ထိုင်း-မြန်မာနယ်စပ်၊ တာ့ခ်ခရိုင်၊ မယ်လမတ်မြို့နယ်မှာ ဒီကနေ့  စက်တင်ဘာ ၁၉ ရက် မနက်က တရားမဝင် ဝင်ရောက်လာတဲ့ မြန်မာ ၁၅ ဦး အဖမ်းခံရတယ်လို့ AEC အာဆီယံ ထိုင်းသတင်းမှာ ဖော်ပြပါတယ်။

မီးခိုးရောင် တိုယိုတာဟိုင်းလပ်စ်ကား ၁ စီးဟာ ဟွေ့ပါ စစ်ဆေးရေးဂိတ်ကို ကွေ့ရှောင်ပြီး ဘန့်ပါလိုက်ဒင်ဒဲန် တောလမ်းဘက်ကနေ မောင်းလာစဉ် နယ်လှည့်စစ်ဆေးရေးအဖွဲ့နဲ့ တိုးမိတာလို့ ဆိုပါတယ်။

တာဝန်ရှိသူတွေက အဆိုပါကားကို စစ်ဆေးဖို့ ရပ်မိန့်ပေးစဉ် ယာဉ်မောင်းကရပ်မပေးဘဲ ထွက်ပြေးသွားခဲ့ပါတယ်၊ တောတွင်းတနေရာမှာရောက်တော့  ကားရပ်ပြီးထွက်ပြေးသွားကြောင်း ၊ ကားပေါ်မှာ လူ ၁၅ ယောက် ( အမျိုးသား ၁၀ ဦး အမျိုးသမီး ၅ ဦး ) ပါလာပြီး မြန်မာပြည်ကနေ ထိုင်းမှာအလုပ်လုပ်ဖို့ ဝင်လာကြောင်းလို့ဆိုပါတယ်။ အလုပ်သမားတွေဟာ ပွဲစားခ တဦးလျှင် ဘတ် ၂၀၀၀၀ မှ ၃၀၀၀၀ စီပေးခဲ့ရပြီး၊ သူတို့ကို လဝက ဥပဒေနဲ့ ဆက်လက်အရေးယူဖို့ မယ်လမတ်ရဲစခန်းကို ပို့ဆောင်ထားပါတယ်။

အဆိုပါလမ်းကြောင်းပေါ်မှာပဲ  ဘတ် ၆၇၂၀၀ တန်ဖိုးရှိ ကျွန်းသစ်လုံး ၈ လုံးကိုပါ ဖမ်းမိခဲ့ပါတယ်။ ၄ လုံးကို ကားပေါ်တင်လာစဉ်ဖမ်းမိပြီး နောက် ၄ လုံးကို ဝှက်ထားတဲ့ တောထဲကနေ ဖမ်းမိခဲ့တယ်လို့ ဆိုပါတယ်။

စက်တင်ဘာ ၁၇ ရက်နေ့ကလည်း ကန်ကျနပူရီခရိုင် ထောင်းဖာဖူးမြို့နယ်ထဲမှာ တရားမဝင် ဝင်ရောက်လာတဲ့ မြန်မာ ၁၅ ဦးနဲ့ လမ်းပြယာဉ်မောင်း ၁ ဦးပါ အဖမ်းခံခဲ့ရပါသေးတယ် ။ 

တာဝန်ရှိသူတွေဟာ ထောင်းဖာဖူးမြို့နယ် ထာ့ခနွန်အုပ်စုတွင်း လုံခြုုံရေး စောင့်ကြပ် စစ်ဆေးစဉ် ဟွေ့ခယုန်ရွာအနီး ဝင်ရောက်လာတဲ့ တိုယိုတာကားတစ်စီးကို စစ်ဆေးရာမှာ ယာဉ်မောင်း ၁ ဦးသာလျှင် ထိုင်းမှတ်ပုံတင်ရှိပြီး ကျန်သူတွေမှာ အထောက်အထားမရှိလို့ အဖမ်းခံရပါတယ်။

အဆိုပါ မြန်မာ ၁၅ ဦးမှာ အမျိုးသား ၉ ဦး အမျိုးသမီး ၄ ဦးနဲ့ ကလေး ၂ ယောက်တို့ပါလာပြီး ရန်ကုန်နဲ့ မော်လမြိုင်ကလာကြောင်း ၊ ရာ့ချ်ပူရီနဲ့ ချွန်းဖွန်းခရိုင်ကို သွားဖို့ ပွဲစားခ တစ်ဦးလျှင် ဘတ် ၂၅၀၀၀ မှ ၃၀၀၀၀ ထိပေးခဲ့ရတယ်လို့ ဆိုပါတယ်။

ကိုဗစ်-၁၉ ကူးစက်ရောဂါ ကာကွယ်ရေးအရ  သူတို့ကို ကိုယ်ပူချိန်စစ်ဆေးရာမှာ ၂ ဦးမှာ အပူချိန်မြင့်နေလို့ ATK နဲ့ ဆက်စစ်ရာမှာ ကိုဗစ် ၁၉ ပိုးကူးစက်ခံထားရတယ်လို့ ဆိုပါတယ် ။ 

အားလုံးကို လိုအပ်သလိုအရေးယူဆောင်ရွက်ဖို့ ထောင်းဖာဖူးမြို့နယ်ရဲစခန်းကို ပို့ဆောင်ထားတယ်လို့ ကန်ကျနပူရီဒေသတွင်းသတင်းအရ သိရပါတယ်။

မြန်မာနိုင်ငံမှာ စစ်တပ်အာဏာသိမ်းပြီးနောက် နိုင်ငံရေးမတည်ငြိမ်မှုကြောင့် စားဝတ်နေရေး ၊ လုံခြုံရေးအခက်အခဲဖြစ်နေတဲ့ နိုင်ငံသားတွေဟာ အိမ်နီးချင်းထိုင်းနိုင်ငံထဲ ဝင်ရောက်လုပ်ကိုင်နေကြရာမှာ အဖမ်းအဆီးခံနေရတာလည်း နေ့စဉ်လို ရှိနေပါတယ်။ 

Ref- AEC