ပါကစ္စတန်နှင့် စစ်ဘက်ဆက်ဆံရေးတိုးမြှင့်ရန် မြန်မာကာချုပ်ဆွေးနွေး
DVB
·
May 8, 2015
ပါကစ္စတန်နိုင်ငံမှာ ရောက်ရှိနေတဲ့ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ဟာ ပါကစ္စတန်သမ္မတ မမ်နွန်းဟူစိန်နဲ့ တွေ့ဆုံပြီး နှစ်နိုင်ငံ ကုန်သွယ်မှု တိုးမြှင့်ရေးနဲ့ စစ်တပ်အချင်းချင်း ချစ်ကြည်ရေးမြှင့်တင်ရေး ပူးပေါင်းဆောင်ရွက်ဖို့ ဆွေးနွေးခဲ့ကြပါတယ်။
ဒီတွေ့ဆုံပွဲမှာ ဗိုလ်ချုပ်မှူးကြီး မင်းအောင်လှိုင်က “တပ်မတော် အချင်းချင်းချစ်ကြည်ရေးအတွက် အလွှာအသီးသီးမှ ခေါင်းဆောင်များအား အပြန်အလှန် စေလွှတ်လိုပါကြောင်း၊ ပက်ရ်ှဝါတပ်မတော် အထက်တန်းကျောင်း အကြမ်းဖက် တိုက်ခိုက်ခံရမှု ဖြစ်စဉ်အပေါ် ၀မ်းနည်းပါကြောင်းနဲ့ စာနာထောက်ထားပါကြောင်း၊ ပါကစ္စတန်နိုင်ငံ၏ ဒေသတွင်း အရေးပါမှုကိုလည်း နားလည်သဘောပေါက်ကြောင်း၊ မိမိတို့ နိုင်ငံ၏ နိုင်ငံခြားရေး မူဝါဒမှာ နိုင်ငံအချင်းချင်း ငြိမ်းချမ်းစွာ အတူယှဉ်တွဲနေထိုင်ရေးပင်ဖြစ်ကြောင်း” ပြောကြားခဲ့တယ်လို့ သူ့ရဲ့ လူမှုကွန်ရက်မှာ သတင်းထုတ်ပြန်ပါတယ်။
ပါကစ္စတန်သမ္မတကတော့ “ယခု ခရီးစဉ်သည် ချစ်ကြည်ရေးကို တိုးမြှင့်ပေးနိုင်သည့် ခရီးစဉ်ဖြစ်ကြောင်း၊ ၁၉၇၁ ခုနှစ်မှ မိမိနိုင်ငံ အခက်အခဲ ဖြစ်စဉ်တွင် မြန်မာနိုင်ငံက အကူအညီ ပေးသည်ကို ကျေးဇူးတင်ရှိကြောင်း၊ အာဆီယံဥက္ကဋ္ဌတာဝန်နဲ့ အစည်းအဝေးများအား အောင်မြင်စွာ ထမ်းဆောင်နိုင်မှုအပေါ် ဂုဏ်ယူပါကြောင်း၊ နှစ်နိုင်ငံ ကုန်သွယ်မှု ကိစ္စများသည် အနာဂတ်တွင် ဆက်လက်တိုးတက်လာမည်ဟု ယုံကြည်ပါကြောင်း၊ အခြားစီးပွားရေး ကိစ္စများလည်း ပူးပေါင်းဆောင်ရွက်သွားမယ်လို့ ပြောကြားခဲ့တယ်လို့ဆိုပါတယ်။
ပါကစ္စတန်သတင်းတွေမှာတော့ ပါကစ္စတန်သမ္မတက မြန်မာနဲ့ ကုန်သွယ်ရေး၊ ကာကွယ်ရေးနဲ့ ခရီးသွားလုပ်ငန်းတွေမှာ ဆက်ဆံရေးတိုးမြင့်ဖို့ ဆန္ဒရှိတဲ့အကြောင်း၊ ပညာရေး၊ ကာကွယ်ရေးနဲ့ တခြားကဏ္ဍတွေမှာ မြန်မာကို သင်တန်းတွေပေးဖို့ ကမ်းလှမ်းခဲ့တယ်လို့ ရေးပါတယ်။
