ရခိုင်ပြည်နယ်ဝန်ကြီးချုပ် ဦးညီပုကို စစ်ကောင်စီက ဖမ်းဆီးတရားစွဲဆိုပြီးနောက် အောက်တိုဘာ ၈ ရက် ဒီနေ့ အလုပ်ကြမ်းနဲ့ ထောင်ဒဏ် ၂ နှစ် ချမှတ်လိုက်ပါတယ်။
စစ်တွေအကျဉ်းထောင်အထူးတရားရုံးကနေ နိုင်ငံတော်အကြည်ညိုပျက်စေမှုနဲ့ ထောင်ဒဏ်ချမှတ်တာလို့ ဒီအမှုလိုက်ပေးနေတဲ့ ရှေ့နေဆီက သိရပါတယ်။
စစ်တပ်က အာဏာသိမ်းတဲ့ ဖေဖော်ဝါရီ ၁ ရက်နေ့မှာပဲ ဝန်ကြီးချုပ်ဦးညီပုကို နေအိမ်အကျယ်ချုပ်ထားခဲ့ပြီး ပြန်လွတ်လာတဲ့နောက်ပိုင်း သူ့ရဲ့ ဖေ့စ်ဘွတ်ခ်စာမျက်နှာကနေ ပြည်သူသို့ ပြန်ကြားချက်ဆိုတဲ့ ဗွီဒီယိုဖိုင်ကို တင်ခဲ့တာကြောင့် ပြန်ပြီး ဖမ်းဆီး ခံလိုက်ရတာပါ။
ဒါ့အပြင် ဦးညီပုဟာ အန်အယ်လ်ဒီအစိုးရလက်ထက် ဝန်ကြီး ၄ ယောက်နဲ့အတူ ဂွမြို့နယ်ထဲက သောင်ထွန်းမြေပေါ်မှာ မြေကွက်ဖော်တဲ့ကိစ္စအတွက် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ နဲ့လည်း တရားစွဲဆိုခံထားရပါသေးတယ်။