အီဘိုလာ သံသယရှိ လူနာ ဆေးရုံက ဆင်းပြီ
DVB
·
September 3, 2014
အီဘိုလာရောဂါ သံသယနဲ့ ဝေဘာဂီဆေးရုံမှာ စောင့်ကြပ်ဆေးကုမှုခံယူနေတဲ့ လူနာမှာ အီဘိုလာရောဂါပိုးမရှိဟု မနေ့က သတင်းထုတ်ပြန်ခဲ့ပြီးနောက် ဒီနေ့ ဆေးရုံက ဆင်းပြီလို့ ကျန်းမာရေးဝန်ကြီးဌာနက ကြေညာပါတယ်။
သံသယ လူနာနဲ့ အနီးကပ်ထိတွေ့သူ ၄ ဦး၊ စုစုပေါင်း ၅ ဦးကို ဝေဘာဂီ အထူးကုဆေးရုံကြီိးမှာ ပြုစုကုသပေးပြီး လူနာတွေရဲ့အခြေအနေ လုံးဝကောင်းမွန်တာကြောင့် ဆင်းခွင့်ပြုလိုက်တာလို့ ဆိုပါတယ်။
ဝေဘာဂီအထူးကုဆေးရုံကြီးမှာ တက်ရောက်ကုသနေတဲ့ အသက် ၂၂ နှစ်ရှိ သံသယလူနာနဲ့ အနီးကပ်ထိတွေ့သူ ၄ ဦးအပါအ၀င် စုစုပေါင်း ၅ ဦးရဲ့ ဓာတ်ခွဲနမူနာတွေကို ဂျာမနီနိုင်ငံ ဟန်းဘတ်မြို့ရှိ ညွှန်းပို့ဓာတ်ခွဲခန်းကို ပေးပို့စစ်ဆေးခဲ့ရာ ဓာတ်ခွဲနမူနာတွေမှာ အီဘိုလာရောဂါပိုး မတွေ့ရှိရကြောင်း စက်တင်ဘာလ ၂ ရက်နေ့က အကြောင်းပြန်ကြားခဲ့တာပါ။
အာဖရိကမှာ အလုပ်လုပ်ပြီး ပြန်လာတဲ့ အသက် ၂၂ နှစ်အရွယ် မြန်မာ အမျိုးသားတဦးကို ပြီးခဲ့တဲ့ သြဂုတ် ၁၉ ရက်နေ့က ရန်ကုန်လေဆိပ်မှာ ကိုယ်အပူချိန်မြင့်လျက် တွေ့ရှိရတဲ့အတွက် အီဘိုလာ ရောဂါသံသယနဲ့ သက်ဆိုင်ရာက မြောက်ဥက္ကလာ ဝေဘာဂီဆေးရုံဆီ လွှဲပြောင်းပို့ဆောင် ကျန်းမာရေးစောင့်ကြပ်စစ်ဆေး ကုသပေးနေတာ ဖြစ်ပါတယ်။