ထိုင်းနိုင်ငံ ဒုတိယမြို့တော် ချင်းမိုင်မှာ ကိုဗစ်-၁၉ ရောဂါ ကူးစက်မှုအရှိန်မလျော့သေးဘဲ ရွှေ့ပြောင်း အလုပ်သမားတွေကြားထဲမှာလည်း ကူးစက်သူတွေတိုးလာတဲ့အတွက် ပိုးကူးခံရသူတွေကိုသီးခြားခွဲ ထုတ်ထားရှိတဲ့ Community Isolation ( CI ) စင်တာမှာ အဆောင်ထပ်တိုးဖို့ သက်ဆိုင်ရာက စီစဉ်နေပါတယ်။
အဆိုပါစင်တာမှာ ချင်းမိုင်မြို့ ချန့်ဖိုတ်ရပ်ကွက်ရှိ မြူနီစီပယ်အားကစားကွင်းထဲမှာ ဖွင့်လှစ်ထားရှိပြီး လက်ရှိ အဆောင် ၅ ခုထဲမှာ ရွှေ့ပြောင်းအလုပ်သမားပေါင်း ၂၃၇ ဦးကြောင်း ၊ အများစုမှာ အလုပ်သမားတန်းလျားနဲ့ လုပ်ငန်းခွင်တွေမှာ သွားရောက်စစ်ဆေးရာက ပိုးတွေ့ရှိခဲ့ သူတွေဖြစ်တယ်လို့ ချင်းမိုင်မြူနီစီပယ်ဝန် နိုင်းအတ်ဆနီး ပူရဒုပကွန်းက မနေ့က သတင်း ထောက်တွေကို ပြောပါတယ်။
လက်ရှိချင်းမိုင်မှာ ပိုးကူးစက်သူ ၃၀၀ အထက်နေ့စဉ်တွေ့နေတဲ့အပြင် နောက်ထပ်နယ်မြေ ထဲကွင်းဆင်းစစ်ဆေးမှုတွေ တောက်လျှောက်လုပ်ဆောင်သွားမှာမို့ လူ ၅၀၀ အထိလက်ခံထားရှိ နိုင်ဖို့ ပြင်ဆင်နေတယ်လို့ လည်း ဆက်ပြောပါတယ်။
ဒါ့အပြင် ချင်းမိုင်မြူနီစီပါယ်ရုံးမှာ ကိုဗစ်-၁၉ ကာကွယ်ဆေးထိုးနှံပေးနေပြီး လက်ရှိဆေး အစုံပေါင်း ၇၀၀၀ ရှိကြောင်း ၊ ဆေးအမျိုးအစားမှာ ပထမတကြိမ် Sinovac နဲ့ ဒုတိယတကြိမ် AstraZeneca ဖြစ်ပြီး ရွှေ့ပြောင်းအလုပ်သမားတွေကို ဦးစားပေးထိုးနှံပေးနေတယ်လို့ ဆိုပါတယ်။
နောက်ထပ် CI စင်တာတစ်ခုကို ချင်းမိုင်ဖူးခမ်းဟိုတယ်မှာ ဖွင့်လှစ်ထားရှိပြီး အဲဒီမှာ တော့ ထိုင်းနိုင်ငံသားတွေကို ထားရှိပါတယ်။
ကိုဗစ်-၁၉ ပိုးကူးစက်ခံရပြီး ရောဂါလက္ခဏာအခြေအနေမဆိုးရင် CI စင်တာမှာ သီးသန့်ခွဲ ထားကာ အခြေအနေဆိုးသူတွေကိုတော့ ဆေးရုံမှာကုသပေးနေတာဖြစ်ပါတယ်။
ချင်းမိုင်ခရိုင်မှာ နိုဝင်ဘာ ၉ ရက်နေ့က ကိုဗစ် ၁၉ ပိုးကူးစက်ခံရသူနောက်ထပ် ၃၇၉ ဦး တွေ့ရှိပြီး သေဆုံးသူ ၂ ဦးရှိပါတယ်။
ထိုင်းမှာ နိုဝင်ဘာ ၉ ရက်နေ့ထိ ကိုဗစ်-၁၉ ပိုးကူးစက်ခံရသူစုစုပေါင်း ၂၀၃၉၀ ဦး ၊ သက်သာပျောက်ကင်းသူပေါင်း ၁၅၂၀၇ ဦး အခြေနေစောင့်ကြည့်ဆဲ ၂၃၅ ဦးနဲ့ သေဆုံးသူ ၇၄ ဦးရှိတယ်လို့ ခရိုင်ကျန်းမာရေးဌာနက ထုတ်ပြန်ထားပါတယ်။ ကိုးကား - https://www.chiangmainews.co.th/page/archives/1834057/?fbclid=IwAR173qH9NA-4PKuM_P30sEzw3lb5O1lm_u8NGTl5EtmgtKgq1qZZtZztLzI