လုံး ကျရောက်ပေါက်ကွဲခဲ့သလို အေးကုန်းရွာဘက်မှာလည်း မီးခိုးလုံးတွေ မြင်နေရပြီး အိမ်တွေ မီးလာင်နေတာထင်ရတယ်။ လေယာဥ်နဲ့ပစ်ခတ်မှုကြောင့် ပြည်သူ အသေအပျောက်လည်း ရှိနိုင်တယ်။ ပိတ်မိနေတဲ့ ပြည်သူတွေလည်း ရှိနိုင်ပြီး လောလောဆယ်မှာတော့ ဒေသခံအားလုံးဟာ အသက်လု ထွက်ပြေးနေကြရတယ်” လို့ ပြောပါတယ်။

စစ်ကောင်စီတပ်က ဝေဟင်ကနေ ပစ်ကူပေးပြီးတိုက်ခိုက်ခဲ့သလို  စစ်ကောင်စီတပ်သားတွေကိုလည်း မြေပြင်ကို ချပေးနေတာတွေ လုပ်ဆောင်ခဲ့ပါတယ်။ 

အဲဒီလို စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် ကျေးရွာ ၁၀ ရွာလောက်က ဒေသခံတွေ ထွက်ပြေးနေကြရပြီး အဲဒီဒေသတဝိုက်မှာ ဖုန်းလိုင်းတွေပါ ပြတ်တောက်သွားပြီလို့ ဒေသခံတွေက ပြောပါတယ်။

6 hours Ago

ရေးမြို့တွင် ဆရာဝန်ဇနီးမောင်နှံနေအိမ်ကို လက်နက်ကိုင်များဝင်ရောက်ပြီး ငွေကျပ် သိန်း ၅၀ ယူသွား

မွန်ပြည်နယ်၊ ရေးမြို့နယ်က ကလေးအထူးကုဆရာဝန်နဲ့ သားဖွားမီးယပ်အထူးကု ဆရာဝန် ဇနီးမောင်နှံနေအိမ်ကို အမည်မသိ သေနတ်သမားတွေက ဝင်ရောက်ရှာဖွေခဲ့ပြီး ငွေကြေးတွေ ယူသွားတယ်လို့ ဒေသခံတွေက ပြောပါတယ်။

အခုလိုမဖြစ်ပွားခင် ဩဂုတ် ၃ ရက်က ရေးမြို့နယ် လဝကရုံးမှာ ရေးဘီလူးအဖွဲ့ ဝင်ရောက် တိုက်ခိုက်ခဲ့အပြီး အဲဒီညမှာပဲ ကလေးအထူးကုဆရာဝန်ကို စစ်ကောင်စီတပ်ဖွဲ့တွေက လာရောက်ခေါ်သွားခဲ့ပါတယ်။

စစ်ကောင်စီတပ်က ကလေးအထူးကုဆရာဝန်ကို စစ်ကြောရေးခေါ်သွားပြီး ၂ ရက်အကြာမှာပဲ ပြန်လည်လွှတ်ပေးခဲ့ပြီး ရက်ပိုင်းအတွင်းမှာပဲ အဲဒီဆရာဝန်မိသားစု နေအိမ်ကို အမည်မသိ လက်နက်ကိုင်အဖွဲ့တွေက ဝင်ရောက်စစ်ဆေးဖို့ဆိုပြီး အိမ်တံခါးတွေကို အတင်းဖျက် ရောက်လာခဲ့တာလို့ အနီးဝန်းကျင်မှာ နေထိုင်သူတွေက ပြောပါတယ်။

အမည်မသိ သေနတ်သမားတွေက အိမ်တံခါးကို ညပိုင်းဝင်ဖျက်နေတဲ့အချိန် အိမ်ရှင်ဆရာဝန် မိသားစုက ရဲစခန်းနဲ့ စစ်ကောင်စီတပ်ဖွဲ့တွေဆီ ဖုန်းဆက်ခဲ့ပေမဲ့ ဘယ်သူမှ ရောက်မလာဘဲ အဲဒီ လက်နက်ကိုင်ထားတဲ့သူတွေက ငွေကျပ် သိန်း ၅၀ လောက် ယူသွားတယ်လို့ နီးစပ်သူတွေက ဆိုပါတယ်။

