ရန်ကုန်မြို့တွင်း ပြိုင်ကားနဲ့ ပါဝါအိပ်ဇောတပ် ကားများ ဆူညံစွာ စည်းကမ်းမဲ့ မောင်းနှင်မှုတွေကို ရဲတပ်ဖွဲ့က စီမံချက်ချမှတ်ပြီး ဒီဇင်ဘာ ၅ရက်နေ့က စတင်စစ်ဆေးမှုတွေ ပြုလုပ်နေပါတယ်။ ဒီဇင်ဘာ ၉ ရက်နေ့အထိ ၄ရက်အတွင်းမှာ ပြိုင်ကားတွေနဲ့ ပါဝါ အိပ်ဇောတပ် ကားတွေ စုစုပေါင်း ၅၂ စီး ဖမ်းဆီးထားကြောင်း ရန်ကုန်ရဲတပ်ဖွဲ့က သတင်းထုတ်ပြန်ထားပါတယ်။ အခုဖမ်းဆီးရမိတဲ့ မော်တော်ယာဉ်တွေကို ယာဉ်စည်းကမ်း လမ်းစည်းကမ်းအရ အရေးယူ ဆောင်ရွက်သွားမှာဖြစ်ပြီး ယာဉ်မှတ်ပုံတင်လိုင်စင်ရှိ/မရှိ စိစစ်ကာ ယာဉ်မှတ်ပုံတင်မရှိတဲ့ မော်တော်ယာဉ်တွေကို ဥပဒေနဲ့အညီ အရေးယူသွားမယ်လို့ သိရပါတယ်။ စစ်ဆေးဖမ်းဆီးရေးဂိတ်တွေကို ကုက္ကိုင်းလမ်းဆုံ၊ ဝေဇယန္တာလမ်းဆုံ၊ ၈မိုင် လမ်းဆုံနဲ့ စော်ဘွားကြီးကုန်းလမ်းဆုံတွေမှာ ထားရှိပြီး ညစဉ် ၉ နာရီကနေ မနက် ၂ နာရီအထိ စစ်ဆေး ဖမ်းဆီးမှုတွေပြုလုပ်နေပြီး လိုအပ်သလို နေရာပြောင်းရွှေ့ ဖမ်းဆီးမှုတွေ ဆက်လက်လုပ်ဆောင်သွားမယ်လို့ ရဲတပ်ဖွဲ့ကတဆင့် သိရှိရပါတယ်။ သတင်းဓာတ်ပုံ - ကောင်းထက်ကျော် [gallery ids="73311,73312,73313,73314"]