သုံးသပ်ချက်

November 19, 2022

ကမ္ဘာ့ဖလားအုပ်စုများ လေ့လာသုံးသပ်ချက် (အုပ်စု- E)

ကမ္ဘာ့ဖလားပြိုင်ပွဲတိုင်းမှာ မရဏအုပ်စုဆိုတာ ပါလာစမြဲဖြစ်ပြီး အခုနှစ်ပြိုင်ပွဲမှာတော့ အုပ်စု E ကို သတ်မှတ်ရမလိုပါပဲ။ ဥရောပတိုက်ရဲ့ နာမည်ကြီးနှစ်သင်းဖြစ်တဲ့ စပိန်နဲ့ ဂျာမနီတို့ တအုပ်စုတည်း တွေ့ဆုံခဲ့ပြီး အာရှတိုက်က ဖျက်မြင်းအသင်းလို့ဆိုရမယ့် ဂျပန်၊ မထင်မှတ်တာတွေ လုပ်ပြတက်တဲ့ ကွန်ကာကပ်ဖ်ဇုန်က ကော်စတာရီကာတို့ တွေ့ဆုံနေတာဖြစ်တယ်။

စပိန်

Opta ရဲ့ လေ့လာချက်အရ စပိန်ဟာ ဒီနှစ်ကမ္ဘာ့ဖလားမှာ အုပ်စုပထမရဖို့ ၅၀ ဒသမ ၅ ရာခိုင်နှုန်း သတ်မှတ်ခံထားရပြီး ပြိုင်ဘက် ဂျာမနီထက် ၁၀ ရာခိုင်နှုန်းကျော် ပိုများတယ်။ ၂၀၁၈ ပြိုင်ပွဲတိုင်းကထက် တည်ငြိမ်တဲ့နည်းပြနဲ့ လူစာရင်းကြောင့်လည်း စပိန်အတွက် အုပ်စုအဆင့်တော့ ကျော်လွန်နိုင်မယ်လို့ သုံးသပ်ကြတယ်။ စပိန်ဟာ ၂၀၁၈ ကမ္ဘာ့ဖလားမတိုင်ခင် အချိန်နီးကပ်မှ နည်းပြ လိုပက်တီဂူကို ထုတ်ပယ်ခဲ့ပြီး ၁၆ သင်းအဆင့်နဲ့သာ ကျေနပ်ခဲ့ရတယ်။ ဒီနှစ်ပြိုင်ပွဲအတွက် နည်းပြ အင်းနရစ်ဟာ ပတ်ဒရီ၊ ဂါဘီ၊ ပီနို၊ ဖာတီ၊ ဝီလျံတို့လို လူငယ်ကစားသမားတွေနဲ့အတူ ဘူးစကွက်စ်၊ မိုရာတာ၊ အယ်လ်ဘာ၊ ကာဗာဟယ်၊ အက်ဇ်ပီလီကွယ်တာတို့လို ဝါရင့်တွေနဲ့ ပေါင်းစပ်ရွေးချယ်ခဲ့တယ်။ ခြေစစ်ပွဲတွေမှာ တိုက်စစ်ပိုင်းက ဖယ်ရန်တောရက်စ် ၄ ဂိုးသွင်းယူနိုင်ခဲ့တာက အများဆုံးဖြစ်ပြီး မိုရာတာ၊ ဆာရာဘီယာတို့လို တိုက်စစ်ကစားသမားတွေက ဂိုးရဖို့ ရုန်းကန်ခဲ့ရတယ်။ ယူရို ၂၀၂၀ မှာ ဆီမီးဖိုင်နယ်၊ ပြီးခဲ့တဲ့ နေးရှင်းလိဂ်မှာ ဗိုလ်လုပွဲအထိ တက်ရောက်ခဲ့တာမို့ လူငယ်တွေများနေတယ် ဆိုပေမဲ့ စပိန်ရဲ့ခြေစွမ်းက အထိုက်အလျောက် အောင်မြင်မှုရဖို့ ရှိနေပါတယ်။

