မန္တလေးတိုင်း၊ မိုးကုတ်မြို့က သပိတ်ခေါင်းဆောင် ဦးစိုးဌေးရဲ့သားအကြီး ကိုဥက္ကာစိုး အပါအဝင် မြို့ခံလူငယ် ၉ ဦးကို စစ်အုပ်စုက PDF လို့ စွဲချက်တင်ပြီး နှိပ်စက်နေတယ်လို့ သူတို့နဲ့ နီးစပ်တဲ့ ဒေသခံက ပြောပါတယ်။
“ဖမ်းသွားတာ ၅ ရက်လောက်ရှိပြီ။ ပြန်လွှတ်ပေးတော့မယ် မထင်ဘူး။ PDF လို့ စွဲချက်တင်ပြီး တရားစွဲမယ်ကြားတယ်။ အခုလည်း မေးမြန်းပြီး နှိပ်စက်နေတယ်။ တချို့လူတွေပဲ မိဘနဲ့တွေ့ခွင့်ရတယ်”လို့ ဒေသခံတစ်ဦးက ပြောပါတယ်။
ဦးစိုးဌေးသားအပါအဝင် လူငယ် ၉ ဦးကို စက်တင်ဘာ ၂၉ ရက် မနက်ပိုင်း ၆ နာရီ ဝန်းကျင်က Mogok Delivery to service ရုံးမှာ စစ်အုပ်စုက လာရောက်ဖမ်းဆီးသွားတာ ဖြစ်ပါတယ်။
“ရုံးမှာ မနက်အစောပိုင်း လာဖမ်းသွားတယ်။ Laptopကော၊ ဖုန်းတွေကော အားလုံး သိမ်းသွားတယ်။ Customer ကို ပို့ရမယ့် ပစ္စည်းတွေကအစ ဖောက်ပြီးယူသွားတယ်။ ရုံး တခုလုံးကိုလည်း မွှေထားတာ ဆိုဖာတွေကိုလည်း ဖြဲပြီးရှာထားတယ်”လို့ နီးစပ်သူတွေဆီက သိရပါတယ်။
ဦးစိုးဌေးရဲ့သားဟာ delivery service လုပ်ငန်းကိုလုပ်ကိုင်နေတာဖြစ်ပြီး ရုံးမှာ ညဘက် လာအိပ်တဲ့ဝန်ထမ်းတချို့နဲ့ သူငယ်ချင်းတွေဖမ်းဆီးခံထားရတာ ၅ ရက်လောက်ရှိနေပြီး ဘာကြောင့်ဖမ်းထားတယ်ဆိုတာကို မသိရသေးပါဘူး။
စစ်ကောင်စီဟာ မိုးကုတ်သပိတ်ခေါင်းဆောင်ဦးစိုးဌေးကို ပုဒ်မ ၅၀၅ (က)နဲ့ ဝရမ်းထုတ်ထားပြီး ဖမ်းမမိတာကြောင့် ဇနီးနဲ့ သမီးကိုဓားစာခံအဖြစ် ဖမ်းဆီးပြီး ထောင် ၃ နှစ်ချထားပါတယ်။