ဖိုက်ဇာကုမ္ပဏီက ကိုဗစ်-၁၉ ကုသဆေးကို အကျိုးအမြတ်မယူဘဲ ဆင်းရဲနိုင်ငံများသို့ ပေးမည်

ဖိုက်ဇာ နိုင်ငံတကာ ကော်ပိုရေးရှင်းက သူ့ရဲ့ ကိုဗစ်-၁၉ ကပ်ရောဂါ ကုသဆေး ပက်စ်လိုဗစ်နဲ့ ရောင်းအားကောင်းတဲ့ ရင်သားကင်ဆာကုဆေး အီဘရန့်စ်တို့ အပါအဝင် မူပိုင်ခွင့်တင်ထားတဲ့ သူ့ဆေးဝါးတွေ အားလုံးကို အကျိုးအမြတ်မယူတဲ့ဈေးနဲ့ ကမ္ဘာ့အဆင်းရဲဆုံး ၄၅ နိုင်ငံကို ပေးမယ်လို့ မေ ၂၅ ရက်မှာ ပြောလိုက်ပါတယ်။

ဒီနိုင်ငံတွေမှာ ဆန်းသစ်တီထွင်ထားတဲ့ ဆေးတွေကို ကောင်းကောင်း လက်လှမ်းမမီပါဘူး။ ကုသမှုအသစ်တွေ ရမယ်ဆိုရင်တောင် ဝင်ငွေနည်းတဲ့နိုင်ငံတွေမှာ ကုသခွင့်ရဖို့ လေးနှစ်မှ ခုနစ်နှစ်အထိ ကြာနိုင်တယ်လို့ Bill & Melinda Gates ဖောင်ဒေးရှင်းက ဆိုပါတယ်။

ဖိုက်ဇာရဲ့ အစီအစဉ်ထဲမှာ သူအပြည့်အဝ မူပိုင်ခွင့်ရထားတဲ့ ကူးစက်ရောဂါကုဆေးတွေ၊ ကင်ဆာကုဆေးတွေနဲ့ ရှားပါးတဲ့ ရောင်ရမ်းမှုဆိုင်ရာ ဆေးတွေ အပါအဝင် ဆေးနဲ့ ကာကွယ်ဆေး ၂၃ မျိုး ပါတယ်လို့ ပြောပါတယ်။ ဒါ့အပြင် ဘိုင်အိုအန်တက်ခ် ကုမ္ပဏီနဲ့ ပူးတွဲ မူပိုင်ခွင့်ရထားတဲ့ ကိုဗစ်ကာကွယ်ဆေးလည်း ပါပါတယ်။

ဖိုက်ဇာဟာ ဆေးသစ်တွေ၊ ကာကွယ်ဆေးသစ်တွေ ထုတ်ချိန်မှာ အဲဒီဆေးတွေလည်း အကျိုးအမြတ်မယူတဲ့ ဆေးစာရင်းထဲ ပါလာလိမ့်မယ်လို့ သူက ဆက်ပြောပါတယ်။

ပိုကျန်းမာတဲ့ ကမ္ဘာအတွက် သဘောတူညီချက်လို့ ဖိုက်ဇာက ခေါ်တဲ့ အစီအစဉ်ထဲမှာ ဝင်ငွေနိမ့် နိုင်ငံ ၂၇ ခုနဲ့ ဝင်ငွေပိုနိမ့်တဲ့ နိုင်ငံ ၁၈ ခု ပါပြီး အာဖရိကနိုင်ငံ အများစုနဲ့ အရှေ့တောင်အာရှနိုင်ငံ အများအပြား ပါပါတယ်။

ရဝမ်ဒါ၊ ဂါနာ၊ မာလာဝီ၊ ဆီနီဂေါနဲ့ ယူဂန်ဒါ နိုင်ငံတွေက သဘောတူညီချက်ကို ပူးပေါင်းပြီးပြီ ဖြစ်ပြီး ဒါဗို့စ်မြို့မှာ ကျင်းပနေတဲ့ ကမ္ဘာ့စီးပွားရေးဖိုရမ်မှာ ကြေညာပြီးပါပြီ။ ဒီကြေညာချက်ကို မာလာဝီနဲ့ ရဝမ်ဒါနိုင်ငံတွေက သမ္မတတွေက ကြိုဆိုခဲ့ကြပါတယ်။

//
More News
Up