ဂျာမနီ

ဂျာမနီဟာလည်း ပြီးခဲ့တဲ့ ၂၀၁၈ ကမ္ဘာ့ဖလားမှာ အုပ်စုအဆင့်ကနေ အရှက်တကွဲ ရှုံးနိမ့်ခဲ့ရပြီး အသင်းကို ပြုပြင်ပြောင်းလဲမှုတွေ ပြုလုပ်ခဲ့ရတယ်။ ၂၀၀၂ ကစပြီး ၂၀၁၄ အထိ ၄ ကြိမ်ဆက်တိုက် ဆီမီးဖိုင်နယ်အထိ တက်ရောက်နိုင်ခဲ့တဲ့ ဂျာမန်တွေဟာ ၂၀၁၈ မှာ မက္ကဆီကိုနဲ့ တောင်ကိုရီးယားတို့ကိုရှုံးပြီး အုပ်စုကနေ ထွက်ခဲ့ရတာဖြစ်တယ်။ အခုနှစ်ပြိုင်ပွဲကို ဘိုင်ယန်မြူးနစ်နည်းပြဟောင်း ဟန်ဆီဖလစ်က ဦးဆောင်မှာဖြစ်ပြီး ခြေစစ်ပွဲတလျှောက် ရလဒ်တွေအရတော့ ခြေစစ်ပွဲ ၁၀ ပွဲမှာ ၉ ပွဲအထိ နိုင်ပွဲရခဲ့တယ်။ နေးရှင်းလိဂ်မှာတော့ ၆ ပွဲမှာ တပွဲသာ အနိုင်ရခဲ့တယ်။ တိုက်စစ်ပိုင်းမှာ တီမိုဗာနာ မပါနိုင်တော့လို့ မူလာနဲ့ တောင်ပံတိုက်စစ်ကစားသမားတွေကိုပဲ အားကိုးရနိုင်တယ်။ အစဉ်အလာအရ ကမ္ဘာ့လားမှာ အောင်မြင်မှုအများဆုံး ရရှိထားတဲ့ ဥရောပအသင်းပီပီ ဒီနှစ်မှာတော့ ဂျာမနီကို စောင့်ကြည့်သွားရဖို့ရှိတယ်။

ဂျပန်

ကမ္ဘာ့ဖလားပြိုင်ပွဲ ၆ ကြိမ်ကစားခွင့်ရရှိရာမှာ ၃ ကြိမ်သာ ၁၆ သင်းအဆင့်အထိ တက်ရောက်ခဲ့တဲ့ ဆာမူရိုင်းတို့အတွက် ဒီနှစ်ပြိုင်ပွဲက အခက်ခဲဆုံး ဖြစ်သွားနိုင်တယ်။ နောက်တဆင့်တက်ဖို့အတွက် စပိန်နဲ့ ဂျာမနီ တသင်းသင်းကို အနိုင်ရဖို့လိုအပ်ပြီး ကော်စတာရီကာဟာလည်း ထင်သလောက် မလွယ်ကူတဲ့ ပြိုင်ဘက်ကောင်း ဖြစ်နေတယ်။ နောက်ဆုံး ၁၃ ပွဲမှာတော့ ဘရာဇီးနဲ့ တူနီးရှားတို့ကိုပဲ ရှုံးနိမ့်ခဲ့တာမို့ ဥရောပအခြေစိုက် ကစားသမားကောင်းတွေရှိတဲ့ ဂျပန်ဟာ ဖျက်မြင်းအဆင့်မှာတော့ ရှိနေတယ်။ ၂၀၁၈ ကမ္ဘာ့ဖလား အဖွင့်တုန်းက ကိုလံဘီယာကို အနိုင်ရပြီး ဆီနီဂေါနဲ့ သရေကစားကာ နောက်တဆင့်တက်ခဲ့ဖူးတဲ့ ဆာမူရိုင်းတွေအတွက် ဒီနှစ်ပြိုင်ပွဲမှာ အံ့အားသင့်စရာ စွမ်းဆောင်ရည် ပြသနိုင်မှပဲ နောက်တဆင့်တက်ဖို့ မျှော်လင့်နိုင်မှာဖြစ်တယ်။