မြန်မာတပ်မတော်အကြီးအကဲဟာ ၀န်ကြီးချုပ် မိုဟာမက် နာဝပ်ရှရစ်နဲ့လည်း မေ ၇ ရက်နေ့က အစ္စလာမ္မာဘတ်ဒ် နေအိမ်မှာ တွေ့ဆုံခဲ့ရာမှာ ၀န်ကြီးချုပ်က မြန်မာပြည်ရဲ့ ဖွံ့ဖြိုးတက်တက်မှုတွေဟာ အထင်ကြီးစရာဖြစ်ကြောင်း၊ နယ်ပယ်အားလုံးမှာ မြန်မာနဲ့ အပြည့်အ၀ ပူးပေါင်းဆောင်ရွက်မှု တိုးမြှင့်လိုတယ်လို့ ပြောပါတယ်။
ဗိုလ်ချုပ်မှူးကြီး မင်းအောင်လှိုင်ဟာ ပါကစ္စတန် တပ်မတော် ပူးတွဲစစ်ဦးစီးချုပ်များ ကော်မတီ ဥက္ကဋ္ဌ ဗိုလ်ချုပ်ကြီး ရာရှက်ဒ်မာမွတ်နဲ့လည်း တွေ့ဆုံဆွေးနွေးခဲ့ပြီး ၂၀၁၅ ရွေးကောက်ပွဲကိစ္စ တနိုင်ငံလုံး အပစ်အခတ်ရပ်စဲရေး ဆောင်ရွက်နေမှုနဲ့ လောက်ကိုင်ဒေသ ကိုးကန့်တိုက်ပွဲအခြေအနေတွေအပြင် နှစ်နိုင်ငံတပ်မတော် အဆင့်မြင့်အရာရှိကြီးများ အပြန်အလှန်စေလွှတ်ရေး၊ သင်တန်းသားတွေ အပြန်အလှန်စေလွှတ်ရေး ကိစ္စတွေ ဆွေးနွေးခဲ့ပါတယ်။
ဒါ့ပြင် မြန်မာကာကွယ်ရေးဦးစီးချုပ်ဟာ ပါကစ္စတန် တပ်မတော် ကြည်းတပ်ဦးစီးချုပ် ဗိုလ်ချုပ်ကြီး ရာဟီးလ် ရှရစ် နဲ့လည်း သီးခြားတွေ့ဆုံပြီး ပါကစ္စတန်နိုင်ငံရဲ့ တန်ပြန်အကြမ်းဖက်မှု တိုက်ဖျက်ရေး အတွေ့အကြုံနဲ့ မြန်မာနိုင်ငံရဲ့ ပြည်တွင်းသောင်းကျန်းမှု အတွေ့အကြုံနှစ်ရပ် ပူးပေါင်းဖလှယ်နိုင်ပါက နှစ်နိုင်ငံစလုံးအတွက် အကျိုးရှိမယ်လို့ ပြောကြားခဲ့ပါတယ်။
ပါကစ္စတန်တပ်မတော် ကြည်းတပ်ဦးစီးချုပ်ကတော့ လေ့ကျင့်ရေးပိုင်းဆိုင်ရာ ကိစ္စတွေမှာ ပိုမို ပူးပေါင်းဆောင်ရွက်လိုကြောင်း၊ မြန်မာတပ်မတော်ရဲ့ အတွေ့အကြုံတွေကို ဖလှယ်ရယူလိုကြောင်းနဲ့ ပါကစ္စတန်နိုင်ငံအနေနဲ့ အကြမ်းဖက်အဖွဲ့အစည်းတွေရဲ့ တိုက်ခိုက်မှုတွေကို ရင်ဆိုင်ဖြေရှင်းနေမှု အတွေ့အကြုံတွေ ပြန်လည်ဆွေးနွေး ပြောကြားခဲ့တယ်လို့ သိရပါတယ်။
တပ်မတော်ကာကွယ်ရေးဦးစီးချုပ်နဲ့ အဖွဲ့ဟာ ပါကစ္စတန်နဲ့ ဆားဘီးယားနိုင်ငံတွေကို မေ ၆ ရက်ကတည်းက ချစ်ကြည်ရေးခရီးထွက်ခွာသွားတာ ဖြစ်ပြီး မြန်မာတပ်မတော်အကြီး အကဲတဦးအနေနဲ့ ဒီနိုင်ငံတွေကို ပထမဆုံးအကြိမ် တရားဝင်ချစ်ကြည်ရေး ခရီးသွားရောက်တာလည်းဖြစ်ပါတယ်။
ခရီးစဉ်အတွင်း နှစ်နိုင်ငံ တပ်မတော်တွေအကြား ချစ်ကြည်ရင်းနှီးမှုနဲ့ ပူးပေါင်း ဆောင်ရွက်ရေးကိစ္စရပ်တွေ ဆွေးနွေးတာနဲ့ အထင်ကရနေရာတွေ၊ အကြီးစားစက်မှု လက်မှုလုပ်ငန်းတွေကို လေ့လာကြည့်ရှုသွားဖို့ရှိတယ်လို့လည်း သတင်းထုတ်ပြန်ထား ပါတယ်။
