Home
ဆောင်းပါး
နိုင်ငံ့အနာဂတ်တွေကို ပြန်ပေးပါ
DVB
·
September 29, 2022

နိုင်ငံတစ်ခု၏ အနာဂတ်သည် နျူကလီးယားစွမ်းအင်၊ စစ်လက်နက်၊  ယာဉ်၊ ယန္တရားနှင့် သယံဇာတပစ္စည်းများအပေါ်တွင် တည်မှီနေခြင်းမဟုတ်ပေ။ နိုင်ငံတစ်ခု၏ အနာဂတ်ကောင်းခြင်း၊ ဆိုးခြင်းသည် လူသားအရင်းမြစ်ပေါ်တွင်သာ လုံးလုံးလျားလျား တည်မှီနေပေသည်။ 

ထို့ကြောင့်လည်း ယဉ်ကျေးသော လူ့အဖွဲ့အစည်းသည် လူသားရင်းမြစ်အသစ်ဖြစ်သော ကလေးသူငယ်များကို တန်ဖိုးထားကြရသည်။ ယနေ့လူငယ် နောင်ဝယ် လူကြီးဆိုသကဲ့သို့ နောင်တချိန်တွင် နိုင်ငံကို ပုံဖော်ထုဆစ်နိုင်စွမ်းရှိသူများမှာ ယနေ့ကာလ၏ ကလေးငယ်များသာ ဖြစ်၏။  ကလေးသူငယ်များသည် နိုင်ငံတစ်ခု၏ အနာဂတ် ၊ ကမ္ဘာကြီး၏ အနာဂတ်ပင်။

မြန်မာနိုင်ငံတွင် လွန်စွာအကျည်းတန် အရုပ်ဆိုးသော ဖြစ်ရပ်ကြီးတစ်ခု ၂၀၂၂ ခု ၊ စက်တင်ဘာ ၁၆ ရက်တွင် ပေါ်ပေါက်ခဲ့သည်။  စစ်ကိုင်းတိုင်း၊ ဒီပဲယင်းမြို့နယ်၊ လက်ယက်ကုန်းကျေးရွာအတွင်း ဘုန်းတော်ကြီးသင်စာသင်ကျောင်းတစ်ခု၌ စာသင်ကြားနေကြသော ကလေးငယ်များနှင့် ဆရာ၊ ဆရာမများသည် စစ်ရဟတ်ယာဉ်များပေါ်မှ ပစ်ခိုက်တိုက်ခိုက်ခံခဲ့ကြရသော ဖြစ်ရပ်ဆိုးကြီး ဖြစ်သည်။ ပစ်ခတ်တိုက်ခိုက်မှုအတွင်း ကျောင်းသားကလေးသူငယ် ၁၁  ဦးအပါအဝင် စုစုပေါင်း  ၁၃ ဦး အသက်ခန္ဓာလွင့်ပါးခဲ့ရပြီး ကျောင်းသားကလေးသူငယ်နှင့် အရပ်သား ၁၅ ဦးခန့်ကိုလည်း  မြန်မာစစ်တပ်က ဖမ်းဆီးခေါ်ဆောင်သွားကြောင်း ဒေသခံများက သတင်းမီဒီယာများသို့ ပြောကြသလို ကုလသမဂ္ဂအတွင်းရေးမှူးချုပ်ရုံးကလည်း သီးခြား စုံစမ်းထုတ်ပြန်ထားသည်။ 

နိုင်ငံအာဏာကို ထိန်းသိမ်းထားရပါသည်ဆိုသော စစ်ကောင်စီ၏ သတင်းပြန်ကြားရေးမှ ဗိုလ်ချုပ်ဇော်မင်းထွန်းက ထိုတိုက်ခိုက်မှုနှင့်စပ်လျဉ်း၍ ပြောကြားရာတွင် ကျောင်းအတွင်း KIA နှင့် PDF တချို့ရှိနေသည်ဟု သတင်းရရှိ၍ တိုက်ခိုက် ရှင်းလင်းခဲ့ခြင်းဖြစ်သည်ဟု အကြောင်းပြချက်ပေးသည်။ နိုင်ငံခြားရေးဝန်ကြီးဌာနကလည်း မြန်မာစစ်တပ်သည် KIA နှင့် PDF များ ကျေးရွာအတွင်း ရှိနေသဖြင့် ထိတွေ့တိုက်ခိုက်မှုဆိုင်ရာ စည်းမျဉ်းစည်းကမ်း (RoE) နဲ့အညီ တိုက်ခိုက်ခဲ့သည်ဟု စက်တင်ဘာ ၂၄ ရက်က ထုတ်ပြန်ထား ပြန်သည်။ ထုတ်ပြန်ချက်အတွင်း ရဟတ်ယာဉ်ဖြင့် တိုက်ခိုက်မှုနှင့် ကလေးသူငယ်ကျောင်းသားများ သေဆုံးထိခိုက်ခဲ့ရမှုကိုမူ တလုံးတပါဒမျှ မဖော်ပြဘဲ ထိန်ချိန်ထားသည်။