ကော်စတာရီကာ

ကော်စတာရီကာဟာ ကွန်ကာကပ်ဖ်ဇုန်ကနေ တိုက်ရိုက် ခြေစစ်ပွဲအောင်မြင်ခဲ့တာ မဟုတ်ပေမဲ့ ပလေးအော့ဖ်အဆင့်မှာ နယူးဇီလန်ကို တဂိုး ဂိုးမရှိနဲ့ အနိုင်ရပြီး ကာတာမြေဆီ အရောက်လှမ်းနိုင်ခဲ့တာဖြစ်တယ်။ ကမ္ဘာ့ဖလားပြိုင်ပွဲကို ပထမဆုံးအကြိမ် ၃ ကြိမ်ဆက်တိုက် ယှဉ်ပြိုင်ခွင့်ရခဲ့တာဖြစ်ပြီး ၂၀၁၈ ခုနှစ်တုန်းက အုပ်စုကနေ ထွက်ခဲ့ရပေမဲ့ ၂၀၁၄ ကမ္ဘာ့ဖလားမှာ နာမည်ကြီးအသင်းတွေကို ကျော်ဖြတ်ပြီး ကွာတားဖိုင်နယ်အထိ ရောက်နိုင်ခဲ့ဖူးတယ်။ လက်ရှိအချိန်မှာတော့ အဲဒီပြိုင်ပွဲတွေကလောက် ကစားသမားအင်အား တောင့်တင်းမှု မရှိတော့လို့ စပိန်၊ ဂျာမနီနဲ့ ဂျပန်တို့ကို ယှဉ်ကစားနိုင်ဖို့ ခက်ခဲနိုင်ပါတယ်။ မရဏအုပ်စုထဲမှာ ကျရောက်ခဲ့တာက ကံဆိုးမှုဖြစ်ပြီး ဒီနှစ်မှာလည်း ‌ကော်စတာရီကာ အတွက် ၁၆ သင်းအဆင့်ကို တကျော့ပြန်တက်ရောက်ဖို့ အလှမ်းဝေးနေဦးမယ်လို့ ထင်ပါတယ်။

ဝဏ္ဏကို

1 week Ago

November 18, 2022

ကမ္ဘာ့ဖလားပြိုင်ပွဲအုပ်စုများ လေ့လာသုံးသပ်ချက် - အုပ်စု (A)

ကမ္ဘာ့ဖလားပြိုင်ပွဲကလာမယ့် တနင်္ဂနွေဆိုရင်စတင်ပါပြီ။ အရှေ့အလယ်ပိုင်းက အာရပ်နိုင်ငံ ကာတာမှာ သမိုင်းတလျှောက်ပထမဆုံးအကြိမ် လက်ခံကျင်းပမယ့်ပွဲ ဖြစ်တယ်။ အိမ်ရှင်ကာတာရဲ့ လူ့အခွင့်အရေးချိုးဖောက်မှုတွေကြောင့် အငြင်းပွားဖွယ်ရာကိစ္စတွေ သောသောညံခဲ့ပေမဲ့ ဒီလိုအငြင်းပွား ဖွယ်ရာကိစ္စတွေနဲ့ပဲ ပြိုင်ပွဲစတင်မယ့်အချိန် ဆိုက်ရောက်လို့လာခဲ့တယ်။

ကာတာကမ္ဘာ့ဖလားမှာ ဥရောပနိုင်ငံတွေရဲ့ တနည်းတဖုံကန့်ကွက်ဆန္ဒပြမှုတွေလည်း ရှိလာမှာဖြစ်ပေမယ့် ပြိုင်ပွဲနဲ့ ပတ်သက် လာရင်တော့ ကမ္ဘာ့ဖလားဆိုတဲ့အစဉ်အလာနဲ့အညီ အနိုင်မခံအရှုံးမပေးတိုက်ပွဲဝင်သွားကြဖို့ရှိတယ်။ ဒီတော့ အိမ်ရှင်ကာတာပါဝင်နေတဲ့ အုပ်စု A ကအသင်းတွေရဲ့ အလားအလာတွေကိုလေ့လာသုံးသပ် ကြည့်မယ်ဆိုရင်တော့။

ကမ္ဘာ့ဖလားပြိုင်ပွဲအုပ်စု A မှာ အိမ်ရှင်ကာတာနဲ့အတူ ကမ္ဘာ့ဖလားဗိုလ်လုပွဲသုံးကြိမ်တက်ရောက်ဖူး တဲ့ ဟော်လန်၊ အာဖရိကတိုက်ချန်ပီယံ ဆီနီဂေါနဲ့ တောင်အမေရိကတိုက်ကနေ ခြေစစ်ပွဲအောင်လာတဲ့ အီကွေဒေါတို့ တွေ့ဆုံပါတယ်။

