စစ်ကိုင်းတိုင်း တန့်ဆည်မြို့၊ လမ်းဆုံအဝိုင်းပတ်အနောက်ဘက်ရှိ ရွှေဒေါင်းမင်းဆီဆိုင်မှာ တပ်စွဲကာ စစ်ဆေးရေးလုပ်နေတဲ့ စစ်ကောင်စီတပ်ဂိတ်ကို Taze People Comrades - TPC အထူးကွန်မန်ဒိုအဖွဲ့က ဒီနေ့ညနေ ၃ နာရီကျော်လောက် ဝင်ရောက်ပစ်ခတ်တိုက်ခိုက်ခဲ့တယ်လို့ TPC အဖွဲ့က ပြောပါတယ်။

“ပစ်ခတ်ခဲ့တာကတော့ ဟုတ်တယ်ဗျ။ ဟိုတလောက ရဲကားပစ်တဲ့ အထူးကွန်မန်ဒိုအဖွဲ့ပဲဗျ။ အခု ပစ်ရတာလည်း စီစဉ်ချတဲ့အတိုင်းမဖြစ်ဘဲ ပစ်လိုက်ရတော့ နေရာတင် စစ်သား ၃ ဦး သေတယ်။ နောက်ပြီး ၂ ယောက် ဒဏ်ရာရသွားတယ်။ ကျနော်တို့ဘက်ကတော့ လက်ဦးမှု အရင်ရတာကြောင့် အကျအဆုံး၊ အထိအခိုက်မရှိဘူး” လို့ TPC ပြန်ကြားရေးတာဝန်ရှိသူ မောင်နိုးစက်က ပြောပါတယ်။

ပြီးခဲ့တဲ့ဩဂုတ် ၇ ရက်နေ့မှာလည်း တန့်ဆည်မြို့ပေါ် ကင်းလှည့်နေတဲ့ ရဲကားကို TPC အဖွဲ့က ပစ်ခတ်ခဲ့တာကြောင့် စစ်ကောင်စီဘက်က ၇ ဦး ကျဆုံးခဲ့ပြီး လက်နက် ၇ လက် သိမ်းဆည်းနိုင်ခဲ့တယ်လို့ ဒေသခံတွေက ပြောပါတယ်။

ရေဦးမြို့နယ်၊ ချမ်းသာရွာမှာ ညအိပ်စခန်းချခဲ့တဲ့ အင်အား ၁၂၀ ခန့်ရှိ စစ်ကောင်စီတပ်ကို ကွမ်းအုံရွာအနီးမှာ ဩဂုတ် ၁၂ ရက် မနက် ၈ နာရီလောက် ဒေသခံ ပြည်သူ့ကာကွယ်ရေး ပူးပေါင်းတပ်က တိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင် ၁၀ ဦးထက်မနည်း သေဆုံးခဲ့တယ်လို့ Freedom Revolution Force (FRF) ဆီက သိရပါတယ်။

စစ်ကောင်စီတပ်ကို ပြည်သူ့ကာကွယ်ရေးပူးပေါင်းတပ်တွေက မိုင်းကွင်းနဲ့ အသင့်ကြိုစောင့်ကာ လက်နက်ကြီး၊ လက်နက်ငယ်တွေနဲ့ တိုက်ခိုက်ခဲ့တာလို့ ဆိုပါတယ်။

မိုင်းကွင်းအတွင်း ဝင်လာတဲ့ စစ်‌ကောင်စီတပ်သား ၇ ဦးလောက် လွင့်စဉ်သွားပြီး လက်နက်ကြီး လက်နက်ငယ်တွေနဲ့ ပစ်ခတ်မှု‌ကြောင့် စစ်ကောင်စီတပ်သား ၃ ဦး သေဆုံးခဲ့တယ်လို့ သိရပါတယ်။

အခုတိုက်ခိုက်မှုကို ရွှေဘိုခရိုင် တပ်ရင်း-၂၄ FRF တပ်ဖွဲ့၊ ဗိုလ်မုတ်ဆိတ်အဖွဲ့၊ DRPA၊ ရွှေဘိုခရိုင်တပ်ရင်း-၉၊ ရွှေဘိုခရိုင် တပ်ရင်း-၁၁ နဲ့ တခြား မဟာမိတ်ပူးပေါင်းအဖွဲ့တွေက ပူးပေါင်းတိုက်ခိုက်ခဲ့ကြတာပါ။

အဆိုပါ စစ်ကောင်စီတပ်ဟာ ဩဂုတ် ၁၀ ရက်က ထောက်ပို့ရဟတ်ယာဉ်နဲ့ ရေဦးမြို့နယ် အနောက်ဘက်မှာရှိတဲ့ ကုန်းသာရွာကို မီးတင်ရှို့ကာ ချမ်းသာ၊ တောင်ခွင်၊ ငှက်ပျောတောရွာတွေကို မွှေနှောက်ဖျက်ဆီးခဲ့ပြီး ဒီနေ့မှာလည်း ကွမ်းအုံရွာကို မီးရှို့ဖျက်ဆီးခဲ့တယ်လို့ ဒေသခံမီဒီယာတွေက ထုတ်ပြန်ထားပါတယ်။