၂၀၂၀ ရွေးကောက်ပွဲ

January 14, 2022

မဲမသမာမှု၊ တရားမဲ့ပြုကျင့်မှုဖြင့် လူပေါင်း ၄၀၀ ကျော်ကို အမှုဖွင့်ထားဟု စစ်ကောင်စီကော်မရှင် ပြော

နိုင်ငံတော်သမ္မတဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ်အပါအဝင် လူပေါင်း ၄၀၀ ကျော်ကို အမှုဖွင့်အရေးယူထားတယ်လို့ စစ်ကောင်စီခန့် ရွေးကောက်ပွဲကော်မရှင်အဖွဲ့ဝင် ဦးခင်မောင်ဦးက  ဇန်ဝါရီ ၁၄ ရက် ဒီကနေ့ နေပြည်တော်မှာ ကျင်းပတဲ့ သတင်းစာရှင်းလင်းပွဲမှာ ပြောပါတယ်။

၂၀၂၀ ပြည့်နှစ်ရွေးကောက်ပွဲမှာ မဲမသမာမှု၊ တရားမဲ့ပြုကျင့်တာမှာ ပါဝင်ပတ်သက် ကျူးလွန်ခဲ့တယ်လို့ စွပ်စွဲပြီး  ပြည်ထောင်စုအဆင့်ပုဂ္ဂိုလ်တွေ၊ ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌနဲ့ အဖွဲ့ဝင်တွေ၊ တိုင်းနဲ့ ပြည်နယ်ဝန်ကြီးချုပ်တွေ၊ လွှတ်တော်ကိုယ်စားလှယ်တွေ၊ ပါတီအောင်နိုင်ရေးအဖွဲ့ဝင်တွေနဲ့ ရွေးကောက်ပွဲ ကော်မရှင်အဖွဲ့ဝင်တွေကို အမှုဖွင့်အရေးယူနေတာလို့ ပြောပါတယ်။ ဒါ့အပြင် ဆက်လက် စိစစ်အရေးယူဦးမယ်လို့လည်း ဆိုပါတယ်။

ပြီးခဲ့တဲ့ ရွေးကောက်ပွဲကို စနစ်တကျ ကြီးကြပ်ကွပ်ကဲဖို့ အားနည်းခဲ့တယ်ဆိုပြီး ရွေးကောက်ပွဲ ကော်မရှင်အဆင့်ဆင့်က တာဝန်ရှိသူပေါင်း ၂၄၈၃ ယောက်ကိုလည်း အရေးယူဖို့လုပ်နေတယ်လို့ ဆိုပါတယ်။

ပြီးခဲ့တဲ့ ရွေးကောက်ပွဲမှာ ရွေးကောက်ပွဲနဲ့ ပတ်သက်တဲ့အမှုပေါင်း ၁၀၇၇ မှုဖြစ်ခဲ့ပြီး ရွေးကောက်ပွဲဥပဒေနဲ့ အရေးယူခဲ့တာ ၅၄၆ မှု၊ တရားစွဲတာ ၃၄၂ မှုနဲ့ ပိတ်သိမ်းခဲ့တာ ၁၉၄ မှုရှိတယ်လို့ သူက ပြောပါတယ်။ ၁၀ မှုကတော့ ဥပဒေအကြံတောင်းထားတုန်းဖြစ်တယ်လို့လည်း ပြောပါတယ်။

ဒါ့အပြင် ရွေးကောက်ပွဲမှာ နိုင်ငံသားစိစစ်ရေးကတ် အမှတ်၊ အမည်တူ မဲပေးသူပေါင်း ၂၀၀၀ ကျော်ကို အရေးယူဖို့ တိုင်ကြားထားပြီး ဆက်လက်စစ်ဆေးနေတုန်းပဲလို့ ပြောပါတယ်။

၂၀၂၀ ရွေးကောက်ပွဲမှာ မဲစာရင်းမှားတယ်၊ မဲမသမာမှုရှိတယ်ဆိုတဲ့  အကြောင်းပြချက်နဲ့ စစ်တပ်က အာဏာသိမ်းထားတာဖြစ်ပြီး  အာဏာသိမ်းကာလ ၁ နှစ်နီးပါးကြာတဲ့အထိ  ရွေးကောက်ပွဲ ရလဒ်ကို အပြောင်းအလဲ ဖြစ်စေနိုင်တဲ့ မဲမသမာမှု တခုမှ သက်သေအထောက်အထား ပြနိုင်ခြင်း မရှိပါဘူး။

7 months Ago

November 16, 2021

သမ္မတနှင့် နိုင်ငံတော်အတိုင်ပင်ခံပုဂ္ဂိုလ် အပါအဝင် ၁၆ ဦးကို စစ်ကောင်စီရွေးကော် တရားစွဲ

သမ္မတဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် ၁၆ ယောက်ကို ရွေးကောက်ပွဲနဲ့ သက်ဆိုင်တဲ့ ပုဒ်မ အများအပြားနဲ့ တရားရုံးတွေမှာ တရားစွဲဆိုနေတယ်လို့ စစ်ကောင်စီရဲ့ ရွေးကောက်ပွဲ ကော်မရှင်က ထုတ်ပြန်ပါတယ်။

