တွံတေးမြို့ကိုရောက်နေတဲ့ စစ်ကောင်စီတပ်သားတွေထဲက ရေတပ်သား ၂ ယောက်ဟာ စစ်ကောင်စီလက်အောက်မှာ အမှုမထမ်းချင်တော့တာကြောင့် အာဏာဖီဆန်ရေး လှုပ်ရှားမှု CDM ပြုလုပ်လာကြပါတယ်။
သူတို့ကို မနေ့က အောင်အောင်မြင်မြင်ခေါ်ထုတ်လာနိုင်ပြီး ထိန်းသိမ်းထားတယ်လို့ တွံတေးပြည်သူ့ကာကွယ်ရေးတပ်ဖွဲ့က ပြောပါတယ်။
ကိုယ်ပိုင်အမှတ် ရေ-၄၉၆၉၀ တပ်သား မင်းသီဟကျော်နဲ့ ရေ ၄၉၇၀၀ တပ်သား ဆလိုင်းအေးချမ်းအောင်တို့ဖြစ်ပြီး ဧရာဝတီရေတပ်စခန်းဌာနချုပ်နဲ့ ရေတပ်ပစ္စည်းထိန်းဌာနတို့က ဖြစ်ပါတယ်။
သူတို့ဟာ တွံတေးမြို့ကို ယာယီပြောင်းလာပြီး အထက ၂ မှာ တပ်စွဲနေတုန်း CDM လုပ်လာတာပါ။
"စစ်တပ်ကမဟုတ်တာတွေ လုပ်နေတဲ့အပေါ် ရွံလာလို့ပါ။ ပြီးတော့ ပြည်သူတွေ ကျနော်တို့ကို ကြည့်တဲ့အကြည့်တွေကလည်း ရွံသလိုတွေ ကြည့်နေတာတွေကြောင့် စစ်တပ်လက်အောက်မှာ ထပ်မနေချင်တော့လို့ပါ။ တပ်ထဲမှာကတော့ အရင်လိုမဟုတ်ဘူး။ ဖြစ်ချင်တိုင်းဖြစ်နေတာ" လို့ သူတို့က ပြောပါတယ်။
တပ်ထဲမှာ အပြင်ကသတင်းတွေကို သေသေချာချာမသိရဘဲ အင်တာနက်သုံးတဲ့အချိန်မှာမှ နည်းနည်း သိရတယ်လို့လည်း ဆိုပါတယ်။