မကွေးတိုင်းဒေသကြီး မြိုင်မြို့နယ်မှာ ဒီဇင်ဘာလ ၁၆ ရက်နေ့ မွန်းလွဲပိုင်းက မြိုင် PDF နဲ့ စစ်ကောင်စီတပ်တွေ တိုက်ပွဲ ဖြစ်ပွားခဲ့ပြီး စစ်ကောင်စီတပ်သား ၃ ယောက်သေဆုံးခဲ့တယ်လို့ မြိုင် PDF ကနေ သိရပါတယ်။
မြိုင်မြို့နယ် ငါးမြောင်းရွာနားမှာ မနေ့ မွန်းလွဲ ၁ နာရီလောက်က စစ်ကောင်စီစစ်ကြောင်းက ရှေ့ပြေးလာတဲ့ စစ်ကောင်စီတပ်သား ၃ ယောက်ကို မြိုင်PDF တပ်ဖွဲ့က ချုံခိုပြီးတော့ သေနတ်နဲ့ ပစ်ခတ်သုတ်သင်နိုင်ခဲ့တယ်လို့ မြိုင် PDF ရဲ့ ပြန်ကြားရေးတာဝန်ခံ ဗိုလ်ခွင့်ချိန်က ပြောပါတယ်။
နှစ်ဖက် အပြန်အလှန်တိုက်ပွဲ ဖြစ်ပွားခဲ့ပြီး မြိုင် PDF က ရဲဘော်တစ်ယောက် လက်မောင်း ကျည်ဆန်ထိမှန်ဒဏ်ရာရပြီးတော့ ကျန်တဲ့ ရဲဘော်တွေအားလုံး အောင်အောင်မြင်မြင်ဆုတ်ခွာနိုင်ခဲ့တယ်လို့ ဆိုပါတယ်။
မြိုင်မြို့နယ်ကို စစ်အုပ်စုတွေက ငါးမုန်း၊ ငါးမြောင်းဘက်မှာ အင်အား ၁၀၀ ကျော်လောက်ပါတဲ့ စစ်ကြောင်းတစ်ကြောင်း၊ သက္ကယ်ကန်ရွာဘက်မှာ အင်အား ၈၀ လောက်ပါတဲ့ စစ်ကြောင်း တစ်ကြောင်းနဲ့ မင်းသားကျဘက်မှာ အင်အား ၁၀၀ လောက်ပါတဲ့ စစ်ကြောင်းတစ်ကြောင်း အားလုံးစစ်ကြောင်း ၃ ကြောင်းနဲ့ ထိုးစစ်ဆင်နေတယ်လို့ ပြောပါတယ်။
မြိုင်မြို့နယ်မှာ ဒီဇင်ဘာလ ၁၅ ရက်ကလည်း မြိုင်PDF တပ်ဖွဲ့က စစ်ကောင်စီကား ၂ စီးနဲ့ လက်ပံတိုရေနံမြေ ရဲကင်းကို မိုင်းဆွဲတိုက်ခိုက်ရာ စစ်ကောင်စီတပ်သား အများအပြား ဒဏ်ရာရ ပြီး ကျောက်ခွက်ရေနံမြေရဲကင်းကိုမီးရှို့ ဖျက်စီးပြီးတော့ လျှပ်စစ်ထရန်စဖော်မာ တစ်ခုကိုပါ ဖောက်ခွဲဖျက်ဆီးနိုင်ခဲ့တယ်လို့ သိရပါတယ်။
နှစ်ဖက်တိုက်ပွဲတွေအတွင်းမှာ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်း ထုတ်ပြန်ထားတာ မရှိသေးပါဘူး။