ကယားပြည်နယ်၊ ဒီးမော့ဆိုမြို့နယ်မှာ ဒီနေ့ ဇွန်လ ၁ ရက်နေ့မှာလည်း စစ်ကောင်စီဘက်က စစ်ရဟတ်ယာဉ်တွေနဲ့ လေကြောင်းကနေ ထပ်မံလာရောက်ပစ်ခတ်နေတယ်လို့ ဒေသခံတွေက ပြောပါတယ်။
"ဒီနေ့ ဒီးမော့ဆိုကို ရဟတ်ယာဉ်နဲ့ လာပစ်တယ်။ လွိုင်ကော်ဘက်ကလည်း လက်နက်ကြီးနဲ့ထုတယ်။ ဖားဆောင်းဘက်မှာလည်း ပြည်သူတွေပြေးနေကြရတယ်။ ပြေးတဲ့သူတွေကတော့ပြန့်ကျဲနေတယ်။ ရွာတွေမှာလည်း လူမရှိတော့ဘူး" လို့ ဒေသခံတယောက်က ပြောပါတယ်။
မနေ့ နေ့လယ် ၁ နာရီလောက်က ဒီးမော့ဆိုမြို့နယ် ကုန်းသာရွာဘက်ကို စစ်ကောင်စီ တပ်သား ၁၅၀ လောက် ချီတက်လာလို့ ပြန်ခုခံတိုက်ခိုက်ရာမှာ စစ်ကောင်စီဘက်က ၈၀ ထက်မနည်း သေဆုံးခဲ့တယ်လို့ ကရင်နီပြည် ကာကွယ်ရေးတပ်ဖွဲ့ (KNDF) က ထုတ်ပြန်ပါတယ်။
KNDF က အင်အားတွေ စုစည်းထားနိုင်တဲ့အပြင် လက်နက်တွေလည်း ပြင်ဆင်ထားနိုင်တာ ကြောင့် အခုလို ခုခံနိုင်ခဲ့တာလို့ ဆိုပါတယ်။
မနေ့ကတိုက်ပွဲမှာ စစ်ကောင်စီဘက်က ရဟတ်ယာဉ်တွေ၊ တိုက်လေယာဉ်တွေ၊ လက်နက်ကြီးတွေနဲ့ ပစ်ကူခဲ့ပြီး KNDF တပ်သား ၁ ယောက်ကျဆုံး၊ ၆ ယောက် ဒဏ်ရာရခဲ့သလို လေကြောင်းကနေ ပစ်ခတ်လို့ ရွာသားတယောက်လည်း သေဆုံးခဲ့ပါတယ်။
ပြီးတော့ KNDF ဟာ ကုန်းသာရွာကနေ ဆုတ်ခွာခဲ့ပြီး လက်နက်ကြီး ပစ်ကူနေတဲ့ ဖယ်ခုံနဲ့ လွိုင်ကော်ကို ထိုးစစ်ဆင်ဖို့ ကြိုးပမ်းတာကြောင့် နေရာအနှံ့တိုက်ပွဲတွေဖြစ်နေတယ် လို့လည်း ဆိုပါတယ်။
လွိုင်ကော်မြို့ပေါ်မှာတော့ ဒီရက်ပိုင်း တိုက်ခိုက်တာတွေမရှိပေမဲ့ လူတွေကတော့ ဆက်လက်တိမ်းရှောင်နေတုန်းဖြစ်ပါတယ်။
“ဒီမနက်က မြို့ထဲမှာ ဗုံး ၃၊ ၄ လုံး ကွဲတယ်။ ထိခိုက်ဒဏ်ရာရတာကတော့ မကြားသေးဘူး။ မြို့ပေါ်ကနေ တောဘက်ကိုရှောင်တာက တရက်ထက်တရက် ပိုများလာတယ်။ မြို့ပေါ်မှာ လူက တ၀က်လောက်ပဲ ကျန်တယ်” လို့ ဒေသခံတယောက်က ပြောပါတယ်။
ကယားပြည်နယ်ထဲမှာ အကြမ်းဖက်စစ်တပ်နဲ့ ဒေသခံ ပြည်သူ့ကာကွယ်ရေးတပ်တွေအကြား တိုက်ပွဲတွေပြင်းထန်ဖြစ်ပွားနေတာ သီတင်းတပတ်ကျော်လာပြီဖြစ်ပြီး စစ်ဘေးရှောင်ပြည်သူ သောင်းနဲ့ချီပြီး နေအိမ်တွေကိုစွန့်ခွာ ထွက်ပြေးတိမ်းရှောင်နေကြရပါတယ်။