စစ်ကိုင်းတိုင်း ဆားလင်းကြီးမြို့နယ် ဒုန်းတောရွာအနီးမှာ ဒီဇင်ဘာ ၈ ရက်မနက်ပိုင်းက စစ်ကောင်စီတပ်က သတ်ဖြတ်ထားခဲ့တဲ့ အလောင်း ၄ လောင်း ထပ်မံတွေ့ရှိခဲ့တယ်လို့ ဒေသခံတစ်ယောက်က ပြောပါတယ်။
ဒေသခံရွာသားတစ်ဦးက “ကိုဉာဏ်ပို၊ မဝင်းကြည် အသက် ၆၀ ခန့်၊ ဒေါ်သန်းရွှေ အသက် ၈၀ နဲ့ အသက် ၁၁ နှစ်ဝန်းကျင် ကလေး ၁ ဦး အလောင်းတွေကို ဒီနေ့မနက်ခင်း ထပ်တွေခဲ့ရတယ်။ အသက်ကြီးသူတွေဆိုရင် မလုပ်ဘူးလောက်ဘူးဆိုပြီ ရွာထဲမှာနေကြတဲ့သူတွေပါ။ သတ်ထားခဲ့တာက လည်လှီးပြီး သတ်ထားခဲ့ကြတာဗျ” လို့ ပြောပါတယ်။
ဓားစာခံအဖြစ်ခေါ်ဆောင်ခံရပြီး ပြန်လွတ်လာသူအချို့ရဲ့ ပြောကြားချက်အရ စစ်ကောင်စီတပ်ဟာ ၁၆ ကုတင်ဆေးရုံအနီးကနေ ဒုံတောရွာဘက်လာခဲ့တုန်းက ဒုန်းတောရွာမှာ လူဦးရေ ၂၀ လောက် သတ်ခဲ့တယ်ဆိုပြီး ပြောကြားခဲ့တယ်လို့ သိရပါတယ်။
ဒီဇင်ဘာ ၇ ရက်နေ့ကလည်း ဆားလင်းကြီးမြို့နယ် ဒုန်းတောကျေးရွာအပြင်ဘက် ကိုင်းတောထဲပုန်းရှောင်နေတဲ့ စစ်ရှောင်ပြည်သူ ၁၁ ဦးကို စစ်ကောင်စီတပ်ဖွဲ့က ပစ်သတ်မီးရှို့ထားခဲ့တာကြောင့် အသတ်ခံရသူ စုစုပေါင်း ၁၅ ဦးအထိ ရှိပြီဖြစ်ပါတယ်။
မုံရွာ-ပုသိမ် လမ်းအတိုင်းလာနေတဲ့ စစ်ကောင်စီတပ်ဖွဲ့ကို လမ်းခုလပ်တစ်နေရာမှာ ဒေသခံ PDF အဖွဲ့က မိုင်းဆွဲတိုက်ခိုက်ခံခဲ့တာကြောင့် စစ်ကောင်စီဘက်က အထိနာသွားခဲ့ပြီး ခုလို သတ်ဖြတ်ခံတာဖြစ်နိုင်ပြီး လက်နက်ကြီးလက်နက်ငယ်တွေနဲ့ ပစ်ခတ်ခဲ့တာကြောင့် ပြည်သူတွေ ထွက်ပြေးတိမ်းရှောင်ကြရတယ်လို့ ဒေသခံတွေက ပြောပါတယ်။
ဆားလင်းကြီးမြို့နယ်မှာ ဒီဇင်ဘာ ၇ ရက်နေ့က ဒေသခံ ရွာသားတွေ ရက်ရက်စက်စက် သတ်ဖြတ်ခံခဲ့ရတဲ့အပေါ် အထူးစိုးရိမ်ကြောင်းနဲ့ မြန်မာလုံခြုံရေးတပ်ဖွဲ့တွေရဲ့ အကြမ်းဖက်လုပ်ရပ်တွေအပေါ် ပြစ်တင်ရှုတ်ချကြောင်း ကုလသမဂ္ဂ အတွင်းရေးမှူးချုပ်ရဲ့ ပြောခွင့်ရ Stephane Dujarric က ဒီဇင်ဘာ ၈ ရက်နေ့က ပြောကြားလိုက်ပါတယ်။
အခုလို အကြမ်းဖက်တာတွေတွေကို ပြင်းပြင်းထန်ထန်ရှုတ်ချပြီး နိုင်ငံတကာ အသိုင်းအဝန်းက တညီတညွတ်တည်း တုံ့ပြန်ကြဖို့လည်း တောင်းဆိုထားပါတယ်။