ဒေါ်အောင်ဆန်းစုကြည် နေပြည်တော်အချုပ်ထောင်ထဲတွင်ရှိ၊ တရားသူကြီး ခွင့်ယူထားသဖြင့် ရှောင်တာနယ်အမှု မစစ်ဖြစ်

နိုင်ငံတော်တိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ရန်ကုန်က ခြံအမှတ် ၅၄ ကို ပြန်ပို့လိုက်တယ်လို့ သတင်းတွေ ထွက်ပေါ်နေပေမဲ့ နေပြည်တော်အချုပ်ထောင်ထဲမှာပဲ ရှိတယ်လို့ တရားရုံးနဲ့နီးစပ်တဲ့ အသိုင်းအဝိုင်းကနေ စုံစမ်းသိရပါတယ်။

ဒီနေ့ ဇူလိုင် ၇ ရက်မှာ သြစတြေးလျနိုင်ငံသား ရှောင်တာနယ်အမှုကို နေပြည်တော်အချုပ်ထောင်အတွင်း သီးသန့်အထူးတရားရုံးမှာ ဆက်လက်ရုံးထုတ် စစ်ဆေးမှာဖြစ်ပေမဲ့ တရားသူကြီး နေမကောင်းဖြစ်ပြီး ခွင့်ယူထားတဲ့အတွက် မစစ်ဆေးဖြစ်ဘူးလို့ သိရပါတယ်။

ဒေါ်အောင်ဆန်းစုကြည်ကို ရန်ကုန်က ခြံအမှတ် ၅၄ ကို ပြန်ပို့တယ်ဆိုတာ မမှန်ကန်ဘဲ ဒီနေ့ ရုံးထုတ်မှာ တရားရုံးမှာရှိနေတယ်လို့ တရားရုံးနဲ့ နီးစပ်သူတယောက်က ပြောပါတယ်။

ရှောင်တာနယ်ကို စစ်ကောင်စီက လ.ဝ.ကအက်ဥပဒေ၊ မြန်မာနိုင်ငံအစိုးရ လျှို့ဝှက်ချက်များ အက်ဥပဒေပုဒ်မ ၃-၁(ဂ) တို့နဲ့ စွဲဆိုထားတာ ဖြစ်ပါတယ်။ 

မြန်မာနိုင်ငံအစိုးရ လျှို့ဝှက်ချက်များ အက်ဥပဒေပုဒ်မ ၃-၁(ဂ) အမှုမှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ ဦးစိုးဝင်း (စီမံ/ဘဏ္ဍာဝန်ကြီး)၊ ဦးဆက်အောင် (စီမံ/ဘဏ္ဍာ/စက်မှု ဒုဝန်ကြီး)၊ ဦးကျော်ဝင်း (စီမံ/ဘဏ္ဍာဝန်ကြီးဟောင်း) တို့ကို အမှုတွဲအဖြစ် တရားစွဲဆိုထားကာ အဆိုပါ ပုဂ္ဂိုလ်လေးယောက်ကို အားပေးကူညီမှုနဲ့ စွဲချက်တင်အမိန့်ချပြီး ဖြစ်ပါတယ်။

//
More News
Up