၎င်းတို့၏ အကြောင်းပြချက် မှန်ခြင်း၊ မမှန်ခြင်းဆိုသည်ထက် အသိဉာဏ်ရှိသူတိုင်းက ဝေဖန် ပိုင်းခြား ရှုမြင်သုံးသပ်ကြမည်မှာ မြန်မာစစ်တပ်၏ အတည်မပြုနိုင်သေးသည့် သတင်းတစ်ခုအပေါ် ကိုင်တွယ်ဆောင်ရွက်ပုံကို ဖြစ်၏။ အဆိုပါ ကျောင်းအတွင်း ဗိုလ်ချုပ်ဇော်မင်းထွန်းနှင့် နိုင်ငံခြားရေးဝန်ကြီးဌာနက ပြောသကဲ့သို့ ၎င်းတို့၏ ဆန့်ကျင်ဖက် အင်အားစုများ ရှိနေခဲ့သည်ဟုပင် ထားဦး၊ ယင်းကဲ့သို့ တိုက်ခိုက်သင့်ပါ၏လောဟု မေးခွန်းထုတ်ရပေမည်။

နိုင်ငံတကာတွင်လည်း စာသင်ကျောင်း၊  ဟိုတယ်၊ ဘုရားကျောင်း၊ စူပါမားကက် ၊ ဘဏ် စသည့် အများသူငှာ သွားလာနေထိုင်သည့် ဧရိယာအတွင်း ဝင်ရောက်ကာ အကြပ်ကိုင်သည့် အကြမ်းဖက်သမားများရှိခဲ့ဖူးပါသည်။ 

ထိုအကြမ်းဖက်သမားများကို ချေမှုန်းတိုက်ခိုက်သည်ဟုဆိုကာ မြန်မာစစ်တပ်ကဲ့သို့ ရဟတ်ယာဉ် အသုံးပြု၍ မြင်မြင်ရာရာ ပစ်ခတ်သွားခြင်းမျိုးကို တွေ့မြင်ဖူးကြပါသလောဟု မေးခွန်းထုတ်စရာ ဖြစ်လာသည်။ 

စွမ်းဆောင်ရည်ပြည့်ဝ၍ ပြည်သူကို ရင်ဝယ်သားလို စောင့်ရှောက်လိုစိတ်ရှိသည့် မည်သည့်တပ်ဖွဲ့ကမျှ ထိုသို့ မလုပ်ခဲ့ကြဖူးပေ။ ဓားစာခံများ လွတ်မြောက်ရေးကို အလေးထား၍ အပေးအယူ ပြုတန်ပြုကာ နောက်ပိုင်းမှသာ အကြမ်းဖက်သမားများကို ရှင်းလင်း သုတ်သင်ပစ်ကြလေ့ ရှိသည်။ မြန်မာစစ်တပ်၏ တိုက်ခိုက်ပုံသည်ကား တာဝန်ယူမှု၊ တာဝန်ခံမှု ကင်းမဲ့လွန်းလှသည်ဟုသာ ဆိုရချေမည်။ ၎င်းတို့သည် ၎င်းတို့ကို ဆန့်ကျင်သော အင်အားစုများကို ချေမှုန်းရင်း ဖြစ်ရပါသည်ဟု သတင်းထုတ်ပြန်လိုက်လျှင် ကိစ္စပြတ်ပြီဟု မှတ်ယူကြပုံရသည်။ လွန်စွာ အကျည်းတန်လှသည့် အဆင်အခြင်မဲ့မှု၊ မိုက်မဲမှုပင်။

