နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပေါ် စစ်ကောင်စီက စွပ်စွဲထားတဲ့ အဂတိအမှုတွေထဲက ၁ မှုကို ဒီဇင်ဘာ ၁၀ ရက်မနက်က နေပြည်တော်၊ ဇမ္ဗူသီရိတရားရုံးမှာ ဆက်လက် စစ်ဆေးပါတယ်။
ရန်ကုန်မြို့၊ တက္ကသိုလ်ရိပ်သာလမ်းရှိ ဒေါ်အောင်ဆန်းစုကြည်ရဲ့နေအိမ်အနီးပရဝုဏ်ကို အသုံးပြုမှုနဲ့ပတ်သက်တဲ့ အမှုနံပတ် ၂၅/၂၀၂၁ ကိုဆက်လက်စစ်ဆေးခဲ့တာလို့ တရားရုံးနဲ့ နီးစပ်သူတွေဆီက သိရပါတယ်။
ဒီအမှုဟာ ရန်ကုန်တိုင်းတရားလွှတ်တော်ကနေ နေပြည်တော်တရားရုံးကို လွှဲ ပြောင်းထားတဲ့ အမှုဖြစ်ပါတယ်။
ဒီအမှုကို တိုင်ကြားခဲ့တဲ့ စစ်ကောင်စီ အဂတိလိုက်စားမှုတိုက်ဖျက်ရေးကော်မရှင်အဖွဲ့ဝင် ဦးရဲထက်က ဒီကနေ့မှာ ထွက်ဆိုချက်တွေပေးခဲ့သလို ရှေ့နေအဖွဲ့က အပြန်အလှန်စစ်မေးတာတွေ ပြုလုပ်ခဲ့ပါတယ်။
နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ နေပြည်တော် မြို့တော်ဝန် ဒေါက်တာမျိုးအောင်နဲ့ ဦးရဲမင်းဦးတို့ကို ပူးတွဲစွဲဆိုထားတဲ့ တခြားအဂတိအမှုတွေကိုတော့ ဒီဇင်ဘာ ၁၇ ရက်မှာ ဆက်လက်စစ်ဆေးဖို့ တရားရုံးက ရုံးချိန်းပေးခဲ့ပါတယ်။
ဒီဇင်ဘာ ၁၇ ရက် ရုံးချိန်းမှာတော့ တရားလိုပြသက်သေ ၂ ယောက်ကို ဆက်လက်စစ်ဆေးသွားမှာ ဖြစ်ပါတယ်။
ဒီနေ့တရားရုံးကိုရောက်ရှိလာတဲ့ ဒေါ်အောင်ဆန်းစုကြည်၊ ဒေါက်တာမျိုးအောင်၊ ဦးရဲမင်းဦးနဲ့ ဦးမင်းသူတို့ ၄ ယောက်စလုံးကျန်းမာရေး အခြေအနေ ကောင်းမွန်တယ်လို့ သိရပါတယ်။
စစ်ကောင်စီက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပေါ် အဂတိအမှု ၆ မှု အပါအဝင် အမှုပေါင်း ၁၃ မှုနဲ့ တရားစွဲထားတာ ဖြစ်ပါတယ်။
ဒီဇင်ဘာ ၆ ရက်နေ့ ရုံးချိန်းမှာတော့ ဒေါ်ဆောင်ဆန်းစုကြည်ကို ဇမ္ဗူသီရိတရားရုံးက ရာဇသတ်ကြီး ဥပဒေ ၅၀၅(ခ)အမှုအတွက် ထောင်ဒဏ် ၂ နှစ်၊ သဘာဝဘေးပုဒ်မအတွက် ထောင်ဒဏ် ၂ နှစ် စုစုပေါင်း ထောင်ဒဏ် ၄နှစ်ချမှတ်ခဲ့ပါတယ်။
သမ္မတဦးဝင်းမြင့်ကိုလည်း စစ်ကောင်စီတရားရုံးက ၅၀၅(ခ)အမှုအတွက် ထောင်ဒဏ် ၂နှစ်၊ သဘာဝဘေးပုဒ်မအတွက် ထောင်ဒဏ် ၂နှစ် စုစုပေါင်း ထောင် ဒဏ် ၄နှစ် ချမှတ်ခဲ့ပါတယ်။ ဒေါက်တာမျိုးအောင်ကိုလည်း ၅၀၅(ခ)အမှုအတွက် ထောင်ဒဏ် ၂နှစ် ချမှတ်ခဲ့ပါတယ်။
တရားရုံးက နိုင်ငံတော်အတိုင်ပင်ခံပုဂ္ဂိုလ်နဲ့ သမ္မတတို့ကို ထောင်ဒဏ်ချအပြီး ညနေပိုင်းမှာပဲ အာဏာသိမ်း စစ်ခေါင်းဆောင်က ထောင်ဒဏ် ၄ နှစ်ထဲကနေ ၂ နှစ်ကို လျှော့ပေါ့ လွတ်ငြိမ်းသက်သာခွင့်ပြုကြောင်း သတင်းထုတ်ပြန်ခဲ့ပါတယ်။