ဟော်လန်

ဟော်လန်အသင်းဟာ အုပ်စုအဖွင့်ပွဲစဉ်အဖြစ် ဆီနီဂေါအသင်းနဲ့ စတင်ရင်ဆိုင်ရမှာဖြစ်ပြီး သူတို့အတွက် ပထမဆုံးစမ်းသပ်ချက်ဖြစ်လာလိမ့်မယ်။ ဒါပေမဲ့ လက်ရှိဟော်လန်အသင်းဟာ နောက်ဆုံး ၁၅ ပွဲဆက်တိုက်ရှုံးပွဲ မရှိမှတ်တမ်းကောင်းရရှိထားပြီး သူတို့နောက်ဆုံးရှုံးပွဲတွေ့ခဲ့တာက ယူရိုပြိုင်ပွဲ ၁၆ သင်းအဆင့်မှာ ချက်ကိုရှုံးနိမ့်ခဲ့တာဖြစ်တယ်။ ဝင်ရောက်ယှဉ်ပြိုင်ခွင့်ရတဲ့ ကမ္ဘာ့ဖလားပြိုင်ပွဲ တိုင်းမှာ အုပ်စုအဆင့် ကိုကျော်လွန်အောင် စွမ်းဆောင်နိုင်ခဲ့တဲ့ လိမ္မော်ရောင်တွေဟာ ဒီနှစ်ပြိုင်ပွဲမှာလည်း အုပ်စုအဆင့်ကို ကျော်လွန်ဖို့ အခွင်အရေးအများဆုံး အသင်းဖြစ်တယ်။ ကစားသမားအင်အားအရလည်း ပြိုင်ဘက်တွေထက်သာလွန်နေပြီး ဒီပေး၊ လုခ်ဒီယောင်၊ ဘက်ချ်ဝင်နဲ့ ဂတ်ပိုတို့ ဦးဆောင်မယ့် တိုက်စစ်ကိုပဲ စောင့်ကြည့်ရဖို့ရှိပါတယ်။ ပြီးခဲ့တဲ့ ၂၀၁၈ ကမ္ဘာ့ဖလားမှာ ခြေစစ်ပွဲမအောင်ခဲ့လို့ ၈ နှစ်အတွင်းပထမဆုံးအကြိမ် ကမ္ဘာ့ဖလားပွဲကစားရမယ့် လိမ္မော်ရောင်တွေဟာ သူတို့ရဲ့အစဉ်အလာကောင်းကို ဆက်ထိန်းပြီး အခက်အခဲမရှိ နောက်တစ်ဆင့် တက်ဖို့များပါတယ်။

ဆီနီဂေါ

အာဖရိကချန်ပီယံအသင်းဖြစ်တဲ့ဆီနီဂေါဟာ ခြေစစ်ပွဲနောက်ဆုံးအဆင့်မှာလည်း ဒေသတွင်းအင်အားကြီးပြိုင်ဘက် အီဂျစ်ကို ပင်နယ်တီအဆုံးအဖြတ်နဲ့အနိုင်ယူပြီး ကာတာဆီ သွားခွင့်လက်မှတ်ရခဲ့တာဖြစ်တယ်။ အာဖရိကပြိုင်ပွဲ အုပ်စုပွဲစဉ်တွေမှာ တစ်ပွဲနိုင် နှစ်ပွဲသရေ ရဂိုးတစ်ဂိုးသာရခဲ့လို့ စိုးရိမ်စရာ အခြေအနေဖြစ်ခဲ့ပေမယ့် ရှုံးထွက်အဆင့်တွေမှာ ခြေစွမ်းပြပြီး အာဖရိကချန်ပီယံဖြစ်ခဲ့တယ်။ မိနစ် ပေါင်း ၆၆၀ ကစားအပြီးမှာ ၂ ဂိုးသာခွင့်ပြုခဲ့ရတဲ့ ဆီနီဂေါခံစစ်တန်းကို ဂိုးသမားမန်ဒီနဲ့ ကူလီဘာလီတို့က ဦးဆောင်လာမှာဖြစ်တယ်။ မာနေးဒဏ်ရာရနေတာကတော့ ဆီနီဂေါတိုက်စစ်ကိုအားပျော့သွားစေပြီး အဖွင့်ပွဲစဉ်ဖြစ်တဲ့ ဟော်လန်နဲ့ပွဲဟာ စိန်ခေါ်မှုတွေနဲ့ ပြည့်နှက်နေပါလိမ့်မယ်။ နောက် တဆင့်တက်ဖို့အတွက် ၅၀ ရာခိုင်နှုန်းလောက်သာရှိပြီး အီကွေဒေါနဲ့ ကာတာတို့ထက်တော့ အခွင့်အရေးပိုများနေပါတယ်။

