အီရန်က အီရတ်ကိုအနိုင်ယူပြီး အစောဆုံးခြေစစ်ပွဲအောင်မြင်သည့် အာရှအသင်းဖြစ်လာ

မနေ့ကယှဉ်ပြိုင်ကစားသွားခဲ့တဲ့ အာရှဇုန်ကမ္ဘာ့ဖလားခြေစစ်ပွဲမှာ အီရန်က အီရတ်ကို ၁ ဂိုး ဂိုးမရှိနဲ့ အနိုင်ရပြီး အစောဆုံး ခြေစစ်ပွဲအောင်မြင်တဲ့ အာရှအသင်းဖြစ်ခဲ့ပါတယ်။ 

အာရှဇုန်ကမ္ဘာ့ဖလားခြေစစ်ပွဲတွေကို ၆ သင်းပါဝင်တဲ့ အုပ်စု ၂ ခုခွဲကာ ယှဉ်ပြိုင်ကစားနေကြတာပါ။ 

အီရန်အသင်းက အုပ်စု A မှာ ၇ ပွဲကစား ၆ ပွဲနိုင် ၁ ပွဲသရေကျခဲ့ပြီး ဒုတိယနေရာက တောင်ကိုရီးယားထက် ၂ မှတ်အသာနဲ့ အုပ်စု ပထမ နေရာကနေ ရပ်တည်နေတာပါ။ 

ရမှတ် ၁၉ မှတ်ရရှိထားတဲ့ အီရန်ဟာ လက်ကျန် ၃ ပွဲအလိုမှာ တတိယနေရာက ယူအေအီးအသင်းကို ၁ဝ မှတ်ဖြတ်လိုက်တာကြောင့် ကမ္ဘာ့ဖလားခြေစစ်ပွဲအောင်ဖို့ သေချာသွားခဲ့တာပါ။ 

အုပ်စု B မှာတော့ ဆော်ဒီ၊ ဂျပန်နဲ့ သြစတြေးလျတို့အပြိုင် ဖြစ်နေပြီး အုပ်စုပထမနဲ့ ဒုတိယ ၂ သင်းက တိုက်ရိုက်ခြေစစ်ပွဲအောင်မြင်မှာပါ။ 

အီရန်အသင်းဟာ ၂၀၂၂ ကာတာကမ္ဘာ့ဖလား ခြေစစ်ပွဲအောင်မြင်ခဲ့တာကြောင့် ကမ္ဘာ့ဖလား ၃ ကြိမ်ဆက်တိုက် ယှဉ်ပြိုင်ခွင့်ရတော့မှာ ဖြစ်ပါတယ်။ 

အီရန်အသင်းမှာ ဥရောပလိဂ်တွေမှာကစားနေတဲ့ ကစားသမား ၁၇ ဦးအထိ ပါဝင်နေပြီး ကမ္ဘာ့အဆင့် ၂၁ မှာ ရပ်တည်နေပါတယ်။ 

//
More News
Up