ဘုန်းမောက်အသင်းနဲ့ပွဲစဉ်မှာ ရရှိခဲ့တဲ့ ပင်နယ်တီကို ဝင်အောင်ကန်သွင်းနိုင်ခဲ့မယ်ဆိုရင် ပွဲအဖြေ ပြောင်းလဲနိုင်ကြောင်း လီဗာပူးနည်းပြ ယာဂန်ကလော့ပ်ကပြောပါတယ်။
လီဗာပူးဟာ ဘုန်းမောက်အသင်းကို အဝေးကွင်းမှာ ၁ ဂိုး ဂိုးမရှိနဲ့ အရေးနိမ့်ခဲ့တာပါ။ ဒုတိယပိုင်းမှာ ချေပဂိုးဖြစ်စေမယ့် ပင်နယ်တီရရှိခဲ့ပေမယ့် ဆာလာက ဝင်အောင် ကန်သွင်းနိုင်ခြင်း မရှိခဲ့တာပါ။
နည်းပြကလော့ပ်ကတော့ ဆာလာသာ ပင်နယ်တီဝင်အောင်ကန်သွင်းနိုင်ခဲ့မယ်ဆိုရင် ပွဲအဖြေ ပြောင်းလဲသွားနိုင်ကြောင်း ပွဲအပြီးမှာ သုံးသပ်ခဲ့တာပါ။
“ဆာလာဟာ ဂိုးတွေအများကြီးသွင်းခဲ့တဲ့သူပါ။ ဒီတစ်ကြိမ်မှာတော့ ပင်နယ်တီကိုလွဲချော်ခဲ့တယ်။ ဒါကဘောလုံးလောကမှာဒီလိုပါပဲ” လို့ နည်းပြ ကလော့ပ်ကပြောပါတယ်။
လီဗာပူးအသင်းအနေနဲ့ ဘုန်းမောက်ခံစစ်ပိုင်းမှာ နေရာလွတ်တွေအများကြီးရှိနေပေမယ့် အသုံးချနိုင်ခြင်းမရှိခဲ့ကြောင်းလည်း နည်းပြကလော့ပ်က ပြောသွားပါတယ်။
