မြန်မာနှစ်ဆန်းတရက်နေ့ ဧပြီ ၁၇ ရက်နေ့မှာ ပဲခူးတိုင်း၊ ပြည်အကျဉ်းထောင်ကနေ နိုင်ငံရေး အကျဉ်းသားတယောက်မှမလွတ်ဘဲ တပ်ပြေး ၄ ယောက်နဲ့ မူးယစ်ဆေးမှု ၂ ယောက် စုစုပေါင်း ၆ ယောက်ပဲ လွတ်မြောက်တယ်လို့ အကျဉ်းဦးစီးဌာန ဝန်ထမ်းတယောက်ဆီက သိရပါတယ်။
မြန်မာနှစ်ဆန်းတရက်နေ့မှာ တနိုင်ငံလုံး အကျဉ်းထောင်တွေကနေ အကျဉ်းသား ၁၅၀၀ ကျော်လွှတ်ပေးတယ်လို့ စစ်ကောင်စီက အမိန့်ထုပ်ပြန်ထားခဲ့ပေမဲ့ နိုင်ငံရေးအကျဥ်းသား ၁၅၀ ကျော်ရှိတဲ့ ပြည်ထောင်က နိုင်ငံရေးအကျဉ်းသား တယောက်မှ မလွတ်မြောက်ခဲ့ဘူးလို့ သိရပါတယ်။
နိုင်ငံရေးအကျဉ်းသားဟောင်းတယောက်က “မနက်က အစောကြီးသွားစောင့်နေတာ ကိုယ့်လူတွေပါမလားဆိုပြီး၊ ၉ နာရီ လောက်မှာ စလွှတ်တာ၊ မူးယစ်ဆေးရောင်းသူတွေနဲ့ စစ်တပ်က ပြေးသူတွေ ၆ ယောက်ပဲလွှတ်ပေးတယ်၊ နိုင်ငံရေးအကျဉ်းသားတယောက်မှမပါဘူး။ ထင်တော့ထင်ပါတယ်၊ ဘယ်လွှတ်ပေးရဲမလဲ သူတို့က ကြောက်နေတာလေ” လို့ ပြောပါတယ်။
စစ်ကောင်စီက မြန်မာနှစ်ဆန်းတရက်နေ့မှာ အမိန်အမှတ် ၃၀/ ၂၀၂၂ န့ ပြစ်ဒဏ်လွှတ်ငြိမ်းခွင့် အမိန်တခုကို ဒုတိယ ဗိုလ်ချုပ်ကြီးအောင်လင်းဒွေး လက်မှတ်နဲ့ ထုတ်ပြန်ထားပါတယ်။
အဲ့ဒီအမိန့်မှာ အကျဥ်းထောင်၊ အချုပ်ထောင် အသီးသီးမှာ အကျဥ်းကျခံနေရတဲ့ အကျဉ်းသား၊ အကျဉ်းသူ ၁၅၇၇ ဦးတို့ကို ရာဇ၀တ်ကျင့်ထုံးဥပဒေ ပုဒ်မ ၄၀၁၊ ပုဒ်မခွဲ (၁) အရ နောက်တကြိမ်ပြစ်မှု ထပ်မံကျူးလွန်ပါက အဆိုပါပြစ်ဒဏ်အပြင်၊ ယ ခုကျခံရန်ကျန်ရှိသော ပြစ်ဒဏ်များကိုပါ ဆက်လက်ကျခံပါမည် - ဟူသော စည်ကမ်းသတ်မှတ်ချက်နဲ့ ကျခံရန်ကျန်ရှိသော ပြစ်ဒဏ်များအပေါ် လျှော့ပေါ့ပြီး ပြစ်ဒဏ်လွတ်ငြိမ်းသက်သာခွင့်ပြုလိုက်လို့ ဖော်ပြထားပါတယ်။