၂၀၂၀ ပြည့်နှစ် ပါတီစုံ ဒီမိုကရေစီ အထွေထွေရွေးကောက်ပွဲမှာ မဲမသမာတာ၊ တရားမဲ့ ပြုကျင့်တာတွေအပေါ် စုံစမ်းတွေ့ရှိချက် အစီရင်ခံစာမှာပါတဲ့ ရွေးကောက်ပွဲ လုပ်ငန်းစဉ်တွေ၊ မဲမသမာမှုတွေနဲ့တရားမဲ့ ပြုကျင့်တာတွေမှာ ကျူးလွန် ပါဝင်ဆောင်ရွက်ခဲ့ကြတာကြောင့်လို့ ဆိုပါတယ်။

သမ္မတဦးဝင်းမြင့်၊ နိုင်ငံတော် အတိုင်ပင်ပုဂ္ဂိုလ် ဒေါ်အောင်ဆန်းစုကြည်၊ ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌ ဦးလှသိန်း၊ ပြည်ထောင်စု အစိုးရအဖွဲ့ရုံးဝန်ကြီး ဦးမင်းသူရွေးကောက်ပွဲ ကော်မရှင် အဖွဲ့ဝင်တွေဖြစ်တဲ့ ဦးမြင့်နိုင်နဲ့ ဦးသန်းဌေး၊ မန္တလေးတိုင်းဝန်ကြီးချုပ် ဒေါက်တာဇော်မြင့်မောင်၊ နေပြည်တော် ကောင်စီဥက္ကဋ္ဌ ဒေါက်တာ မျိုးအောင်အပါအဝင် ၁၆ ယောက်ကို တရားစွဲတာ လို့လည်း ထုတ်ပြန်ပါတယ်။

သူတို့ဟာ ရွေးကောက်ပွဲကော်မရှင် အဖွဲ့ခွဲတွေကို ဖွဲ့စည်းပေးရာမှာ ဥပဒေပါပြဋ္ဌာန်းချက်တွေကို လျော်ကန်တဲ့ခွင့်ပြုချက်မရှိဘဲ မရိုးဖြောင့်တဲ့သဘောနဲ့ ဆန့်ကျင်တဲ့ ပြစ်မှုကို ကျူးလွန်တာ၊ ကျူးလွန်ရာမှာ အားပေးကူညီတာ၊ တပ်မဲရုံတွေနဲ့ ပတ်သက်လို့ သက်ဆိုင်ရာ ကော်မရှင်အဖွဲ့ခွဲတာဝန်ရှိသူက ဥပဒေနဲ့အညီဆောင်ရွက်နေတာကို ဟန့်တားတာ၊ နစ်နာစေဖို့ ခြိမ်းခြောက်ပြောဆိုတာ၊ အန်အယ်လ်ဒီပါတီအနိုင်ရဖို့အတွက် ရွေးကောက်ပွဲ လုပ်ငန်းတွေမှာ ဝင်ရောက် စွက်ဖက်တာ၊ ရွေးကောက်ပွဲမတိုင်ခင် တရက်အလိုမှာ မဲစာရင်းမှာ အမည်စာရင်ထည့်ဖို့ မရိုးဖြောင့်တဲ့သဘောနဲ့ စေခိုင်းခဲ့တာ စတာတွေကို ပါဝင်ပတ်သက် ကျူးလွန်ခဲ့ကြတယ်လို့ စစ်ကောင်စီရဲ့ ကော်မရှင်က ထုတ်ပြန်ထားပါတယ်။

ဒါကြောင့် သူတို့ကို အခု နိုဝင်ဘာ ၁၅ ရက်နေ့ကစလို့ သက်ဆိုင်ရာ တရားရုံးတွေမှာ တရားစွဲဆိုနေပြီလို့လည်း  ဆိုပါတယ်။

၂၀၂၀ ပြည့်နှစ် ပါတီစုံ ဒီမိုကရေစီ အထွေထွေရွေးကောက်ပွဲမှာ မဲမသမာမှုရှိခဲ့တဲ့လို့ စစ်ကောင်စီက  အကြိမ်ကြိမ် စွပ်စွဲနေပေမဲ့  ရွေးကောက်ပွဲရလဒ်ကို အပြောင်းအလဲဖြစ်နိုင်တဲ့ မဲမသမာမှု တခုတလေမှာ ခုချိန်အထိ သက်သေပြနိုင်ခြင်းမရှိသေးပါဘူး။ 

သမ္မတဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင်  နိုင်ငံခေါင်းဆောင်တွေကို စစ်ကောင်စီက စစ်အာဏာသိမ်းပြီးကတည်းက ဖမ်းဆီးထားတာ ၉ လကြာရှိနေပြီဖြစ်ပြီး  တခြားဥပဒေ ပုဒ်မအမျိုးမျိုးတွေနဲ့လည်း စွပ်စွဲ  အမှုဖွင့်ထားပါတယ်။  

9 months Ago
More News
Up