အဲဒီလို လက်နက်ကိုင်ပြီး ငွေကြေးယူသွားတဲ့အဖွဲ့က စစ်ကောင်စီဘက်ကလူတွေ ဖြစ်ပေမဲ့ ဆရာဝန်မိသားစုက ခြိမ်းခြောက်ခံထားရပြီး လုံခြုံရေးအခြေအနေအရ ဘေးပတ်ဝန်းကျင်ကို ထုတ်မပြောပြတာ ဖြစ်တယ်လို့ ဆရာဝန်မိသားစုနဲ့ နီးစပ်သူတွေက ပြောပါတယ်။

အဲဒီဖြစ်စဉ်တွေ ဖြစ်ပွားပြီးတဲ့နောက် ဆရာဝန်မိသားစုက စိုးရိမ်ပြီး နေအိမ်ကနေ ထွက်ခွာသွားလို့ ရေးမြို့နယ်ထဲက ကလေးတွေအတွက် ကျန်းမာရေးပြသဖို့ အခက်အခဲ ဖြစ်နေကြတယ်လို့ ကလေးမိဘတွေက ပြောပါတယ်။

ရေးမြို့နယ်ထဲမှာ စစ်ကောင်စီက လုံခြုံရေးတင်းကျပ်ထားပြီး ညမထွက်ရအမိန့် ထုတ်ပြန်ထားပေမဲ့ ညပိုင်း အခုလို အမည်မသိ လက်နက်ကိုင်တွေက နေအိမ်ထဲကနေ ပိုက်ဆံယူသွားတဲ့အပေါ် ဒေသခံတွေအကြား ဝေဖန်မှုတွေ မြင့်တက်နေပါတယ်။

6 hours Ago

တောင်ကြီးဆေးတက္ကသိုလ် ကျောင်းသားများသမဂ္ဂက နိုင်ငံရေးသင်တန်းဖွင့်မည်

ရှမ်းပြည်နယ်တောင်ပိုင်း၊ တောင်ကြီးမြို့အခြေစိုက် တောင်ကြီးဆေးတက္ကသိုလ် ကျောင်းသားများသမဂ္ဂက အခြေခံနိုင်ငံရေးအသိပညာမြှင့်တင်ခြင်း ရက်တိုသင်တန်း ဖွင့်လှစ်မယ်လို့ ဩဂုတ် ၁၀ ရက်က  ကြေညာပါတယ်။

နွေဦးတော်လှန်ရေးကာလအတွင်း ကျောင်းသားထုရဲ့ နိုင်ငံရေးရေချိန် မြှင့်တင်ပေးနိုင်ရေးအတွက် အခြေခံ နိုင်ငံရေးသင်တန်းတွေကို ပို့ချပေးဖို့ စီစဥ်ခဲ့တာဖြစ်တယ်လို့ တောင်ကြီးဆေးတက္ကသိုလ် ကျောင်းသားများသမဂ္ဂကက ပြောပြပါတယ်။

ဒီသင်တန်းမှာ အကြမ်းမဖက် လူထုလှုပ်ရှားမှု အယူအဆများ၊ Why secularism matters? နဲ့ အခြေခံလူ့အခွင့်အရေး နည်းနာတွေကို ခေါင်းစဉ်သုံးခုနဲ့ ဆရာ ၃ ယောက်က Zoom ကတဆင့် အွန်လိုင်းက သင်ကြားဆွေးနွေးမှာ ဖြစ်ပါတယ်။

သင်တန်းတွေဟာ ဩဂုတ် ၂၀ ရက်ကနေ စက်တင်ဘာ ၄ ရက်နေ့အထိ Course တခုကို ၁ ပတ်နှုန်းနဲ့ ၃ ပတ်တာဖြစ်ပြီး Course တခုစီအတွက် ၁ ရက်ကို ၂ နာရီနှုန်းနဲ့ ၂ ရက်စီ ကြာမြင့်မှာ ဖြစ်ပါတယ်။

သင်တန်းအဆိုပြု လျှောက်လွှာ‌တွေကို အွန်လိုင်းကတဆင့် လက်ခံနေတာဖြစ်ပြီး လာမယ့် ဩဂုတ် ၁၈ ရက်နေ့အထိ လက်ခံမှာဖြစ်တယ်လို့ သိရပါတယ်။

တောင်ကြီးဆေးတက္ကသိုလ်ဟာ စစ်အာဏာရှင်ဆန့်ကျင်ရေး အကြမ်းမဖက် အာဏာဖီဆန်တဲ့ CDM လှုပ်ရှားမှုမှာ အားကောင်းကောင်းနဲ့ ပါဝင်နေတဲ့ ကျောင်းတကျောင်း ဖြစ်ပါတယ်။

