အမေရိကန်လူ့အခွင့်အရေးကိုယ်စားလှယ်နှင့် လူထုအခြေပြုအဖွဲ့အစည်းများ တွေ့
DVB
·
January 13, 2015
[caption id="attachment_77016" align="alignright" width="440"] ဓာတ်ပုံ - အမေရိကန်သံရုံး[/caption]
ဒီမိုကရေစီ၊ လူ့အခွင့်အရေး၊ အလုပ်သမားရေးရာဆိုင်ရာ အမေရိကန် ဒုလက်ထောက် နိုင်ငံခြားရေးဝန်ကြီး တွမ်မာလင်နော့စကီးနဲ့ မြန်မာ့လူထုအခြေပြုအဖွဲ့အစည်း ကိုယ်စား လှယ်တွေ ရန်ကုန်မြို့မှာ မြန်မာလူ့အခွင့်အရေး အခြေအနေကို ဆွေးနွေးကြပါတယ်။
နိုင်ငံရေးအကျဉ်းသား၊ ရှေ့နေ၊ လူ့အခွင့်အရေး၊ အမျိုးသမီးရေး၊ မသန်စွမ်းရေးရာတွေကို ဆောင်ရွက်နေတဲ့ လူထုအခြေပြုအဖွဲ့အစည်း ကိုယ်စားလှယ်တွေနဲ့ အမေရိကန်သံရုံးမှာ ဒီကနေ့ ဆွေးနွေးကြတာဖြစ်ပါတယ်။
အမေရိကန် ကိုယ်စားလှယ်အဖွဲ့ဟာ အစိုးရနဲ့ ၂ ရက်ကြာ ဆွေးနွေးဖို့ ရှိနေတဲ့အတွက် အခုလို မြန်မာအရပ်ဘက်အဖွဲ့အစည်းတွေနဲ့ အကြိုတွေ့ဆုံပြီး အချက်အလက် တွေရယူတာဖြစ်ပါတယ်။
ညီမျှခြင်းမြန်မာအဖွဲ့ရဲ့ အမှုဆောင်ညွန်ကြားရေးမှူး ဦးအောင်မျိုးမင်းက “နိုင်ငံရေး အကျဉ်းသားနဲ့ ဒီမိုကရေစီ ပြောင်းလဲမှု အပိုင်းကို အဓိကထားဆွေးနွေးပါတယ်။ နိုင်ငံရေး အကျဉ်းသား ကိစ္စကို အဓိကထားမေးတာ ရှိတယ်၊ အကျဉ်းသားကော်မတီနဲ့ ပတ်သက်ပြီး ဆွေးနွေးတာရှိတယ်၊ နောက်ပြီး လူ့အခွင့်အရေး အခြေအနေတွေကို သုံးသပ်မှု လုပ်ပါတယ် ” လို့ ဦးအောင်မျိုးမင်းက ပြောပါတယ်။
အမေရိကန် လူ့အခွင့်အရေး ကိုယ်စားလှယ်အဖွဲ့ဟာ မြန်မာပြည်ခရီးစဉ်အတွင်း ကချင်ပြည်နယ် မြစ်ကြီးနားက ရွှေ့ပြောင်း ဒုက္ခသည်စခန်းတွေကိုလည်း သွားရောက်ခဲ့ပါတယ်။
ကုလသမဂ္ဂဆိုင်ရာ အမေရိကန်ပြည်ထောင်စုကိုယ်စားလှယ် Samantha Power က ဇန်န၀ါရီလ ၁၂ ရက်နေ့က မြန်မာနိုင်ငံအခြေအနေ ပြောဆိုရာမှာ ရခိုင်ပြည်နယ်က လူသားချင်းစာနာမှု အခြေအနေတွေ ဆိုးရွားနေမှုနဲ့ နိုင်ငံသားအဖြစ် စိစစ်ခံရဖို့အတွက် ရိုဟင်ဂျာအမည် သုံးစွဲခွင့်ပိတ်ပင်မှုနဲ့ စာနယ်ဇင်းသမားတွေကို ထောင်ဒဏ်စီရင်မှုကိုလည်း ပြစ်တင်ဝေဖန်ခဲ့ပါတယ်။