စစ်ကိုင်းတိုင်း၊ ဘုတလင်မြို့က မြန်မာ့စီးပွားရေးဘဏ်ကို ဖေဖော်ဝါရီ ၁၅ ရက်နေ့ နေ့လယ်က စစ်တပ်ကားတစ်စင်း ရောက်ရှိလာပြီး သံသေတ္တာတွေနဲ့ သယ်ထုတ်သွားတယ်လို့ မြို့ခံတွေက ပြောပါတယ်။
ဘဏ်အတွင်းမှ သယ်ထုတ်လာတဲ့ သံသေတ္တာတွေကို တပ်သားတွေက ကားပေါ်သို့ သယ်ဆောင်နေတာကို တွေ့ရတယ်လို့လည်း ဒေသခံတစ်ဦးကပြောပါတယ်။
“အတွင်းထဲကနေ သံသေတ္တာနဲ့ ဘာတွေသယ်နေကြလဲဆိုတာတော့ မသိရဘူး။ ကျနော့်အထင်ကတော့ ပိုက်ဆံလို့ ယူဆရတယ်။ ဒေသခံပြည်သူတွေကိုတော့ ညနေ ၄ နာရီအထိ ငွေလာထုတ်ခွင့်ပြုပေးထားတယ်။ အဲ့ဒီ ၄ နာရီနောက်ပိုင်းတော့ ကျန်ငွေတွေကို ဘာလုပ်မလဲ မသိရသေးဘူး။ အခုလည်း သူတို့ ရှိနေတုန်းပဲ” လို့ ပြောပါတယ်။
ဘုတလင်မြို့က CB ဘဏ်မှာလည်း စစ်တပ် ရောက်ရှိနေတာကို တွေ့ရတယ်လို့ မြို့ဒေသခံတွေက ပြောပါတယ်။
ဒီနေ့မနက် ရန်ကုန်မှာလည်း စစ်တပ်ကနေ မြန်မာ့စီးပွားရေးဘဏ် (၁) နဲ့ (၂) တွေမှ ငွေထုတ်ယူသွားတာတွေရှိနေသလို ဧရာဝတီတိုင်း မြောင်းမြမြို့က မြန်မာ့စီးပွားရေးဘဏ်ကိုလည်း ဝင်ရောက်စီးနင်းတာတွေလည်း ရှိနေပါတယ်။