7 hours Ago

မြိုင်မြို့နယ် ပေါက်ပင်ကိုင်းရွာကို စစ်ကောင်စီတပ်က မီးရှို့ဖျက်ဆီး

မကွေးတိုင်း၊ မြိုင်မြို့နယ်၊ ပေါက်ပင်ကိုင်းကျေးရွာကို  စစ်ကောင်စီတပ်တွေက သြဂုတ် ၁၁ ရက် မနက်အစောပိုင်းမှာ ဝင်ရောက်မီးရှို့ဖျက်ဆီးခဲ့လို့ နေအိမ် ၄၃ လုံး မီးလောင်ဆုံးရှုံးသွားတယ်လို့ ဒေသခံတွေဆီက သိရပါတယ်။

စစ်ကောင်စီတပ်တွေနဲ့ ပျူစောထီးတွေဟာ သြဂုတ် ၁၁ ရက် မနက် ၁ နာရီလောက်မှာ စစ်ကြောင်းထိုးလာပြီး မနက် ၆ နာရီကနေ ၁၀ နာရီလောက်အထိ ပြည်သူတွေရဲ့ နေအိမ်တွေကို အကြမ်းဖက် မီးရှို့ဖျက်ဆီးခဲ့တာလို့  ပေါက်ပင်ကိုင်းရွာ ဒေသခံတစ်ယောက်က ပြောပါတယ်။

“မီးရှို့တဲ့အထဲမှာ ပေါက်ပင်ကိုင်းမှာ အိမ်ထောင်ကျတဲ့ ဦးရဲနိုင်ဆိုတဲ့ပျူလည်းပါပြီး သူ့သားမက် ပျူလည်းပါတယ်။ အဲဒီလိုမီးရှို့ဖျက်ဆီးပြီးတော့ ပေါက်ပင်ကိုင်းရွာက ရပ်မိရပ်ဖတစ်ယောက်ကို တယ်လီဖုန်းနဲ့ ဆက်သွယ်ပြီး မင်းတို့ဘာတတ်နိုင်သေးလဲလို့ ပြောကြားခဲ့ပြီး ဖုန်းချသွားတယ်။ စစ်(...)၊ပျူ(...)တွေဝင်လာတော့ ပြည်သူတွေဟာ ဘေးလွတ်ရာကို ထွက်ပြေးလာရပြီး ဆောနယ်က ဘင်းဂံဘက်က PPDF စခန်းကို  မီးရှို့နေတဲ့အချိန်မှာပဲ ဒေသခံတွေက အကုန်ရှောင်လိုက်ကြတော့တာ။”

မီးရှို့ခံထားရတဲ့ အလောင်းတလောင်းကတော့ ဘင်းဂံက PPDF ကိုမောင်ဝမ်းရဲ့ အလောင်းလို့ သိရပြီး ပြည်သူ ၅ ယောက်ကိုလည်း စစ်တပ်က ဖမ်းဆီးရိုက်နှက်ပြီး စစ်ကြောင်းပြန်ဆုတ်တဲ့ အချိန်မှပြန်လွှတ်ပေးခဲ့တယ်လို့ ဒေသခံက ပြောပါတယ်။

စစ်ဘေးရှောင်ပြည်တွေကို မြိုင်မြို့နယ် တောင်ပိုင်းဇုန် PDFက ကာကွယ်ရေးအတွက် အသုံးပြုနေတဲ့ကားတွေ၊ ထော်လာဂျီတွေ ၊ သုံးဘီးတွေ ၊ နွားလှည်းတွေနဲ့ ကယ်ထုတ်ပေးခဲ့ပြီး နေထိုင်စားသောက်ရေးနဲ့ ကျန်းမာရေးအတွက်လည်း ဆေးဝါးကုသမှုတွေ  စီစဥ်ပေးထားတယ်လို့ ဆိုပါတယ်။

စစ်ဘေးရှောင်ပြည်သူတွေအတွက် မဟာမိတ်တပ်ပေါင်းစုတွေနဲ့ ပူးပေါင်းပြီးနေထိုင်စား သောက်ရေးတွေ ကူညီပေးနိုင်ပေမဲ့ လတ်လော နေအိမ်တွေမီးရှိုခံရတဲ့ မီးဘေးသင့်ပြည်သူတွေကိုတော့ ပ.က.ဖ အနေနဲ့ ကူညီမပေးနိုင်သေးဘူးလို့ မြိုင်မြိုနယ် တောင်ပိုင်းဇုန် ပ.က.ဖ တာဝန်ခံကပြောပါတယ်။