တိုက်ခိုက်မှုအတွင်း နိုင်ငံ၏ အနာဂတ်ကလေးများ ကျဆုံးသွားရသည်နှင့် မပြီး၊ ရုပ်ကလာပ် ဖျောက်ဖျက်ခံရသည့်အပြင် ဖမ်းဆီးခေါ်ဆောင်သွားခြင်းကိုလည်း ခံခဲ့ကြရသည်။ မြန်မာစစ်တပ်သည် ၎င်းတို့ ကျူးလွန်ခဲ့သည့် စစ်ရာဇဝတ်မှုများ မပေါ်ပေါက်စေရန်နှင့် သက်သေအထောက်အထား မကျန်စေရန် အလောင်းဖျောက်ဖျက်လေ့ရှိသည်မှာလည်း ထုံးစံပင်။

ဖမ်းဆီးသွားသူများနှင့်ပတ်သက်၍ မြန်မာစစ်တပ်ဘက်ကမူ ဆေးကုသပေးနေသည်ဟု အကြောင်းပြပြန်သည်။ သို့သော် ၎င်းတို့ ဆေးကုပေးနေသည်ဆိုသော ကျောင်းသားကလေးင ယ်အရေအတွက်နှင့် ရွာသို့ ပြန်ရောက်မလာသေးသော ကျောင်းသားနှင့် အရပ်သား အရေအတွက်ကလည်း ကွဲလွဲမှုများ ရှိနေသည်။ ဆေးကုသပေးနေသည်ဟု အကြောင်းပြသော်လည်း ၎င်းတို့ ကျူးလွန်ထားသော ပြစ်မှုများ မပေါက်ကြားစေရန်နှင့် မမှန်ကန်သော ထွက်ဆိုချက်များ ရရှိရေးအတွက် အဓမ္မစည်းရုံးသိမ်းသွင်းနိုင်ရန် အချိန်ဆွဲနေခြင်းသာ ဖြစ်သည်ကို မြန်မာစစ်တပ်၏ လုပ်ကိုင်ပုံကို သိရှိထားသူများက သိနားလည်ပြီး ဖြစ်ပေသည်။ ထို့ကြောင့် ဆေးကုသမှုပေးနေသည် ဆိုခြင်းထက် ဖမ်းဆီးထိန်းသိမ်းထားခြင်းသာ ‌ဖြစ်ပေ၏။ ဖမ်းဆီးခံလိုက်ရသည့် ကျောင်းသား ကလေးများနှင့် ဒေသခံများကို မည်သည့်နေရာထား၍ မည်သို့ ပြုမူနေကြသည်ဆိုခြင်းကို မည်သူမျှ မသိနိုင်ပေ။ သိနိုင်၊ မှန်းဆနိုင်သည်မှာ မိဘနှင့်ကင်းကွာသွားရသော ကလေးငယ်များ၏ စိတ်ဒဏ်ရာနှင့် မိသားစုများ၏ စိုးရိမ်သောကတို့ ဖြစ်၏။

မြန်မာစစ်တပ်၏ တိုက်ခိုက်စီးနင်းမှုအတွင်း ကလေးသူငယ် ၁၁  ဦး  လွင့်ကြွေသွားရသလို ခေါ်ဆောင် အထိန်းသိမ်းခံလိုက်ရသော ကလေးငယ်များလည်း မိသားစုနှင့် ကင်းဝေးနေသည်မှာ စက်တင်ဘာ ၃၀ တွင် ရက်သတ္တ နှစ်ပတ်ပြည့်ပေပြီ။ အပြစ်မရှိသော အရွယ်ရောက်ပြီး နိုင်ငံသားတစ်ဦးကိုပင် ၂၄ နာရီထက် ပိုမိုချုပ်နှောင်ခြင်းမပြုရန် ဥပဒေက အကာကွယ်ပေးထားသည်ဖြစ်ရာ မည်သည့်ပြစ်မှုကိုမျှ ကျူးလွန်ထားခြင်းမရှိသော နိုင်ငံ့အနာဂတ်ကလေးများကို ကိုယ်ချင်းစာတရားရှိရှိ မိဘရပ်ထံ အမြန်ဆုံး ပြန်ပို့ပေးရန် တိုက်တွန်းလိုက်ရပေ၏။ 

စောအဲမွန်

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024