မြိတ်တွင် အကြမ်းဖက်စစ်အုပ်စု ပစ်ခတ်ဖြိုခွင်းမှုကြောင့် ၃ ဦးကျဆုံး၊ ၁၀ ဦး ဒဏ်ရာရ

တနင်္သာရီတိုင်း မြိတ်မြို့မှာ စစ်အာဏာရှင် ဆန့်ကျင်ရေး ဒီနေ့ ဆန္ဒပြသူတွေကို အကြမ်းဖက် စစ်အုပ်စုက ပစ်ခတ်ဖြိုခွင်းမှုကြောင့် အနည်းဆုံး ၃ ယောက် ကျဆုံးပြီး ၁၀ ယောက်လောက် ဒဏ်ရာရတယ်လို့ သိရပါတယ်။

မြိတ်မြို့ ရွှေပြည်သာရပ်ကွက်မှာ ဒီနေ့မွန်းတည့် ၁၂ ခွဲလောက်က တက္ကသိုလ်ကျောင်းသားတွေအပါအဝင် ဆန္ဒပြည်သူ ၂၀၀ လောက်ရဲ့ သပိတ် ပစ်ခတ်ဖြိုခွင်းခံခဲ့ရတယ်လို့ မြိတ်မြို့ခံတဦးက ပြောပါတယ်။

“မြိတ်မြို့ ရွှေပြည်သာရပ်ကွက် သပိတ်ဖြိုခွင်းခံရတဲ့နေရာမှာ ရော်ဘာကျည်ရော ကျည်အစစ်တွေပါသုံးတာ။ အနည်းဆုံး ၃ ယောက်ဆုံးသွားတယ်။ ဦးခေါင်းမှာ ၁ ယောက် ထိတယ်၊ ဝမ်းဗိုက်မှာ ၁ ယောက်ထိတယ်။ နောက်တယောက်က အိမ်ထဲမှာနေတဲ့ အသက် ၃၂ နှစ်အရွယ်အမျိုးသမီး ၁ ယောက်လည်း သေနတ်ထိမှန် သေဆုံးသွားတယ်။”

အကြမ်းဖက် စစ်တပ်နဲ့ရပ်တပ်ဖွဲ့က ပစ်ခတ်ဖြိုခွင်းခဲ့ပြီးနောက် ဆိုင်ကယ်နဲ့ သပိတ်မှောက်တဲ့လူတွေကိုလည်း သေနတ်နဲ့ လိုက်လံပစ်ခတ်ခဲ့တယ်လို့ မြို့ခံက ပြောပါတယ်။

“၂ နာရီလောက်မှာပေါ့ ဆိုင်ကယ်နဲ့ သပိတ်မှောက်တဲ့အုပ်စုက လုံခြုံရေးတပ်ကို ဒီဘက်ခြမ်းပြန်မျှားခေါ်လာတယ်။ အဲဒီမှာ လုံခြုံရေးတပ်ဖွဲ့က ဆိုင်ကယ်တွေနဲ့ လိုက်ပစ်တာ၊ လမ်းကြိုလမ်းကြားတွေ ရက်ကွက်ထဲထိ လိုက်ပစ်တယ်။ တဖက်က ဆိုင်ကယ်တွေနဲ့ ပြေးတာ။ အဲ မှာ ၆ ယောက်ဒဏ်ရာရတယ်၊ စုစုပေါင်းဆို ၁၀ ယောက် ဒဏ်ရာရတယ်။”

ဒီနေ့ မြိတ်မြို့ ဆန္ဒပြပွဲကို အကြမ်းဖက် စစ်တပ်နဲ့ရဲတပ်ဖွဲ့ အင်အား ၁၀၀ ကျော်လောက်နဲ့ ဖြိုခွင်းခဲ့တာလို့ သိရပါတယ်။

ဒီနေ့ ကျဆုံးသွားသူ ၃ ယောက်ထဲက ၁ ယောက်ကိုတော့ စစ်တပ်နဲ့ ရဲက သယ်ဆောင်သွားတယ်လို့ မြိတ်မြို့ဒေသခံက ပြောပါတယ်။

တနင်္သာရီတိုင်း ထားဝယ်မြို့မှာလည်း ဒီနေ့မနက် ၁၀ နာရီဝန်းကျင်လောက်မှာ အကြမ်းဖက်စစ်တပ်နဲ့ရဲက လိုက်လံပစ်ခတ်ခဲ့တာကြောင့် ၁ ဦး ဒဏ်ရာရခဲ့တယ်လို့ ဆန္ဒပြ တက္ကသိုလ်ကျောင်းသား ၁ ဦးက ပြောပါတယ်။

“ထားဝယ် ကြက်စားပြင်မှာ တယောက် သေနတ်ကျည်ဆန်ထိသွားတယ်။ ခြေသလုံးမှာ အရေးပေါ်ကားနဲ့ ထားဝယ်ဆေးရုံကြီး သယ်သွားတယ်။ ဆန္ဒပြတာမဟုတ်ဘူး၊ ဒီအတိုင်း စစ်တပ်နဲ့ရဲက ဝင်ပစ်တာ” လို့ ပြောပါတယ်။

ထားဝယ်မြို့မှာ စစ်အာဏာရှင်အလိုမရှိကြောင်း ဆန္ဒပြပွဲတွေကို နေ့စဉ်လိုလို ပြုလုပ်နေကြပြီး ဒီနေ့ညနေပိုင်းမှာလည်း ဆန္ဒပြခဲ့ကြပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up