မီးဘေးသင့်စစ်ဘေးရှောင်ပြည်သူတွေအတွက် အမိုးအကာ၊ အဝတ်အထည်၊ စားနပ်ရိက္ခာ၊၊ ဆေးဝါး နဲ့ ကျန်းမာရေးစောင့်ရှောက်မှုတွေ အရေးအပေါ် အကူအညီလိုအပ်နေလို့ မိဘပြည်သူတွေအနေနဲ့ ပြည်သူ့ကာကွယ်ရေးတပ်ဖွဲ့တွေကနေတဆင့် လှူဒါန်းပေးကြဖို့ မေတ္တာရပ်ခံ တောင်းဆိုထားပါတယ်။

7 hours Ago

မြန်မာတွင် တရက်တည်း ကိုဗစ်-၁၉ ကူးစက်မှုအသစ် ၂၀ ကျော်၊ သေဆုံးသူအသစ် ၁ ဦးရှိလာ

မြန်မာနိုင်ငံမှာ တရက်တည်း ကိုဗစ်-၁၉ အတည်ပြုလူနာသစ် ၂၁ ယောက် ထပ်မံပြီးတော့ စစ်ဆေးတွေ့ရှိခဲ့ရတယ်လို့ အကြမ်းဖက်စစ်ကောင်စီလက်အောက်ခံ ကျန်းမာရေးဝန်ကြီးဌာနက ဩဂုတ် ၁၁ ရက်ညပိုင်းမှာ ထုတ်ပြန်ပါတယ်။

ပြီးခဲ့တဲ့ ၂၄ နာရီအတွင်း ဓာတ်ခွဲနမူနာစုစုပေါင်း ၆,၀၇၀ ခုကို စစ်ဆေးခဲ့ချိန်မှာ ခုလိုတွေ့ရှိရတာဖြစ်ပြီး ရောဂါပိုးတွေ့ရှိမှု ရာခိုင်နှုန်းမှာ ၀ ဒသမ ၃၅ ရာခိုင်နှုန်း ရှိနေခဲ့တာ ဖြစ်ပါတယ်။

ဒါ့အပြင် လပေါင်းများစွာ ကိုဗစ်-၁၉ ရောဂါကူးစက်ခံရပြီး ထပ်မံသေဆုံးသူ မရှိခဲ့ရာကနေ မနေ့ကတော့ ပထမဆုံး ၁ ယောက်ထပ်မံသေဆုံးခဲ့တာမို့ စုစုပေါင်း သေဆုံးသူ အရေအတွက်ကတော့ ၁၉,၄၃၅ ယောက် ရှိနေတယ်လို့ ထုတ်ပြန်ချက်မှာ ဖော်ပြပါတယ်။

နိုင်ငံတဝန်းမှာတော့ ကိုဗစ်-၁၉ ရောဂါကူးစက်ခံရသူ အရေအတွက်ဟာ ၆၁၄,၂၉၇ ယောက် ရှိလာခဲ့ပြီဖြစ်ကာ ရောဂါပြန်လည်ပျောက်ကင်းသက်သာလာသူပေါင်း ၅၉၃,၀၅၅ ယောက် ရှိခဲ့ပြီလို့ ဆိုပါတယ်။

ဒါပေမဲ့ ဒီစစ်ဆေးထုတ်ပြန်ချက်တွေဟာ အာဏာဖီဆန်ရေးလှုပ်ရှားမှု (CDM) မှာ ပါဝင်နေကြတဲ့ ဆေးရုံတွေ၊ ဓာတ်ခွဲစမ်းသပ်ခန်းတွေ မပါဝင်ဘဲ စစ်အုပ်စုလက်အောက်ခံ တပ်မတော်ဆေးရုံတွေ အများစုမှာ စမ်းသပ်စစ်ဆေးခဲ့တာမို့ ရောဂါကူးစက်မှု၊ သေဆုံးမှုတွေနဲ့ ပတ်သက်ပြီးတော့ တိကျတဲ့ ပမာဏအတိုင်းအဆကို မသိနိုင်ပါဘူး။

