လတ်တလော နိုင်ငံနဲ့အဝှမ်း ဆင်နွှဲနေကြတဲ့ စစ်အာဏာသိမ်းမှုဆန့်ကျင်ရေး လူ ထုလှုပ်ရှားမှုမှာ ပါဝင်နေကြတဲ့ ပြည်သူတွေအတွက် ၈၈ ကျောင်းသားခေါင်းဆောင် မင်း ကိုနိုင်က ကိုယ်တိုင်ရေးကဗျာတပုဒ်ကို ရွတ်ပြပြီး စိတ်ခွန်အားပေးလိုက်ပါတယ်။
လက်ရှိမြန်မာနိုင်ငံတဝန်းမှာ ဖြစ်ပွားနေတဲ့ စစ်အာဏာသိမ်းမှုဆန့်ကျင်ရေး လူထု လှုပ်ရှားမှုဟာ အရှိန်အဟုန်မြင့်တက်နေပြီး ပြည်သူ့ဝန်ထမ်းတွေရဲ့ အာဏာဖီဆန်ရေး လှုပ်ရှားမှု(CDM)ဟာလည်း တစထက်တစ ပိုမိုအားကောင်းလာနေတာ ဖြစ်ပါတယ်။
"ငါတို့အားလုံးတခုထဲ"
================
ကင်မရာတွေရှေ့
ဗိုက်ဖုံးအင်္ကျီလှန်ပြလိုက်တာ
အဲဒီမိန်းမရွယ်ရဲ့ ဗိုက်သားမဟုတ်ဖူး
"အနာဂါတ်ကြီး"ဗျ
နေ့စေ့ လစေ့ အနာဂါတ်ကြီး
"မဖျက်ဆီးနဲ့
အညွှန့်မချိုးနဲ့ "လို့ ပြောနေတာ
အိုက်တင်ကောင်းလို့
သရုပ်ဆောင်နေတာမဟုတ်ဘူး
ပလက်ဖောင်းပေါ်လက်အုပ်ချီရင်း
စီးကျလာတဲ့ မျက်ရည်တွေက
စာနာဖို့ ဆင်ခြင်ဖို့
နံရံကို မှုတ်ဆေးနဲ့
လက်ဆော့နေတာမဟုတ်ဘူး
ငယ်သူအိပ်မက် အပျက်မခံ ပန်းချီမှာ
လွတ်လပ်ခြင်းရဲ့ ဒရမ်တွေ"ထမြည်"နေတာ
အိုးခွက်ပန်းကန်တွေကို
ထုရိုက်နေတာ မဟုတ်ဘူး
ကျင့်ဝတ်မဲ့မကောင်းဆိုးရွားတွေကို
မောင်းထုတ်နေတာ
ဘဏ်ဖယ်ရီက သူ့ရှေ့လမ်းပေါ်
ပစ်ခင်းချလိုက်တဲ့ နှလုံးသားတွေရှေ့
ကျွီ"ကနဲ ဘရိတ်အုပ်လိုက်တော့
အနင်းကျိတ်ခံဖို့ ရွေးထားတဲ့
လူသားစင်စစ် ဧကန်ဖြစ်တွေကိုတွေ့ရတယ်
မီးပွိုင့်မှာ
စက်သေကုန်တဲ့ကားတွေ ရှေ့
ရင်ကျပ်လာလို့ တုံးလုံးရပ်လိုက်ရတဲ့
လူသားတွေ
အို...ကမ္ဘာကြီးရဲ့....
လေထဲဝဲပျံနေတဲ့ ဓါတ်ပုံတွေကြည့်လိုက်ပါ
ယုံကြည်ရာပိုစတာကိုယ်စီနဲ့
လမ်းကူးလာတဲ့ လူအိုစုံတွဲလည်းပါတယ်
သံပုံးတီးရင်း ငိုမဲ့မဲ့ အဒေါ်ကြီးလည်း
ပါတယ်
ဝှီးချဲပေါ်က အံကြိတ်နေတဲ့ ဖခင်အို
ဘုရားစင်ရှေ့ သစ္စာဆိုနေတဲ့ မိခင်အို နဲ့
အင်ဂျင်နီယာမှာလည်း သူ့တန်ဖိုးနဲ့
အထည်ချုပ်သမလေးလည်း သူ့တန်ဖိုးနဲ့
စတီယာရင်ကိုင်သော လက်တွေ
မြေဖြူကိုင်သော လက်တွေ
ခေတ်လမ်းနံရံမှာ ကာတွန်းတကွက်
ကဗျာတကြောင်း၊ ပန်းချီတချပ်၊
ဆေးထိုးအပ်နဲ့၊ ကီးဘုတ်ဖိုက်တာများ.....
