လတ်တလော စစ်အာဏာသိမ်းမှုတွေ၊ ကိုဗစ်-၁၉ ကူးစက်ပျံ့နှံ့မှုတွေနဲ့ ရင်ဆိုင်နေ ရတာကြောင့် ၂၀၂၁ ခုနှစ် Miss Supranational အလှမယ်ပြိုင်ပွဲမှာ မြန်မာနိုင်ငံက သွားရောက်ယှဉ်ပြိုင်ခြင်းမပြုနိုင်တော့ဘူးလို့ Missosology Myanmar က ထုတ်ပြန်ပါတယ်။

Miss Supranational အလှမယ်ပြိုင်ပွဲတွေကို ပြီးခဲ့တဲ့ ၂၀၀၉ ခုနှစ်က ပိုလန်နိုင်ငံမှာ စတင်ကျင်းပလာခဲ့တာဖြစ်ပြီး မနှစ်က ၂၀၂၀ ပြည့်နှစ်မှာတော့ ကိုဗစ်-၁၉ ကပ်ဘေးကြောင့် မကျင်းပဖြစ်ခဲ့ပါဘူး။

ပိုလန်အခြေစိုက် Miss Supranational Beauty Pageant ပြိုင်ပွဲတွေမှာတော့ မြန်မာနိုင်ငံ ကိုယ်စားပြုအလှမယ်တွေအနေနဲ့ ၂၀၁၃ ခုနှစ်ကစတင်ကာ ဆက်တိုက်ပါဝင် ယှဉ်ပြိုင်ခဲ့ဖူးပြီး ဆုတွေလည်း ရရှိခဲ့ကြဖူးပါတယ်။

၂၀၁၃ ခုနှစ်က မြန်မာကိုယ်စားပြုအလှမယ်အဖြစ် ခင်ဝင့်ဝါကို စေလွှတ်ခဲ့ပြီး သူဟာ နိုင်ငံတကာအလှမယ်တွေကြား Top 20 အဆင့်ထိ တက်လှမ်းနိုင်ခဲ့ကာ Miss Internet award ၊ Face of Miss Supranational by Missosology & People Choice award ၊ Most Beautiful Woman in the world by Belarus website ၊ Miss Grand Slam Popularity ၊ 3rd of Miss Grand Slam by Global Beauties စတဲ့ ဆုတွေ ရရှိခဲ့ပါတယ်။

အဲဒီနောက် ၂၀၁၄ ခုနှစ်မှာတော့ အလှမယ် ဟန်တီက သွားရောက်ယှဉ်ပြိုင်ခဲ့ပြီး Top 10 အဆင့်ထိ ရောက်ရှိခဲ့ကာ Miss Asia & Oceania winner ၊ Miss Internet award ၊ Beauty Concept by most beautiful girl Top 5 ဆုတွေ ရရှိခဲ့တာပါ။

ကချင်အလှမယ် L ဘောက်နူးကတော့ ၂၀၁၅ ခုနှစ်မှာ မြန်မာကိုယ်စားပြု အလှမယ်အဖြစ် ဝင်ရောက်ယှဉ်ပြိုင်ခဲ့ပြီး Top 20  အဆင့်ထိ ပါဝင်ခဲ့ကာ Miss Internet award ၊ Best Evening Gown winner award ၊ Best Interview Top 3 ဆုတွေ ရရှိခဲ့တာ ဖြစ်ပါတယ်။

၂၀၁၆ ခုနှစ်မှာတော့ မြန်မာအလှမယ် ဆွေဇင်ထက်က Top 10 အဆင့်ထိ ပါဝင်ခဲ့ ပြီး Miss Personality award ၊ Miss Grand Slam Top 50 by Global Beauties ဆုတွေ ရရှိထားပါတယ်။

အဲဒီနောက် ၂၀၁၇ ခုနှစ်မှာတော့ အလှမယ် ရွှေမှူးဟန်၊ ၂၀၁၈ ခုနှစ်မှာ အလှမယ် ရွှေအိမ်စည်နဲ့ ၂၀၁၉ ခုနှစ်မှာတော့ အလှမယ် အိမ့်မြတ်ချယ်တို့က အသီးသီး ဝင်ရောက် ယှဉ်ပြိုင်ခဲ့ကြတာ ဖြစ်ပါတယ်။

လတ်တလောမှာတော့ မြန်မာနိုင်ငံမှာ မတရားအာဏာသိမ်းကာလ ၆ လနီးပါးရှိ လာနေခဲ့ပြီး ကိုဗစ်-၁၉ တတိယလှိုင်း ကူးစက်မှုတွေ၊ သေဆုံးမှုတွေလည်း မြင့်တက်လာနေခဲ့တာမို့ အခုနှစ်ရဲ့ Miss Supranational အလှမယ်ပြိုင်ပွဲကို စေလွှတ်နိုင်ခြင်း မရှိတော့ပါဘူး။