အမျိုးသားညီညွတ်ရေးအစိုးရ (NUG) ကျန်းမာရေးဝန်ကြီးဌာနကတော့   ကိုဗစ်-၁၉ အသစ်ဖြစ်ပွားမှုဟာ ပြီးခဲ့တဲ့ ရက်သတ္တပတ်အတွင်း တကမ္ဘာလုံးအတိုင်းအတာအရ မြင့်တက်လာတယ်လို့ ကမ္ဘာ့ကျန်းမာရေး အဖွဲ့ရဲ့ ထုတ်ပြန်ချက်ကို ကိုးကားသတင်းထုတ်ထားပါတယ်။

ဒါ့ကြောင့် ပြည်သူလူထုအနေနဲ့ ကိုဗစ်-၁၉ ရောဂါ ကာကွယ်ဆေးထိုးနှံခြင်းအပြင် မဖြစ်မနေ လိုက်နာကြရမယ့် ရောဂါကာကွယ်ရေးနည်းလမ်းတွေကို ဆက်လက်လိုက်နာဆောင်ရွက်ကြဖို့ အထူးအရေးကြီး တယ်လို့ NUG အစိုးရက တိုက်တွန်းထားပါတယ်။

စစ်ကောင်စီဩဇာခံ ကျန်းမာရေးဝန်ကြီးဌာနကတော့ ကိုဗစ်-၁၉ နေ့စဉ်ကူးစက်မှုနဲ့ သေဆုံးမှုအရေအတွက်တွေကို နေ့စဉ်ထုတ်ပြန်နေတာကို တွေ့ရပြီး ခုရက်ပိုင်းမှာတော့ နေ့စဉ်ကူးစက်မှုနှုန်း ၁ ရာခိုင်နှုန်း လောက်တောင် မရှိတော့ဘဲ သေဆုံးမှု လုံးဝမရှိတဲ့ နေ့တွေလည်း ရှိလာနေတယ်လို့ ဆိုပါတယ်။

ဒါ့အပြင် မြန်မာနိုင်ငံမှာ ကိုဗစ်-၁၉ ရောဂါ ဓာတ်ခွဲအတည်ပြုလူနာသစ် တွေ့ရှိမှုနဲ့ သေဆုံးမှုနှုန်းတွေ ကျဆင်းလာတာကြောင့် မတ် ၁၆ ရက်က စတင်ကာ လူ ၄၀၀ ထိ စုဝေးခွင့်ပြုတယ်လို့ စစ်ကောင်စီ ကျန်းမာရေးဝန်ကြီးဌာနက ထုတ်ပြန်ထားပါတယ်။

မြန်မာနိုင်ငံမှာတော့ စစ်အာဏာသိမ်း ၁ နှစ်ခွဲကျော်ကာလအတွင်း တိုင်းပြည်မှာ နိုင်ငံရေး မတည်ငြိမ်မှုတွေနဲ့အတူ စီးပွားရေး၊ လူမှုရေး၊ ပြည်သူ့ကျန်းမာရေး စောင့်ရှောက်မှုတွေမှာ အဘက်ဘက်က ကျဆင်းနေ ပါတယ်။

အမျိုးသားညီညွတ်ရေးအစိုးရ (NUG) က ထုတ်ပြန်တဲ့ ကိုဗစ်-၁၉ ရောဂါဖြစ်ပွားမှုဆိုင်ရာ စစ်တမ်းမှာ တွေ့ရှိရတဲ့ အထောက်အထားတွေအရ ဆေးရုံမှာ စောင့်ရှောက်ကုသဖို့ လိုအပ်တဲ့ လူနာတွေ ဆေးရုံမတက် ရောက်နိုင်တာ၊ အွန်လိုင်းကသာ ကုသမှုခံယူနေကြရတာ၊ အကြမ်းဖက်စစ်ကောင်စီက အမှန်တကယ် သေဆုံးနှုန်းကို မဖော်ပြနိုင်တာ စတဲ့အချက်တွေဟာ ထင်ရှားနေတာမို့ စစ်ကောင်စီဟာ ကိုဗစ်-၁၉ ကာကွယ်၊ ထိန်းချုပ်၊ ကုသမှု လုပ်ငန်းတွေမှာ မှားယွင်းညံ့ဖျင်းစွာ စီမံနေတယ်လို့ သုံးသပ်ထားပါတယ်။

ကိုဗစ်-၁၉ ကာကွယ်ဆေး ထိုးနှံပြီးစီးမှုအနေနဲ့ လက်ရှိအချိန်ထိ အသက် ၁၈ နှစ်အထက် လူဦးရေသန်း ၃၀ ကျော် ထိုးနှံပြီးဖြစ်တယ်လို့ စစ်ကောင်စီ ကျန်းမာရေးဝန်ကြီးဌာနက ထုတ်ပြန်ထားပါတယ်။