အားလုံး.....စက်ခေါင်းမောင်းသမား
ဒီလမ်းပေါ်မှာ အခုတော့
ကျောင်းတော်က ရန်စတွေတောင်
ယောက်ဖရေ သားရီးရေ ပြန်ခေါ်လို့
ဘုရားကျောင်းရှေ့ ချပ်ဂျ်ကျောင်းရှေ့
ဗလီရှေ့မှာ အားလုံးအတူ
ချီတက်သူတွေစားပြီးမှ
အမောပြေ အလကားကျွေးတာပါလို့
ပြောသွားတဲ့ ဖရဲသီးသည်လေးကအစ.....
ငါတို့အားလုံး 'တခုချင်းစီ'ကနေ
ငါတို့အားလုံး "တခုထဲ"ဖြစ်သွားတဲ့အခါ
ငါတို့ဟာ
နိုင်မြင်းကို ရွေးလောင်းသူတွေ မဟုတ်
ကိုယ်တိုင်ပန်းဝင်တဲ့ နိုင်မြင်းအဖြစ်
ကိုယ်တိုင် ကဆုန်ဆိုင်းပြေးနေကြတာ။
#မင်းကိုနိုင်
၁၉.၂.၂၀၂၁
မင်းကိုနိုင်ကိုတော့ မြန်မာ့ဒီမိုကရေစီရေးအတွက် ၁၉၈၈ ခုနှစ် လူထုအုံကြွမှုတွေ မှာ ကျောင်းသားခေါင်းဆောင် အဖြစ်နဲ့ စတင်ပါဝင် လှုပ်ရှားလာခဲ့သူတယောက်အနေနဲ့ အားလုံးက သိကြမှာဖြစ်ပြီး သူ့ရဲ့ ဘဝအချိန် အတော်များများကိုလည်း အကျဉ်းထောင် ထဲမှာပဲ ကုန်ဆုံးခဲ့ရတာ ဖြစ်ပါတယ်။
အသက် ၅၈ နှစ်အရွယ်ရှိနေပြီဖြစ်တဲ့ မင်းကိုနိုင်ရဲ့ နာမည်ရင်းကတော့ ပေါ်ဦးထွန်း ဖြစ်ပြီး ဖြတ်သန်းခဲ့တဲ့ ကာလတလျှောက် နိုင်ငံရေးလှုပ်ရှားမှုတွေအပြင် သူ့ရဲ့ အခြားတ ဖက်စာမျက်နှာက အနုပညာအရည်အသွေးတွေကိုလည်း ပြသနိုင်ခဲ့သူ ဖြစ်ပါတယ်။
သူ့ရဲ့အသက် ၄၇ နှစ်ပြည့် မွေးနေ့မှာ ထုတ်ဝေခဲ့တဲ့ “နောက်ကြည့်မှန်”ဝတ္ထုက တော့ မင်းကိုနိုင်ရဲ့ ထင်ရှားတဲ့ စာအုပ်တအုပ် ဖြစ်ခဲ့ပါတယ်။
ရှစ်လေးလုံးနောက်ခံ ဇာတ်အိမ်တည်ထားခဲ့တဲ့ ဒီဝတ္ထုထဲမှာတော့ အဲဒီခေတ်က အခြေအနေ၊ ဇာတ်ကောင်စရိုက်အဖွဲ့အနွွဲ့တွေနဲ့အတူ သုတ၊ ရသဟန်ချက်ညီညီ ရေးဖွဲ့ ထားခဲ့တဲ့ သမိုင်းနောက်ခံဝတ္ထုတပုဒ် ဖြစ်ပါတယ်။
မင်းကိုနိုင်ရဲ့ နောက်ထပ်ထင်ရှားတဲ့ စာအုပ်တချို့ကတော့ ကောက်နွယ်ကနောင် ပြုံးချိုဖတ်ဖို့ကဗျာ(မင်းကိုနိုင်၊နောင်ကျော်၊ပြုံးချို)၊ ထာဝရအောင်လံ၊ လူငယ်နှင့် လွပ်လပ် မှုတန်ဖိုး၊ တောဘူတာရုံကလေးအတွက်ဥသြသံ၊ မောင်ပေါ်ထူးနှင့်မသံသာ၊ တရားခံ စံပယ်ပင်နှင့်အပေါင်းအပါကဗျာများ၊ ဖိနပ်ဟောင်းရဖို့ သေနတ်ပြောင်းဝသို့ ပြန်မ ရောက်စေချင်နှင့်...စာစုများ၊ သူကြီးသားမက်၏သူငယ်ချင်း၊ ကျေးဇူးတင်ပါသည်စတဲ့ စာအုပ်တွေ ဖြစ်ပါတယ်။
ခုလတ်တလောမှာတော့ မင်းကိုနိုင်ဟာ အာဏာဖီဆန်ရေးလူထုလှုပ်ရှားမှုတွေမှာ ဦးဆောင်ပါဝင်နေတာကို တွေ့ရပါတယ်။