ကာတာ

အိမ်ရှင်ကာတာဟာ ကမ္ဘာ့အဆင့် ၅၀ မှာရှိပြီး လက်ရှိအာရှတိုက်ချန်ပီယံဖြစ်တယ်။ ၂၀၁၀ ပြိုင်ပွဲ တုန်းက အိမ်ရှင်တောင်အာဖရိကအသင်းက စောစီးစွာ ပြိုင်ပွဲကနေထွက်ခွာခဲ့ရပြီးနောက်ပိုင်း ဒုတိယ အကြိမ်မြောက် အစောဆုံးထွက်ခွာရမယ့် အိမ်ရှင်အသင်းဖြစ်မလာဖို့ ကြိုးပမ်းကြရ မှာဖြစ်တယ်။ ကာတာဟာ ၂၀၁၉ အာရှဖလားမှာတော့ ဗိုလ်လုပွဲမှာ ဂျပန်ကို ၃ ဂိုး ၁ ဂိုးနဲ့ အနိုင်ရပြီး ချန်ပီယံဖြစ်ခဲ့တယ်။ သွင်းဂိုး ၁၉ ဂိုးရှိခဲ့ပြီး တစ်ဂိုးသာ ပြန်ပေးခဲ့ရလို့ အာရှဖလား စွမ်းဆောင်ရည်ကတော့ အထင်ကြီးစရာဖြစ်ခဲ့တယ်။ ဒါပေမဲ့ လွန်ခဲ့တဲ့ ၃ နှစ်အကြာက စွမ်းဆောင်ရည်ဖြစ်ပြီး လက်ရှိကမ္ဘာ့ဖလား ပြိုင်ပွဲမှာတော့ အုပ်စုနောက်ဆုံးဘိတ် မဖြစ်ရေးကိုတောင် ခက်ခက်ခဲခဲကြိုးပမ်းရဖွယ်ရှိတယ်။ အဖွင့်ပွဲစဉ်ဖြစ်တဲ့ အီကွေဒေါနဲ့ပွဲစဉ်ကအ အရေးပါပြီး အဲဒီပွဲမှာ ရလဒ်မကောင်းခဲ့ရင်တော့ အုပ်စုအဆင့်ကနေ ပဲထွက်ခွာဖို့ရှိနေတယ်။ ကစားသမားအင်အားအရလည်း ပြည်တွင်းကလပ်တွေက သူတွေနဲ့ ဖွဲ့စည်းထားပြီး အယ်လ်ဒူဟေးလ် တိုက်စစ်အတွဲဖြစ်တဲ့ အယ်လ်မို့ဇ်အလီနဲ့ မွန်တာရီတို့က စောင့်ကြည့်ရမယ့် ကစားသမားတွေဖြစ်တယ်။

အီကွေဒေါ

အီကွေဒေါအသင်းဟာ လက်ရှိအချိန်မှာ ပုံစံကောင်းရနေတယ်လို့ဆိုနိုင်ပြီး နောက်ဆုံး ၁၅ ပွဲမှာ ပါရာဂွေးနဲ့ပွဲစဉ်မှာပဲ ရှုံးပွဲတွေ့ခဲ့ဖူးတယ်။ အဲဒီ ၁၅ ပွဲမှာ  အာဂျင်တီးနားကို တစ်ဂိုးစီသရေ၊ ဘရာဇီးနဲ့လည်း တစ်ဂိုးစီ သရေကစားနိုင်ခဲ့တဲ့ ရလဒ်တွေလည်းပါဝင်တယ်။

ဒါပေမဲ့ သရေပွဲစဉ် ၈ ပွဲပါနေတာကတော့ သတိပြု စရာအချက်ဖြစ်တယ်။ နောက်ဆုံး ၆ ပွဲမှာ သွင်းဂိုး ၂ ဂိုးပဲရခဲ့ပြီး ပေးဂိုးလည်း မရှိခဲ့တာမို့ ကမ္ဘာ့ဖလားမှာ ပျင်းစရာကောင်းတဲ့ အသင်းဖြစ်နေမလားပဲ။ ကစားသမားအင်အားအရ ဖီနာဘီချီတိုက်စစ်မှူးအမ်နာ ဗလင်စီယာအပါအဝင် ဘရိုက်တန်သုံးဖော်ဖြစ်တဲ့ ကိုင်စီဒို၊ အက်စ်တူပီနမ်၊ ဆာမီယန်တို တို့နဲ့အတူ ပြိုင်ဘက်တိုင်းကို ယှဉ်ကစားနိုင်စွမ်းတော့ရှိနေတယ်။ အဖွင့်ပွဲစဉ်မှာ အိမ်ရှင်ကာတာကို မဖြစ်အနေ အနိုင်ရဖို့လိုအပ်ပြီး ဟော်လန်နဲ့ ဆီနီဂေါပွဲစဉ်ရလဒ်က သူတို့နောက်တဆင့်တက်မလားဆိုတာ အဖြေ ထုတ်မယ့်ပွဲစဉ်ဖြစ်လာပါလိမ့်မယ်။

ဝဏ္ဏကို

2 weeks Ago
More News
Up