စစ်ကိုင်းတိုင်းဒေသကြီး ဟုမ္မလင်းမြို့နယ်က ကျေးရွာတချို့မှာ လုယက် ဓားပြတိုက်ခံရမှုတွေ မကြာခဏဖြစ်ပေါ်နေတယ်လို့ သိရပါတယ်။
လူသွားလူလာနည်းပါးတဲ့ နမ့်တောကျေးရွာ၊ ကံကျော်ရကျေးရွာနဲ့ တက်ခတ် ပေးကုန်းကျေးရွာတွေ သွားတဲ့ နေရာတွေမှာ လုယက်ဓားပြတိုက်မှုတွေ မကြာခဏဖြစ်ပေါ်နေတာလို့ ဒေသခံတွေက ပြောပါတယ်။
Mask တပ်ထားတဲ့သူအချို့က လုယက် ဓားပြတိုက်နေတာ စက်တင်ဘာလကစပြီး ဒီနေ့အထိ ၇ ကြိမ်လောက်ရှိပြီဖြစ်ပြီး အဲဒီဒေသတဝိုက်မှာ မူးယစ်ဆေး ရောင်းဝယ်သူတွေလည်းရှိနေတယ်လို့ ဆိုပါတယ်။
ပြီးခဲ့တဲ့ ၅ ရက်လောက်က နမ့်တောမှာ ရွှေသွားရောင်းတဲ့သူတဦး လမ်းမှာ ဓားပြတိုက်ခံတယ်လို့ ဒေသခံတဦးက ပြောပါတယ်။
“ပိုက်ဆံပါရင် ပိုက်ဆံယူပါတယ်။ ဖုန်းပါရင် ဖုန်းယူပါတယ်။ ရွှေရောင်းတဲ့သူ တစ်ယောက်ဆိုရင် ၈ သိန်းဖိုးလောက် ပါသွားတယ်။”
လက်ရှိအချိန်ထိ ဓားပြတိုက်သူတွေက လူတွေကို အန္တရာယ်ပြုတာတော့ မရှိသေးဘူးလို့ ဆိုပါတယ်။
ကုန်စျေးနှုန်းတက်ပြီး လုပ်ငန်းတွေအဆင်မပြေတာကြောင့် အခုကာလ လုယက် ဓားပြတိုက်မှုတွေ ဖြစ်လာနေတာလို့ ဒေသခံတွေက ပြောပါတယ်။
ဟုမ္မလင်းမြို့နယ်မှာ စစ်ကောင်စီတပ်နဲ့ KIA တို့ မကြာခဏ တိုက်ပွဲဖြစ်ပွားလေ့ရှိပြီး Mytel တာဝါတိုင် မိုင်းခွဲဖျက်ဆီးခံရတာတွေလည်း ရှိနေပါတယ်။