7 hours Ago

စစ်ကောင်စီတပ်၏ အကြမ်းဖက်ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူပေါင်း ၂၁၉၀ ခန့်ရှိလာ

မြန်မာနိုင်ငံမှာ အာဏာသိမ်း ၁ နှစ်ခွဲကျော်အကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၂,၁၈၅ ယောက်နဲ့ ဖမ်းဆီးထိန်းသိမ်းခံရသူပေါင်း ၁၅,၀၉၁ ယောက်ထိရှိပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၂ ခုနှစ်၊ ဩဂုတ် ၁၁ ရက်အထိ အေအေပီပီက ကောက်ယူမှတ်တမ်း ပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြပါ တယ်။

နွေဦးတော်လှန်ရေးကာလအတွင်း ဒီနေ့အထိ ၁၁,၉၉၄ ယောက် လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၁,၃၈၀ ယောက်ကတော့ ထောင်ဒဏ် ချမှတ်ခံထားရပါတယ်။

တော်လှန်ရေးနဲ့ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူအရေတွက်ကတော့ ၈၁ ယောက်ရှိနေပြီး မျက်ကွယ် သေဒဏ်ချမှတ်ခံထားရသူ ၄၂ ယောက်အပါအဝင် ၁၂၁ ယောက်ကတော့ မျက်ကွယ် ပြစ်ဒဏ်ချမှတ်ခံထားရတာကြောင့် သေဒဏ်ချမှတ်ခံထားရသူ စုစုပေါင်း ၁၂၃ ယောက် ရှိလာခဲ့ပြီဖြစ်ပါတယ်။

လတ်တလောအချိန်ထိ အာမခံနဲ့ လွတ်မြောက်သူ ၂၂ ယောက်ရှိပြီး ပြန်လည်လွတ်မြောက်လာသူဦးရေကတော့ ၃,၀၇၅ ယောက် ရှိခဲ့တယ်လို့ ဆိုပါတယ်။ ဒါ့အပြင် အေအေပီပီကနေ လက်လှမ်းမီသမျှ မှတ် တမ်းပြုစုထားချက်အရ အာဏာသိမ်းချိန်ကနေ ပြီးခဲ့တဲ့ ဇူလိုင်လကုန်ထိ အကြမ်းဖက်စစ်အုပ်စုက မတရား ချိပ်ပိတ်သိမ်းဆည်းခဲ့တဲ့ နေအိမ်၊ အဆောက်အဦး အရေအတွက် စုစုပေါင်း ၇၀၉ ခုထက်မနည်းရှိခဲ့တယ် လို့ ဆိုပါတယ်။

ဩဂုတ် ၁၀ ရက်မနက် ၁၀ နာရီလောက်က ချင်းပြည်နယ်၊ ဟားခါးမြို့နယ်၊ နှီယာလောန်‌ကျေးရွာအတွင်းက နေအိမ် တစ်လုံးပေါ်ကို အကြမ်းဖက်စစ်အုပ်စုတပ်ကနေ ရမ်းသန်းပစ်ခတ်ခဲ့တဲ့ လက်နက်ကြီးကျည် ကျ ရောက်ပေါက်ကွဲခဲ့တာကြောင့် မီးဖိုချောင်မှာ ထမင်းချက်နေတဲ့ Pi Chia Hnem ဟာ နေရာတင် သေဆုံးသွားခဲ့တယ်လို့ သိရပါတယ်။

ဒါ့အပြင် ရန်ကုန်မြို့မှ ဆယ်တန်းကျောင်းသူ မဆုလာဘ်သော်တာဟာ Kaung For You Education မှာ အွန်လိုင်းကတဆင့် စာသင်ကြားနေချိန် နေအိမ်မှာ ဇူလိုင် ၁၃ ရက်က ဖမ်းဆီးခံခဲ့ရတယ်လို့ ဆိုပါတယ်။ အဲ ဒီနောက် အကြမ်းဖက်စစ်အုပ်စုမှ မဆုလာဘ်သော်တာကို ရာဇသတ်ကြီးပုဒ်မ ၅၀၅-က နဲ့ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေ ပုဒ်မ ၁၉(က) တို့နဲ့ တရားစွဲဆိုထားတယ်လို့ သိရ ပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေး ကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီး အချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။

7 hours Ago
More News
Up